Sunma'ahom Bo'olom
3
1 Se'em han yeti a bo sunma'ahom bo'olom, a gaŋɛ nahɔ a nii poan te bo dɛna nagadɔɔ bii duŋyan'aŋa te sɛsɛla ka eŋɛ ka, te a tare wa'an Na'ayenɛ nɛŋan na. 2 A dekɛ a nu'o pagalɛ a bo'olom la zuo ge kɔrɔgɛ ka Sogorɛ nɔɔrɛn. Te Aron la a dayɔɔhe la n de malemadoma la dekɛ ka ziim ka'ahɛ yeele kaanbegɔ daka la loga la zan'an kae. 3 A sunma'ahom bo'olom la poan, a yehe sɛla bini nyɔ' bo Na'ayenɛ. A yehe kaam la woo n pin' duŋa la pooren lɔgɔrɔ la bii ta' la ba la. 4 A yehe sɛyiga la la ba kaam la n lɛm ba la, ge yehe soloŋo la zen'sɛka n lɛm sɛyiga la. 5 Te Aron dayɔɔhe la nyɔ' ba daka la zuo, nyɔ'an bo'olom la n pon paga bugum la n dite la zuo la, nyɔ' bo Na'ayenɛ, tare nyuŋo soŋɔ bo en.6 Se'em han yeti a bo a sunma'ahom bo'olom a ta'an a gaŋɛ duŋa a duŋbɔɔnlɔgɔ poan te a bo Na'ayenɛ, ka dɛna duŋdɔɔ bii duŋyan'aŋa, te sɛsɛla ka eŋɛ ka. 7 A han bɔ'ɔra la pehego, a tare ko wa'an Na'ayenɛ nɛŋan na. 8 A dekɛ a nu'o pagalɛ a bo'olom la zuo ge kɔrɔgɛ kɔ Sogorɛ nɔɔrɛn. Te Aron dayɔɔhe la dekɛ ka ziim la ka'ahɛ yeele kaanbegɔ daka la loga la zan'an mum. 9 A sunma'ahom bo'olom la poan, a yehe sɛla bini nyɔ' bo Na'ayenɛ. A yehe kaam la woo, la zoko'orɛ la. A yehe de doohe poguunleŋa la, yehe kaam sebo woo n pin' ka pooren lɔgɔrɔ la, bii ta' la ba la, 10 A sɛyiga la la ba kaam la n lɛm ba la, ge yehe soloŋo la zen'sɛka n lɛm sɛyiga la. 11 Te malemadaana la nyɔ' ba daka la zuo. Nyɔ'an kaanbegɔ n bala nyɔ' bo Na'ayenɛ.
12 A sunma'ahom bo'olom la han dɛna la boa, a tare ka wa'an Na'ayenɛ nɛŋan na. 13 A dekɛ a nu'o pagalɛ a bo'olom la zuo ge kɔrɔgɛ ka Sogorɛ la nɔɔrɛn. Te Aron dayɔɔhe la dekɛ ka ziim la ka'ahɛ yeele kaanbegɔ daka la loga la zan'an mum. 14 A bo'olom la poan, a yehe sɛla bini nyɔ' bo Na'ayenɛ. A yehe kaam la woo n pin' ka pooren lɔgɔrɔ la, la sɛla woo n ta' la ba la. 15 A yehe sɛyiga la la ba kaam la n lɛm ba la, ge yehe soloŋo la zen'sɛka n lɛm sɛyiga la. 16 Te malemadaana la nyɔ' ba daka la zuo. Nyɔ'an kaanbegɔ n bala nyɔ' bo Na'ayenɛ. Kaam nɛnɔ la woo dela Na'ayenɛ denɛ.
17 Malema ana n boe bo ya buuri saŋa se'ehe woo n kene na la. Ya bɔŋa zen'an woo, da makɛ ya obe duŋa kaam bii ziim.