Nabucodonosor Dioso tocopatatsi jemata pematajemabinexatsi
4
Pepopeyanacua-ewetsinë Nabucodonosor tonajume-itoroba mapaliwaisije daxitanacuanëpijiwijawabelia, daxitawiriawijawabelianua, daxitawiriajumewijawabelia-ata mapanacuata pejinawanapaewije. Peyaquinaebaxutota jumaitsi: «Xanë, Nabucodonosornë patacayanacua-ewetsinë, bitso pacabajacobatsi pexaniacuenia. Pacatojitsipatsi panenajuajinawanapaenexa aliwaisijibia, panecobecowëjawanë-ata papecatonawitsijawanexa. 2 Xanë netoxanepana patacatsipaebijawa, paneyapëtaenexa daxita papinijicuenejawanë, papexaniacuenejawanënua Dioso pepo-ayaijamatabëcuenenë neto-exana xanëjawaberena. 3 ¡Bitso bajaraPonë wajanacatsita-exanaenë pinijicuenejawanë! ¡Bitso pinijisaë pexainaenëxae, pinijicuenejawanë nacato-exanabiaba! BajarapaDioso canacopatsiana peyanacua-ewetsinëcuene daxitamatacabijawabelianexa. Penamatacaitorobisaë-ata xainaponaponaena daxitamatacabijawabelianexa, jiwi werewerecaponae-ata.4 »Xanë, Nabucodonosornë, pacayapëtaeya-exanaenatsi xua netocopiapata baja. Itsamatacabi nacuera-ewetaponaponajë tayanacua-ewetsibojawata. Bajarajota, xanë jamatejema ponaponajë bitso taxainaenëcuenia. 5 Itsiata baitsi jane, itsamerawi tamajitanucaejawata, xanë amajitsinaenë. Xua taeponajë bajarapamajitsinaejawata, bitso nejunawia-exana. Nexata, nebenajaca bitso. 6 Nexata, xanë tanejamatabëcuene-enaexae bajarapamajitsinae, itorobajë tanetocapatsinexa xanëjawaberena daxita pamonae Babilonia tomarata pejinawanapaewi, mapanacuapijicuene bitso peyapëtaewi, bajarapamonae taneyapëtaeya-exanaenexa picani pajamatabëcuene xaina bajarapamajitsinae. 7 Nexata, pata daxita pamonae mapanacuapijicuene bitso peyapëtaewi, peyapëtaewi-ata tulupujawanë pecanaëjëbicuenia, peyapëtaewi-ata penajorobijawata. Daxita bajarapamonae pepatsicujinae, xanë nexata tsipaebajë bajarapamajitsinae. Itsiata baitsi jane, bajarapamonae apocuenecaëjëpaetsi taneyapëtaeya-exanaenexa pajamatabëcuene xaina ta-amajitsinaejawa. 8 Bajaraxuacujinae, cotocaewi Daniel-ata patajopa, ponë wënërubatsi Beltsasar, tajadiosonë pewënëta. Bajaraponë bitso peyapëtaenëxae, nacatsita pejamatabëcuenecaëjëpaeya-exanaenëtsi wajanacuapijidiosowi.a Bajarapadiosowi peyawenonabiabixaetsi bajaraponë naexana bitso peyapëtaenë daxita jiwiwecua. Bajaraxuata, bajaraponëjawabelia tsipaebajë tamajitsinaejawa mapacueniaje. 9 Jumaitsinë: ‘Beltsasar, nenamatacaitorobinë daxita pamonae mapanacuapijicuene bitso peyapëtaewi. Xanë yapëtaniji pacuenia diosowi cajamatabëcuenematacapona necanaëjëtsijawata daxita jiwiwecua, bajarapacuenia neyapëtaeya-exanabiabinënexa daxitacuene jiwi apopeyapëtaejawanëmi cawecuamatayatsinejewa. ¡Nejumetaema! Pexaniacuene cawajëtatsi, taneto-itajëtsinexamë pajamatabëcuene xaina xua xanë taniji ta-amajitsinaejawata. 10 Maraxua xanë netsitajëta tataenexa bemajitsinaebocuenia tajacamata tabocaejawata. Jemata netsitanaitajëta naejawaxaneto penucaejawa daxitajiwi pejinawanapaenacuanëtuatuajëta. Bajarapanaejawaxaneto bitso piapianae. 11 Nexata, bajaraponae bitso witsabapona. Ayainaexaneto naexanapona. Bajaraponae matatupata athëbëabetsia, nexata jiwi cuenecaëjëpatsi itsanacuanëjawawerena-ata petaejawa, bitso tajë jinawanapae-ata bajaraponaewecua. 12 Bitso bajaraponae pexaniabaxu xaina. Ayaijawa-ata pecuai xaina. Nexata, cuenecaëjëpatsi pecuaixaenexa daxitanacuanëpijiwi. Bajaraponae pebëxëpanata, pitacaënaeta, bobobenabiaba daxitawiria matatsënë-unupijiwi. Bajarapijinia pacuenia, daxitawiria pepunaewi xaina pematapenanë pemaxërananëjawa. Nexata, daxitacuenewiriawi na-eweta mapanacuataje, pewëna-asaëtsawanapaenexa bajaraponaejawa pejamatabëcuene.
