Nabucodonosor tane majitsinaebota jiwitonë jumapecataeya pexanaenëxaneto
2
Nabucodonosor itsa baja xaina anijawaibeje peyanacua-ewetsijawaa Babilonia nacua, bajaraponë nawitsia amajitsinae. Nexata, bajarapamajitsinaenë bitso jamatabëcuenebëjaiya-exanatsi. Bajaraxua yabara, apocuenecaëjëpaetsi pemajitsijawa, pejunawixae. 2 Nexata, bajaraponë itoroba pijajiwi petojunatsinexatsi pamonae bitso peyapëtaewi mapanacuapijicuene. Baitsi, junatsia-exana pamonae peyapëtaewi pe-ëjëbijawata, tulupucuene pecanaëjëbijawata, penajorobiwi-ata. Daxita bajarapamonae junata peyapëtaeya-exanaenexatsi picani xua amajitsinae, pajamatabëcuene-ata xaina bajarapamajitsinae. Nexata, bajarapamonae itsa pata pepopeyanacua-ewetsinë pe-ecaebota, tsitanaitajëba. 3 Nexata, pepopeyanacua-ewetsinë jumaitsi bajarapamonaejawabelia:—Xanë amajitsinaenë. Bitso jamatabëcuenebëjanë bajarapamajitsinae yabara, tsipaji jamatabëyapëtaniji xua yabara amajitsinaenë —jai bajaraponë.
4 Nexata, pamonae bitso peyapëtaewi mapanacuapijicuene, jumaitsi pepopeyanacua-ewetsinëjawabelia arameojumeta:
—Patajatuxanenëmë, pacatojitsipatsi pataneyanacua-ewetsinëmë niasaëtsaponaponaejawa daxitamatacabijawabelianexa. ¡Nexata, panetsipaebare paxanë panijajiwinëjawaberena xua xamë amajitsinaemë, nexata paxanë pacatsipaebianatsi pajamatabëcuene xaina bajarapamajitsinae! —jai bajarapamonae.
5 Itsiata, pepopeyanacua-ewetsinë jumecanawiata:
—¡Jume! Xanë rabaja pacasiwanajamatabëcueneweretatsi apopatacatsipaebijawanexa xua amajitsinaenë. Paxamë panetsipaebianame xua amajitsinaenë, pajamatabëcuene-ata xaina. Nexata, itsa apopanetsipaebimë tsane xua amajitsinaenë, pajamatabëcuene-ata xaina bajarapamajitsinae, xanë pepacuene pacananeconitsia-exanaenatsi mapacueniaje. Pacatsi-itorobianatsi panijaneconijamatabëcuene tajajiwi wajabitsaëwi papecabeyejebinexa papecatupatitibabecuenia, bajarapacuenia panijabonë-ata papecatobijianaenexa. 6 Itsiata, itsa paneto-itajëtsianame xua yabara amajitsinaenë, pajamatabëcuene-ata yajawaxaina, nexata xanë juya pacarajutsianatsi amoneya penamatamotsijawanë. Pacatocopatsianatsinua jiwi papecayaiyataenexa ayaijamatabëcuenewicuenia. ¡Nexata jane baja, panejumaitsimëre xua xanë amajitsinaenë, pajamatabëcuene-ata xaina! —jai pepopeyanacua-ewetsinë.
7 Icatsia, cotocaewijawa pamonae bitso peyapëtaewi mapanacuapijicuene jumaitsi pepopeyanacua-ewetsinëjawabelia:
—Itsa xamë patajatuxanenëmë panetsipaebijitsipame xua amajitsinaemë picani, nexata paxanë juya pacatsipaebijitsipatsi pajamatabëcuene xaina bajarapamajitsinae —jai.
8 Nexata, pepopeyanacua-ewetsinë jumecanawiata:
—Yapëtaniji xaniawaetsia mapacueneje. Paxamë saya panajamatabëjemataponame, bepijiayo panetaeyaniwa patacananeconitsia-exanaejawanexa. 9 Bajaraxuata, itsa paxamë apopanejumaitsimë tsane xua yabara amajitsinaenë, pepacuene najëpaeya pacananeconitsia-exanaenatsi padaxitamë xua pacatocaëjëtatsi. Paxamë tsaena caejamatabëcuene paxainame penajumetsënëtsiliwaisianë patanetsipaebaponaenexamë, bepexaniajailiwaisi, juya patacajumexaniataenexa. Bajarapacuenia panajamatabëjemataponae-atamë, belia itsajamatabëcuene taxainaenexa, xanë abaxë pacajamatabëcuene-ewetaponatsi patanetsipaebinexamë. ¡Nexata, rowialia paneto-itajëre baja tamajitsinaejawa yabara! Matapania bajarapacuenia yapëtaenajë pexaniajaicuene patanetsipaebijawatamë pajamatabëcuene-ata xaina bajarapamajitsinae —jai.
