Te Bildad la lerege Yob yeti, Wane ma'an te ho wan go'e yetɔgɔbɔna wa?
8
1 Te Suah teŋa boraa Bildad la lerege Yob yeti, 2 Wane ma'an te ho wan go'e yetɔgɔbɔna wa? Ho yetɔgom la woo dela sabeeo. 3 Yenɛ gu'ure sɛla n nare mɛ? Bii Gaŋɛ Zan'an Yenɛ wa gu'ure boorɔ baha mɛ? 4 Ho kɔma la han tom be'em a nɛŋan, a bo ba la ba be'em la yɔɔrɛ. 5 La dela ho ɛ Yenɛ, la ho sohɛ ninbɔn'zɔrɛ Gaŋɛ Zan'an Yenɛ wa zen'an. 6 Te ho han seren ka tara dɛngerɔ ho poan ge dɛna la tontɔɔ nɛra, Yenɛ mɛŋa wan sɔe tare ho sɛla woo lebe la bɔŋa zen'an na bo ho. 7 Te hom daa pɔhɛ se'em peka peka la, ho wan lebege kantɛ dabeha wa poan.8 Behɛ saŋa se'ehe la se buuri n tole ha la, ge behɛ ho yaabdoma n yuun nyɛ sɛla. 9 Tomam yeen dɛna la zam kɔma. To ka mi' sɛla, to dabeha teŋa wa zuo ka seke se'ere. 10 Ho han soke ba, ba kan pa'alɛ hɔ ge yele ho yelese'a te bama mɛhe mina te ho bɔkɛ? 11 Kolekatema wan ta'an bɔna zen'an te ko'om ka bɔna bini? Ŋmatehe wan ta'an bɔna zen'an te ko'om kana? 12 Ba han bɔna zen'an te ko'om ka bɔna, te sɛla pon ka ŋmaɛ ba, ba mɛŋa wan ki tɔtɔ gana mɔɔ yoo. 13 Sɛba n ne tamɛ Yenɛ yele te la ana ba se'em n bala. Sɛba n ka zote Yenɛ ge tara potɛn'ɛrɛ te ba wan nyɛ sɛla la wan bahɛ yoo. 14 Ban nam sɛla la ka tare paŋa. Ban dele sɛla la dela paanreŋa yire. 15 Se'em han delom de, de kan zɛ'a, se'em han gin' de, de wan tɔnhegɛ. 16 Sɛba n ka zote Yenɛ ane wo sanbole sonɛ n boe wontɛɛŋa ge nyɛta ko'om, tɛn' na'ma pin' yire zuo se'em la. 17 Ba nyɛga ŋmɛline vila la kuga. Ba boe la taŋkɔnrehe sɛngehen. 18 Ba han ta gbirigera ba, ba bɔŋa zen'an la ne bahɛ ba mɛ te a ka tabelɛ mina ba.
19 Ho nyɛ ya, se'em n ka zote Yenɛ yɔɔrɛ n bala. Lan ete ba se'em n bala. Sanbole han ki deyema en tee yɛhera. 20 Behɛ, Yenɛ kan malom bahɛ nɛra se'em n ka tare tuure, bii a soŋɛ be'emdoma. 21 A ane bala ge wan perɛ ho nɔɔrɛ wa mɛ la yelɔ'ɔrɔ, ge bahɛ te ho nyeem. 22 Valom wan di sɛba n yaɛ hɔ la, ge te be'emdoma yiya la mɛlom.