13 »Bajarapamajitsinaejawata jemata icatsia taniji ángelnë perunaejawatsica athëbëwetsica, peyajiwitaeponaponaenë. 14 Bajaraponë ayaijumeta peyanabiwitsijawabeliab jumaitsi: «¡Panicataxuabare bajaraponaejawa! ¡Pamaxërananë-ucubabema! ¡Pabaxusiribabema! ¡Pacuaicayajarenua! ¡Orijibia, daxita pamonae matatsënëwereca pejinawanapaewi payorore, pitacaënaeta pebobenaewi bajaraponaebëxëpanata, pitaxutuanacaetuanaewi! ¡Payororenua pepunaewi-ata, pamonae xaina pematapenanë pemaxëranajawa! 15 «¡Itsiata baitsi jane, bajaraponaematabaca pëtsa baja pacajutsimina irawetsina! ¡Pacopatanure bajarapamatabaca petabunepe yajawa! ¡Saya pamatabacacëtanure anijacadenamaëtotabeje, pexanaejawa hierronanitota, pexanaejawa broncenanitota! Bajarapacuenia pacopatanutsianame wayafotusatota». Orijibia, ángelnë jumaitsi ponë yabara jamatabëcuene-itajëta bajaraponaejawa petocopiapatsijawanexatsi. Jumaitsi: »Pacuenia wayafota penucaenaematabaca donota sucuenabiaba, bajaraponë baja jema bajarapacuenia donota sucuenae. Naxaeponaponaenua po̱na dajubimonae yajawa, wayafota pejinawanapaewi. 16 Nexata, bajaraponë jiwijamatabëcuene wecua-ajibitsi tsane, juya dajubijamatabëcuene pexainaenexa. Nexata, ponaponaena siete pawaibeje dajubijamatabëcuene pexainaenëcuenia», jai ángelnë wajunupaebiaya penaneconitsia-exanaecuenia.
17 ’Icatsia, ángelnë jumaitsi: «Marapaliwaisi petocaëjëtsijawatsi bajaraponë penaneconitsia-exanaenexa, Dioso pija-ángel-monae peyajiwitaewanapaewi, pitorobicueniatsi towajunupaeba. Bajarapaliwaisicuenia tonajumecopatatsi, daxitacuenewiriawi peyapëtaenexa Dioso pepo-ayaijamatabëcuenenëcuene daxitawecua, pepoPetuxanenënexanua daxita peyanacua-ewetsiwijawabelia, bajarapamonae peyanacua-ewetsinacuanëpijiwijawabelia-ata. Bajaraponë pepoPetuxanenëxae, tocopatabiaba daxitanacuanëpijiwi ponë tojitsipa peyanacua-ewetsinënexa. Bajarapacuenia wecuapitabiabanua itsamonae peyanacua-ewetsicuenemi, juya petocopatsinexa itsanë beweliajamatabëcuenenëjawabelia. Dioso baja cajena peto-itapetabiabinë daxitanacuanëpijiwi pajiwi yanacua-ewetsia-exanabiabijitsiatsi», jai ángelnë tataejawata bajarapamajitsinaebota.
18 »’Bajarapacuenia xanë amajitsinaenë. Ajenaconoxae nexata xamë, Beltsasar, nejumaitsimë tsane, taneto-itajëtsinexamë pajamatabëcuene xaina, tsipaji itsanë-ata, ta-ewetsinacuata pijacujirucuenia peyapëtaewi, apocuenecaëjëpaetsi bajaraxua taneyapëtaeya-exanaenexa. Itsiata baitsi jane, xamë cacuenecaëjëpa taneyapëtaeya-exanaejawamë bajarapajamatabëcuene yabara, tsipaji xamë xainame diosowi pejamatabëcuene jiwiwecua’, janë Nabucodonosornë Daniel-jawabelia.
