Jonás dujuainë-ënëjawawerena wajëteca Jehovájawabelia
2
Nexata, Jonás wajëteca Jehovájawabelia dujuainë-ënëjawawerena.2 Jumaitsi:
«Cawajëtatsi tajamatabëcuenebëjaijawata Jehovámëjawabelia, nexata xamë itsiata nejumetaneme. Bajarapacuenia xanë tatëpaejamatabëcuene tayapëtaejawata, tacawajëtsijawata xamëjawabelia nejumetaneme.
3 »¡Nexuaremeca manuamenetuatuajëjawareca, bitso tajëjawareca! Nexata, manuamenesaëjawa malatacaxanetota nemataquiobaba, xamë tanetsi-itorobicueniamë tanetocopiapatsinexa. 4 »Bajarapaepatota, nasiwajamatabë-itsinë: ‘Jehováwecua xanë netsita tanenawecuaxuabinëmi tsaponaponae. ¿Icatsia, meta taenajë nijatemplobo?’ jamatabëjanë.
5 »Bajarapamanuamene nemataquiona daxitanënë. Nexata, bajarapamanuamenetuatuajëareca necajoneca. Bajarapacuenia tanecawotsijawata, manuamenepijithamanajawanë nematacacëba.
6 »Bubunanajetarucajë, tapatsijawabereca petsutonëtabujawabereca menebëxëpana. Pacuenia hierronaebonëta yacaranatabiaba penaneconitsiwi pejebabiabibota pepitsapaeyaniwa, bajarapacuenia daxitamatacabijawabelia tatëpaejawanexa neyacaranata icatsia ta-asaëtsaponaponaejawayaniwa. Itsiata baitsi jane, xamë Jehová Diosomë, necapanepame tatëpaejawaminexawecua.
7 »Paepatota natoyapëtaniji tatëpaejawanexa, bajarapaepatota canajamatabënapitatsi Jehovámë. Nexata, ne-ecaenë nijatemplobojawata, tacawajëtsijawata nejumetaneme nijatemplobojawawerena.
8 »Pamonae jumapecataeya pexanaenëanëjawabelia siwanajamatabëcuenecopatabiaba, bajarapamonae nayamaxë-itojorobabiaba natsiquejemajawanëta. Bajarapacuenia pexanabiabixae nacofënëba xamëjawabelia piajamatabësaënexa. Aponatotaenua nitaxutotsoniataeyabiabijawa.
9 »Itsiata baitsi jane, xanë pexaniajamatabëcuene tacarajutsijawata, carajutabiabianatsi dajubi tajuitsiaya xamëjawabelia. Najumeliwaisicowë-exanaenajë pacuenia baja xanë najumecapanepaeya cajumaitsitsi. Xamë Jehovámë, caenëmë, cacuenecaëjëpa jiwi necapanepaejawa», jai Jonás pewajëtsijawata.
10 Nexata, Jehová dujuainë itoroba Jonás peyacabinexatsi irajawabelia.