Na'ayenɛ le nɛɛ a mɛŋa boyi' poan bo Solomon
9
1 Naba Solomon n mɛ Na'ayenɛ Yire la naba yire la sɛla woo te a suunre bɔta te a eŋɛ la ba'ahɛ la, 2 te Na'ayenɛ le nɛɛ a mɛŋa boyi' poan bo Solomon wo n daa nɛɛ a mɛŋa se'em bo en Gibeon teŋa la. 3 Na'ayenɛ tɔgɛ bo en yeti, Mam wom ho sohoga la te ho ɛɛra soŋorɛ se'ere woo la. Mam eŋɛ yire wa la toolom yire doohe la n Yu'urɛ n boe de poan. N nini la n potɛn'ɛrɛ wan gan'an de poan saŋa woo. 4 Ge han dɛna hom mɛŋa, ho han dɔla mam wo ho sɔ David n daa dole mam la birikinte a suunre poan la tontɔɔ vom se'em la ge dɔla mam malema la nɔze'elego la, 5 n wan sɛ' ho yire wa zin'ire Israel na'am gɔŋɔ wa zuo wuuha wo mam daa biŋe nɔɔrɛ la ho sɔ David yeti a kan malom koŋɛ nɛra a yire wa te a zin'ire Israel na'am gɔŋɔ wa zuo la.6 Ge hom bii ho kɔma han ta bire poore bahɛ mam ka dɔla mam nɔɔrɛ la la n malema la te n bo ya la ge dɔla yena a se'a na'ahera a, 7 n wa ŋmaɛ Israel teŋsɛka te n dekɛ bo la poan bahɛ, ge zagahɛ mam eŋɛ yire se'ere te de dɛna toolom yire doohe la n Yu'urɛ n boe de poan la. Te ba wan tɛɛnha nu'uhe pa'ala Israel te ka dɛna nɛreba kɛhega lɔkɔ. 8 Te Yire dena wa wan lebege daboo gan'an, te sɛba woo n tole wan pin' ba nɔya, ge ɛnregera yeti, bene zuo te Na'ayenɛ eŋɛ teŋa wa, la Yire wa wana? 9 Nɛreba wan lerege yeti, ba zagahɛ la Na'ayenɛ ba Yenɛ la n tare ba sɔdoma ze'ele Mizraim teŋa yehe na la. Ba dole la yena na'aha a ge tona bɔ'ɔra a. Bala n sɔe te Na'ayenɛ bahɛ te nɔyalegerɛ dena sige ba zuo na wa.
10 Yuuma pihiyi' ba'ahegɔ poan te Solomon mɛ yiya ayi' wa, Na'ayenɛ Yire la naba yire, la ba'ahɛ. 11 Naba Solomon bo Tire teŋa naba Hiram teŋhe pihiyi' Galilee teŋa poan te a sɔna behera. Se'ere n sɔe Hiram n daa bo en mɔlɔsomɔ tiihe la peelesomɔ tiihe la sanlema wo en bote se'em la. 12 Ge Hiram wa ze'ele Tire teŋa na te a behɛ teŋse'ehe te Solomon n daa bo en la, ge teŋhe la ka tegɛ a nini. 13 Te a soke yeti, N zɔ wa, bene teŋhe en bala te ho bo mam wa? Ge a yi' se yu'urɛ Kabul. Se yu'urɛ en bala la zina.a 14 Hiram bo Naba Solomon la sanlema bɔɔrehe kɔbega la pihiyi'.
15 Naba Solomon n dekɛ nɛreba se'em tom Na'ayenɛ Yire la naba yire, ge palehɛ fole se'a n gan' deto la Yerusalem dangoone la teŋasoka la kae, ge mɛ Hazor la Megido la Gezer teŋhe la yele n wana. 16 Saŋa kayema te Mizraim naba Faro daa ta zabɛ mɛ nyaŋɛ Gezer teŋa nyɔ' ka. A daa ko Kanaandoma woo ka poan ge to'e ka te la dɛna a pɔyɔa n ele Solomon la ɛlega bo'olom bala. 17 Te Solomon nya malom mɛ Gezer teŋa wa la Bet Horon teŋa teŋa nɔɔrɛn bɔba la, 18 ge mɛ Baalat la Tadmor teŋhe n boe Yuda pɔgɔtia poan la, 19 ge mɛ teŋse'ehe te lɔgɔrɔ wan biŋera se poan, la yiri toroto la yire teŋse'ehe poan, ge mɛ a suunre n bote ba mɛ' sɛla Yerusalem teŋa la Lebanon teŋa la teŋhe la woo n boe a nu'uhen.
20 Han dɛna nɛresɛba n gee dɛna Amoridoma la Hitidoma la Perizidoma la Hivdoma la Yebusdoma la, ba dagana Israel buuri la, 21 ba kɔma sɛba n wa yee doohe la Israel la n yuun ka nyaŋɛ sagom ba zan'an ge te ba gee teŋa la poan la, bama te Naba Solomon dekɛ ba te ba dɛna yamehe, tona tooma la, la zina wa. 22 Ge Solomon ka dekɛ Israel nɛra te a dɛna yameŋa. Bama dela pɛɛntɛɛnreba la teŋbehega kpɛ'ɛndoma la sɛba n gure en la nɛŋadoma la a yiri toroto nɛŋadoma la sɛba n tukure to la. 23 Bama n de kpɛ'ɛndoma beha a tooma la woo. Ba dela kpɛ'ɛndoma kɔbehe senuu la pihinuu. 24 Naba Faro pɔyɔa la n ta ze'ele David Teŋa la wa'an yire se'ere te Naba Solomon mɛ bo en la poan na la, te Solomon nya palahɛ yire la woo kae.
25 Sugumnɔɔren botan' yuunɛ woo poan te Solomon ne kaanbɛ nyɔ'an la sunma'ahom bo'olom kaanbegɔ daka la te a maalɛ bo Na'ayenɛ la nyɔ'anra ko'ɛnka bɔ'ɔra Na'ayenɛ. Enŋa n tone Na'ayenɛ Yire la poan tooma se'em n bala.
26 Te Naba Solomon mɛ ɔɔnrɔnɔ kanra Ezion Geber teŋa n lɛm la Elat teŋa n boe Edom teŋa, Mɔgɔ Mɔlega nɔɔrɛn la. 27 Te naba Hiram bahɛ te a nɛreba sɛba n mi' ko'kantɛ poan tooma naɛ la Naba Solomon nɛreba te ba tona. 28 Te ba keŋɛ Opir teŋa la ɔɔnrɔnɔ la, tare sanlema bɔɔrehe kɔbehe senaahe la pihiyi' na bo Naba Solomon.