Nabucodonosor nacuenebia-exana jiwitonë jumapecataenëxaneto
3
Itsamatacabijawabelia pepopeyanacua-ewetsinë Nabucodonosor pijajiwi itoroba ayainëxaneto jiwitonë jumapecataenëcuenia petonacuenebanutsinexatsi oronanitota. Itorobanua bajarapajumapecataenë pexainaenexa treinta pametrobeje piapiajawa athëbëabetsia, acueyabi pijinia pametrobeje epatajërëtsialia. Bajarapajumapecataenëxaneto nacuenebia-exananuta Duratusatojawata, Babilonia nacuata pebocaetusato. 2 Bajaraxuacujinae, najumeliwaisi-itoroba petopaebanajetarucaenexatsi daxita pewetsinacuajawa, penacaetuatsia-exanaenexa daxita pamonae ayaijamatabëcuenewi bajarapajumapecataenë penutsijawata. Junatsia-exana pamonae pewetsiwi pecuene-amoneyabinacuanëmijawa, pamonae wajabitsaë penamatacaitorobiwi, pamonae penajuanacuenebiwi, pacuenia gobernador-monae, pamonae pepopeyanacua-ewetsinë pemuxujiobabiabiwitsi, pamonae palata peto-ewetabiabiwitsi, pamonae penaneconitsiwi peliwaisixanebabiabiwi, itsamonae pewetsiwi-ata. Daxita bajarapamonae pata pinijifiesta penataenexa bajarapajumapecataenë pewënëta. 3 Nexata, daxita bajarapitsinamatacaitorobiwi nacaetuata Duratusatota, penataenexa Nabucodonosor peto-exanaefiesta bajarapajumapecataenë pewënëta. Pepatsicujinae, daxita nubena bajarapajumapecataenë pitabarata. 4 Nexata, ponë pepopeyanacua-ewetsinë pejumepaebabiabinë ayaijumeta wawajaiya jumaitsi penacaetuatsiwijawabelia:—¡Panejumetaema xaniawaetsia, paxamë daxita panepatsiwi daxita nacuanëjawawerena, pa-itsawiriawimë, itsawiriajumenë panecuaicuaijaiwi-ata! 5 Paepatota pajumetaename penajumetsijawa piobijawata trompeta, flauta, zampoña-ata, peracatsijawatanua arpa, cítarawiria-arpajawanë, salteriojawanë, itsawiria pecanaxëanaejawanë-ata, nexata bajarapaepatota, daxita paxamë yaiyataeya panematabacabëta irataeya panubenaename bajarapajumapecataenë pitabarata, oronanitota pexananutsinë, panenajamatabëcuene-itajëtsinexa asiwaya paneyaiyataejawa bajaraponë ayaijamatabëcuenenëcuenia. 6 Pajiwi pematabacabëta apotonucae tsane yaiyataeya bajarapajumapecataenë pitabarata, nexata bajarapajiwi caecuenia tajajiwi wajabitsaëwi xuabianatsi pitatsajawi-isotoxanetojawabelia, itsajota setabiaba daxitawiria penanijawanë pepora penaexanaenexa —jai pejumepaebinë.
7 Bajarapanacaetuatsibitsaëto itsa jumetane bajarapacuenia penajumetsijawa piobijawanë, peracatsijawanë, itsapecanaxëanaejawanënua, nexata bajarapamonae nubena pematabacabëta yaiyataeya bajarapajumapecataenë pitabarata, oronanitota pexananutsinë.
Sadrac, Mesac, Abed-negobana peneliatsi pitatsajawi-isotoxanetojawabelia
8 Nexata, bajarapaepatota, itsamonae, peyapëtaewiyajuwënëwi tulupu pecanaëjëbicuenia, pibisiacuenia cuenebaracuaicuaijai judíowi yabara pepopeyanacua-ewetsinë Nabucodonosor-jawabelia. 9 Jumaitsi:
—Patajatuxanenëmë, pacatojitsipatsi niasaëtsaponaponaejawa daxitamatacabijawabelianexa. 10 Xamë, patajatuxanenëmë, panetocaëjëtame paepatota pajumetaeyabiabajë penajumetsijawa piobijawanë, peracatsijawanënua, itsawiriapecanaxëanaejawanë yajawa, bajarapaepatota, yaiyataeya padaxitanacuapijiwinë patamatabacabëta patatonubenabiabinexa oronanitota ne-exananutsia-exanaenë pitabarata. 11 Orijibia jumaitsimënua: «Pajiwi aponucae tsane pematabacabëta yaiyataeya, nexata bajarapajiwi xuabia-exanaenajë pitatsajawi-isotoxanetojawabelia, pataxunaeta penanijawanë setabiaba», jamë picani. 12 Bajarapacuenia jumaitsi-atamë, itsiata itsamonae judíowi, pamonae wajataicaewimi Judá nacuata, amoneya wajanacatonacuenebiwinexa, xamë nenato-itapetsiwi neyajawanacuenebiwinexa nebarë-ewetsiwituatuajëta, bajarapamonae apopecayaiyataecuenia exana xamëjawabelia. Caranata, apo-exanae pacuenia panetonajumecopatame Sadrac, Mesac, Abed-negobana. Nexata, oronanitota ne-exananutsia-exanaenë yaiyataeya apotonubenabiabi pematabacabëta. Orijibia, itsamonae nijadiosowi-ata asiwaya apocatoyaiyataenua —jai bajarapamonae.
