Naba me pon ka bɔna wa'an a pooren na ana wo Yosia
23
1 Naba Yosia wa tom nɔɔrɛ bo te Yuda la Yerusalem keendoma woo lagahɛ na. 2 A ihege kɛn' Na'ayenɛ Yire la poan la Yuda nɛreba la Yerusalem nɛreba la malemadoma la nɔtɔgɔheba la nɛra buuri zan'an bibige doohe en. A kaanlɛ nɔbiŋere yelese'a n boe gɔŋɔ la te ba nyɛ Na'ayenɛ Yire la poan la, te nɛra woo toba wom. 3 Naba la ze'ele Na'ayenɛ Yire la poan zɛɛnrɛ deyema zen'an biŋe nɔɔrɛ la Na'ayenɛ te a wa dɔla Na'ayenɛ, ge tara a nɔse'a te a bo la a nɔze'elego la a pa'alegɔ la, la a suunre la a potɛn'ɛrɛ zan'an ge tona nɔbiŋere la a potɛn'ɛrɛ zan'an, ge tona nɔbiŋere la yelese'a n golehɛ eŋɛ gɔŋɔ la poan la. Nɛreba la zan'an nya me lagom sakɛ a nɔbiŋere la.4 Naba la bo malema nɛŋadaana Hilkia, la malemadoma sɛba n tagalɛ en, la sɛba n gure koleŋa la nɔɔrɛ la yeti, ba tare yelese'a woo n maalɛ bo Baal bagarɛ la Aserah bagarɛ la yelese'a woo n boe saazuo ho baga la woo te a bɔna Yenɛ Yire la poan la. A yehe na nyɔn' ba Yerusalem yeŋa Kidron bɔn'ɔn la zuo ha, ge vaɛ ba tampegelom tare keŋɛ Betel. 5 Naba wa doohe sa'ahɛ bagakaanbera la woo te Yuda nadoma sɔ ba te ba dɛna baga kaanbereba dɔla kuŋkuma zuto kaanbegɔ zan'ehe woo n boe Yuda la Yerusalem poan la, ge me kaanbera Baal la yentule la ŋmarega la ŋmarebibihe la yelese'a woo n boe saazuo ha la, 6 A ɔnbegɛ Aserah bagarɛ la Na'ayenɛ Yire la poan yehe na, tare de yehe Yerusalem yeŋa na, Kidron bɔn'ɔn la poan ha, ta nyɔ' dɛ. A tɔ bagarɛ la te lebege puhugo, te dekɛ ba lobe yuguhe nɛreba yɔɔrɔ zuo. 7 A wɔnrɛ borase'ehe n tone yalomtooma deto la n boe Na'ayenɛ Yire la poan la, zen'an te pɔgɔhe zin'an wogora lɔgɔrɔ bɔ'ɔra Aserah bagarɛ la.
8 Yosia yehe malemadoma sɛba woo n boe Yuda la Yerusalem teŋhe ge sagom ba kuŋkuma zuto kaanbegɔ zen'enhe la te malemadoma la nyɔ'anra ko'ɛnka poan la, ze'ele Geba ta paɛ Beerseba teŋhe la ha. A gbi' kuŋkuma zuto kaanbegɔ zen'enhe la te ba mɛ yeŋa nayaŋa se'ehe te Yosua se'em n behere teŋa n lɛm teŋa la yeŋa nayɛŋa gɔbega nu'o bɔba. 9 Baga kaanbereba n sɔe kuŋkuma zuto kaanbegɔ zen'enhe, ka tabelɛ paɛ Na'ayenɛ kaanbegɔ daka la poan Yerusalem teŋa la poan, ge ba me obere boroboro se'a n ka tare mi'ihom la malemadoma la taaba. 10 Naba sagom Topet kaanbegɔ zen'enhe n bɔna Ben Hinom Bɔn'ɔn poan la te nɛra kan le keŋɛ bini ta dekɛ a dayɔa bii pɔyɔa nyɔ' bugumen kaanbɛ Molek bagarɛ la. 11 A yehe yiri se'e te Yuda naba dekɛ i bo yentule te i zɛ'a Na'ayenɛ Yire koleŋa nɔɔrɛn lɛm la kpɛ'ɛma la yu'urɛ de Natan Melek bɔ'ɔ la. Yosia nyɔ' yiri toroto seto n tare tona yentule na'ahegɔ tooma la. 12 A gbi' kuŋkuma zuto kaanbegɔ zen'se'ehe te Yuda nadoma mɛ yagelɛ naba Ahaz yire gɔhɔgɔ la baga se'a te Manase mɛ ze'ele Na'ayenɛ Yire zenzagahe seyi' la poan la bahɛ. A wɔnrɛ ba buuri buuri vaɛ ba ta bahɛ Kidron bɔn'ɔn la poan. 13 Naba me gbi' kuŋkuma zuto zuto kaanbegɔ zen'se'ehe woo n boe Yerusalem dapɔya bɔba ha la, lebehe Sagom Zoore la gɔbega bɔba, zen'an te Israel Naba Solomon tabelɛ mɛ Sidondoma bagarɛ Astoret la Moabdoma bagarɛ Kemos la Ammondoma bagarɛ Milkom kaanbegɔ zen'enhe la bahɛ. 14 Yosia gbi' baga zɛnya la bahɛ ge vɔn' Aserah baga la bahɛ, ge tee va nɛreba kɔnba perɛ yogoro la.
