Babilon naba Nebukadnezar me zom na
24
1 Yehoiakim saŋa la poan, Babilon naba Nebukadnezar me zom na, te Yehoiakim dɛna a yameŋa yuuma atan', ge ta zagahɛ te a kan le bɔna a nu'uhen. 2 Na'ayenɛ bahɛ te Kaldeadoma la Aramdoma la Moabdoma la Ammondoma pɛɛntɛɛnreba bibige Yehoiakim la Yuda te ba sagom ka. Te la doohe Na'ayenɛ yelehom la te a tɔgɛ doohe a yamehe n de a nɔtɔgɔheba la poan se'em la. 3 Te yele dena wa seren sige Yuda zuo na, te la foe Yuda Na'ayenɛ nɛŋan, Manase be'em la woo te a tom la zuo, 4 la en ka'ahɛ ziim sebo n ka tare taalɛ la. Se'ere n sɔe la, a doohe Yerusalem poan mɛ zan'an ka'ahɛ ziim n ka tare taalɛ. Na'ayenɛ me ka tɛn'ɛhere te a wan bahɛ en fai.5 Yehoiakim toonse'a n gee woo la golehɛ eŋɛ la Yuda nadoma yɛla gɔŋɔ la poan. 6 Yehoiakim kule paɛ a yaabdoma te a dayɔa Yehoiakin sɔe a na'arɛ dɛna naba. 7 Mizraim naba ka le veehe zuo na. Se'ere n sɔe la, Babilon naba n tee sɔna sɛla woo te Mizraim naba tabelɛ sɔna la ze'ele Mizraim Kolaa ta paɛ Euprates Kolaa la.
8 Yehoiakin dela yuuma pia la anii ge di na'am la, te a behɛ teŋa la ŋmarehe setan' Yerusalem poan. A ma yu'urɛ dela Nehusta dɛna Yerusalem boraa Elnatan pɔyɔa. 9 Te a tona be'em Na'ayenɛ nɛŋan wo a sɔ la.
10 Saŋkaŋa poan Babilon naba Nebukadnezar zaba nɛŋadoma wa'ana gum Yerusalem teŋa wa te ba zabɛ la ka. 11 Ban gan'an gura te ba zabɛ la teŋa la, te Nebukadnezar mɛŋa wa'an ka poan na. 12 Yuda naba Yehoiakin dekɛ a mɛŋa la a ma la a yamehe la a kpɛ'ɛndoma la zuodoma eŋɛ Babilon naba nu'uhen. Babilon naba na'am dia yuuma anii poan te a nyokɛ Yehoiakin gura la en. 13 Wo Na'ayenɛ daa yeti Nebukadnezar vaɛ lɔgɔseto woo n boe Na'ayenɛ Yire la poan la naba yire la poan la sanlema logoro woo te Israel naba Solomon maalɛ bo Na'ayenɛ Yire la. 14 A vaɛ Yerusalem nɛreba la zan'an, kpɛ'ɛndoma la pɛɛntɛɛnreba la sɛba n mi' lɔgɔrɔ maalegɔ la kuteba. La dela nɛreba tuha pia. Nɛre beeliho ka gee, han dagana sɛba n de nahe korehe teŋa la poan la ma'an. 15 Nebukadnezar vaɛ Yehoiakin la a ma la a pɔgɔba la a kpɛ'ɛndoma la teŋa la poan nɛrezura la woo tare keŋɛ Babilon te ba ta dɛna yamehe. 16 Babilon naba vaɛ la nɛresoma tuha ayopɔe te ba zan'an dɛna kansaŋehe wan ta'an zabɛ. A me vaɛ la sɛba n mi' lɔgɔrɔ maalegɔ la kuteba tuhure. 17 A tee bobe Yehoiakin sɔ be'a Mattania naba te a sɔe Yehoiakin na'arɛ dɛna naba, ge tee segɛ a yu'urɛ Zedekia.
18 Zedekia dela yuuma pihiyi' la deyena ge di na'am la, te a behɛ teŋa la yuuma pia la deyena Yerusalem poan. A ma yu'urɛ dela Hamutal, Yeremia la n de Libna teŋa nɛra la pɔyɔa. 19 Zedekia wa tona be'em Na'ayenɛ nɛŋan wo Yehoiakin la.
20 Dena wa dela Yerusalem la Yuda te Na'ayenɛ eŋɛ suunre la ba, ta dige ba a nɛŋan. Zedekia ta zagahɛ mɛ te a kan bɔna Babilon naba nu'uhen.