19 »’Itsiata baitsi jane, Daniel, ponë wënërubatsinua Beltsasar, moya eca bajaya-epatowajëto, ayaicuenia pejamatabëcuenenabenajacaexae. Xua najamatabëxaineca tanejumecanawiatsinexa, bitso jamatabëcuenenawiteca. Siwajamatabëcuenebëjai xua yabara Dioso yapëtaeya-exanaponatsi. Nexata, pecajunawi moya eca. Nexata, xanë, Nabucodonosornë, jumaitsinë: ‘¡Beltsasar, pëtsa jamatabëcuenebëjamë tamajitsinaejawa yabara! ¡Jume! ¡Pëtsa jumejunawame tanetsipaebijawamë pajamatabëcuene xaina!,’ janë.
Nexata, Daniel nejumecanawiata: «Tajatuxanenëmë, pamajitsinae taneme pajamatabëcuene xaina bitso abeje. Bajaraxua picani, apojitsipaenë pecatocopiapatsijawa. Biji rajane, netsitaxanepana picani bajaraxua petsijumajopaejawatsi nijawajabitsaëwi, pamonae catojitsipabiaba piabejecuene. 20 Nexata, catsipaebianatsi jane baja. Ponaejawaxaneto xamë taneme niamajitsinaejawata, bajaraxua xamë cacuenecatane neyanacua-ewetsijawa yabara. Pacuenia bajaraponae witsabapona, pinijinaexaneto penaexanaponaenexa, bitso piasaënaenexanua, bajarapacuenia xamë pinijicuenesaë xainaponame neyanacua-ewetsijawata. Pacuenia bajaraponae matatupata itaboxojawabetsia, jamatejema jiwi petaenexa, tajë nacuajawa pejinawanapaewi-ata, bajarapijinia pacuenia, tajë pe-enaetomaranë pejinawanapaewi-ata cawënëtane ayaijamatabëcuenenëmë yabara. 21-22 Bajaraponae pexaniabaxu xaina, pexaniapitacaënae pexainaenexa. Nexata, pebëxëpanata daxitawiria-unupijiwi nacaetuatabiaba penacuera-ewetsinexa. Pemaxërananëjawa daxitawiria pepunaewi xaina pematapenanë. Bajaraponae cuainawitanua, daxitacuenewiriawi pewëna-asaëtsawanapaenexa pecuaixaejawata. Nexata, pacuenia daxitawiriawi na-eweta bajaraponae pejamatabëcueneta, bajarapijinia pacuenia, xamë necuenesaëta na-ewetawanapa daxitanacuanëpijiwi. 23 Tajatuxanenëmë, niamajitsinaejawata taneme Dioso pija-ángelnë, peyajiwitaeponaponaenë, athëbëwetsica perunaejawatsica, pejumaitsijawanua peyanabiwitsijawabelia: ‘¡Panicataxuabare bajaraponaejawa! ¡Pa-epa-ucubarenua panebijianaenexa! ¡Pëtsa itsiata bajaraponaematabaca pacajutsimina! ¡Pacopatanure bajarapamatabaca petabunepe yajawa! ¡Saya pamatabacacëtanure anijacadenamaëtotabeje, pexanaejawa hierronanitota, pexanaejawa broncenanitota! Bajarapacuenia pacopatanutsianame wayafotusatojawata.’ Orijibia, ángelnë jumaitsi ponë yabara bajaraponaejawa jamatabëcuene-itajëta petocopiapatsijawanexatsi mapacueniaje: ‘Pacuenia wayafota penucaematabaca donota sucuenabiaba, bajaraponë bajarapacuenia sucuenabiabiana. Bajarapacuenia jema baja naxaeponaponae po̱na dajubimonae yajawa, wayafota pejinawanapaewi, siete pawaibeje pepanepaejawabelia,’ jai ángelnë niamajitsinaejawata.