15 Sɛla n pa'ahɛ dela, naba wa gbi' kuŋkuma zuto kaanbegɔ zen'an n boe Betel teŋa poan te Nebat dayɔa Yeroboam yuun mɛ bahɛ te Israel zan'an tue mɛ. A gbi' kuŋkuma la kaanbegɔ zen'an la nyɔ' bagarɛ wa kaanbegɔ zen'en la bugum, te ka wɔnrɛ zan'an, ge nyɔ' Aserah bagarɛ la me. 16 Yosia n ŋmɛregɛ nyɛ la yɔɔrɔ n boe zoore zuo, te a tom te ba ta gurum kɔnba se'a woo n boe yɔɔrɔ la poan la tare na nyɔ' a kaanbegɔ zen'an la zuo ganlom dɛ wo Na'ayenɛ yelehom la te Yenɛ nɛra tɔgɛ doohe la poan se'em la.a 17 Naba yeti, Bene yɔɔ danlehom n bala te n nyɛta wa? Te teŋa la nɛreba lerege en yeti, Ko dela Yenɛ nɛra n daa yehe Yuda na tabelɛ pore hom eŋɛ Betel kaanbegɔ zen'an se'em la yɔɔ. 18 A yeti, Bahɛ ya en te a gan'an vɔ'ɔha. Se'em da guruge a kɔnberɛ. Te ba bahɛ yɔɔ koŋɔ, ka guruge yɔɔ koŋɔ la nɔtɔgɔha n yehe Samaria teŋa na la yɔɔ la poan kɔnba.
19 Wo enŋa eŋɛ Betel teŋa la, Yosia doohe gbi' baga kaanbegɔ zen'enhe la woo te Israel nadoma daa mɛ Samaria teŋhe nyie Na'ayenɛ suunre la bahɛ. 20 Yosia kɔrom baga kaanbereba sɛba n boe kuŋkuma zuto kaanbegɔ zen'enhe la, vaɛ nɛreba kɔnba pagalɛ ba zuto nyɔ', ge nya lebe Yerusalem.
21 Naba nya yele nɛreba la yeti, Tɛnre ya Na'ayenɛ ya Yenɛ Azootole De'eŋɔ la wo ban golehɛ de yele se'em eŋɛ Nɔbiŋere Gɔŋɔ wa poan wa la. 22 Saŋsɛka poan te gankereba yuun beha Israel la, tare na paɛ saŋsɛka te Israel bii Yuda tara nadoma la, ba ka tabelɛ de'em Azootole De'eŋɔ te ko tara zuo wo kona wa. 23 Ge Yosia na'am dia yuuma pia la anii poan, ba malom de'em Azootole De'eŋɔ wa mɛ bo Na'ayenɛ Yerusalem poan.
24 Sɛla n pa'ahɛ dela, Yosia dige bakolodoma n behere la baga woo la yelefɛn'ɛha woo n boe Yuda la Yerusalem poan la bahɛ. A nya bahɛ te yelese'a n boe pa'alegɔ gɔŋɔ la te malemadaana Hilkia nyɛ Na'ayenɛ Yire la poan la nya tona. 25 Nadoma woo n wa'an yia na la ŋmɛregɛ lebe Na'ayenɛ zan'an la a suunre la a potɛn'ɛra la a paŋa zan'an wo Moses Pa'alegɔ la wo Yosia. Naba me pon ka bɔna wa'an a pooren na ana wo Yosia.
26 Ge la bala zan'an, Na'ayenɛ ka bahɛ a sunsunyiim la te a taɛ bahɛ Yuda zuo, doohe la Manase n tom se'em nyie a suunre la zuo. 27 Te Na'ayenɛ yeti, N sa'ɛ Yuda n nɛŋan bahɛ wo mam sa'ɛ Israel se'em la. N wan zagahɛ Yerusalem wa te mam mɛŋa loe wa, la Yire wa te mam yeti mam Yu'urɛ wan pota de poan la.
28 Yosia toonse'a n gee la la enŋa n eŋɛ yelese'a woo la golehɛ eŋɛ la Yuda nadoma yɛla gɔŋɔ la poan. 29 Yosia saŋa la te Mizraim naba Faro Neko ihege yɛ'a Euprates Kolaa te a soŋɛ Asiria naba la. Naba Yosia yehe zabera en, te Faro Neko ko' en Megido teŋa la poan. 30 Yosia yamehe dekɛ en eŋɛ yiri toroto poan zi' en ze'ele Megido lebe Yerusalem na pin' en a mɛŋa yɔɔ poan. Te teŋa la nɛreba la dekɛ Yosia dayɔa Yehoahaz, sɔ' en la kaam te a soe a sɔ na'arɛ dɛna naba.
31 Yehoahaz dela yuuma pihiyi' la atan' ge di na'am la, te a behɛ teŋa la ŋmarehe setan' Yerusalem poan. A ma yu'urɛ dela Hamutal dɛna Yeremia n de Libna teŋa nɛre la pɔyɔa. 32 Te a tona be'em Na'ayenɛ nɛŋan wo a yaabdoma la. 33 Faro Neko nyɔkɛ en Aribla teŋa n boe Hamat teŋa poan te ba gura en bini te a da dɛna naba Yerusalem poan. A nya bo Yerusalem nɛreba la nɔɔrɛ te nɛra woo yɔɔra sanlenpeelega bɔɔrehe kɔbega la sanlema bɔɔrega te la dɛna koberɛ. 34 Faro Neko tom te Yosia dayɔa Eliakim te enŋa sɔe a sɔ Yosia na'arɛ dɛna naba. Ge a tee segɛ Eliakim yu'urɛ Yehoiakim, ge a ton nyɔkɛ Yehoahaz tare keŋɛ Mizraim te a ta ki la bilam ha. 35 Yehoiakim yɔ' sanlenpeelega la sanlema la bɔ'ɔra Faro. A ne ŋmɛgehɛ nɛreba la mɛ te ba bo te la paɛ naba Faro n pa'alɛ se'em la.