14
1 Te Na'ayenɛ yele Moses yeti, 2 Yele Israeldoma la te ba ŋmɛregɛ lebe pooren tiihom lɛm Pi Hahirot teŋa la n boe Migdol la ko'kantɛ la teŋasoka la nɛŋan na, Baal Zepon nɛŋa na la, tiihom ya dapɔya bɔba la na, lɛm la ko'kantɛ la. 3 Faro wa wan tɛn'ɛhɛ Israeldoma wa yele a suunre poan yeti wana ma'an ba eere la mɔen la ha tuuna yoo yoo, wana ma'an ba bɔrɔge mɛ mɔen la ha. 4 Ge n wan bo en sunkanberɛ te a dige ya na. Te n le ta'an pa'alɛ Faro wa la a pɛɛntɛɛnreba wa, n paŋa, te Mizraimdoma wa baŋɛ, te mam n de Na'ayenɛ. Te Israeldoma wa eŋɛ bala.5 Lan ta lu Mizraim teŋa naba wa tobai te Israel nɛreba wa tole ya la, te Faro wa, la a kpɛ'ɛndoma la potɛn'ɛrɛ le tee la Israeldoma wa, te ba sɔkera taaba yeti, To eŋɛ la bene wa? Tomam n bahɛ te Israeldoma wa keŋɛ wa, ane n wan tona bɔ'ɔra tɔ? 6 Bala te naba wa ihege, maahom a zaba yiri, la i toroto, vaɛ a pɛɛntɛɛnreba pa'ahɛ, 7 ganhɛ zaba toroto kɔbehe seyoobe, vaɛ Mizraim teŋa toroto pa'ahɛ, bahɛ te kpɛ'ɛndoma bɔna to zan'an poan. 8 Te Na'ayenɛ bo Mizraim teŋa naba Faro wa sunkanberɛ, te a digera Israeldoma wa n kene la boraanɛ wa poore. 9 Te Mizraimdoma wa, dekɛ zaba yiri, la i toroto, la i ban'areba, la pɛɛntɛɛnreba zan'an, digera Israeldoma wa, ta pɔnra ban tiihom bɔna ko'kantɛ la nɔɔrɛn na, lɛm la Pi Hahirot n boe Baal Zepon nɛŋan na la.
10 Te Faro la a nɛreba la n ta pɔnra ba na la, te Israeldoma la gorege zuo, te Mizraimdoma la n bala digera ba na, te dabeem kɛn' ba, te ba kaahɛ bo Na'ayenɛ, 11 ge yele Moses yeti, Yɔɔrɔ n ka boe Mizraim teŋa poan n sɔe te ho tare to yehe ka'lam na te to ki mɔen wa? Hom tare to Mizraim teŋa poan yehe na wa, la bɛɛ? 12 Dagɛ wana zuo te to daa pon yele ho te ho bahɛ to baanlam te to tona bɔ'ɔra Mizraimdoma la? La wan ane ne soŋa te to tona bɔ'ɔra Mizraimdoma la, nyana to ki mɔen wa.
13 Te Moses yele nɛreba la yeti, Da zote ya dabeem. Ze' ya kaŋkaŋe, ge ya wan nyɛ Na'ayenɛ faanrɛ la zina. Behɛ ya, Mizraimdoma sɛba te ya nyɛta ba la ya nini zina wa, ya kan le malom nyɛ ba le yɛ'ɛha. 14 Na'ayenɛ wan zabɛ bo ya, yamam yeen ana baanlam.
15 Te Na'ayenɛ soke Moses yeti, Bene te ho kɛla bɔ'ɔra mam na? Yele Israeldoma la, te ba yeen kena nɛŋa. 16 Hom zɛnkɛ ho doore la, tɛɛn ho nu'o pa'alɛ ko'om la, ge bo wan yelege bo yi' te Israeldoma wa nɛ kɛ'ɛŋa ko'om la teŋasoka tole. 17 N wan bo Mizraimdoma la sunkanberɛ, te ba dige ya doohe sige ko'om la poan na, te n doohe bala nyaŋɛ Faro wa, la a pɛɛntɛɛnreba la, la a zaba yiri toroto la, la a yiri ban'areba la, zan'an, te n yu'urɛ nyɛ pɛnka. 18 N han sagom Faro la, la a pɛɛntɛɛnreba la, la a zaba yiri toroto la, la sɛba n tukure to la, nya tare pɛnka na bo n yu'urɛ la, Mizraimdoma wa wan baŋɛ te mam n de Na'ayenɛ.
19 Bilam, te Yenɛ soŋora se'em n ne bɔna Israeldoma wa nɛŋan te ba kena la, tee lebe ba pooren na, te saŋgbanɛ la me bahɛ de ne bɔna ba nɛŋa la, ge tee lebe ba pooren na, 20 beŋe Mizraimdoma pɛɛntɛɛnreba, la Israeldoma pɛɛntɛɛnreba la teŋasoka. Saŋgbanɛ la pin' bala gbatere, ge ne nɛɛ bugum yu'uŋɔ, te ba se'em ka lɛm a tadaana. 21 Te Moses tɛɛn a nu'o pa'alɛ ko'om la. Te Na'ayenɛ bahɛ te saabeeokeŋɔ ze'ele dapɔya bɔba na lobe, kan'ahɛ ko'om la bahɛ ke, ge bahɛ ke, ge te teŋkɛ'ɛŋa gan'an ko'om la teŋasoka, 22 te Israeldoma wa sige nɛɛra kɛ'ɛŋa yakera, ge te bo gu' gan'an ba zuɔ la gɔbega.
23 Te Mizraimdoma la me digera ba na, naba Faro la a yiri la i toroto la a yiri ban'areba la zan'an wa'ana sige bini. 24 Bolika, te Na'ayenɛ la n ne dɛna bugum yu'uŋɔ, ge dɛna saŋgbanɛ wontɛɛŋa la, suure behɛ Mizraim teŋa pɛɛntɛɛnreba wa na, dekɛ dabeem tuunle ba na. 25 Bahɛ te ba toroto la na'ma ka tana viliŋera, te kenɛ kpe'em bo ba. Te Mizraimdoma wa nya sɔɔlena bɔ'ɔra ba mɛhe yeti, Bahɛ ya te to bahɛ Israeldoma wa ge lebe, Na'ayenɛ n zabere tɔ bɔ'ɔra ba.
26 Te Na'ayenɛ yele Moses yeti, Tɛɛn ho nu'o tɔ ko'om la, te bo lebe naɛ taaba, di Mizraimdoma wa, la ba yiri toroto la, la ba yiri ban'areba la zan'an. 27 Te Moses tɛɛn a nu'o tɔ ko'om la, ta yɛ'a yu'uŋɔ, te ko'om la lebe naɛ taaba wo bo ne pon ana se'em la. Te Mizraimdoma la nya zegera te ba zɔ, te Na'ayenɛ bahɛ te ko'om la di ba. 28 Ko'om la lagom la taaba, libe Mizraimdoma zaba toroto la, la yiri ban'areba la, la pɛɛntɛɛnreba sɛba woo n dige Israeldoma la na sige ko'om la poan la zan'an, te ba ayena me ka vo'e. 29 Ge Israeldoma la, nɛ la kɛ'ɛŋa ko'om la poan, dooe, ge te bo gu' gan'an ba zuɔ, la gɔbega, ge te ba yakera.