Jonás anaepana Dioso apopenaneconitsia-exanaexae Nínive tomarapijiwi
4
Jonás bitso apotsitaxanepanaetsi, itsa yapëtane Jehová pitaxutotsoniataejawa Nínive tomarapijiwijawabelia. Bajaraxuata, bara-anaepana bitso ayaicuenia. 2 Nexata, wajëta Jehovájawabelia mapacueniaje:—¡Nejumetaema mapacueniaje, Jehová! Xanë pacujinae tajanacuata abaxë ponaponajë, bajarapacuenia xanë cajumaitsitsi pacuenia xamë exanaejitsiamë. Bajaraxuata, xanë picani nayajiwinajetabijirawajë bepijia Tarsis nacuayabelia, tsipaji xanë yapëtaniji, Diosomë, cajena jiwi nitaxutotsoniataeyabiabinë, jiwi niasiwanënua. Bajarapacuenia xamë bepijianua aponianaepanaenë. Yapëtanijinua pacuenia xamë niasiwajamatabëcuene nexainaenëxae, naneconitsia-exanaeyapaebi-atamë penaneconitsiwi icatsia najamatabëcueneliwaisicataitsijitsiamë naneconitsia-exanaenejewamë. 3 Bajaraxuajitsia Jehová, ajena cawajëtatsi tanebeyaxuabinexamë. Xanë jitsipajë tatëpaejawa taponaponaejawawecua —jai pewajëtsijawata.
4 Itsiata baitsi jane, Jehová jumecanawiatatsi:
—¿Catsitaxanepana tsaja xamë nianaepanaejawa mapacueniaje? Apoxanepanae cajena —jaitsi.
5 Bajaraxuacujinae, Jonás pitsapa peponaponaenexa pemutuabereca bajarapatomarawecua. Nexata, bajarajota Jonás nacuenebanuta naemaxëranabobërëtoyo, bajarapa-itacaënaejawata pe-ecaenexa. Bajaraponë ewetecabiaba peyapëtaenexa xua bajarapatomarapijiwi tocopiapatsijitsiatsi. 6 Jehová Dioso xuacujinae tojuwia-exana pijabobërëtomuxuneneta ricinonaeyo. Bajaraponaeyo xaina bitso pexania-itacaënae. Nexata, bajaraponë bajarapa-itacaënaebëxëpanata ecabiaba, pejamatabëcuenexanepanaponaenexa. Nexata, Jonás bitso siwajamatabëcuenebarëya bajarapa-itacaënaejawa. 7 Itsiata baitsi jane, itsamatacabijawabelia bajayacunua Dioso icatsia tocopata tolenaito bajaraponaeyo pexaenexa. Nexata, bajaraponaeyo baja tsaquena. 8 Nexata, itsa juameto pitsapaina, Dioso icatsia copatsina pemutuawetsina bitso piatajujowibo. Nexata, itsa Jonás bitso icotia matatsajawaponatsi, bajaraponë bitso icotia yajamatabëfaena. Jamatabëyatëpanua. Nexata, jumaitsi:
—Xanë netoxanepana tatëpaejawa ta-asaëtsaponaponaejawawecua —jai bajaraponë.
9 Nexata, Dioso jumecanawiatatsi:
—¿Catsitaxanepana xamë nianaepanaejawa pecawecuatsaquenaexae ricinonaejawa? —jaitsi bajaraponë.
—Jãjã, netsitaxanepana cajena bajarapacuene, tsipaji xanë jamatabëyatëpajë taca-anae —jai Jonás.
10 Nexata, icatsia Jehová jumaitsi Jonás-jawabelia:
—Xamë picani apo-ubimë bajaraparicinonaejawayo. Bajarapacuenianua apowitsabia-exanaemë. Bajaraponaejawayo juwina merawi. Bajarapacuenia icatsia itsamerawijawabelia tsaquena. Bajaraponaeyo naxaniaba saya caematacabicuenia. Xamë itsiata bajaraponaeyo itaxutobejiobiataneme. 11 Bajarapacuene matatoxenetsia netoxanepana xanë ta-itaxutotsoniataejawa Nínive tomarapijiwi, tsipaji bajarapamonae matatoxenetsia piajamatabësaëwi. Orijibianua bitso pinijitomaraxaneto itsajota jinawanapa ciento veinte mil pajiwibeje bepejewaxijamatabëcuenewi, pamonae apopecanaëjëtsiwi, bajarapacuenia dajubi-ata ayaibitsaëto —jai Jehová Jonás-jawabelia.