7
1 Dagɛ namehegɔ ma'an n boe nɛresaaleba zuo teŋparɛ wa zuo? Asaala tone mɛ a vom wa poan wo ligiri tontona n tone se'em la. 2 La ane wo yameŋa n tom taregɛ bɔta vo'ohe se'em la, bii ligiri tontona n tom ba'ahɛ bɔta a yɔɔrɛ se'em la. 3 Mam yɔɔrɛ dela namehe yoo la ninbɔn'ɔn, yu'uŋɔ woo kaara ŋmarehe. 4 N han gan'arɛ, n ne tɛn'ɛha la mam wan ihege se'em ma'an. Yu'uŋɔ la ne yuue mɛ, te mam lɛbegere la bala te beere ta yelegɛ. 5 Zunzunya, la dɛngerɔ ma'an n to'e mam iŋa wa. Mam iŋa wa mɔte la bala tanhera. 6 Mam dabeha la zote la kalam kalam gana wogora n lobere a woka dɔɔ se'em la. Mam dabeha wa wan ba'ahɛ la yore. 7 Mina te mam vom wa dela vo'ohom boyena ma'an. Mam nini kan le nyɛ som. 8 Nini se'e n behere mam wa kan le nyɛ mam. Ya wan beha mam, ge te n ba'ahera. 9 Saa saŋgbanɛ han tole, de tole mɛ. Hom se'em n sige yɔɔ poan kan le dooe na. 10 Ba kan le lebe ba yiya poan na, bii ba tɛnra ba ba zen'enhe la poan.11 Bala zuo, mam kan sina. La wune mam la bala ge te n tɔgɔra. N wan nyɔna la bala n daaŋɔ wa poan. 12 Mam dela ko'kantɛ, bii ko'om poan bonsɛla te ho bahɛ te ba pigira mam? 13 Mam ne han yeti, N gan'arɛ ge n soŋɔ la zuo wan bo mam vo'ohogo, n bongan'ala la zuo wan bogelɛ n suunre, 14 ho ne dekɛ la zaanheŋɔ, la liligere vuunhe mam, 15 te mam han pon pin' n mɛŋa ki, la nyane mam vɔe wa. 16 Mam vom ka le tara vɔnrɛ. N kan vɔna wuuha. Bahɛ mam te n ki, ge n dabeha ka le zaan.
17 Nɛresaaleba dela bem te ba yele pakɛ hom? Ba dela bem te hom potɛn'ɛrɛ bɔna ba poan, 18 te hom behera ba bolika woo ge magaha ba saŋa woo wa? 19 Bahɛ mam te n vo'ohe fiin. N ta'an vole nɔtɔɔnrom. 20 Saaleba behera wa, mam be'em ete ho la bem? Bene te hom dekɛ mam ze'ele dagara mam? Mam dela zeero bo n mɛŋa. 21 Bene te ho ka di suguru bo mam tuure wa, ge saalom n tuure wa bahɛ? La gee fiin la n sige teŋa. Ho wan ɛ mam, ge ho kan le nyɛ mam.