DANIEL 1

Daniel

Pacuenia Daniel-bana jinawanapa Babilonia tomarata

Joacim itsa baja xainaponapona acueyabi pawaibeje peyanacua-ewetsicujinaerena Judá nacuata, bajarapawaita Nabucodonosor, Babilonia pepopeyanacua-ewetsinë, tsimaxëpatajopa pijajiwi wajabitsaëwi yajawa Jerusalén-jawaberena, patomarata ponapona Joacim. Nexata, Nabucodonosor pijajiwi wajabitsaë matatoyorotsia yacajinawanapa, bajarapatomarapijiwimi pecopatsijawabelia penayajiwinawajabitsaëtaponaejawa, juya penacaewetsinexa pijawajabitsaë pecobeyabelia. 2 Dioso Pepopetuxanenë daxitawecua tocopata Nabucodonosor pecobeyabelia, Joacim pebarëcuene-amoneyabinexatsi, Judá nacuapijiwi pepopeyanacua-ewetsinëmi. Bajarapacuenia-ata tocopata penotsinexa Dioso pijatemplobota pexainaeyajuwënëjawanëmi, bitso penamatamotsijawanëmi. Nexata, Nabucodonosor pijajiwi wajabitsaë penawiabijawata, bajaraxuanëmi capona Babilonia nacuajawabelia. Caponanua jiwi ayaibitsaëto petaicaewi. Nexata, xuanë capona, Dioso pijatemplobopijijawanëmi, pecapatsicujinae Babilonia tomarajawabelia, Nabucodonosor xaniawaetsia-exana pijadiosowi pewënëta, pabo-ënëta asiwaya nawajëcabiaba bajarapajumapecataenëanëjawabelia, pataxunaeta xaniawaetabiaba penamatamotsijawanë. 3 Bajaraxuacujinae, Nabucodonosor itoroba pijajiwitonë, Aspenaz, ponë pepopenamatacaitorobinë penacuenebiwi peyanacua-ewetsibojawata, peto-itapetsinexatsi pamonae Judá nacuata petaicaewimiyajuwënëwi itsamonae pewëjëawi, petonacuenebiwinexatsi nacua pewetsiwicuenia. Itoroba peto-itapetsinexatsi mapitsicuene pexainaewije: pamonae pijamonaemi ayaijamatabëcuenewiyajuwënëwi, itsamonae-ata Judá nacua pepopeyanacua-ewetsinëmi pijamonaeyajuwënëwi. 4 Nexata, Nabucodonosor jumaitsi Aspenaz-jawabelia:

—Papewëjëawi neto-itapetsianame, Judá nacuata wajataicaewimiyajuwënëwi, mapecuene-itsiwi tsaneje: caejawayo-ata apopenabejenaewi, peyaxaniawaetsiwi, peyapëtaewinua pecujarubicuenetsi daxitacuene yabara, bajarapacuenia-ata pamonae peyapëtaejamatabëcuene pecanaëjëtsicuenia pexanaewinexa. Itapetsianame pamonae toyapëxanepanaejitsiatsi penacuenebawanapaewinexa nacua-ewetsinë peyanacua-ewetsibojawata. Bajarapamonae nitapetsicujinae, nacujarubia-exanaename Babilonia nacuapijiwitsi wajacuaicuaijaijume, panacujarubiliwaisianë-ata rubena peyaquinaebaxutonëta, wajasalinailiwaisianë, wajanacuapijiliwaisianë, wajayapëtaecueneliwaisianë, wajana-ewetsiliwaisianë-ata yabara —jai.

5 Nabucodonosor itorobanua pijajiwi bajarapapewëjëawi perajutabiabinexa apocaewiriapexaejawa caematacabi canacujitsia, paxaeyajuwënëjawanë bajaraponë xaeyabiaba, pawiriavinora-ata matawëjëa-apaeyabiaba. Orijibia, itoroba pecujarubawanapaenexanua bajarapamonae acueyabi pawaibejecuenia. Bajarapa-acueyabi pawaibejecujinae bajarapapewëjëawi caponaejitsiatsi, petonacuenebawanapaenexa pepopeyanacua-ewetsinë peyanacua-ewetabiabibota.

