Na'ayenɛ bo David paŋa zaberɛ zen'an woo poan
18
1 Le yɛ'ɛha David daa le ta zabɛ nyaŋɛ Pilistidoma la mɛ ge to'e Gat la ka teŋbibihe la behera.2 David daa le nyaŋɛ Moabdoma la mɛ, te ba bahɛ te a sɔna ba behera ge yɔɔra koberɛ bɔ'ɔra en.
3 David le zabɛ nyaŋɛ Zoba naba Hadadezer, paɛ Hamat teŋan doohe la enŋa daa bote a to'e Euprates Kolaa la bɔba sɔna la. 4 David nyaŋɛ en to'e a yiri toroto tuhure la sɛba n tukure a yiri toroto tuha ayopɔe la sɛba n kenɛ teŋa tuha pihiyi', kagɛ yiri la duma ge bahɛ a toroto yiri la kɔbega. 5 Aramdoma n boe Damaskus teŋa wa'ana te ba soŋɛ Zoba naba Hadadezer te ba zabɛ la David, te David ko' ba nɛreba tuha pihiyi' la ayi'. 6 Te Damaskus teŋa daa dela David pɛɛntɛɛnreba wa fole te ba sɔna ba te ba yɔɔra koba bɔ'ɔra en. Na'ayenɛ bo David paŋa zaberɛ zen'an woo poan. 7 David to'ohe sanlema tɛlehe se'ehe te Hadadezer nɛŋadoma la ziira la tare keŋɛ Yerusalem poan. 8 Teba la Kun teŋhe wa n de Hadadezer sɔ'ɔlom wa, te David daa le to'e ba nyɔgom. Pooren te Solomon dekɛ nyɔgom la maalɛ Yenɛ Yire nyɔgom Ko'kantɛ la zɛnya la dogoro la zan'an la.
9 Hamat naba Tou n wom David n kɔrom Zoba naba Hadadezer pɛɛntɛɛnreba la zan'an se'em la, 10 a tom la a dayɔa Hadoram David zen'en te a ta po'ohe en, la n nyaŋɛ Hadadezer a diŋdaana la ge bo en sanlema la sanlempɛɛla la nyɔgom. 11 Te David dekɛ bo'olom bona zan'an bo Na'ayenɛ, la sanlema la sanlempɛɛla se'a zan'an te a nyaŋɛ to'e Edomdoma la Moabdoma la Ammondoma la Pilistidoma la Amalekdoma zen'enhe la.
12 Zeruiah bia Abisai nyaŋɛ Edom pɛɛntɛɛnreba la Yaarom Bɔn'en, ko' ba tuha pia la anii (18,000). 13 A nya mɛ' a pɛɛntɛɛnreba la soka deto Edom teŋa poan, te a dɛna ba naba. Na'ayenɛ bo David paŋa zaberɛ zen'an woo poan.
14 David daa behere Israeldoma zan'an soŋa soŋa la gankerɛ sonɛ poan. 15 Zeruiah bia Yoab daa de pɛɛntɛɛnreba la nɛŋadaana. Ahilud dayɔa Yehosapat n daa sɔe ba gɔnɔ behera. 16 Ahitub dayɔa Zadok la Abiatar dayɔa Ahimelek daa dela malemadoma. Savsa me dɛna gɔŋgoloha. 17 Yehoiada dayɔa Benaiah behere Keretdoma la Peletdoma ge te David a dayɔɔhe me dɛna naba nɛŋadoma.