13 Bajarapacuenia Nabucodonosor pejumetaejawata, bitso anaepana. Nexata, anaeya itoroba petocaponaenexatsirena bajaraponëjawaberena Sadrac, Mesac, Abed-negobana. Nexata, caecuenia caponaliatsi pepopeyanacua-ewetsinëjawabelia, pitabarata penubinexatsi. 14 Anaeya peyanijobijawata jumaitsi:
—¿Xaniajai tsaja paxamë apopanawajëcabiabimë patajadiosowijawabelia? ¿Xaniajai tsaja asiwaya yaiyataeyanua apopatonubenabiabimë panematabacabëta ponë exananutsia-exanajë oronanitota, jiwitonë jumapecataenëjawabelia? —jai bajaraponë.
15 Icatsia, jumaitsi:
—Aeconoxae icatsia pacacuene-ëjëtsianatsi tayapëtaenexa itsa panejumecowënëtsijitsiamë. Nexata, paepatota pajumetaename penajumetsijawa piobijumenë, peracatsijumenë, itsawiria pecanaxëanaejawanë yajawa, bajarapaepatota pananubenaename panematabacabëta yaiyataeya pitabarata bajarapajumapecataenëjawabelia. Patacatonajumecopatsicuenia itsa apopa-exanaemë tsane, caecuenia jane baja, tajajiwi wajabitsaë itorobianajë papecapenetsinexa pitatsajawi-isotoxanetojawabelia, penanijawanë pesetsitaxunaeta. ¡Jica! ¿Detsa nexata padioso pacacapanepaena paxamë bajarapacuene pataca-exanaejawawecua? —jai pepopeyanacua-ewetsinë Nabucodonosor Sadrac, Mesac, Abed-negobanajawabelia.
16 Nexata, bajarapamonae jumaitsi:
—Paxanë apopaxainaenë xua yabara pacajumecanawiatsijitsiatsi, patajatuxanenëmë, xua yabara panejumaitsimë. 17 PatajaDioso, ponëjawabelia asiwaya yaiyataeyanua panawajëcabiabajë, bajaraPonë cuenecaëjëpatsi patanecapanepaejawa bajarapa-isotoxaneto pitatsajawicotiawecua. Papibisiacuenenua xamë, patajatuxanenëmë, jitsipame pataneto-exanaenexamë, caëjëpatsi bajaraPonë necobewecua patanecapanepaejawa. 18 Itsiata baitsi jane, bajarapacuenia apopanecapanepae-ata tsipae, paxanë, patajatuxanenëmë, tsitecaeya apopanawajëcaenë tsane panijadiosowijawabelia. Asiwaya, yaiyataeya, apopatonubenaenënua tsane patamatabacabëta bajarapa-oronanitota pexanaejumapecataenëjawabelia —jai bajarapa-acueyabi ponëbeje.
19 Bajarapacuenia Nabucodonosor itsa jumetane pejumaitsijawa, nexata itsa-itabaracuene xaina. Itabaratsobiatsatabi, ayaicuenia pianaepanaexae bajarapa-acueyabi ponëbejejawabelia. Nexata, bajaraponë itoroba pijajiwi peto-itajurutsinexatsi ayai-isotoxaneto penanijawanë pesetsitaxunaeta. Itoroba bajarapamonae pitajurutsinexa, ayaicuenia piataju-exanaenexa siete xuabeje pematatsënëyo piatajutsabiabijawamiwecua. 20 Bajaraxuacujinae, itoroba pijajiwi wajabitsaëyajuwënëwi, bitso piasaëwi itsamonae wajabitsaëwiwecua, pecëbinexatsi Sadrac, Mesac, Abed-negobana, pepenetsinexatsilia bajarapa-isotocotiaxanetojawabelia. 21 Nexata, bajarapa-acueyabi ponëbeje, xuanë juma-enabiaba, taxuna-enabiaba, mata-enabiabanua, penajamatabëcuene-itajëtsinexa penacuenebijawata ayaijamatabëcuenewicuene, bajaraxuanë yajawacëbatsi. Nexata, bajarapamonae pecobecëbicujinaetsi, petaxucëbicujinaetsi-ata, peneliatsi bajarapa-isotocotiaxanetojawalia. 22 Pepopeyanacua-ewetsinë Nabucodonosor pitorobixae peto-itajurutsinexatsi bajarapa-isotoxaneto piataju-exanaenexa siete xuabeje pematatsënëa piatajujawamiwecua, nexata bajarapa-isotoxaneto bitso ataju. Bajaraxuata, pawajabitsaëwi caponalia bajarapa-acueyabi ponëbeje pepenetsinexalia isotoxanetojawabelia, bajarapawajabitsaëwimi tajuatsi bajarapa-isotoxanetocotiata. Nexata baja, tëpa. 23 Nexata, pepënatorobajarabijawata bajarapa-acueyabi ponëbeje pecëbiwitsi, othopalia bajarapa-isotoxaneto-itatsajawijawalia.
