Nínive tomarapijiwi najamatabëcuenepënëyorota Diosojawabelia
3
Bajaraxuacujinae, icatsia Jehová jumaitsi cotocaewijawa Jonás-jawabelia. Jumaitsitsi mapacueniaje:2 —¡Nonotapunare! ¡Ponare Nínive tomaraxanetojawabelia, netsipaebinexa paliwaisi xanë cajumaitsi tsanetsi! —jai Jehová.
3 Nexata, Jonás jumecowënëta. Pona baja Nínive tomarajawabelia, pacuenia Jehová itorobatsi pexanaenexa. Nínive tomara bitso pinijitomaraxaneto ayaicuenia. Cuenecaëjëpa peponaejawa acueyabi pamatacabibeje bajarapatomara pe-epapitsapaenexa petaxuta. 4 Jonás baja itsa junua bajarapatomarajawata, nexata junua caematacabicuenia petsipaebanajetarucaenë. Nexata, bajaraponë pewawajaicuenia jumaitsi tsanajetarucae ayaijumeta:
—¡Cuarenta pamatacabibejecujinae Dioso werebiabiana Nínive tomarapijiwi penaneconitsixae! —jai tsanajetarucae Dioso pewënëta.
5 Nexata, bajarapatomarapijiwi, ayaijamatabëcuenewi, beweliajamatabëcuenewi-ata, jumexaniatane Dioso. Nexata, penajamatabëcuene-itajëtsinexa itsajamatabëcuene pexainaejawa pibisiacuene pexanaejawamiwecua, bajarapamonae itoroba daxita penajanixaniawaetsinexa, pexaeyaniwa pexaejawa, bajarapacuenia penaxatabinexa pecatsequecaepananëtsi. 6 Belia, Nínive tomara pewetsinë jumetane Jonás petsipaebanajetarucaeliwaisi. Nexata, bajaraponë-ata wecuanonotapuna pe-ecabiabitronowecua, pe-ecaenexa ipumanajawata, penajamatabëcuene-itajëtsinexa itsajamatabëcuene pexainaejawa pexanaeneconimi yabara. Bajarapacuenianua najonotaxuaba naniawelia penaxatatecaejawanë penajuma-acatsinexa pecatsequecaepanatsi. 7 Bajaraxuacujinae, bajaraponë pepopeyanacua-ewetsinë najua-itoroba peyajawanacuenebiwi-ata pepaebanajetarubenaenexa daxita Nínive tomarapijiwijawabelia pacuenia exanaejitsia. Nexata, itoroba mapacueniaje: «Caejiwi-ata apobexae pexaejawa. Apobe-apaenua mera. Bajarapacuenia apoberajutsinua mera, pexaejawa-ata pijadajubijawabelia. 8 Daxitajiwi naxatabiana pecatsequecaepananëtsi. Bajarapacuenia pijadajubimonae-ata juma-acabiana bajaraxuanëta. Caejiwi canacujitsia Diosojawabelia wajëcaena daxitajamatabëcuenesaëta. Bajarapacuenia copabiananua papibisiacuene exanawanapa, pebejiobia-exanawanapaejawami itsamonae. 9 Bajarapacuenia itsa exanaejitsipatsi, belia nexata Dioso najamatabëcuenecanawiatsipa wajanacananeconitsia-exanaejawaminexa. Nexata, bajarapacuenia meta Dioso jamatabëcuenecaewiana wajanacabara-anaepanaejamatabëcuenemi, wajanacananeconitsia-exanaejawaminexa wajatëpaejawata», jai pitorobijawata. Jejai. Pona baja petsipaebanajetarucaenexa.
10 Dioso itsa tane bajarapacuenia bajarapatomarapijiwi pexanaejawa, pecopabanajetarubenaejawa papibisiacuenemi exanawanapa, nexata bajaraponë najamatabëcuenecataita, apopenaneconitsia-exanaejawanexa pacuenia picani tonajumecopata Jonás-jawabelia.