10 Nexata, pamonae bitso peyapëtaewi mapanacuapijicuene, pejumecanawiatsijawata jumaitsi pepopeyanacua-ewetsinëjawabelia:
—Mapanacuataje ajibi cajena itsanë pecato-itajëtsinënexa nijacuene yabara petuxanenëmë, xua xamë panewajëtame patacayapëtaeya-exanaenexa. Mapanacuataje caenë-ata peyanacua-ewetsiwiyajuwënënë, bitso ayaijamatabëcuenenë natae-ata itsapewetsiwiwecua, apoyanijobi bajarapitsipiayapëbejejawa bitso mapanacuapijicuene peyapëtaewijawabelia, pamonae peyapëtaewi pe-ëjëbabiabijawata, tulupu pecanaëjëbijawata, pamonae-ata peyapëtaewi penajorobijawata. Xamë matapania paxanëjawaberena panewajëtame patacato-itajëtsinexa. 11 Patajatuxanenëmë, xua panewajëtame, bitso ayapëbeje patacayapëtaeya-exanaenexa. Ajibi baja cajena, itsanë-ata pecayapëtaeya-exanaenexa nijacuene yabara. Ëdiosowi yapëtane bajarapacuene. Itsiata, waxaitsituatuajëta bajarapadiosowi aponacayajawajinawanapae wajayanijobinexa jiwitonëcuenia. Bajaraxuata, ayapëbeje wajayapëtaenexa xua panewajëtame —jai bajarapamonae.
12 Bajarapacuenia itsa jumetane pejumecanawiatsijawatsi, pepopeyanacua-ewetsinë bitso ayaicuenia anaepana. Bajaraxuata, itoroba pijajiwi wajabitsaë, peyanacua-ewetsibota pewetsiwi, pebeya-exanaenexa Babilonia tomarata pejinawanapaewi, daxita pamonae bitso peyapëtaewi mapanacuapijicuene. 13 Bajaraxuata, pebeya-exanaewajënaeya wajunupaeba daxitanacuajawa xua yabara bajarapamonae naneconita, pacuenianua tocopata pebeyejebia-exanaenexa daxita pamonae bitso peyapëtaewi mapanacuapijicuene, pejinawanapaewi Babilonia nacuata. Bajarapa-itorobicuene daxitanacuajawa peyapëtaeya-exanaecujinae, nexata wajabitsaë jaitsia-exanatsi Daniel, bajarapacuenia acueyabi ponëbeje penajuawi, bajarapamonae peyajawabenexatsi itsamonae bitso mapanacuapijicuene peyapëtaewi, Daniel-bana aponanubenae-ata picani bajarapamonaejawata, paepatota pepopeyanacua-ewetsinë yanijobatsi piamajitsinaejawa yabara.
Daniel yapëtaeya-exana Nabucodonosor xua tane majitsinaebota
14 Nexata, Daniel itsa wënëtane Arioc petocopatsijawatsi pebeponaejawanexa daxita pijacujirucuenia peyapëtaewi pecanaëjëbijawata, bajaraponë pona pebarëcuaicuaijainexa Arioc-jawabelia, ponë pepopenamatacaitorobinë wajabitsaëwi pepopeyanacua-ewetsinë pijabota. Nexata, namatacaitoroba pamonae pebeponaewinexa daxita pijacujirucuenia peyapëtaewi. Nexata, Daniel pecanaëjëtsinëcuenia, yapëtaeya barëcuaicuaijai bajaraponëjawabelia. 15 Jumaitsi mapacueniaje:
—¿Detsa pitsijamatabëcuene yabara pepopeyanacua-ewetsinë panetsi-itoroba pijajiwiwajabitsaë, bepijiacuenia patanebeya-exanaenexa daxita paxanë bitso patayapëtaewi mapanacuapijicuene? —jai Daniel.