6 Bajarapapitapetsipewëjëawijawata, Judá nacuata petaicaewimiyajuwënëwi, itapetatsi mapamatabëxëyoje, Judápijinë pemomoxibitsaëtoyajuwënëwi: Daniel, Ananías, Misael, Azarías. 7 Aspenaz, pepopenamatacaitorobabiabinë penacuenebiwituatuajëta, daxita bajarapamonae wënë-itothianatsi bajarapacuatro ponëbeje. Daniel wënërutatsi Beltsasar. Ananías wënërutatsi Sadrac. Misael wënërutatsi Mesac. Azarías pijinia wënërutatsi Abed-nego. 8 Itsiata baitsi jane, Daniel najamatabëcuenewereta apopenajamatabëcuenebijianaejawanexa bajarapaxaejawanëta, tsipaji Daniel yapëtane pacuenia Dioso jani-itawetatsi israelitawi pexaeyaniwa peyanacua-ewetsinë pexaeyajuwënëjawanë, piapaevinoranë-ata. Bajaraxuata, pona Aspenaz-jawabelia, pexaniacuene pewajëtsinexa, bajaraxuanë pexaeya-exanaeyaniwatsi, bepenaxuirabinëcuenia penacopatsiyaniwa Jehová pitabarata. 9 Dioso tocopata Aspenaz pitaxutotsoniataejamatabëcuene petoxainaenexa Daniel-jawabelia, pexaniajamatabëcuenia penaëcotabiabinexatsi.

10 Itsiata, Aspenaz, pecujunawixae pijatuxanenë, jumaitsi:

—Xanë tajatuxanenë pepopeyanacua-ewetsinë bitso yaiyataeya cujunawajë. Bajaraponë pacatotsata picani xua jitsipa, xua-ata nitoroba patacarajutabiabinexa panexaejawanexa, panematawëjëa-apaeyabiabivinoranexa-ata. Nexata, bajarapacuenia itsa apo-exanaenë tsipae, belia bajaraponë itsa pacayapëtaejitsipa paxamë apopanexanepanaejawa itsamonaewecua, nexata bajaraponë nebara-anaepanaejitsipa. Itorobijitsipanua pijajiwi, wajabitsaë, tanebeyaxuabia-exanaenexa paxamë panejamatabëcueneta —jai.

11 Aspenaz apopejejaixae, bajaraxuacujinae Daniel pona pebarëcuaicuaijainexa Melsar-jawabelia, ponë Aspenaz tocopatatsi pewetabiabinënexa Daniel, Ananías, Misael, Azarías-bana. Bajaraponëjawabelia nexata Daniel jumaitsi:

12 —Paxanë apopanetsixanepanae picani pepopeyanacua-ewetsinë pexaeyajuwënëjawa patanerajutabiabijawamë. Nexata, paxanë, nitabarata beweliajamatabëcuene pataxainaewi, pexaniacuene pacawajëtatsi xamëjawabelia patanecuene-ëjëtsinexamë paxanëjawaberena diez pamatacabibejecuenia, saya patanerajutabiabinexamë ëpe-ubijawanë pataxaewanapaenexa, ëmera-ata patamatawëjëa-apaenexa. 13 Itsa baja panepaena bajarapadiez pamatacabibeje, nexata, xuacujinae paxanë paneperabëcanaëjëtsianame pamonaejawabelia xaewanapa pepopeyanacua-ewetsinë pexaeyajuwënëjawanë. Nexata, itsa pacatsitabeweliatsi, bajaraxuacujinae xamë exanaename pacuenia jitsipame paxanëjawaberena pataxaejawa yabara. Itsiata, itsa panajëpaenajë bajarapamonae yajawa, pexaniacuene cawajëtatsi, patanetocapatsinexamë pataxaeyabiabinexa patacawajëtsicowëya patawajënaeyabelia —jai Daniel pewetsinëtsijawabelia.