24 »Orijibia Daniel nejumaitsi: «Tajatuxanenë, bajarapacuenia ángelnë pecajumaitsijawa, jamatabëcuene-itajëta xua catocaëjëta xamë pecananeconitsia-exanaenexa Dioso pepo-ayaijamatabëcuenenë. 25 Nexata, xamë, tajatuxanenëmë, jiwi canawecuatsatsiana, saicaya neponaponaenexa dajubimonaetuatuajëta, nexaeponaponaenexa po̱na pacuenia vacamonae. Bajarapacuenia dono-ata catsijuma-othopabiabiana nejumasucuenaenexa. Nexata, bajarapacuenia xamë, tajatuxanenëmë, dajubinëcuenia ponaponaename siete pawaibeje, nenatoyapëtaejawabelia Dioso pepo-ayaijamatabëcuenenëcuene daxitanacuanë peyanacua-ewetsiwiwecua, nenatoyapëtaejawabelianua bajaraPonë pejitsipaecuenia peto-itapetabiabinë caenacuapijiwi canacujitsia ponë yanacua-ewetabiabijitsiatsi. 26 Bajarapacuenia peca-itapetsixae Babilonia nacuapijiwi neyanacua-ewetsinënexa, nexata xua itoroba ángelnë pecopatanutsinexa bajaraponaematabaca petabunepe yajawa, bajaraxua cuene-itajëta pacuenia xamë, tajatuxanenëmë, icatsia Dioso pecatocopatsinexa caewëarena neyanacua-ewetsijawanexa Babilonia nacuapijiwi. Matapania nenatoyapëtaecujinae Dioso penamatacaitorobisaë pexainaenëcuene daxitawecua, pacuenia-ata yanacua-eweta neyanacua-ewetsinacua xamëwecua, bajarajane baja, icatsia catocopatsiana neyanacua-ewetsinexa Babilonia nacuapijiwi. 27 Bajarapacuenia pecatocopiapatsiyaniwa tajatuxanenëmë, cawajëtatsi tanenamuxuna-ewetsinexamë: ¡Pëtsa baja orijibia pibisiacuene exanaponame! ¡Juya, exanaponaponare ëpexaniacuene! ¡Nacuenecopare baja jiwi nebejiobia-exanaecuene, pibisiacuene neto-exanaponaponaejawata! ¡Juya pexaniajamatabëcuene xainare neyawenonabiabinexa jiwi bepejiobicueneta pejinawanapaewi! Tajatuxanenëmë, bajarapacuenia itsa exanaponaponaejitsipame, belia Dioso ca-itaxutotsoniataejitsipa, jamatejemaya neponaponaenexa barëyaya Dioso cananeconitsia-exanaenejewa», nejai Daniel.
28 ’Daxita bajaraxuanë netocopiapata jane baja, pepotayanacua-ewetsinë Nabucodonosor-nëjawaberena. Tanetowajunupaebijawami pexaniajaijawa. 29 Bajarapacuenia nexata netocopiapata baja: Caewaicujinae itsa baja xainajë ta-amajitsinaejawa, itsamatacabi nucaponaponajë tayanacua-ewetsibo athëbëyopiji-irajawatatsia Babilonia nacuata. Nexata, itsa matatsënënaëcorecajë, nasiwajamatabëcuenebarëyaya jumaitsinë: 30 «¡Pataema xanë daxita ta-exanaecuenejawanë! Mapapexaniatomaraxaneto, Babilonia tomara, exanajë baja taponaponaetomaranexa, itsajota eca pabota yanacua-ewetaponaponajë. Daxita bajaraxuanë exanajë pinijicuenesaë taxainaexae, ayaijamatabëcuenenënëxae-ata. Nexata, jiwi newënëxaniatabiaba ta-exanaecuenejawanë yabara, tsipaji xanë ayaijamatabëcuenenënë cajena daxitawecua», janë xanë tanucaponaejawata.
31 ’Paepatota abaxë cuaicuaijanë tsanucaponae, jumetaniji Dioso athëbëwetsica tanejumaitsijawa: «¡Xamë, peponeyanacua-ewetsinë Nabucodonosormë, juya nejumetaema xua xanë tacatocaëjëtsijawa pecatocopiapatsijawanexa! Xamë rabaja neyanacua-ewetsijamatabëcuenemi cawecuapitatsi baja. 32 Jiwijamatabëcuene cawecuapitsianatsinua, dajubijamatabëcuene juya tacatsijamatabërutsinexa. Nexata, xamë baja, jiwi canawecuacapitsapaena, juya siete pawaibeje neponaponaenexa dajubimonaetuatuajëta, po̱na nenaxaeponaponaenexa. Bajarapacuenia ponaponaename matapania nijacuata nenatoyapëtaejawabelia pacuenia xanë caenënë Dioso pepo-ayaijamatabëcuenenënë, tanamatacaitorobisaë taxainaenëcuene daxita peyanacua-ewetsiwiwecua. Nenatoyapëtaejawabelianua pacuenia Xanë tanatojitsipaecuenia nato-itapetabiabajë daxitanacuanëpijiwi, caenacua canacujitsia, pajiwi yanacua-ewetsia-exanaejitsianë. Bajaraxua nenatoyapëtaecujinae, copatsianame jane baja, dajubijamatabëcuene nexainaejawami», nejai Dioso athëbëwetsica.