Nexata, Arioc yapëtaeya-exana daxita pajamatabëcuene yabara exana bajarapacuenia. 16 Bajaraxua pejumetaecujinae, Daniel bepijiayo pona pepopeyanacua-ewetsinë pe-ecabiabibojawabelia, pewajëtsinexa itsamatacabianë abaxë petocopatsinexatsi, jamatejema peyapëtaeya-exanaenexa piamajitsinaejawa yabara, pajamatabëcuene-ata xaina. Jumaitsi:
—Pexaniacuene cawajëtatsi abaxë tanetocopatsinexamë itsamatacabibeje tacayapëtaeya-exanaenexa niamajitsinaejawa, pajamatabëcuene-ata xaina —jai.
17 Bajaraxuacujinae, pepopeyanacua-ewetsinë pejejaicujinae, Daniel nawiata baja pijaboyabelia. Nexata, tsipaeba penajuawijawabelia, Ananías, Misael, Azarías-bana xua tocopiapatsijitsiatsi, itsa apoto-itajëtsi pepopeyanacua-ewetsinëjawabelia xua amajitsinae. 18 Nexata, Daniel wajëta penajuawijawabelia pewajëcaenexa Dioso athëbëtatsia pe-ecaenëjawabelia.b Itoroba petowajëtsinexatsi Dioso pitaxutotsoniataenexatsi penajuawi yajawa, jamatejema peyapëtaeya-exanaenexatsinua xua tane piamajitsinaejawata pepopeyanacua-ewetsinë, xua-ata itsamonae pijacujirucuenia peyapëtaewi apocuenecaëjëpaetsi peyapëtaeya-exanaejawa. Nexata, Dioso peyapëtaeya-exanaecujinaetsi, itsa yapëtaeya-exana pepopeyanacua-ewetsinëjawabelia, Daniel-bana penajuawecuapanepaenexa pebeyejebijawaminexatsi, daxita pamonae-ata bitso peyapëtaewi mapanacuapijicuene, Babilonia nacuajawata pejinawanapaewi. 19 Itsiata baitsi jane, bajarapamerawi Dioso yapëtaeya-exanatsi Daniel majitsinaebota xua Nabucodonosor tane piamajitsinaejawata, xua-ata picani Babilonia nacuapijiwi, pijacujirucuenia peyapëtaewi, apocuenecaëjëpaetsi peto-itajëtsinexa. Orijibia, yapëtaeya-exanatsi pajamatabëcuene xaina bajarapamajitsinae. Bajaraxuata, bajayacunua itsa namatacota, Daniel pexaniacuenia wënëxaniata Dioso athëbëtatsia pe-ecaenëjawabelia. 20 Jumaitsi mapacueniaje:
—Daxitamatacabijawabelia xanepana pexaniacuenia pecawënëxaniatabiabijawa jiwi pecawënëcacuaicuaijaijawata Diosomë, tsipaji xamë nexainaenë neyapëtaecuene, niacuenesaëcuene-ata daxitawecua.
21 Xamë raja newetaponaponaenë matacabianëpijicuene, nacuapijicuene-ata, nejitsipaecuenia nexanetabiabinexa. Nexata, nejitsipaecuenia xamë itsamonae tocopatabiabame peyanacua-ewetsiwinexa, itsamonae juya wecua-ajibia-exanabiabame peyanacua-ewetsijawami. Xamë itsamonae rajutame neyapëtaejamatabëcueneyajuwënëjawa pexainaenexa, peyapëtaejamatabëcuenecuenia pexanabiabiwinexa. Itsamonae pijinia jamatabëcuenecaëjëpaeya-exaname bepijia pejumeyapëtaewinexa penacujarubicuene.
22 Yapëtaeya-exanabiabamenua bëpënëapijicuenejawanë, apopatayapëtaecuenemi-ata. Yapëtanemenua xua apotae itsajiwi-ata pitaquirijawata, tsipaji necotia nexainaenë.
