La dagɛ hom n de se'em n wan mɛ yire bo' mam
17
1 David n kɛn'ɛra a yire, te a ihege saŋa ka sɛka poan yele nɔtɔgɔha Natan yeti, Mam kɛn'ɛra dɔɔ mɔlɔsonɔ yire poan, ge te Na'ayenɛ nɔbiŋere daka la bɔna sogorɛ poan. 2 Natan lebehe en yeti, Eŋɛ sɛla n boe ho suunren, te Yenɛ boe la ho mɛ.3 Ge yu'uŋkoŋɔ mea poan te Na'ayenɛ le tɔgɛ bo' Natan yeti, 4 Keŋɛ ta yele mam yameŋa David yeti Na'ayenɛ la n yele se'em n wana. La dagɛ hom n de se'em n wan mɛ yire bo' mam. 5 Pɔhɛ saŋsɛka te n yehe ya mam Israeldoma wa paɛ zina, mam ka malom kɛn' yire poan, ge sogorɛ yire la pagahe poohen te n bɔna. 6 Mam n tare Israel buuri wa ɛ doohe zen'se'ehe woo la, n tabelɛ soke sɛba te mam bo ba nɔɔrɛ te ba beha Israeldoma wa la yeti, bene n sɔe te ya ka mɛ dɔɔ mɔlɔsonɔ yire bo' mam? 7 Bala la, nya yele mam yameŋa David te Pɛɛntɛɛnreba Na'ayenɛ yeti, mam n loe ho duŋkeeŋai te ho behera mam nɛreba Israeldoma, 8 doohe ho poore ho kenɛ zen'an woo, ge bo' ho nyaŋerɛ ho dima zan'an woo. Mam wan bo' ho yu'urɛ kantɛ n zone la teŋa wa nɛrekanreba. 9 Le yɛ'ɛha n wan sɛ zen'an bo' n nɛreba Israeldoma mɛ ba kaŋkaŋe, te potɔpa kan le nyaŋɛ bike ba wo pɔhe na la 10 saŋsɛka poan te kema n yuun behera nɛreba Israeldoma. N wan bo' ho nyaŋerɛ a dima zutin. Bilam te mam Na'ayenɛ wan mɛ yire bo' ho! 11 Te ho han ka ta bɔna, kule paɛ ho sɔdoma, n wan tee ho dayɔa kayema diihe ho na'am te a sɔna sɔ'ɔlom la behera. 12 Ho dayɔa wa wan mɛ yire bo' mam, ge te n mɛ a na'am la me wuuha wuuha. 13 N wan dɛna a sɔ, te a dɛna n dayɔa, me kan yehe zo'ohogɔ la a zuin, wo n yehe dɛ se'em te ho tee a na'arɛ.a 14 Ho dayɔa wa wan zire mam yire la la n sɔ'ɔlom la poan wuuha wuuha. 15 Te Natan dekɛ yetɔgɔbɔna liligere dena wa tɔgɛ bo' David.
16 Te naba David kɛn' ta zin'ire Na'ayenɛ la nɛŋan yeti, Na'ayenɛ, mam me dela ane, n yire dela dene, ge te hom zɛnkɛ mam saazuo wa'ana paɛ zina beere? 17 Yele dena wa dela yelepeka ho Yenɛ nɛŋan, ho pon tɔgɛ ho yameŋa wa yire zɛnke mam gaŋɛ, Na'ayenɛ. 18 Ho pon diŋɛ mina ho yameŋa wa, n tare la bem la hon zɛnkɛ mam se'em wa? 19 La dela hon mɛŋa n bote te ho toonkanra ana wa, ge biŋe nɔbiŋkanra ana wa bo mam ho yameŋa wa. 20 Se'em ka boe ana wo hom, tomam toba n wom sɛla woo se'em la. Yenɛ ka le bɔna pa'ahɛ hom zuo. 21 Ane n boe wo ho nɛreba Israeldoma, teŋparɛ wa zan'an te hon yɔ to'e to? Ho nyɛ yu'urɛ, dɔla la yelese'a te ho tom, sa'ɛ teŋhe te mam sɛba te ho yɔ to'e Mizraimdoma nu'uhen wa. 22 Hom dekɛ tomam Israel kɔma lebege ho nɛreba, ge te hom Na'ayenɛ dɛna te Yenɛ.
23 Bala la, Na'ayenɛ, hom pon diŋɛ tɔgɛ sɛla dɔla ho yameŋa wa la a yire wa. Bahɛ te la ze'ele wo hom po'olɛ ho nɔɔrɛ la se'em la, wuuha 24 wo la pon diŋɛ yele se'em la bahɛ te ho yu'urɛ nyɛ ze'elego la zɛnkerɛ wuuha wuuha. Te nɛreba wan baŋɛ tɔgɛ te Pɛɛntɛɛnreba Na'ayenɛ dɛna Israel Yenɛ. Te ho yameŋa David yire zan'an nyɛ ze'elego ho nɛŋan. 25 Hom Na'ayenɛ mam Yenɛ n lilige bo ho yameŋa wa te ho wan mɛ a yire. Bala n sɔe te n dekera iŋkpeŋere po'ohegɔ bɔ'ɔra hom wa. 26 Dena wa poan, Na'ayenɛ ho n de Yenɛ ge po'olɛ yele som dɛna wa bo ho yameŋa. 27 Bala zuo, n sohore ho mɛ, te ho kan'somɔ bahɛ ho yameŋa wa la a yire wa, te la bɔna wuuha wuuha. Bala, Na'ayenɛ, ho kan' ho kan'an la bo la hon n de wuuha.