16
1 Te ba dekɛ Yenɛ nɔbiŋere daka la kɛn'ɛra sogorɛ David n tin' bo ka ge nya kaanbɛ nyɔ'an bo'olom la sunma'ahom bo'olom Yenɛ nɛŋan. 2 David n nya kaanbɛ ba'ahɛ la, te a nya kan' bo nɛreba la Na'ayenɛ yu'urɛ la poan. 3 Te a nya tɔnrɛ Israel nɛreba, pɔka la boraa woo, boroboro ayema la tiihe wɔla n ku'e wama ayi' la. 4 A loe Levidoma wa basɛba, te bama dɛna Na'ayenɛ daka la nɛŋan sohera la bo fara ge pɛngera Na'ayenɛ Israel Yenɛ wa. 5 Asap de ba nɛŋadaana tagela Zekaria la Yeiel la Semiramot la Yehiel la Matitia la Eliab la Benaiah la Obed Edom ge te Yeiel. Ba daa kɔ'ɔn sɔna kɔnlɔ la duurenhe la, te Asap me kɔ'ɔn sɔna lenlahe. 6 Te malemadoma Benaiah la Yahaziel pɛɛbera tentana Yenɛ nɔbiŋere daka la nɛŋan.7 De daarɛ mea te David baam bo Na'ayenɛ fara eta Asap la a sɔɔnrɔ nu'uhen. 8 Bo' ya Na'ayenɛ fara! Yi' ya a yu'urɛ! Bahɛ ya te nɛresaala woo baŋɛ a tooma! 9 Yoon ya bo ya en! Baam ya ge tɔgɛ a toonkerehe! 10 Nɛɛ ya ge na'ahe ya a yu'urɛ se'ere n de fa'a la ya suunre zan'an. 11 Nam ya Na'ayenɛ la a paŋa. Ɛ en daarɛ woo. 12 Tɛnre ya a kerehetooma la a nyalematooma la a gankere somɔ la. 13 Ya dela a yameŋa Israel yaahe wa la Yakob kɔma me dɛna sɛba te a loe.
14 Na'ayenɛ n de tomam Yenɛ, tona la som teŋparɛ wa zuo zan'an. 15 Te a tɛnra a nɔbiŋere la a nɔpolegɔ yuuma tuha poan la 16 a nɔbiŋere la Abraham la a po'olɛ nɔɔrɛ me la Isaak. 17 Yenɛ bo' Yakob a malema ge bo Israeldoma a nɔbiŋere n ka tare ba'ahegɔ la. 18 A yeti, Kanaan teŋa dela ya tɔntɛ. 19 Ban yuun ka zo'e, ge me ka tara kɛn'a zen'an, 20 ba daa nɔgere la bala kaara teŋhe la zan'an. 21 A daa ka bo sore te nɛreba daan ba ge tanha nadoma ba zuo. 22 A yeti, Da kalom sɛba te mam sɔ' la kaam bii mam nɔtɔgɔheba wa zutin.
23 Teŋa wa zan'an, pɛnge Na'ayenɛ te beere n yiligere woo te mɔɔla te a de faanra. 24 Yele teŋhe wa zan'an Na'ayenɛ tebehom la a nyalematooma la. 25 Enŋa ma'an n nare pɛnka la na'ahegɔ. Enŋa te baga woo zɔta. 26 Nɛresaaleba kaanbere la baga, ge Na'ayenɛ n naam saazuo. 27 Soŋa la na'am bo Na'ayenɛ neŋan. Paŋa la a popeelom perɛ a yire la.
28 Nɛra woo n boe teŋa woo, dekɛ pɛnka bo Na'ayenɛ n de paŋa zan'an daana zuo. 29 Dekɛ ya na'ahegɔ boe Na'ayenɛ. Tare ya a bo'olom kaanbegɔ la wa'ana. Bahɛ ya te to pɛngera Na'ayenɛ la a fa'a la zuo. 30 Teŋa wa nɛra woo, tare ya dabeem la en! Enŋa zuo, teŋa wa ze'ele kaŋkaŋe ge ka gbirigera. 31 Bahɛ ya te saazuo la teŋa wa yoona la popeelom. Soolom bo teŋhe la zan'an te Na'ayenɛ n de naba! 32 Ko'kanra la sɛla woo n boe bini, pɛngere Na'ayenɛ! Bahɛ te samana la dise'ehe woo n boe a poan me nyeena! 33 Tiihe la wan nya yoon la popeelom a nɛŋan, Na'ayenɛ wa'ana te a gankɛ la teŋa woo la zuo. 34 Pɛngere ya Na'ayenɛ n an som la zuo. A nɔŋere ka maan ba'aha.
35 Yele ya en, Fan' to bahɛ, Yenɛ to Faanra! Lagom tɔ ge fan' tɔ teŋse'ehe la! Bahɛ te to wan bo fara ge pɛngera vɔɔla bɔra hom fa'a yu'urɛ ge teŋhe woo wan bo ho pɛnka! 36 Pɛngere ya Na'ayenɛ Israel Yenɛ wuuha wuuha. Te nɛreba la daa yeti, Taare! Pɛngɛ Na'ayenɛ!
37 David bahɛ Asap la a sɔɔnrɔ te beere n yiligere woo, ba ton la na'ahegɔ tooma la zan'an Na'ayenɛ nɔbiŋere daka nɛŋan. 38 A me bahɛ Obed Edom la a sɔɔnrɔ pihiyoobe la tonii la te ba soŋe ba. Yedutun dayɔa Obed Edom la Hosa n daa de guruba. 39 David bahɛ malemadaana Zadok la a sɔɔnrɔ me te ba beha Na'ayenɛ Sogorɛ n boe Gibeon zoore ha la me. 40 Bilam te ba kaanbɛ nyɔ'an bo'olom nyɔ'an kaanbegɔ daka la zuo bo Na'ayenɛ bolika la zanɔɔrɛ daarɛ woo, wo Na'ayenɛ pa'alegɔ se'em te a daa bo Israeldoma la. 41 Heman la Yedutun n daa tagalɛ pɛnkadoma la zan'an te ba pɛngera Na'ayenɛ, a nɔŋerɛ se'ere n ka tare ba'ahegɔ la zuo. 42 Heman la Yedutun kelom sɔna tentana la lenlahe la yooma lɔgɔrɔ Yenɛ Yire la poan. Yedutun dayɔɔhe la n de guruba Gibeon ha.
43 De pooren nɛra woo daa kule la a yire, te David me kule paɛ a yiredoma te a kan' bahɛ ba zuto.