Sheba teŋa naba n de pɔka
10
1 Sheba teŋa naba n de pɔka la n ta wom Solomon n kpe'em se'em Na'ayenɛ poan la, a wa'ana te a magahɛ en behɛ la sɔgɔha en kpe'em. 2 A wa'ana paɛ Yerusalem teŋa na la ya'anɛ, te yogoma toŋe taaba ziira nyɛga la sanlema kekeko la sanlenkuga. Te a wa'ana paɛ Naba Solomon, sɔnhɛ la en, yele en enŋa n tare sɛla woo a suunren. 3 Solomon lerege a yɛla la zan'an bo en, ka gee yele deyena me ka nyaŋɛ pa'alɛ en. 4 Sheba teŋa naba wa n nyɛ mi'ilom sebo n boe Solomon poan la la yire se'ere te a mɛ la, 5 en dite sɛla a tebole zuo daarɛ woo, a kpɛ'ɛndoma la n ne wa'ana zin'ire se'em, la a yamehe la n tone ge yɛ futo seto, la a yamehe se'ehe en bo'ore en daam, la lɔgɔseto te Solomon kaanbera Na'ayenɛ Yire la poan la, a iŋa ki la zan'an.6 Pɔka yele Naba Solomon yeti, Mam wom ho yele se'em n teŋa ha la, hom nyaŋɛ eta yelese'a, la mi'ilom sebo te ho tara la dela sera. 7 Ge mam ka sakɛ sera, han dagana mam paɛ na te n mɛŋa niho nyɛ wa. Ban yele mam sɛla la pon ka paɛ porogerɛ. Ho mi'ilom la ho tarega wa ba' zooe mam wom ho yele se'em la mɛ. 8 Ho nɛreba boe la popeelom poan, ho kpɛ'ɛndoma n tone bɔ'ɔra ho daarɛ woo ho nɛŋan ge wona ho yam sɔnhega wa boe la popeelom poan! 9 Pɛnka dɛna Na'ayenɛ ho Yenɛ la, te a nini tegɛ la hɔ te a dekɛ ho zin'ire Israel na'am gɔŋɔ wa zuo wa denɛ. Na'ayenɛ n nɔŋɛ Israel ka tara ba'ahegɔ la zuo, te a dekɛ hom eŋɛ naba, te ho bahɛ te yelemɛŋɛrɛ la tontɔɔ vom tona.
10 A nya bo Naba Solomon sanlema bɔɔrehe kɔbega la pihiyi' la nyɛga kekeko la sanlenkuga. Nyɛga kekeko ka le ze'ele zen'an wa'ana wo Sheba naba n de pɔka wa n tare ba se'em na bo Naba Solomon la. 11 Hiram ɔɔnrɔnɔ la tara sanlema Opir teŋa na ge zi dɔɔsonɔ zo'e zo'e la sanlenkuga. 12 Naba la dekɛ dɔɔsonɔ tona wa kpa' kura eŋɛ Na'ayenɛ Yire la dɔlɔga zen'enhe la a mɛŋa yire dɔlɔga zen'enhe la poan, ge dekɛ to maalɛ yooma kɔnlɔ. Yehe de daarɛ, dɔɔsonɔ kekeko tona taaba ka le wa'ana, la zina. 13 Naba Solomon bo Sheba teŋa naba wa enŋa n bote a bo en sɛla la ge le bo en sohɛ en sɛla woo la pa'ahɛ, te enŋa la a yamehe lebe kule ba teŋa.
14 Sanlema se'a te Naba Solomon tɔ'ɔha yuunɛ woo dela sanlema bɔɔrehe kɔbehe seyoobe la pihiyoobe la ayoobe, 15 te sɛla te leebedoma la ɔɔnrɔnɔdoma la Arab nadoma la teŋbeheradoma kena na bɔ'ɔra naba la ka pa'ahɛ. 16 Naba Solomon dekɛ sanlema ma'an zan'maalɛ zaba tɛ'ɛlehe kɔbehe seyi'. Sanlema kpila kɔbehe seyoobe n dekɛ maalɛ tɛ'ɛlega woo. 17 A me maalɛ sanlema zaba tɛ'ɛlehe bibihe kɔbehe setan', te tɛ'ɛlega woo tebehom dɛna yolɔ totan', tare bama ta biŋe a na'am zɔŋɔ la n de Lebanon Tiihe Yire la poan.
18 Naba wa dekɛ wɔbegɔ nyɛna ma'an maalɛ na'am koka, takɛ ka la sanlema. 19 Na'am koka wa tara kura ayoobe zɔna ka zuo, te ka dɛlɛga zen'an la dɛna kiliga, te ka loga ayi' la zan'an tara nu'o pagalegɔ zen'an, te gbegenɛ yagom zɛ'a ka loga ayi' la zan'an. 20 Gbegema pia la ayi' yagom zɛ'a kura la zuo, kute woo nɔya ayi' la zuo. Ba ka tabelɛ maalɛ sɛla bala teŋsɛka poan. 21 Naba Solomon n tare sɛla woo nyuura dela sanlema te ba dekɛ maalɛ, te lɔgɔseto woo n boe a na'am zɔŋɔ la n yi'ire Lebanon Tiihe Yire la poan la dɛna salensoma ma'an te ba dekɛ maalɛ. Lɔkɔ ka boe bini te ba dekɛ sanlenpeelega maalɛ. Se'ere n sɔe la, Naba Solomon saŋa la, sanlenpeelega ka tare tebehom. 22 Naba wa tara ɔɔnrɔnɔ ko'kantɛ poan, te to tona la naba Hiram ɔɔnrɔnɔ. Yuuma atan' woo, to ne lebe mɛ na la sanlema la sanlenpeelega la wɔbegɔ nyɛna la ŋmaaŋkpara la niiŋkanra.
23 Naba Solomon panrɛ la lɔgɔrɔ la yam gana nadoma woo n boe teŋparɛ wa zuo. 24 Te teŋparɛ wa zuo nɛreba zan'an ɛɛra ba nyɛ Naba Solomon, la ba wom a yam yɛla la te Yenɛ dekɛ eŋɛ a potɛn'ɛrɛ poan la. 25 Yuunɛ woo, se'em woo n ye'ehe na ne tara la a bo'olom n de sanlenpeelega la sanlema la futo la zaba lɔgɔrɔ la nyɛga la yiri la yiribonhe na bo.
26 Solomon lagahɛ toroto la yiri, te toroto la dɛna tuhure la kɔbehe senaahe, te yiri la dɛna tuha pia, la iyi'. Te a bahɛ ba a yiri toroto teŋhe la poan, ge te ise'e me bɔna la en Yerusalem teŋa poan. 27 Naba wa bahɛ te sanlenpeelega buge Yerusalem wo kuga la, te mɔlɔsomɔ tiihe buge wo kenkanhe n buge se'em zoore tilin la. 28 Solomon yiri ze'ete la Mizraim la Kue teŋa na. Leebedoma n ne da' i bilam na. 29 Ba ne da' yiri toroko Mizraim teŋa la sanlenpeelega kpila kɔbehe seyoobe, te yeho dɛna sanlenpeelega kpila kɔbega la pihinuu. Ba me da'are i bɔ'ɔra Hiti la Aram teŋa nadoma woo mɛ.