24 Nexata, Nabucodonosor nonotabapuna bepijiayo. Jamatabëcuenenabenajacaeya peyajawanacuenebiwijawabelia jumaitsi:
—¿Apopenetsiliatsi tsaja acueyabi ponëbeje pecëbiwitsi isototuatuajëalia? —jai.
—Jãjã, bajarapacuenia rabaja exana —jai bajarapamonae.
25 Icatsia, Nabucodonosor jumaitsi:
—Itsiata baitsi jane, xanë cuatro ponëbeje taniji pejinawanapaewi apocëbinejewatsi bajarapa-isototuatuajëajawalia, bajarapamonae tajuenejewatsi. Itsiata, cuatronë xaina ángelewi pecuene —jai jamatabëcuenenabenajacaeya.
26 Bajaraxua pejumaitsicujinae, Nabucodonosor nexata imoxoyolia pataxunaeta setabiaba penanijawanë, itsajota isotoxaneto tajuenajetaruca, pecuaiboyenepanajawa pepënëwelia tajëyo penucaenexa. Nexata, wawajai tsaxuabi:
—Sadrac, Mesac, Abed-nego, Dioso pepo-ayaijamatabëcuenenë daxitawecua papijajiwimë. ¡Pawecuapitsaparemena bajarapa-isotojawawerena! —jai bajaraponë.
Nexata, bajarapa-acueyabi ponëbeje wecuapitsaparena bajarapa-isotocotiajawawerena. 27 Nexata, itaxutuanacaetuata daxita pamonae penamatacaitorobiwi bajarapanacuata, pamonae bajarajota nubena. Cujibarenatsi bajarapa-acueyabi ponëbejejawaberena, xaniawaetsia petaenexatsi, tsipaji perabëxanepana daxita. Bajarapa-isotocotiaxaneto apoperabëtajue-atatsi. Apomatanasiajawi-atatsi. Apojuma-esetajue-atatsi penaxatabijawanë. Apotuxutsëxë-enae-ata.
28 Daxita bajarapacuenia petaexae, nexata bajarapaepatota Nabucodonosor ayaijumeta jumaitsi:
—Sadrac, Mesac, Abed-negobana pijaDioso raja ayaijamatabëcuenenë bitso. Nexata, to-itoroba pija-ángelnë pecapanepaenexa pijajiwi, bajarapamonae caejamatabëcuene pexainaexae pitaxutuajamatejemajawa pijaDiosojawabelia. Bajarapamonae apo-exanae pacuenia xanë itorobajë, pepotayanacua-ewetsinë, asiwaya, yaiyataeya pematabacabëta penubenaenexa ta-exanaeya-exananutsinë pitabarata. Caranata, pijaDioso ayaicuenia peyaiyataexae, jitsipa petëpaejawa, pematabacabëta penubenaeyaniwa yaiyataeya itsadiosowi pitabarata. 29 Bajarapacuenia Dioso pecuene-itsinëxae, ajenaconoxae xanë pacatonajumecopatatsi padaxitanacuanëpijiwimëjawabelia mapacueniaje. Pajiwi pibisiacuenia baracuaicuaijai tsane bajarapa-acueyabi ponëbeje pijaDiosojawabelia, Ponëjawabelia bajarapamonae itaxutuajamatejema peyawenonaenexatsi, nexata bajarapajiwi natupatitibiabiana cuatro xuabejecuenia pebeyaxuabinexatsi. Pijabo-ata tobijianaenatsi pepopiabejejawabelia. Bajarapacuenia to-exanaenatsi tocanaëjëtsinejewatsi itsacuenejawa xua yabara itaxutotsoniataejitsiatsi. Nexata, apotocanaëjëtsi tsanetsi pijatomara yabara, pijanacua yabara, pecuaicuaijaijume yabara, waja-asiwanë-ata. Nexata, pamonae naneconita bajaraxua yabara, apo-itaxutotsoniataetsi tsane, wajacopatsinexa naneconitsia-exanaenejewatsi. Daxitajiwi beyaiyatane bajarapamonae pijaDioso, tsipaji ajibi itsadioso bajarapitsicuene pecuenecaëjëpaenëtsi pecapanepaenexa, pacuenia bajarapamonae yawenonatsi —jai Nabucodonosor.
30 Bajaraxuacujinae, pepopeyanacua-ewetsinë bajarapa-acueyabi ponëbeje tocopatatsi itsapenamatamotsitaxunaenë, pewetawanapaenexa pewetsitaxunaenëmiwecua ayaijamatabëcuenewicuenia bajarapaBabilonia nacuata.