Jehová junata Judá nacuapijiwi penajamatabëcuenepënëyorotsinexa bajaraponëjawaberena
2
1-11 […] 12 Joel pewajunupaebijawata Jehová peyapëtaeya-exanaejawamitsi penaneconitsia-exanaejawamitsinexa, jumaitsi Judá nacuapijiwijawabelia:—Jehová pacajumaitsi: «¡Bajarapitsicuene panetaeyaniwa panejamatabë-ëthëtojawawetsina panajamatabëcuenepënëyorore xanë Jehovánëjawaberena! Panajamatabëcuene-itajëtsianame panenasiwanajamatabëxainaecuenia pibisiacuene pane-exanaejawami yabara, pexaejawa panenatsi-atsobijawata, panenasiwajamatabënuejawata, panenajamatabëxainaejawatanua», pacajai Jehová.
13 »¡Tajamonae, pëtsa saya naniawelia panenaxatabijawa panamipabëtitinaxuabame papecatsi-atanejamatabëcuene panijaneconi yabara! Biji rajane, pepacuene panejamatabë-ëthëtowetsina bepacatsi-atane panijaneconi panexainaejawa. ¡Bajarapapecatsi-atanejawata panajamatabëcuenepënëyorore Jehová panijaDiosojawabelia, tsipaji bajaraponë wajanaca-itaxutotsoniataenë, asiwaya wajanacataenënua! Bajaraponë bepijiayo apowajanacabara-anaepanaenë wajaneconi yabara. Nexata, najamatabëcuenecataitabiaba petsi-atanejawamitsi wajanacananeconitsia-exanaeyaniwa, wajaneconi wajaxainaewimi-ata picani. 14 Bajarapacuenia nexata itsa pa-exanaename, belia bajaraponë jamatabëcuenecaewijitsipa papecananeconitsia-exanaejawaminexa, juya pexaniacuene papecarajutsinexa pane-ubijawanë papecatonaxaniabinexa, paxamë juya panerajutsinexa ofrendacuenia Jehovájawabelia pexujawanë, uvacuaibarëmeneranë-ata.
15 »¡Nexata, pa-obare trompeta Sión-tsutojumawetsica, pejumetaewi penacuenexaniawaetsinexa! ¡Nexata, itorobare pexaejawa penatsi-atsobinexa pijaneconijamatabëcuene! Itorobarenua daxita penacaetuatsinexa Jehová pewënëta. 16 ¡Pajunare daxita Dioso pejumecowënëtsiwi! Nexata, daxitajiwi barëpatsiana perujujiwixi, pejewaxi, mitopiapaenacuebi-ata. Bajarapacuenia pejananacojiobiwi-ata namatacobiana penapatsinexa. Daxita bajarapamonae panacaetuatsia-exanaename Sión-jawata, penacuenexanetsinexa Jehová petocaëjëtsicueniatsi. 17 Paxamë pijinia, pasacerdotewimë panetonacuenebawanapaewi Jehová, panubenaename templobo baupawajënaeya piniji-altar-wënëjawa canacujitsita, bajarajota jiwi pijaneconi yabara natsinueya panetowajëcaenexa mapacueniaje: «¡Siwajamatabëcuenecaeware nijajiwi pijaneconimi yabara! Pexaniacuenia pacawajëtatsi netocopatsiyaniwa itsamonae pewënëcapo̱naeyaniwatsi nijajiwi. Pacawajëcatsinua itsanacuanëpijiwi nijajiwi peyanacua-ewetsiyaniwatsi, bajarapacuenia nesiwajamatabëcuenecaewixae nijajiwi pijaneconi yabara itsatomaranëpijiwi cawënëcapo̱naeya patanejumaitsiyaniwa: ‘¿Detsa jota pijaponaponae panijaDioso?’ patanejaiyaniwa», pajamë tsane pasacerdotewimë panetowajëtsijawata panijanacuapijiwi —jai Joel.
Xuanë Jehová to-exanaejitsia pijajiwi penajamatabëcuenepënëyorotsixae
18 Orijibia, icatsia jumaitsi:
—Bajarapacuenia itsa papijajiwimë pa-exanaename, nexata Jehová papijanacuapijiwimë asiwaya papecataeyabiabinëxae, pacasiwajamatabëcuenecaewiana panijaneconimi. 19 Marapacuenia nexata Jehová pacato-exanaeyapaeba juya papijajiwimë. Pacajumaitsi: «Pacarajutsianatsi nawitsia panexainaenexa trigo, uvacuaibarëmeneranë-ata, olivocuaipiji-aceiteranë-ata, daxita bajaraxuanë panexaeyabiabinexa panepenejawabelia. Nexata, bajarapacuenia beweliajamatabëcuenewi apopacatae tsane. 20 Bajarapacuenia apopacacapo̱capo̱nae tsanenua, tsipaji xanë pacawecuatorotsianatsi pamonae papecatsimaxëpatsiwi matatsënëjawawerena.a Itsamonae torotsianajë petsewinacuajawabelia. Nexata, penamataxainaewi bubunaeya-exanaenajë Mar Muerto pucaxanetojawabereca. Cotocaewibitsaëto pijinia torotsianajë Mediterráneo manuamenejawabetsia, bajarajotatsia pebubunaenexa. Pamonae petëpaewi tsabanaena. Nexata, pacato-atuxubeje tsane daxita panijanacuajawa. Xanë Jehovánë, bajarapapinijicuene patacatsita-exanaenë», pacajai Jehová —jai Joel sacerdotewijawabelia, Judá nacuapijiwijawabelianua.