14 Nexata, Melsar jejai. Tsitaxanepanatsi pacuenia Daniel jumaitsi. Nexata, bajaraponë cuene-ëjëta diez pamatacabibejecuenia peyapëtaenexa. 15 Itsa baja panepa diez pamatacabibeje, itsa tane bajarapamonae, nexata caenë-ata apoyajuwënëjiopae. Caranata, matatoxenetsia wënaperabëjumalixanepana, acuenesaënua, pamonaewecua abatawanapatsi pepopeyanacua-ewetsinë pexaeyabiabiyajuwënëjawa. 16 Nexata, bajarapamatacabijawaweliacujinae, Melsar tocapatabiaba bajarapamatabëxëyo ëpe-ubijawanë pexaeyabiabinexa, ëmera-ata pematawëjëa-apaeyabiabinexa, tocapatsinejewatsi pepopeyanacua-ewetsinë pexaeyabiabiyajuwënëjawa, pematawëjëa-apaevinoranë-ata.

17 Dioso jamatabëcuenecaëjëpaeya-exana bajarapacuatro papewëjëatobeje, xaniawaetsia peyapëtaenexa, pecanaëjëtsinexanua daxita paliwaisianë rubena Babiloniapijiwi peyaquinaebaxutonëta daxitacuene yabara, nacuapijiliwaisianë-ata. Daniel itsamonaewecua pematatsënëa Dioso tocopatatsi peyapëtaeya-exanaenënexa itsamonaejawabelia pajamatabëcuene xaina xua tane bemajitsinaebota, piamajitsinaejawata-ata. 18 Acueyabi pawaibeje baja itsa panepa penacujarubicuene, itsa baja copiapata pamatacabianëjawa tocaëjëtatsi bajarapapewëjëawi petsitanaitajëtsinexa Babilonia nacua pepopewetsinë pitabarata, nexata jane baja, Aspenaz tocapona daxita bajarapamonae petsitanaitajëtsinexa Nabucodonosor pitabarata. 19-20 Nexata, pepopeyanacua-ewetsinë jamatabëcuene-ëjëbiaya barëcuaicuaijai daxita bajarapapewëjëawijawabelia. Itsiata baitsi jane, daxita bajarapapewëjëawituatuajëta, naexana caemonae Daniel, Ananías, Misael, Azarías-bana bitso peyapëtaewi, xaniawaetsia pecanaëjëbiwinua, daxitacuene itsapewëjëawiwecua. Caejiwiyo-ata apocuenejëpaetsi bajarapacuatro ponëbeje xuanë bitso peyapëtaejawanë. Bajaraxuata, pepopeyanacua-ewetsinë daxita xua jamatabëyanijoba bajarapacuatro ponëbejejawabelia, yanijobapona petoyapëtaenexa pijapeyapëtaejamatabëcuene, pijapecanaëjëtsijamatabëcuenenua. Nexata, tocaxibajaraba bajarapamonaejawata diez xuabeje bitso pepoxaniawaetsia peyapëtaecuene daxitaliwaisianë daxita pamonae bitso peyapëtaewiwecua mapanacuapijicuene, pamonae pejinawanapaewi peyanacua-ewetsinacuata. Nexata, diez xuabeje cuenematatoxenetsia yapëtane pamonae penajuanacujarubiwiwecua, pamonaenua peyapëtaewi pecopiapatsijawanënexa pijacujirucuenia pe-ëjëbijawata, pecanaëjëbijawata tulupucuene, penajorobiwi-ata. Baitsi, bitso wecuayapëtane daxita bajarapamonae. Bajaraxuata, pepopeyanacua-ewetsinë tocopata bajarapamatabëxëyo petonacuenebawanapaewinexatsi peyanacua-ewetsibojawata, itsamonae pebarë-ewetsiwituatuajëta.

21 Bajarapacuatro ponëbejeyajuwënëwi, caenë Daniel tsitecaeya nacopata petonacuenebaponaponaenëcuenia pepopeyanacua-ewetsiwi peyanacua-ewetsibota pewetsinë Cirojawabelia, Persia nacuapijinë, bajaraponë caewaicuenia pexainaejawabelia peyanacua-ewetsijawa Babilonia tomarata, pecuene-amoneyabicujinae Babilonia nacuapijiwimi, Nabucodonosor petëpaecujinae.