Mam wan yoon pɛngɛ Na'ayenɛ, la enŋa n de nyaŋera la
15
1 Te Moses, la Israeldoma la zan'an yoon yoonɛ dena wa bo Na'ayenɛ yeti, Mam wan yoon pɛngɛ Na'ayenɛ, la enŋa n de nyaŋera la. Enŋa n kpilom yiri la i ban'areba zan'an bahɛ ko'kantɛ la poan. 2 Na'ayenɛ n de mam paŋa, la mam yoonɛ, enŋa n de mam faanrɛ, mam Yenɛ n wana, n wan pɛngɛ en, mam sɔ Yenɛ n wana, n wan zɛnkɛ a yu'urɛ 3 Na'ayenɛ dela pɛɛntɛɛnra. A yu'urɛ n de Na'ayenɛ. 4 A bahɛ te naba la, la a zaba toroto, la a pɛɛntɛɛnreba la zan'an, yee la ko'kantɛ la poan. Kpɛ'ɛn kanra la te naba la ganhɛ wa'ana la, zan'an, yee la Mɔgɔ Mɔlega ko'om la poan suram. 5 Ko'kantɛ la n di ba, te ba muhe wo kugure la, ta paɛ teŋa. 6 Na'ayenɛ paŋa n tare popeelom. Ho paŋa n ma'ɛn diŋdoma wa. 7 Ho ze'ele la ho na'am kpe'eŋo wa poan, lobe ho diŋdoma bahɛ teŋa. Ho tom la ho sunsunyiim ma'an na, te bo di ba, wo bugum n diti sɔgɔrɔ se'em la. 8 Ho vo'ohe la sabeeo ma'an, te ko'om la bɔkɛ, te ko'mi'inhe kan'aha zɔna saazuo, ge bahɛ teŋkɛ'ɛŋa. 9 Dima la yeti, N wan dige, ba ta nyɔkɛ. N wan fan' ba lɔgɔrɔ tɔnrɛ, te n suunre nya ma'ɛn. N wan foe n so'a n nu'en, kɔrom ba. 10 Hom yeen pebele la sabeeo ma'an, te ko'om la pin' ba, te ba muhe wo kurugo la, sige ko'kantɛ la poan ha. 11 Ane n ane wo hom Na'ayenɛ? Bagarɛ dene n boe ana wo hom? Ane n ane wo hom fa'a naba wa, te a soŋa zɛɛra zuo, te a tona kerehe ana wa taaba? 12 Ho tom la ho paŋa te teŋa la vole ba. 13 Ho nɔŋerɛ kantɛ la te ho tara behera sɛba te ho yɔ to'e ba la. Ho dekɛ la ho paŋa la gu'ura ba, ta paɛ ho ma'an bɔŋa zen'an la. 14 Te nɛreba wom gbe'era. Paleŋ'ɛnka n kɛn' Pilistia teŋadoma. 15 Edom teŋa nadoma nɔya yalegɛ mɛ, te dabeem kɛn' Moab teŋa nɛŋadoma, te Kanaan teŋa nɛreba nyɛlegɛ wo kaam la. 16 Dabeem, la sagaŋɔ n kɛn' ba. Ho nu'o paŋa n bahɛ te ba yare zɛ'a digi digi wo kugure la, gura te hom, Na'ayenɛ nɛreba wa, ta tole ba'ahɛ. Ba ze' la bala, te hom n sɔe nɛresɛba wa, ta tole ba'ahɛ. 17 Hom n tare ba kɛn' na, sɛ ba yagelɛ ho mɛŋa sɔ'ɔlom zoore la zuo. Zen'sɛka te hom eŋɛ ka te ka dɛna ho bɔŋa zen'an la, Saraa sɛka te hom mɛŋa nu'uhe mɛ la. 18 Na'ayenɛ wan dɛna naba la bala yɛ'ɛha.19 Naba la la a yiri la, la i zaba toroto la, la a yiri ban'areba la n sige kɛ'ɛŋa la zuo ko'om la poan na la, Na'ayenɛ bahɛ mɛ, te ko'om la gbi' lagom taaba di ba, ge te Israeldoma la nɛ kɛ'ɛŋa ko'om la teŋasoka yakɛ.
20 Te nɔtɔgɔha Miriam, Aron tanya la, dekɛ senyagarɛ zanlɛ a nu'uhen, te pɔgɔhe la zan'an me degehɛ ba senyagahe dɔla a poore la wa'a. 21 Te Miriam nya yoona yeti, Yoon ya pɛngɛ Na'ayenɛ, enŋa n gane zan'an. Enŋa n kpilom yiri la i ban'areba zan'an bahɛ ko'kantɛ la poan.
22 Te Moses tare Israeldoma wa te ba nya ze'ele Mɔgɔ Mɔlega la nɔɔrɛn, tara tara ta paɛ Sur pɔgɔtia la ha, keŋɛ ko poan dabeha atan' ge ka nyɛ ko'om wan nyu'. 23 Te ba kena kena na paɛ Mara teŋa, nyɛ ko'om, bilam, ge te bo tɔna, kan ta'an nyu'. Bala zuo te ba yi'ira zen'an la Mara la. 24 Te nɛreba la pɔhɛ gɔngelena la Moses yeti, Te nya wan nyu' la bem?
25 Te Moses kaahɛ bo Na'ayenɛ, te Na'ayenɛ pa'alɛ en tia kayema. Te a lakɛ ka bahɛ ko'om la poan, te ko'om la lebege ko' nyɛlegɔ. Bilam te Na'ayenɛ bo ba a nɔze'elego la malema, ge makɛ ba behɛ. 26 Te Na'ayenɛ yele ba yeti, Ya han wan kɛleha Na'ayenɛ ya Yenɛ la nɔɔrɛ soŋa soŋa, ge tona sɛla n de ma'an n nɛŋan, ge eŋɛ ya toba kɛle, kɛleha mam n bo'ore ya nɔse'a la, ge dɔla n malema la zan'an, n kan tare ban' se'ehe taaba te n dekɛ kɛn'ɛhɛ Mizraimdoma la wa'an ya zuo na, mam n de ya tebera.
27 Te ba ze'ele bilam, keŋɛ na paɛ Elim teŋa zen'sɛka te kolehe pia la seyi', la kpa'kpa' tiihe pihiyopɔe bɔna la, tiihom bilam lɛm la ko'om la.