33 ’Penajumeweretsicujinae tanejumaitsijawa, xainaenejewa bajaya-epato, nexata bajarapaepatota, netocopiapata jane baja, dajubijamatabëcuene taxainaejawa, tanetocaëjëtsicuenia. Nexata, xanë, Nabucodonosornë, nepitsapaeya-exana jiwi pejinawanapaetaxunaewecua, taxaeponaponaenexa po̱na pacuenia vacamonae. Donojawanënua netsiperabë-othopabiaba athëbëwetsica. Nexata, belia xanë amatana̱pianë tsaponae pacuenia cotsalamianana itsi. Acopibocopianënua, pacuenia cotsala.
34 ’Itsa baja, copiawerewereca siete pawaibeje tanetocaëjëtsijawa tanenaneconitsia-exanaecuenejawami, nexata tanaëcotsijawata athëbëabetsia, xanë, Nabucodonosornë, jamatabëjumaitsinë: «Xaniajai, Xamë, Diosomë, caenëmë Peponeyanacua-ewetsinë daxitawecua», jamatabëjanë. Bajarapaepatota, natoyapëtaniji tanejumaitsicowëya tanetocanawiatsijawa, icatsia jiwijamatabëcuene taxainaejawa. Nexata, xanë pexaniacuenia wënëxaniatsiaya Diosojawabelia pepo-ayaijamatabëcuenenë yabara, daxitamatacabijawabelia peponaponaenëcuene yabara-ata, jumaitsinë: «Xamë, Diosomë, nenamatacaitorobisaë apopecatowerewerecaenë pepoPetuxanenëxaemë. Nexata, neyanacua-ewetsicuene apocatowerewerecae tsane daxitamatacabijawabelianexa. 35 Xamë nitabarata daxita mapanacuapijiwinë pa-amatamobinë. Xamë exanabiabame pacuenia jitsipame pamonae athëbëtatsia pejinawanapaewijawabelia, bajarapacuenia pamonae irajawatatsica pejinawanapaewijawabelia-ata. Itsajiwi-ata apocuenecaëjëpaetsi pecacueneyacaranatsijawa nesaëta nexanaejawanë. Apocuenecaëjëpaetsinua pecajumaitsinexa: ‘¿Detsa xuajitsia bajarapacuenia exaname?’ pecajainexa», janë tawënëxaniatsijawata.
36 ’Bajarapaepatota jane baja, xanë natoyapëtaniji Dioso tanetocanawiatsijawa icatsia jiwijamatabëcuene taxainaenexa. Nexata, netocanawiata icatsia tayanacua-ewetsicuenemi, caewëalia tayanacua-ewetsinexa, icatsia jiwi yaiyataeya ayaijamatabëcuenenënëcuenia tanetaenexa. Nexata bajarapaepatota, tayajawanacuenebiwimi nesiwapata. Nexata bajarapacuenia icatsia baja, caewëalia yanacua-ewetaponaponajë. Orijibia, pematatsënëa netocopata taxainaenexa bitso pinijitanamatacaitorobisaë copiayapijisaëwecua.
37 ’Bajaraxuata, ajenaconoxae xanë, Nabucodonosornë, wënëxaniatajë yaiyataeya Dioso, ponë athëbëtatsia peyanacua-ewetsinë, tsipaji xua daxita bajaraPonë siwanajamatabëxaina pexanaenexa, pexaniacuenia exanabiaba. BajaraPonë beweliajamatabëcuenewi exanabiaba pamonae be-ayaijamatabëcuenewi penataewi, pacuenia baja neto-exana xanëjawaberena,’ janë Nabucodonosornë —jai petoyaquinaebaxutota daxitanacuanëpijiwijawabelia.