23 Xamë, Diosomë, tajasalinaiwimi pijaDiosomë, pexaniajamatabëcuene carajutatsi. Bajarapacuenianua cawënëxaniatatsi, tsipaji xamë netocopatame tayapëtaenënexa, bajarapacuenia tacanaëjëtsinënexa, tasaëjamatabëcuene taxainaenexanua. Baitsi, ajenaconoxaenua netocopatame tayapëtaenexa xua pacawajëtatsi. Neyapëtaeya-exanamenua xua nacua-ewetsinë piamajitsinaejawa siwajamatabëcuenebëjai peyapëtaenexa —jai Daniel Diosojawabelia, pewënëxaniatsijawata.
24 Daniel pewajëtsicujinae Diosojawabelia, pona jane baja petaenexa Arioc, ponë nacua-ewetsinë tocopatatsi pebenexa daxita pamonae pijacujirucuenia peyapëtaewi pecanaëjëbijawata, Babilonia tomarata pejinawanapaewi. Bajaraponëjawabelia jumaitsi:
—¡Pëtsa abaxë panebiame daxita paxanë mapanacuapijicuene patayapëtaewi! ¡Biji rajane, xanë necaponare pepopeyanacua-ewetsinëjawabelia, tato-itajëtsinexa bajaraponëjawabelia xua tane piamajitsinaejawata! —jai Daniel.
25 Nexata bajarapaepatota, Arioc bepijiayocuenia caponatsi Daniel pepopeyanacua-ewetsinë Nabucodonosor-jawabelia. Nexata, bajaraponë jumaitsi pepopeyanacua-ewetsinëjawabelia:
—Tajatuxanenë, xanë raja caxitajarabajë wajataicaewimi Judá nacuapijiwimiyajuwënënë, caenë, bajaraponë cuenecaëjëpatsi pecayapëtaeya-exanaenexa niamajitsinaejawa, pajamatabëcuene-ata xaina bajarapamajitsinae —jai Arioc.
26 Nexata, Nabucodonosor jumaitsi Daniel-jawabelia, ponë wënërubatsi Beltsasar:
—¿Xaniajai? ¿Xamë cacuenecaëjëpa tanejumaitsijawamë xua amajitsinaenë, pajamatabëcuene-ata xaina bajarapamajitsinae? —jai.
27 Nexata, Daniel jumecanawiata:
—¡Jume! Aponecuenecaëjëpae picani, tsipaji xua xamë panewajëtame patacayapëtaeya-exanaenexa, acuenebi caenë-ata pecato-exanaenexa. Bajaraxuata, pamonae bitso peyapëtaewi mapanacuapijicuene, caebitsaëto canacujitsia, pamonae peyapëtaewi pe-ëjëbijawata, tulupucuene pecanaëjëbijawata, penajorobiwi-ata, apocuenecaëjëpaetsi bajarapacuenia pecato-exanaenexa. 28 Itsiata baitsi jane, caenë Dioso athëbëtatsia peponaponaenë, bajaraPonë cuenecaëjëpatsi bajaraxua pecayapëtaeya-exanaenexa, tsipaji bajaraPonë jiwi xuanë apopetaejawanë to-itajëtabiaba. Bajaraponë nexata, xamë tajatuxanenëmë, niamajitsinaejawata cayapëtaeya-exana baja xua copiapatsijitsia itsamatacabijawabelia mapanacuataje. Nexata, xua tajatuxanenëmë, nebocaenë, taneme niamajitsinaejawata, aeconoxae cayapëtaeya-exanaenatsi pacuenia Dioso neyapëtaeya-exana bajaraxua yabara, xua-ata taneme bemajitsinaebocuenia —jai Daniel.
29 Nexata, Daniel orijibia jumaitsi:
—Xamë, tajatuxanenëmë, nijacamajawata nenacuera-ewetsijawata, xamë bitso siwanajamatabëxainabiabame pitsicuene mapanacuataje copiapatsijitsia itsamatacabijawabelia. Nexata, Dioso, ponë daxitacuene peyapëtaenë, jiwijawabelia peyapëtaeya-exanaenënua bëpënëapijicuenejawanë, apopeyapëtaejawanëmi, bajaraPonë cayapëtaeya-exana bemajitsinaebocuenia xua copiapatsijitsia mapanacuataje itsamatacabijawabelia. 30 Pitsicuene Dioso cayapëtaeya-exana majitsinaebota mapanacuataje pecopiapatsijawanexa, xua abaxë apoyapëtaeya-exanae itsajiwiyojawabelia-ata, bajaraxua xanë Dioso neyapëtaeya-exana tacatoyapëtaeya-exanaenexa. Xanë picani apoyapëtaenë bajaraxua bitso tayapëtaenëxae daxitacuene daxitajiwiwecua. Dioso saya neyapëtaeya-exana bajaraxua, xanë juya tacayapëtaeya-exanaenexa tajatuxanenëmëjawabelia pajamatabëcuene xaina niamajitsinaejawa, Dioso taneyapëtaeya-exanaecowëya xua xamë taneme niamajitsinaejawata, xua-ata Dioso canajamatabëxainaeya-exana.
