Boom bo'olom
2
1 Se'em han tara boom bo'olom na te a bo Na'ayenɛ, a bo'olom la dɛna kisoma zom somɔ, te a ka'ɛ kaam la digilom dɔgɔlɛ bo zuo, 2 tare na bo Aron dayɔɔhe la n de malemadoma la zen'an, te malemadaana la tɔnbegɛ bɔ la nu'o, ta' la kaam la, la digilom la, te la dɛna tɛnrega bonɔ, te a nyɔ' bɔ kaanbegɔ daka la zuo bo Na'ayenɛ. Boom bo'olom n bala nyɔ' bo Na'ayenɛ. 3 Boom bo'olom la sɛla n gee la dela Aron la a dayɔɔhe la denɛ. Bo dela boom kaanbegɔ la n nyɔ' bo Na'ayenɛ la n gee. Bo dela toolom bonɔ.4 Ya se'em han tara boom bo'olom na te bo dɛna la zomsomɔ n sɛn' uka poan, maalɛ boroboro n ka tare mi'ihom, eŋɛ kaam yeele a bii kaam boroboro n ka tare mi'ihom la. 5 Se'em han yeti a tara a boom bo'olom la dogɛ la dokɔ poan, a dekɛ zomsomɔ la kaam ge maalɛ boroboro n ka tare mi'ihom. 6 Ŋmɛgɛ ya ba eŋɛ kaam yeele ba. La dela boom bo'olom. 7 Se'em han yeti a taɛ a boom bo'olom la mɛ dokɔ poan, a dekɛ kisoma zom somɔ la kaam taɛ ba. 8 Tare ya ya boom bo'olom disɛka te ya maalɛ ka wana la kena Na'ayenɛ zen'an na. Ne tare na bo malemadaana la, te enŋa to'e paɛ kaanbegɔ daka la zen'an. 9 A wan ne tɔnbegɛ boom bo'olom la poan, tɛnrega bonɔ la nyɔ' daka la zuo. Boom kaanbegɔ n bala nyɔ' bo Na'ayenɛ. 10 Boom bo'olom la sɛla n gee la dela Aron la a dayɔɔhe la denɛ. Bo dela boom kaanbegɔ bo'olom la n nyɔ' bo Na'ayenɛ la n gee. Bo dela toolom bonɔ.
11 Boom bo'olom la n wan dekɛ maalɛ disɛka woo tare na bo Na'ayenɛ la, mi'ihom da bɔna ka poan. Se'ere n sɔe la, ya ka nyɔ'anre mi'ihom bii seerom bɔ'ɔra Na'ayenɛ. 12 Ya ta'an tara mi'ihom la seerom na te ba dɛna ya dideena bo'olom na bo Na'ayenɛ. Ge ya da nyɔ' ba kaanbegɔ daka la zuo bo Na'ayenɛ. 13 Eŋɛ ya yaarom eŋɛ ya boom bo'olom lɔgɔrɔ la woo poan te la dɛna nɔbiŋere la ya Yenɛ la.