Te ho ihege tare tɔ yehe wa'an Sin Pɔgɔtia wa poan na te to zan'an vibe bahɛ yoo
16
1 Te Israeldoma wa zan'an ze'ele Elim teŋa, le pɔhɛ kenɛ, keŋɛ ta paɛ Sin Pɔgɔtia la boe Elim la Sinai teŋhe teŋasoka la poan. Ban ze'ele Mizraim teŋa poan yehe na, ba ŋmarehe seyi', dabeha pia la anuu daarɛ n bala, te ba paɛ zen'kana wa poan na wa. 2 Te Israeldoma bɔbɔgɔ wa zan'an nyɔna Moses la Aron mɔen la ha. 3 Ba nyɔyɔm la dela, Na'ayenɛ han pon ko ne tɔ Mizraim teŋa la poan ha, la ane ne soŋa. Bilam, te daa ne gbi'ile la nɛnɔ la dogorɔ bahɛ, ge zin'an kae tɔ, dita di sɛka woo te to bɔta tegera, te ho ihege tare tɔ yehe wa'an Sin Pɔgɔtia wa poan na te to zan'an vibe bahɛ yoo.4 Te Na'ayenɛ yele Moses yeti, N wan ni dia bahɛ na, te daarɛ woo, nɛreba wa ne yehe ta vaɛ ba wan di se'em daanden daarɛ la ma'an. N wan eŋɛ wana, la n makɛ ba behɛ nya ba wan doohe mam pa'alegɔ la bii ba kan doohe. 5 Ge dabeha ayoobe daarɛ la, ba ne vaɛ ba ne pon vaara se'em daarɛ woo la sugumnɔɔren boyi' ze'ele.
6 Te Moses la Aron yele Israeldoma wa yeti, Zina zanɔɔrɛ, ya wan seren baŋɛ te Na'ayenɛ n tare ya ze'ele Mizraim teŋa poan yehe na. 7 Yɛ'ɛha beere bolika, ya wan nyɛ Na'ayenɛ tebehom n ane se'em. Se'ere n sɔe la, a wom ya nyɔyɔm la te ya nyɔna en la mɛ. Tomam wa dela bane? Te ya nyɔna bɔ'ɔra tɔ? 8 Te Moses le yele pa'ahɛ yeti, Na'ayenɛ n wom ya nyɔyɔm la zuo, a wan bo ya nɛnɔ zanɔɔrɛ, te ya ɔbera, ge bɔ'ɔra ya dia te ya dita tegera, ge tomam wa dela bane te ya nyɔna bɔ'ɔra wa? Ya nyɔyɔm la ka nyɔne la tomam, ya nyɔne la Na'ayenɛ.
9 Te Moses yele Aron yeti, Yele Israeldoma wa yeti, ba vuruge ba mɛhe paɛ Na'ayenɛ. Se'ere n sɔe la, a wom ba kaahega la.
10 Te Aron n boe bini tɔgɔra bɔ'ɔra Israeldoma wa la, te ba gorege ba zuto behɛ tɔ mɔen bɔba ha, nyɛ te Na'ayenɛ soŋa nɛɛ saŋgbanɛ poan na. 11 Te Na'ayenɛ yele Moses yeti, 12 Mam wom Israeldoma wa nyɔyɔm la, yele ba yeti, Yentule han ta ana vɛɛn sigera ha, ya wan obe nɛnɔ, bolika me, ya di dia tegɛ, bala te ya baŋɛ te mam n de ya Na'ayenɛ, la ya Yenɛ.
13 De daarɛ zanɔɔrɛ mea, te kɔrɔhe ɛnkɛ na lu perɛ ban tiihom zen'an la, ta yɛ'a bolika me, te pika pin' ba tiiheŋɔ zen'an la tap. 14 Pika la n ta yelegɛ mɔen mea ha la, ba nyɛ te sɛla n pelege wo gunguno la, gan'an zen'an woo. 15 Te Israeldoma wa nyɛ ba, sɔkere taaba yeti, bana wa dela bem? Se'ere n sɔe la, ba ka tabelɛ nyɛ ba. Te Moses yele ba yeti, ba dela dia te Na'ayenɛ mɛŋa dekɛ bo ya te ya dita. 16 Ge Na'ayenɛ n bo nɔse'ere doohe dia wa poan dela, nɛra woo ne vaɛ n wan ta'an di se'em, sogorɛ woo poan, nɛreba la n zone se'em bɔna bini la, nɛra woo ne vaɛ wanɛ me'en.
