21
1 Te Yehosapat kule paɛ sɔdoma, te ba pin' en la a sɔdoma naba David teŋan, te a dayɔa Yehoram sɔe a na'arɛ dɛna naba. 2 Yehoram wa sɔɔnrɔ bɔna dɛna Yehosapat dayɔɔhe te ba yu'ura yi'ira Azaria, Yehiel, Zekaria, Azariahu, Mikael la Sepatia. Bana zan'an dela Israel naba Yehosapat dayɔɔhe. 3 Ba sɔ Yehosapat bo ba la bo'olom kekeko n de sanlenpeelega, sanlema la lɔgɔrɔ n tare tebehom, ge bo ba teŋhe n boe Yuda teŋhe poan te dangɔɔma mɛ kae se, ge a dekɛ sɔ'ɔlom la bo la Yehoram n de a dayɔkeema la.Yehoram n sɔe a sɔ na'arɛ to'e sɔ'ɔlom la zin'ire ba'ahɛ la
4 Yehoram n sɔe a sɔ na'arɛ to'e sɔ'ɔlom la zin'ire ba'ahɛ la, a ko a yebehe la mɛ zan'an, la Israel keendoma basɛba. 5 Yehoram wa dela yuuma pihitan' la ayi' ge di na'am la, zin'ire na'am gɔŋɔ la zuo yuuma anii Yerusalem poan. 6 A dole Israel teŋa nadoma sɔya wo Ahab yiredoma eta la. Te a pɔga pon dɛna la Ahab pɔyɔa. Te a tona be'em Na'ayenɛ nɛŋan. 7 Ge la bala zan'an, Na'ayenɛ ka maahom te a sagom naba David yire wa doohe la a nɔbiŋere se'ere te a biŋe la naba David te a yire na'am la kan tara ba'ahegɔ la zuo.
8 Yehoram saŋa poan te Edom teŋa yehe ba mɛŋa Yuda nu'uhen, ge bobe ba mɛŋa naba te a sɔna ba behera. 9 Te Yehoram ihege yakɛ ha la a zaba nɛŋadoma, la a zaba toroto, te yu'uŋɔ te a ihege dama ko Edomdoma wa n kae en la a zaba nɛŋadoma la, la a zaba toroto la mum la. 10 Edom n yehe se'em n bala wa'ana paɛ zina. Saŋkaŋa mea poan te Libnadoma me yehe a nu'uhen doohe la enŋa n zagahɛ Na'ayenɛ n de a sɔdoma Yenɛ la zuo. 11 Se'ere n pa'ahɛ dela, a mɛ la bimbina Yuda zɔya la zuto, bahɛ te Yerusalem nɛreba tona yalomtooma se poan, ge bahɛ te Yudadoma bɔregɛ.
12 Te nɔtɔgɔha Eliya golehɛ gɔŋɔ bo Yehoram na yeti, Na'ayenɛ n de ho sɔ David Yenɛ la yeti, Doohe la hom ka dole ho sɔ Yehosapat sore la, ka doohe Yuda teŋa naba Asa sore la, 13 ge ton nɛ la Israel nadoma la na'taka, bahɛ te Yuda la Yerusalemdoma tom yalomtooma wo Ahab yiredoma n yaale se'em la, la hom ko ho sɔɔnrɔ la n de ho mɛŋa nɛreba nyana ho la, 14 behɛ, Na'ayenɛ yeti a ŋmɛ' la ho mɛŋa nɛreba la nɔyalegerɛ. Ho dayɔɔhe, ho pɔgɔba la ho lɔgɔrɔ zan'an. 15 Ho mɛŋa wan bɛn' poorɛ ban'an te ka tara ho daarɛ woo te ho nyɔɔrɔ ta foe yehe na.
16 Te Na'ayenɛ gbirige Pilistidoma la Arabdoma sɛba n beem la Kusdoma la, te ba suunre ihege la Yehoram, 17 te ba wa'ana zabɛ la Yuda, sagom ka poan vaɛ sɛla woo n boe Naba yire la poan, la a dayɔɔhe la a pɔgɔba, te sɛla ka gee han dagana a dayɔbila Yehoahaz ma'an. 18 Te wana woo tole, te Na'ayenɛ ŋmɛ' en la puurɛ ban'an n ka tare tebegɔ. 19 Te la yuura yuura ta paɛ yuuma ayi' ba'ahegɔ poan, te a yɔɔrɔ foe yehe na, te a ki la iŋduma n ka tare makerɛ. Te a nɛreba la ka nyɔ' zutebehom bugum bo en woo ban nyɔ' bo a sɔdoma se'em la.
20 Yehoram dela yuuma pihitan' la ayi' ge di na'am la. A zin'ire a na'am gɔŋɔ zuo la yuuma anii Yerusalem poan ge ki, te se'em ka kele. Te ba pin' en David teŋa la poan a tɔka ge dagɛ nadoma yɔɔrɔ la poan.