Jonás
Jonás pona saicayajawabelia, Nínive tomarajawabelia peponaeyaniwa, Jehová pejumecowënëtsiyaniwa
1
Itsamatacabi Jehová yapëtaeya-exana Jonás-jawabelia, Amitai pexënato, xuajitsipa peto-exanaenexatsi. Nexata, jumaitsitsi mapacueniaje:2 —¡Nonotapunare! ¡Ponare Nínive tomaraxanetojawabelia, netsipaebinexa bajarapatomarapijiwijawabelia pacuenia xanë naneconitsiaya tawerebiabijawanexa, tsipaji bajarapamonae pijaneconi xanë yapëtaniji! —jai Jehová Jonás-jawabelia.
3 Itsiata baitsi jane, Jonás pejumecowënëtsiyaniwa Jehová, wecuanajetabijirawa saicayajawabelia. Nexata, bajaraponë pona Jope tomarawëpajawabelia. Bajarapawëpajawata caxitajaraba barco, peponaemonexa Tarsis tomarajawabelia. Nexata, bajaraponë junua bajarapamo-ënëta penatomatamotsinexa pijanamuto, bajarapamota peponaewi pepëta penaponaenexa Tarsis-jawabelia tajë Jehováwecua. 4 Itsiata baitsi jane, bajarapamonae peponaecujinae, itsa baja tajë najetarubena, Jehová copata bitso ayaicuenia pinijijowiboxaneto. Nexata, bajarapamanuamene bitso pinijimalatacaxanetonë. Belia, bajarapamalatacaxanetota peponaebarcomota jamatabëyasarabiaxuabatsi. 5 Nexata, bajarapabarcota penacuenebiwi bitso ayaicuenia junawa. Nexata, bajarapamonae caejiwi canacujitsia wajëcapona pijawiriadiosowijawabelia, bajarapadiosowi pecapanepaenexatsi. Belia, bajarapamonaenua penereca meniareca pecaponaejawanëmi, bajarapamo pefafanaenexa. Jonás jowibonejewa abaxë runareca bajarapamotuatuajë-ënëabereca. Bajarajotareca, majitanuca bitso ayaicuenia. 6 Nexata, bajarapamo penamatacaitorobinë daxitacuenejawalia siwarunareca itsajotareca Jonás majitanuca. Jumaitsi bajaraponëjawabelia:
—¿Dexamë bajarajota xua exananucame piaitamajitsiyainë? ¡Namatacore baja, nijaDiosojawabelia pijinia nenawajëcaenexa! Belia, bajaraponë xamë cajumecowënëtsipa, wajanacabejiobiataexae wajanacacapanepaenexa malatacata wajatëpaeyaniwa —jai.
7 Itsiata, malataca tsiteca bitso ayai. Nexata, bajarapamota penacuenebiwi najumaitsaponae ëpamonae: «Nexata, wajanatoya-ëjëbicuenia exanaenatsi, bajarapacuenia wajayapëtaenexa pajiwi pejamatabëcueneta bajarapapitsi-ayaicuene nacatocopiapata», najai. Nexata jane baja, bajarapamonae pijacujirucuenia nato-ëjëbapona, peyapëtaenexa ponë penaneconitsinë. Bajarapaepatota, Jonás tsijopatsi penaneconitsinëcuenia. 8 Nexata, bajarapamonae jumaitsitsi:
—¡Panetsipaebare! ¿Dexuajitsia mapitsipibisiacuene nacatocopiajopaje? ¿Detsa pitsicuene xamë nenacuenebaponaponaenë? ¿Detsa werena nenajetarucaenë? ¿Detsa panacuapijinëmë? ¿Detsa pawirianëmë? —jai bajarapamonae.
9 Nexata, Jonás jumecanawiata:
—Xanë raja hebreowiyajuwënënë. Xanë raja Jehová yaiyataeyacuenia tatonacuenebaponaponaenë. PaDioso exana daxita athëbëpijicuene, mapamanuamenepijicuene, bajarapacuenia irapijicuene-ata, bajarapaDioso tatonacuenebinë —jai.
10-11 Nexata, Jonás tsipaeba penajuanajetarubenaewijawabelia bajarapamota pewecuanajetabijirawijawa Jehová. Nexata, bajarapamonae itsa bajarapacuenia jumetane pewecuanajetabijirawijawa Jehováwecua, bitso junawa ayaicuenia. Nexata, bajarapamonae itsa tane bitso ayaicuenia malataca tsaponaejawa, yanijoba bajaraponëjawabelia:
—¿Detsa xuajitsia nexata xamë bajarapitsicuene exaname? ¿Detsa xua nexata paxanë pa-exanaenajë xamëjawabelia mapamalatacaje pewainae-ecaenexa? —jai.
12 Nexata, Jonás jumaitsi:
—¡Panexuaremeca bajarapamanuamenejawareca! Nexata, bajarapamalataca ajibi tsane, tsipaji xanë tajaneconijamatabëcuene bajarapa-ayaimalatacaxaneto nacatocopiapata —jai Jonás.
13 Nexata, bajarapabarcota penacuenebiwi picani yawenonaeya waeta pecowëyabelia ayaicuenia, pepatsinexa irajawabelia. Itsiata baitsi jane, bajarapamonae apocuenecaëjëpaetsi, tsipaji bitso bajarapamanuamene malatacaxaneto tsanajetarucae pewajënaeyabelia. 14 Nexata, bajarapamonae wajëca Jehovájawabelia. Jumaitsi:
—¡Jehovámë, pëtsa paxanë panetëpaeya-exaname maponë pejamatabëcuene! ¡Maponëje itsa paxuabiarecajë pianeconijibinë, pëtsa panetaneme bepatananeconitsiwicuenia bajaraponë pejamatabëcuene! Xamë tsipaji Jehovámë exaname pacuenia jitsipame —jai pewajëcaejawata Jehovájawabelia.
15 Bajarapacuenia pewajëcaecujinae, nexata jane baja Jonás xuabarecatsi meniareca. Nexata, bajarapaepatota malataca wainae-ecajunua. 16 Bajarapabarcota penacuenebiwi bajarapacuenia petaejawata, bitso cujunawiaya tane Jehová. Nexata, pesiwanajamatabëcuene-itajëtsinexa peyaiyataejawa, bajarapamonae tajuita dajubiyo Jehová pewënëta. Bajarapaepatotanua, najumecapanepaeya naliwaisicajunua bajaraponëjawabelia bajarapacuenia peto-exanawanapaenexa pewajënaeyabelia.
17 Itsiata baitsi jane, bajarapaepatota Jehová tsiwajënaexaniawaeta pinijinëxaneto dujuainë, bajaraponë Jonás pequijoninexatsi. Nexata, Jonás bajarapadujainë ënëta boca acueyabi pamerawibeje, bajarapacuenia acueyabi pamatacabibeje.