31 »Xamë, ponë taenutame bemajitsinaebocuenia, nitabarata penucaenë, bajaraponë bitso ayainëxaneto jiwitonëcuenia jumapecataenë. Peniwejainë bitso. Jiwi petaejawata bitso pejunawia-exanaenë pibisianë yabara. 32 Bajaraponë pematabocoto exana ëpepopexania-orojawanëta. Pemipabë, pemaxëbeje yajawa, exana palatananijawanëta. Pecototojawawerecacujinae pijinia pethaëtobejejawabereca exana broncenanijawanëta. 33 Pesitobeje pijinia exana hierronanijawanëta. Petaxubeje pijinia exana itsajawa hierronanijawa, itsajawa pematajërëatsi-atsa pesebijawami yajawa. Nexata, petaxubeje apocaenanitota pexanaejawabeje. 34 Paepatota xamë taenucame bemajitsinaebocuenia, bajarapaepatota ibotoxaneto pijacuata wecuanatsata petsutoxanetowecua. Nexata, itsajiwi torotajarabinejewatsi, bajarapatsutojawawetsica natorenatabica bajarapajumapecataenëxanetojawabetsica. Nexata, hierronanitota, pematajërëabi-atsananitota-ata pexanaetaxumibeje petaxucënëbijawatatsi, pepobeno naexanajunuabeje. 35 Paepatota bajaraponë jopanucaya daxitanë, bajarapaepatota pepobeno naexanajunua daxita hierronanijawami, pematajërëabi-atsa pesebijawami, broncenanijawami, palatananijawami, oronanijawami-ata. Nexata, bajarapabenomi jowibo caputatsi pacuenia atsapërë jowibo bacaputa waimatacabita. Nexata, caepërëtoyo-ata bajarapajumapecataenëmijawa aponacopatsi jowibo pecaputsicujinae. Itsiata baitsi jane, pa-ibotoxaneto petsutojawawetsica taxucënëbatsi bajarapajumapecataenëmi, bajarapa-ibotoxaneto juya naexana pinijitsutoxaneto, peyacaëjëpaenexa daxitanacuanëjawa.c 36 Bajarapacuenia raja taneme majitsinaebota —jai Daniel Nabucodonosor-jawabelia.
Icatsia, jumaitsi pepopeyanacua-ewetsinë Nabucodonosor-jawabelia:
—Ajenaconoxae nexata cayapëtaeya-exanaenatsi pajamatabëcuene xaina niamajitsinaejawa. 37 Xamë, tajatuxanenëmë, bitso ayaijamatabëcuenenëmë tsaponaponae daxita pamonae newënamuto cotocaewi peyanacua-ewetaponaewinexa. Dioso, ponë athëbëtatsia pe-ecaenë, catocopata neyanacua-ewetsinacuata pepopenamatacaitorobisaë nexainaenënexa, pinijicuenesaë nexainaenexa, itsamonae-ata pecayaiyataenënexa. Bajaraxua yabara, daxita neyanacua-ewetsiwi cawënëliwaisiyaiyatane. 38 Bajarapacuenia cacuenecaëjëpa neyanacua-ewetsijawa panacuanëjawa jinawanapa daxitajiwi, matatsënëwereca pejinawanapaewi, pamonae pepunaewi-ata. Nexata, xua taneme bemajitsinaebota, jiwitonë jumapecataeya pexanaenëxaneto pematabocoto, oronanitota pexanaejawa, bajaraxua jamatabëcuene-itajëta neyanacua-ewetsinacua yabara. Pacuenia oronani bitso penamatamotsijawa itsananijawanëwecua, bajarapacuenia neyanacua-ewetsinacua bitso penamatamotsijawa itsamonae peyanacua-ewetsijawanexawecua. 