25
1 Zedekia na'am dia yuuma awae' poan, de ŋmarehe pia dabeha pia daarɛ poan te Babilon naba Nebukadnezar ihege la a pɛɛntɛɛnreba zan'an wa'an Yerusalem na te a zabɛ paɛ na gum teŋa la zan'an gan'an pigira ka. 2 Ba gan pigira teŋa wa la bala ta ta paɛ Zedekia na'am dia yuuma pia la ayena poan. 3 Ŋmarehe senaahe poan dabeha awae' daarɛ, te kom peelega to'e teŋa la poan. Se'ere n sɔe la ba ka le tara dia. 4 Kaldeadoma ta aanhegɛ dangoone la n mɛ kae teŋa la, te teŋa naba la a pɛɛntɛɛnreba le'ehɛ yu'uŋɔ doohe nayaŋa sɛka n boe dangɔɔma ayi' teŋasoka la, doohe naba sɔlega la poan yehe zɔ, te Kaldea pɛɛntɛɛnreba wa gilige teŋa la. Te ba zɔ tɔ Arabah pɔgɔtia la ha. 5 Ge Kaldea pɛɛntɛɛnreba wa ta baŋɛ dige naba ta nyɔkɛ en Yeriko bɔn'ɔrɔ la poan. Te a pɛɛntɛɛnreba la zan'an bahɛ en ge zɔ. 6 Ba nyɔkɛ en wa'an Babilon naba zen'an na, Aribla teŋa poan, te naba wa gankɛ en. 7 Ba kɔrom Zedekia dayɔɔhe a nini, ge kpegɛ a mɛŋa nini, ge ba' en la nyɔgom kuto tare en la keŋɛ Babilon.8 Babilon naba Nebukadnezar na'am dia yuuma pia la awae' poan ŋmarehe senuu dabeha ayopɔe daarɛ, te Nebuzaradan n de Babilon zaba nɛŋadaana wa'an Yerusalem na, 9 nyɔ' Na'ayenɛ Yire la naba yire la yire woo n boe teŋa la poan dɛna yikantɛ. 10 Kaldea pɛɛntɛɛnreba la woo n doohe ba nɛŋadaana la wa'ana la, aanhom Yerusalem dangɔɔma la kae. 11 Zaba nɛŋadaana Nebuzaradan nyɔkɛ nɛresɛba woo n gee teŋa la poan la sɛba n dekɛ ba mɛhe eŋɛ Nebukadnezar nu'uhen. 12 Ge a bahɛ teŋa la poan nɛresɛba n de nahe korehe la, te ba leen beha tiihe la ge kɔɔra teŋa la.
13 Kaldea pɛɛntɛɛnreba wa wɔnrɛ nyɔgom zɛnya la nyɔgom ze'elehe la nyɔgom Ko'kantɛ la n boe Na'ayenɛ Yire la poan la tare keŋɛ Babilon teŋa. 14 Ba vaɛ Na'ayenɛ Yire poan dogorɔ la vaahe la migihe la laahe se'ehe tare nyɔ'anra nyuŋo soŋɔ zun'uhe la la nyɔgom lɔgɔseto woo n tare tona Na'ayenɛ Yire la poan tooma la. 15 Te naba pɛɛntɛɛnreba kpɛ'ɛma wa vaɛ laahe se'ehe n tare dogora la laakanra la la sɛla woo n de sanlema la sɛla woo n de sanlenpeelega. 16 Zɛnya la ayi' la ze'elehe la Ko'kantɛ te Solomon daa bahɛ te ba kure a ze'ele Na'ayenɛ Yire la poan la nyɔgom la tebehom ka tare makerɛ. 17 Nyɔgom zɛɛnrɛ wa woko daa dela santira pia la anii. Te nyɔgom fotoga woko dɛna santira atan' te ba daa gole nyɔgom zɔntɔ la *pomegranate wɔla la kae. Te zɛɛnrɛ se'ere n tagalɛ la me ana bala mea.
18 Nebuzaradan wa nyɔkɛ malema nɛŋadaana Seraiah la Zepania se'em n dole a poore la nɛresɛba batan' n ne zɛ'a gura koleŋa la. 19 A nyɔkɛ boraa kayema n dɛna zaba nɛŋadaana teŋa la poan la boraahe senuu n ne kan'an naba la gɔŋgoloha n de zaba nɛŋadaana n ne ganhɛ nɛreba te ba kɛn' zaberɛ la nɛreba basɛba n gee dɛna boraahe pihiyoobe. 20 Nebuzaradan vaɛ ba zan'an na bo Babilon teŋa naba la Aribla teŋa poan. 21 Bilam te Babilon naba wa kɛ' ba zan'an ko' Aribla teŋa la n boe Hamat teŋa poan la. Yudadoma n bahɛ ba teŋa la ge loŋe teŋa kayema poan se'em n bala.
22 Babilon naba Nebukadnezar loe Sapan dayɔa Ahikam me dayɔa Gedalia te a beha nɛresɛba te a bahɛ ba te yee Yuda poan la. 23 Zaba nɛŋadoma la ba pɛɛntɛɛnreba la n ta wom te Babilon naba loe la Gedalia te a beha teŋa la, ba ihege mɛ la ba nɛreba wa'ana Gedalia zen'an Mizpa na. Nɛŋadoma la dɛna Netania dayɔa Ismael la Karea dayɔa Yohanan la Netopa teŋa nɛra Tanhumet dayɔa Seraiah la Maakat nɛra dayɔa Yaazania la ba nɛreba. 24 Gedalia pɔ' bo bama la ba nɛreba la yeti, Da bahɛ ya te dabeem tara ya la Kaldea teŋa kpɛ'ɛndoma la. Tone ya bo'ore Babilon naba la ge bala n wan bahɛ te la ana soŋa bo ya. 25 Ge ŋmarehe seyopɔe poan te Elisama dayɔa Netania me dayɔa Ismael n de naba yire poan la, wa'ana la boraahe pia te se kɛ' Gedalia ko' lagom ta' la Yudadoma la Kaldea sɛba n boe la naɛ la Mizpa teŋa bala ma'an la. 26 Te nɛreba la zan'an, nɛrekanreba la taromdoma, la zaba nɛŋadoma la woo yele ihege keŋɛ Mizraim teŋa. Se'ere n sɔe la dabeem n tare ba la Kaldeadoma la.
27 Ban nyɔkɛ Yehoiakin loŋe teŋa la yuuma pihitan' la ayopɔe poan, te Evil Merodak sɔe dɛna Babilon naba. Te ŋmarehe pia la seyi' dabeha pihiyi' la ayopɔe daarɛ, a yu'ɛ Yehoiakin paka deo poan bahɛ na. 28 A tɔgɛ soŋa la en, ge bo en na'am koka n gane nadoma la woo n boe Babilon poan la en la. 29 Te Yehoiakin yɛɛhɛ a paka deo lɔgɔrɔ la bahɛ, ge dita la naba la daarɛ woo a vom dabeha la zan'an poan. 30 Naba la yɔɔrɛ a daarɛ woo yɔɔrɛ na gura a kum.