17 Te Israeldoma wa eta bala, te sɛba vaara kekeko, te sɛba me vaara finfiinhe. 18 Ba han ne vaɛ ta paɛ yire dekɛ wanɛ makɛ, sɛba n ne vaɛ zo'e la ne ka makɛ te sɛla gee, bii sɛba n ne vaɛ fiin la, ta makɛ te la pɔ'ɛ. Nɛra woo ne vaɛ la n bote se'em.
19 Te Moses yele ba yeti, Da ne di ya ge gee ka la fiin me ze'ele yiligɛ beere. 20 Te basɛba ka kɛleha Moses n yele ba se'em la, ge ne gee ba ze'ele yiligɛ beere, te zunzunya kɛn' ba, te ba fɛn'ɛra. Te Moses sunsunya nyie la ba. 21 Bolika woo, nɛra woo ne vaɛ la n bote se'em ze'ele, wontɛɛŋa ne han tulugɛ, sɛba woo n gan' la, ne nyɛlegɛ mɛ. 22 Dabeha ayoobe daarɛ la, ba ne vaɛ gaŋɛ ba ne vaara se'em daarɛ woo la mɛ, ba ne vaɛ la wama ayi' ayi' nɛra woo, te nɛŋadoma la ta wa'ana ko'ohe Moses ban ete se'em. 23 Te Moses mɔɔlɛ bo Israel nɛreba wa yeti, Na'ayenɛ n bo a nɔɔrɛ se'em n dela. Beere dela Vo'ohogo Dabaherɛ, de dela Na'ayenɛ ma'an dabaherɛ. Bala zuo la, kiim ya yan wan kiim sɛla, ge dogɛ yan wan dogɛ sɛla. Yan di ge gee sɛla woo la, ya dekɛ ze'ele soŋa, gura beere.
24 Te ba ta di, ge gee ze'ele yelegɛ beere, te ba ka fɛn'ɛra, bii zunzunya kɛn' ba. 25 Te Moses yele ba yeti, Di ya di kana zina. Se'ere n sɔe la, zina dabaherɛ wa dela Na'ayenɛ ma'an dabaherɛ. Ya kan nyɛ dia la samana zuo zina. 26 Dabeha ayoobe te ya wan yɛha vaara dia la, ge dabeha ayopɔe daarɛ la n de Vo'ohogo Dabaherɛ la, ka kan bɔna.
27 Te nɛreba la basɛba, sina ge ihege dabeha ayopɔe daarɛ la yehe te ba ta ɛ vaɛ dia la, ge ban keŋɛ la, ba ka nyɛ sɛsɛla. 28 Te Na'ayenɛ soke Moses yeti, Wane ma'an te nɛreba wa wan nana mam n bo'ore ba n nɔse'a wa la n pa'alegɔ wa? 29 Behɛ ya, Na'ayenɛ bo ya la Vo'ohogo Daarɛ. Bala zuo te dabeha ayoobe daarɛ la, a ne bo ya dabeha ayi' dia la. Nɛra woo ne yee a bɔŋa zen'an dabeha daarɛ la. Nɛnɛra da yehe keŋɛ zen'an. 30 Bala te nɛreba la nya vɔ'ɔha dabeha ayopɔe daarɛ la poan.
31 Israeldoma yi'ire dia la la *manna. Ba dela bonpeela, ana wo tiia la, ge te ba zan'anhom ana wo seerom te ba dekɛ kiim man'aherɛ la.
32 Te Moses yele ba yeti, Na'ayenɛ n bo nɔse'ere dela, vaɛ ya *manna dia wa la wola me'en, dekɛ ze'ele gura ya buuri wa saŋa se'ehe woo n kene na la, te ba nini me ta nyɛ di sɛka te n daa bo ya mɔen ha, se'em ma'an te n tare ya ze'ele Mizraim teŋai yehe na la. 33 Te Moses yele Aron yeti, dekɛ kanleŋa vaɛ *manna dia wa la wola me'en ka'ɛ eŋɛ ka poan. Dekɛ ka kpe'ele Na'ayenɛ nɔbiŋere daka, te ka zɛ'a bilam gura buuri wa saŋa se'ehe woo n nan kene na la. 34 Doohe la Na'ayenɛ n bo Moses a nɔɔrɛ se'em la, te Aron dekɛ *manna dia la ze'ele kpe'ele Na'ayenɛ tooma danlehom la, te ka bɔna wuuha gura buuri la saŋa se'ehe woo n nan kene na la.