39 Orijibia, cayapëtaeya-exana newënamuto penaitajëtsijawanexa beweliacuenesaë pexainaejawanexa peyanacua-ewetsinacuanë ne-ewetsinacuawecua. Nexata, xua taneme palatananitota pexanaejawa, bajaraxua jamatabëcuene-itajëta bajarapanacua beweliacuenesaë pexainaejawanexa. Pacuenia palatanani beweliacuenia namatamota oronaniwecua, bajarapacuenia cotocaewinacua bewelia peyaiyataecuenetsi pexainaejawanexa copiaya neyanacua-ewetsinacuawecua. Bajarapanacua pewerewerecaecujinae, naitajëtsiana icatsia itsanacua, acueyabinacuacuenia, bitso beweliacuenesaë pexainaejawanexa, cotocaewi peyanacua-ewetsijawawecua. Bajarapajamatabëcuene catsitajëta xua broncenanitota pexanaejawa. Pacuenia broncenani beweliacuenia namatamota palatananiwecua, bajarapijinia pacuenia acueyabinacua bitso bewelia peyaiyataecuenetsi pexainaejawanexa pecotocaewinacuawecua. 40 Bajarapa-acueyabinacua pewerewerecaecujinae tsane, icatsia itsanacua naitajëtsiana, cuatronacuacuenia. Bajarapacuatronacuapijiwajabitsaë bitso piacuenesaëwi tsane. Nexata, pacuenia hierronanitota pexanaejawanë cuenecaëjëpa daxitacuene pebijianaenexa, pesaranabiabinexa-ata, bajarapacuenia cuene-itsi tsane bajarapawajabitsaë. Nexata, nacua pewetsiwi pitorobicuenia, pijajiwi wajabitsaë ajibia-exanaena daxita copiaya peyanacua-ewetsinacuanëmi. Wecua-ajibia-exanaenatsinua bajarapanacuanëpijiwi pena-ewetsiliwaisianëmi, bajarapamonae juya, pejumecowënëtabiabinexa pecuene-amoneyabiwitsi ëpitorobicueniatsi. Bajarapacuenia bijianaena daxitacuene. Nexata, pacuenia hierronani beweliacuenia namatamota broncenaniwecua, bajarapijinia pacuenia, cuatronacua peyanacua-ewetsijawa bewelia peyaiyataecuenetsi xainaena acueyabinacuawecua.
41 »Xua taneme bemajitsinaebocuenia petaxubeje, petaxuwësi yajawa, pexanaejawa hierronanitota, itsajawa pematajërëabi-atsa pesebijawa yajawa, bajarapamatajërëabicuenebeje jamatabëcuene-itajëta caesaë apopenajuaxainaejawanexa bajarapacuatronacuata pewetsiwi, najuayanacua-ewetsi-ata tsane pijanacua becaenacuacuenia. Caejamatabëcuene apopexainaexae, aponacuenesaëjëpae tsane copiayapijicuenemi. 42 Petaxuwësi exana hierronanijawata, itsajawa pijinia pematajërëabi-atsa pesebijawa, bajaraxua jamatabëcuene-itajëta pacuenia bajarapanacua pewetsiwi xainaejitsia piacuenesaëjawanexa, piacuenesaëjibijawanexa-ata. 43 Pacuenia xamë taneme bemajitsinaebocuenia petaxubeje pexanaejawa itsajawa hierronanitota, pematajërëabi-atsa pesebijawa yajawa, bajaraxua jamatabëcuene-itajëta pacuenia bajarapanacuanëpijiwi naliwaisicajone-ata tsane caenacuapijiwi penaexanaenexa, itsiata apocuenecaëjëpaetsi tsane caebitsaëtocuenia penaexanaenexa. Pacuenia hierronanito, pematajërëabi-atsajawabeje apocuenecaëjëpae caejawa penaexanaenexabeje piatajanexa, bajarapacuenia cuene-itsi tsane peyanacua-ewetsiwi; caeto-ata caejamatabëcuene aponajuaxainae tsane. 44 Paepatota bajarapamonae pecopiarucaewi yanacua-ewetawanapaena, bajarapaepatota pijinia Dioso tocopatsiana itsanë peyanacua-ewetsinënexa daxita nacuanëpijiwi daxitamatacabijawabelianexa. Nexata, bajaraponë caeto-ata apocuene-amoneyabitsi tsane itsanë-ata, peyanacua-ewetsinexa juya pijanacuami bajaraponë pecowëta. Caranata, cuene-amoneyababiabiana daxitanacuanëpijiwi peyanacua-ewetsiwicuenemi pewerebiabijawabelia. Nexata, bajaraponë ajamatabëcuenesaë tsane peyanacua-ewetsinexa daxitanacuanëpijiwi daxitamatacabijawabelianexa. 