<<    <     2 Yelebiŋ'a     20     >    >> 
Ba ze'ele la Edom teŋa na te ba zabɛ la hɔ
20
1 Yele ana wa n tole la, te la bɔna bɔna te Moabdoma la Ammondoma la Meundoma ta wa'ana te ba zabɛ la Yehosapat. 2 Te nɛreba basɛba wa'ana yele Yehosapat yeti, Pɛɛntɛɛnreba n ze'ele Ko'kantɛ wa yakenɛ na. Ba ze'ele la Edom teŋa na te ba zabɛ la hɔ. Behɛ, ba tiihom la Hazazon Tamar ha. (En Gedi teŋa n bala). 3 Te Yehosapat paleŋa ɛnkɛ, te a ŋmɛregɛ a potɛn'ɛrɛ te a ɛ Na'ayenɛ, ge soolom Yudadoma woo zagahɛ ba mɛhe. 4 Te Yuda zan'an lagahɛ na te ba ɛ soŋorɛ Na'ayenɛ zen'an, te nɛreba ze'ele Yuda teŋkanra la zan'an poan na te ba sohɛ Na'ayenɛ.
5 Te Yehosapat ihege ze'ele Yuda la Yerusalem tiiheŋɔ la poan, Na'ayenɛ Yire la poan, zenzaka paalega la pooren, 6 yeti, Na'ayenɛ n de to sɔdoma Yenɛ wa, dagɛ hom sɔe saazuo ha wa? Dagɛ hom de naba teŋhe wa sɔ'ɔlom woo poan? Paŋa la kpe'eŋo boe la hom nu'uhen, te se'em kan ta'an ze'ele la hɔ. 7 Yenɛ, dagɛ hom n dige teŋkana wa nɛreba ka poan ho nɛreba Israeldoma wa nɛŋan ge dekɛ ba bo ho zɔ Abraham yaahe te ka dɛna ba sɔ'ɔlom saŋa woo? 8 Ba boe ka poan mɛ, ta mɛ yire bo hom yu'urɛ la ge yeti, 9 Be'em sebo han yɛ'a to zuo na, dɛna zaberɛ, gankerɛ, too bii kom, to wan ze'ele la yire dena wa nɛŋan hom nɛŋan, ho yu'urɛ n pote de poan la zuo, la to kaahɛ to sunsagaŋɔ la bo ho, te ho kelehe to ge fan' to bahɛ. 10 Nananawa behɛ, Ammon la Moab teŋhe nɛreba, la Seir Zoore la nɛreba la te Israel yuun ze'ele Mizraim yehe na te hom yuun ka sakɛ te Israel sagom ba la. 11 Behɛ bama n leregere to se'em, ba wa'an me na te ba dige tomam ho sɔ'ɔlom la te ho dekɛ bo tomam te bo dɛna to sɔ'ɔlom la poan. 12 Tomam Yenɛ wa, ho kan gankɛ ba? Tomam kan ta'an ze'ele la nɛrekooŋɔ wa n wa'ana te ba zabɛ la to wa, bii to mina tomam n wan eŋɛ se'em. To nini boe la hom poan.
13 Yuda boraahe zan'an daa ze' la Na'ayenɛ nɛŋan la ba bilɛɛhe, ba pɔgɔba, la ba kɔma. 14 Te Na'ayenɛ sea paŋa sige nɛreba la teŋasoka na, Yahaziel zuo na. Yahaziel sɔ n de Zekaria, te enŋa me sɔ dɛna Benaiah, te enŋa me sɔ dɛna Yeiel, te enŋa me sɔ dɛna Mattania n de Levi, te enŋa me sɔ dɛna Asap. 15 Te Yahaziel wa yeti, Yuda zan'an la Yerusalem nɛreba la naba Yehosapat wa, kelehe ya. Na'ayenɛ n yeti ya se'em n wana. Da zote ya dabeem bii ya giinla kɔ'ɔhɛ la nɛrekooŋɔ wa n yeti ba zabɛ la ya wa. Se'ere n sɔe la, zaberɛ la dagɛ yamam denɛ ge Na'ayenɛ zaberɛ. 16 Beere, sige ya paɛ ba. Behɛ, ba yeti ba doohe la Ziz teŋa pɔgɔtia la poan. Ya wan to'ohɛ ba la paberɛ la fehegan na Yeruel pɔgɔtia la nɛŋan na. 17 Ya da dagom nɔŋɛ ya zabɛ zaberɛ dena wa poan, yeen maahom ya mɛhe zɛ'a ge nyɛ Na'ayenɛ n wan zabɛ ya zuo se'em. Yuda la Yerusalem, da zote ya dabeem bii ya giinla kɔ'ɔhɛ. Beere to'ohɛ ya ba ge Na'ayenɛ boe mɛ la ya.
18 Te naba Yehosapat zin'ire teŋa pɔnre na'ma ŋmɛ' nu'po'ɔ, te Yuda la Yerusalem nɛreba la me zan'an zin'ire teŋa ŋmɛ'ɛra nu'po'ɔ bɔ'ɔra Na'ayenɛ, ge na'aha Na'ayenɛ. 19 Te Kohat buuri poan Levidoma la la Kora buuri poan Levidoma la vaɛ ihege la yooma vɔɔla pɛngera Na'ayenɛ Israel Yenɛ la.