21 Orijibia, icatsia Joel jumaitsi:
—¡Pajamatabëcuenebarëyamëre! ¡Pajunawame pëtsa panija-iranë papecatobijianaejawami, tsipaji Jehová mapitsipinijicuenejawanë pacato-exanaenaje! 22 ¡Paxamë pijinia po̱na panexaewanapaewi pajunawame pëtsa, tsipaji petsewinacuamijawa icatsia pexaniapo̱na capitsapaena! ¡Bajarapacuenia naejawanë xainaena pecuai, higueranaenë-ata, uvamacanaenë-ata! 23 ¡Pajamatabëcujirubarëyamëre tsawanapae Sión-tsutomuxuneniab panejinawanapaewi, tsipaji Jehová panijaDioso bitso pinijicuenia pexaniacuene papecato-exanaponaponaenënexa! Panija-ira petsewinacuami-ata, pacatotsi-itorobabiabiana ema perunabiabinexa pijamatacabianëjawa, pacuenia baja itsi tsabiabi papecatobijianaewajënaeya. 24 Nexata, pane-ubijawanë pacatocapitsapabiabiana ayaijawa trigo, panewënëbinexa pabonëta paxaniawaetabiabame panenotsixu. Bajarapacuenia nawitsia paxainaename uvacuaibarëmeneranë, olivocuai-aceiteranë-ata. Nexata, xua paxainame bajaraporanë panejenexa apopacatoyacaëjëpae tsane penawitsixae.
25 »Nexata, itsa panajamatabëcuenepënëyorotsianame, Jehová orijibia pacajumaitsi papecato-exanaenexa: «Xanë pacatocanawiatsianatsi xuanëwajëto pane-ubijawanëmi pacatobijiana bosesemonae panenotsijawanëminexa patacatotsi-itorobimatacabianëjawa.c 26 Nexata, paxamë paxaewanapaename panepenejawabelia. Nexata, panewënëxaniatawanapaename Jehovánë panijaDiosonë, tsipaji bitso pinijicuenia pexaniacuenejawanë pacato-exanabiabianatsi. Bajarapacuenia patacato-exanaexae pematatsënëa itsamonae beweliajamatabëcuenewi apopacatae tsane. 27 Nexata, matapania panatoyapëtaename caenënë Jehovánë panijaDiosonënë tsaponaponae paxamëtuatuajëta. Panatoyapëtaenamenua pacuenia ajibi itsanë, itsajawa-ata panijaDiosonexa xanëwecua. Bajarapacuenia pematatsënëa itsamonae beweliajamatabëcuenewi apopacatae tsane paxamë patajajiwixaemë», pacajai Jehová —jai Joel pewajunupaebijawata Judá nacuapijiwijawabelia.
Dioso najumecapanepaeya runaeya-exanaeyapaeba Espíritu Santo pijajiwijawabetsica
28 Icatsia, Jehová pacajumaitsi:
«Daxita bajarapacuenia panija-ira patacatoxanetsicujinae, matapania runaeya-exanaenicajë Espíritu Santo daxitajiwijawabetsica. Nexata, bajarapacuenia paxamëtuatuajëta daxita panexi newajunupaebiana, pebijiwi, petiriawi-ata. Daxita panijamonae perujujiwi Espíritu Santojamatabëcuene amajitsinae tsabiabi tsane. Pewëjëawi pijinia taeyabiabiana bemajitsinaebocuenia. 29 Bajarapijinia pacuenia, runaeya-exananicajë Espíritu Santo pamonae amoneya jiwi petonacuenebawanapaewijawabetsica, pebijiwijawabelia, petiriawijawabelia-ata. 30 Bajarapamatacabi paneyapëtaenexa xaniawaetsia pecopiapatsijawa, pacatsitajëtsianatsi pinijicuenejawanë itaboxojawatatsia, mapanacuajawata-ata. Pacatsitajëtsianatsi pejana pexainaecuene, pitatsajawicotiacuene, piapiatsëxëbocuene-ata. 31 Nexata, matacabipijijuameto quirijai tsarucae tsane. Merawipijijuameto pijinia itatsobia tsarucae tsane pejanacuenia. Daxita bajarapacuenia itsinë tsane Jehovánë tajamatacabita, pamatacabi natocaëjëtajë ayaicuenia tananeconitsia-exanaenexa mapanacuapijiwije», pacajai Jehová.
32 »Itsiata baitsi jane, tajamonae, pamonae wajëcaena Jehová pewënëta pecapanepaenexatsi, bajarapamonae capanepaenatsi, tsipaji Jehová najumecapanepaeya jumaitsi itsamonae pepanepaejawanexa Jerusalén tomarajawata pejinawanapaewiyajuwënëwi, Sión-tsutota pejinawanapaewiyajuwënëwi pijinia. Pamonae panepaena bajarapapiayaicuenewecua, Jehová najumecapanepaeya pejumaitsixae, bajarapamonaetuatuajëta pijinia itsamonae nanubenaena, Jehová pejunatsiwitsi», jai Joel Judá nacuapijiwijawabelia Jehová petonajumecopatsicueniatsi.
C3 [...]