45 Bajaraponë yabara bajarapa-ibotoxaneto catocuene-itajëta, pa-ibotoxaneto taneme pijacuata pewecuanatsatsijawa petsutoxanetowecua, bajaraponë ajibia-exanaena daxitanacuanëpijiwi peyanacua-ewetsijawanëmi. Pacuenia bajarapa-ibotoxaneto ajibia-exana bajarapajumapecataenëxaneto penatorenatabijawatatsica petaxucënëbinexatsi, itsajiwi torotajarabinejewatsi, bajarapijinia pacuenia exanaena bajaraponë. Pacuenia petaxucënëbijawatatsi naexanajunua pepobeno, daxita hierronanijawami, broncenanijawami, bajarapacuenia pematajërëabi-atsa pesebijawami, palatananijawami, oronanijawami-ata, bajaraxua raja catsitajëta pacuenia daxita nacuanëpijiwi peyanacua-ewetsicuenemi itsamatacabi copiarucaejitsia. Pacuenianua bajarapa-ibotoxanetomi witsabapona ayaitsuto penaexanaenexa, peyacaëjëpaejawabelia daxitanacuajawa, bajarapacuenia bajaraponë naexanaena daxitanacuanëpijiwi peyanacua-ewetsinënexa daxitamatacabijawabelianexa. Daxita bajaraxua pewajënaeya catsitajëta Dioso, ponë bitso ayaijamatabëcuenenë, pecayapëtaeya-exanaenexa itsamatacabijawabelia xua copiapatsijitsia. Xua amajitsinaemë, bajaraxua xaniajai. Bajarapacuenia-ata pajamatabëcuene xaina xua cayapëtaeya-exanatsi, xaniajai —jai Daniel.
46 Nexata, Nabucodonosor pejumetaejawata xua Daniel tsipaebatsi, bajarapaepatota, yaiyataeya pematabacabëta nucajunua Daniel pitabarata, pitapapatsijawabelia irabereca. Bediosonëcuenia petaexaetsi, orijibia itoroba pijajiwi perajutsinexatsi pexaniacuenejawanë, petotajuitsinexa-ata inciensopërë Daniel pewënëta. 47 Bajaraxuacujinae, jumaitsi Daniel-jawabelia:
—Pepacuene cajena nijaDioso, ayaijamatabëcuenenë itsawiriadiosowiwecua. PepoPetuxanenë daxita mapanacuataje peyanacua-ewetsiwiwecua. BajaraPonë wajanacayapëtaeya-exanaenë-ata xua apowajayapëtaecuenejawanëmi. Matapania yapëtaniji bajaraxua nijaDioso yabara, tsipaji cajamatabëcuenecaëjëpaeya-exana neyapëtaenexa, juya xanë, taneyapëtaeya-exanaenexamë xua amajitsinaenë apotayapëtaejawaminexa —jai Nabucodonosor.
48 Bajarapacuenia pejumaitsicujinae, Nabucodonosor tocopata Daniel ayaijamatabëcuenenëcuenia pinijitaxunaejawata peyanacua-ewetaponaponaenexa. Orijibia, tocapatatsi ayaijawa penamatamotsijawanë amoneya perajutsinexatsi. Copatatsinua bajaraponë gobernadornëcuenia Babilonia nacuata peyanacua-ewetsinexa. Pematatsënëa copatatsinua pepopenamatacaitorobinënexa daxita bajarapanacuata mapanacuapijicuene bitso peyapëtaewijawata.
49 Bajarapacuenia peto-exanaecujinaetsi, orijibia Daniel towajëca pepopeyanacua-ewetsinë Nabucodonosor-jawabelia petocopatsinexatsi Sadrac, Mesac, Abed-negobana peyajawanacuenebinexa penamatacaitorobiwicuenia Babilonia nacuajawata. Jejai Nabucodonosor. Nexata, Daniel nacopata peponaponaenexa pabota pepopeyanacua-ewetsinë yanacua-ewetabiabaponapona.