Be'em bo'olom
4
1 Te Na'ayenɛ tɔgɛ bo Moses yeti, 2 Yele Israeldoma wa yeti, se'em han nyɔhegɛ tom ganlom Na'ayenɛ nɔɔrɛ, en wan eŋɛ se'em n wana.3 Malemadaana la han tue, tare ganleŋɔ wa'an nɛreba la zuo na, a tare lɔlega te sɛsɛla ka eŋɛ ka wa'an Na'ayenɛ zen'an na, te ka dɛna a be'em bo'olom. 4 A tare lɔle la wa'an sogorɛ la nɔɔrɛn na, dekɛ a nu'o pagalɛ ka zuo, ge kɔrɔgɛ ka Na'ayenɛ nɛŋan bilam. 5 A tare ka ziim la bosebo kɛn' sogorɛ la poan na, 6 la a dekɛ a nu'dibila tom ziim la poan dekɛ miihe Na'ayenɛ nɛŋan sugumnɔɔren boyopɔe, tanɛ se'ere n beŋe Saraa la lebehe ha la nɛŋan na. 7 Malemadaana wa dekɛ ziim la bosebo miihe iila la n boe ko'ɛnka daka la n ze' Na'ayenɛ nɛŋan, Sogorɛ la pooren na la zuo la. Ge ka'ɛ ziim sebo n gee la zan'an yeele nyɔ'an kaanbegɔ daka la n ze' Sogorɛ la nɔɔrɛn na la teŋa. 8 A yehe kaam sebo woo n boe a be'em bo'olom lɔle la poan la. Kaam sebo woo n pin' ka pooren lɔgɔrɔ la, la sɛla woo n ta' la ba la zan'an. 9 A yehe sɛyiga la ba kaam la, la soloŋo la zen'sɛka n lɛm ba la. 10 A yehe lɔle kana wa lɔgɔrɔ seto woo te a yehe sunma'ahom bo'olom lɔle la poan la, te malemadaana wa nyɔ' ba nyɔ'an kaanbegɔ daka la zuo. 11 Ge lɔle la gɔŋɔ la, la ka nɛnɔ la zan'an, ka zuo, na'ma, nyɔɔrɔ la ka potɔ la, 12 a tare bama yehe tiiheŋɔ la yeŋa ha, toolom zen'an la te ba ka'aha bonkanbela baha bini la poan ta nyɔ' tɔ la dɔɔrɔ bonkanbela la n kuge gan'an la zuo.
13 Israel buuri la zan'an han nyɔhegɛ tom ganlom Na'ayenɛ nɔse'ere ge ka baŋɛ, la yan pon ka baŋɛ la ya kelom gee mɛ. 14 Ya han ta baŋɛ yan nyɔhegɛ se'ere la, Israel tiiheŋɔ la zan'an tare lɔle te ka dɛna ba woo be'em bo'olom wa'an Sogorɛ la nɔɔrɛn na, 15 te ya keendoma la dekɛ ba nu'uhe pagalɛ lɔle la zuo Na'ayenɛ nɛŋan bilam ge kɔrɔgɛ ka Na'ayenɛ nɛŋan bilam. 16 Te malemadaana wa tare ka ziim la bosebo kɛn' Sogorɛ la poan, 17 ta dekɛ a nu'dibila tom ziim la poan miihe Na'ayenɛ nɛŋan bilam sugumnɔɔren boyopɔe, toolom tanɛ la n beŋɛ Saraa la lebehe ha la nɛŋan na. 18 A dekɛ ziim la bosebo miihe ko'ɛnka daka la n ze' Na'ayenɛ nɛŋan Sogorɛ la bɔ'pooren na la iila la. Ge ka'ɛ ziim sebo n gee la zan'an yeele nyɔ'an kaanbegɔ daka la n ze' Sogorɛ nɔɔrɛn na la teŋan. 19 A yehe duŋa la kaam la zan'an ka poan nyɔ' bɔ kaanbegɔ daka la zuo. 20 A eŋɛ lɔle kana wa wo be'em bo'olom lɔle la te a eŋɛ se'em la. Bala te malema wan maalɛ be'em duuhego bo ba, ge Na'ayenɛ wan bahɛ ba be'em bo ba. 21 Te malemadaana wa nya tare lɔle la yehe tiiheŋɔ la kenkɛleŋa ha ta nyɔ' ka wo yia lɔle la te a nyɔ' se'em la. Tiiheŋɔ la be'em bo'olom n bala.