20 Te ba ihege bolika yu'uŋyu'uŋɔ sige Tekoa pɔgɔtia la poan ha. Ban yehe na la te Yehosapat ihege ze'ele yele ba yeti, Yuda la Yerusalem nɛreba wa, dekɛ ya mɛhe delom Na'ayenɛ ya Yenɛ la te a sɛ ya ze'ele. Dekɛ ya mɛhe delom a nɔtɔgɔheba la ge ya wan nyaŋɛ. 21 Yehosapat n tɔgɛ la nɛreba la ba'ahɛ la, a yehe la sɛba n yɛ toolom futo yoona ge pɛngera Na'ayenɛ la, te ba tole pɛɛntɛɛnreba la nɛŋan na, te a yele ba yeti, Pɛngɛ ya Na'ayenɛ wa ge a zo'ohogɔ la ka tare ba'ahegɔ. 22 Ban pɔhɛ yoona ge pɛngera la, te Na'ayenɛ damɛ Ammon, Moab la Seir zoore teŋa nɛreba wa n tiihom te ba zabɛ la Yudadoma wa, te ba gbirige, 23 te Ammon la Moabdoma la tuluge zabera la Seir zoore teŋa nɛreba la, sagom ba lipi. Ban sagom bama ba'ahɛ la, ba ŋmɛregɛ mɛ zabɛ sagom ba mɛhe ta ba'ahɛ zan'an.
24 Yudadoma n ta behɛ pɔgɔtia la poan ha, behɛ tɔ nɛrekooŋɔ la n boe ne zen'an la, behɛ, ba nyɛ la kum n ki gan'an te ba ayena me ka loe peɛn. 25 Yehosapat la a nɛreba la n wa'ana te ba vaɛ ban tare ne lɔgɔseto la, ba paɛ na vaɛ lɔgɔrɔ mɛ zo'e la futo, la toolom lɔgɔrɔ pon kan ta'an zi. Ba dekɛ la dabeha atan' vaara lɔgɔrɔ la ma'an. Se'ere n sɔe la to ba' zo'e mɛ. 26 Dabeha anaahe daarɛ te ba tiihom Beraka teŋa, pɛngɛ Na'ayenɛ. Bala n sɔe te ba segɛ zen'an la Beraka la, te ka yu'urɛ n bala la zina. 27 Te Yehosapat bɔna nɛŋa te Yuda la Yerusalem nɛreba la zan'an nya lɛbera na la nyeema. Se'ere n sɔe la, Na'ayenɛ n bo ba nyeema la doohe la enŋa n nyaŋɛ ba diŋdoma la bo ba la. 28 Te ba wa'ana paɛ Yerusalem la kɔnlɔ, duurenhe, la tentana wa'ana kɛn' Na'ayenɛ Yire la poan. 29 Te Yenɛ dabeem kɛn' teŋhe la se sɔ'ɔlom la woo n kae ba la, doohe la ban ta wom te Na'ayenɛ n zaba Israel diŋdoma la bo ba la. 30 Bala te Yehosapat sɔ'ɔlom la bɔna la sunma'ahom. Se'ere n sɔe la, a Yenɛ la bo en la sunma'ahom zen'an woo.
31 Te Yehosapat sɔna Yuda teŋa behera. A wa dɛna la yuuma pihitan' la anuu ge di na'am la, zin'ire a na'am gɔŋɔ zuo yuuma pihiyi' la anuu Yerusalem poan. A ma yu'urɛ n de Azuba, dɛna Silhi pɔyɔa. 32 Yehosapat nɛ la a sɔ Asa nataka dɔla a sɔ sore la ka bɔregɛ de poan, ge tona la sɛla n de ma'an Na'ayenɛ nɛŋan. 33 Ge zɔya zuo kaanbegɔ zen'enhe daa kelom bɔna mɛ. Se'ere n sɔe la nɛreba la nan ka ŋmɛregɛ ba suunre lebe ba sɔdoma Yenɛ la zen'an na.
34 Yehosapat tooma la zan'an, a pɔhega ta paɛ a ba'ahegɔ golehɛ eŋɛ la Hanani dayɔa Yehu golehegɔ la n boe Israel nadoma yɛla gɔŋɔ la poan la.
35 Yele ana wa pooren, te Yuda naba Yehosapat ta naɛ la Israel naba Ahazia n de toonfɛn'ɛhadaana la. 36 A dekɛ a mɛŋa naɛ la en te ba maala la ɔɔnrɔnɔ te to kena Tarsis teŋa. Ba maalɛ ɔɔnrɔnɔ la la Ezion-gebe teŋa. 37 Te Maresa teŋa boraa Dodavahu dayɔa Eliezer porɛ bahɛ naba Yehosapat zuo yeti, Hom dekɛ ho mɛŋa naɛ la Ahazia la, Na'ayenɛ wan sagom ho tooma la. Bala te ɔɔnrɔnɔ la sagom kan ta'an keŋɛ paɛ Tarsis.