Yerusalemdoma bobe Yehoram dayɔbila Ahazia na'am
22
1 Te Yerusalemdoma bobe Yehoram dayɔbila Ahazia na'am. Se'ere n sɔe la Arab nɛreba la n wa'ana la ko Yehoram dayɔkeendoma la zan'an mɛ. Te a dayɔa Ahazia dɛna Yuda naba, pɔhɛ teŋa la behega. 2 Ahazia dela yuuma pihiyi' la ayi' ge di na'am la, behe teŋa la yuunɛ deyena ma'an Yerusalem poan. A ma yu'urɛ dela Ataliah, dɛna Omri yaaŋa. 3 Te Ahazia me nɛ Ahab yire etegɔ la nataka, te a ma dɛna a kan'ana, kan'ana en te a tona toonfɛn'ɛha. 4 Te a tona toonfɛn'ɛha Na'ayenɛ nɛŋan wo Ahab yire etegɔ la. Se'ere n sɔe la, a sɔ n ki ge bahɛ en la, bama n kan'ane en sagaŋɔ sore poan ta sagom en. 5 A dole la bama kan'aŋɔ mea, ta doohe la Ahab dayɔa Yoram n de Israel naba la keŋɛ pɛɛntɛɛnrɛ te ba zabɛ la Aram teŋa naba Hazael, Aramot Gilead teŋa poan. Bilam te Aramdoma wa pɔgɔlom Yehoram. 6 Te a lebe Yezreel teŋa na te a tebɛ pɔgɔloŋɔ la te ba pɔgɔlom en enŋa n keŋɛ Aramah teŋa ta zabera la Aram teŋa naba Hazael la. Te Yehoram dayɔa Ahazia n de Yuda naba wa sige Yezreel teŋa, te a ta behɛ Ahab dayɔa Yoram n pɔgɔlom la.7 Ahazia sagaŋɔ la ze'ele la Na'ayenɛ mɛŋa zen'an na, la enŋa n keŋɛ Yoram zen'an la. Dagɛ n keŋɛ a zen'an la ma'an, ge a ta naɛ mɛ la en te ba zabɛ la Nimsi dayɔa Yehu, se'em te Na'ayenɛ bo ba paŋa te ba sagom Ahab yiredoma zan'an la. 8 Te la ta wa'ana te Yehu n ta wa'ana te a sagom Ahab yire bahɛ la, a nyɛ la Yuda nabiihe sese'ehe n de Ahazia sɔɔnrɔ kɔma n de Ahazia yamehe, te Yehu ko ba zan'an. 9 Te Yehu ɛ Ahazia, ta nyɛ en te a sugɛ la Samaria teŋa, te ba tare en na bo Yehu te a ko' en. Ge nɛreba la ton pin' Ahazia mɛ te a dela naba Yehosapat dayɔa sɛka n eere Na'ayenɛ la suunre zan'an. Ban ko Ahazia la, nɛra ka le yee Ahazia yire la poan wan tara sɔ'ɔlom la na'am la.
Yehoseba le'ehɛ nyɔkɛ Ahazia dayɔbila Yoas sogɛ bia wa la ka pɔgɔsɔɔ deo poan
10 Ahazia ma Ataliah n nyɛ te a dayɔa la ki ya la, te a me vaɛ ihege doohe ko' Yuda nabiihe la zan'an. 11 Ge te naba pɔyɔa Yehoseba le'ehɛ nyɔkɛ Ahazia dayɔbila Yoas naba kɔma la poan ta sogɛ bia wa la ka pɔgɔsɔɔ deo poan. Naba Yehoram pɔyɔa Yehoseba wa n de malemadaana Yehoiada pɔga wa n sogɛ bia wa te Ataliah da nyaŋɛ ko ka se'em n bala. (Yehoseba wa dela Ahazia tanya). 12 Ba sogɛ bia wa mɛ te ka bɔna la malemadoma Yenɛ yire la poan yuuma ayoobe, ge te Ataliah sɔe teŋa la dɛna naba.