22 Kema han nyɔhegɛ tom ganlom Na'ayenɛ a Yenɛ la nɔse'ere ge ka baŋɛ, a gee mɛ. 23 A han ta baŋɛ n nyɔhegɛ se'ere la, a tare botela te sɛsɛla ka eŋɛ ka na, te ka dɛna a bo'olom. 24 A dekɛ a nu'o pagalɛ ka zuo, ge kɔrɔge ka Na'ayenɛ nɛŋan, zen'sɛka te ba kɔrɔna nyɔ'an bo'olom la. Ka dela be'em bo'olom. 25 Te malemadaana la eŋɛ be'em bo'olom duŋa wa ziim la a nu'dibila ta miihe nyɔ'an kaanbegɔ daka la iila la, ge ka'ɛ ziim sebo n gee la yeele ka teŋa na. 26 A nyɔ' kaam la zan'an daka la zuo wo n nyɔ' sunma'ahom bo'olom kaam la se'em la. Bala te malemadaana wan maalɛ be'em duuhego nɛre'ena wa be'em te Na'ayenɛ wan bahɛ a be'em bo en.
27 Ya sɛba woo n gee la, se'em han ya poan han nyɔhegɛ se'ere poan, tue Na'ayenɛ kihise'ere ge ka baŋɛ, a gee mɛ. 28 A daana han baŋɛ a nyɔhegerɛ la, a tare bosa'arɛ te sɛsɛla ka eŋɛ ka na te ka dɛna a be'em bo'olom. 29 A dekɛ a nu'o pagalɛ be'em bo'olom la zuo, ge kɔrɔgɛ ka zen'sɛka te ba kɔrɔna nyɔ'an bo'olom la. 30 Malemadaana la eŋɛ ka ziim la la a nu'dibila ta miihe nyɔ'an kaanbegɔ daka la iila la, ge ka'ɛ ziim sebo n gee la yeele ka teŋa na. 31 A yehe ka kaam la zan'an wo sunma'ahom bo'olom duŋa kaam la te a eŋɛ se'em la, la a nyɔ' bɔ kaanbegɔ daka la zuo, te la wan nyu soŋɔ bo Na'ayenɛ. Bala te malemadaana wan maalɛ be'em duuhego ena daana be'em, te Na'ayenɛ wan bahɛ a be'em bo a daana.
32 A han tare la pehego na te ko dɛna a be'em bo'olom, ko dɛna pesa'arɛ te sɛsɛla ka eŋɛ kɔ. 33 A dekɛ a nu'o pagalɛ ko zuo, ge kɔrɔgɛ kɔ te ko dɛna a be'em bo'olom. A kɔrɔgɛ kɔ zen'sɛka te ba kɔrɔna nyɔ'an bo'olom la. 34 Te malemadaana la eŋɛ be'em bo'olom duŋa la ziim la la a nu'dibila ta miihe nyɔ'an kaanbegɔ daka la iila la, ge ka'ɛ ziim sebo n gee la yeele ka teŋa na. 35 A yehe ka kaam la zan'an wo sunma'ahom bo'olom pehego la kaam la se'em la, nyɔ' bɔ bo'olomsebo te ba dɛna kaanbegɔ nyɔ' bo Na'ayenɛ la zuo. Bala te malemadaana wan maalɛ be'em duuhego nɛre'ena daana be'em, te Na'ayenɛ wan bahɛ a be'em bo a daana.