Pacuenia jiwicobe liwaisi yaquinaruca Belsasar pijaboyenepanajawata
5
Nabucodonosor petëpaecujinae, pexënato Belsasara naexana pepopeyanacua-ewetsinënexa Babilonia nacuata. Nexata, itsamatacabi bexëajawabelia, bajaraponë exana pinijifiesta, pebarëxaenexa pijajiwi mil ponëbeje, peyajawanacuenebiwi bajarapanacuata. Bajarapafiestajawata barëxane pexaejawa ayaijawa, barëmatawëjëa-apanua ayaijawa piatanevinoranë pamonae daxita pejunatsiwi. 2-3 Belsasar piatanevinora penatsi-apaexae, naitajibiaxuaba. Pebarëyajamatabëcuene itoroba pijajiwi, petocaponaenexatsirena xuanë pecanacuenebijawanëmi Dioso Pijatemplobojawata, copajawanë, tasajawanë-ata, pexanaejawanë oronanitonëta, palatananijawanëta-ata, pecapatsijawanëmi pijasalinainë Nabucodonosor Jerusalén tomarawerena Babilonia tomarajawaberena. Bajarapacuenia itoroba tsipaji bajaraxuanëta jamatabëca-apa vinoranë, daxita pijajiwi pejunatsiwi, pamonae ayaijamatabëcuenewi, bajaraponë pijawajiwi, powaxi-ata cotocaewi penotsiwaxi. Nexata, pijajiwi tocaparenatsi bajaraponëjawaberena bajarapacopajawanë oronanitota pexanaejawanë, palatananitota pexanaejawanë-ata. Nexata, bajaraponë bajarapacopajawanëta piatanevinoranë ca-apaepona, daxita pamonae-ata pejunatsiwi bajarapafiestanexa. 4 Nexata, bajarapamonae bajarapacopanë peca-apaejawata vinoranë, yayotaponaeya wënëxaniataponab pijadiosowi jumapecataeya pexanaenëanë oronanijawanëta, palatananijawanëta, broncenanijawanëta, hierronanijawanëta, naejawanëta, bajarapacuenia ibotonëta-ata.5 Bajarapaepatota, jemata naitajëta jiwicobe peyaquinarucaejawa boyenepanajawata, bitso pexanianapebetsicotiajawata, pabota ponapona pepopeyanacua-ewetsinë. Nexata, bajarapacuenia pepopeyanacua-ewetsinë taenuca peyaquinarucaejawa jiwicobe. 6 Nexata pepopeyanacua-ewetsinë petaejawata bajarapacobe peyaquinarucaejawa, najunawiaca. Bajaraponë ayaicuenia jamatabë-enatsi, bitso pecajunawi wayanataba. Orijibia a-epasisaëjibi. Belia, bitso sineconecojai, nexata matabacanabiabeje pecajunawi. 7 Bajaraxuacujinae, bajaraponë ayaijumeta wawajai petojunatsinexatsi pamonae mapanacuapijicuene bitso peyapëtaewi, pamonae peyapëtaewi tulupu pecanaëjëbicuenia, pamonaenua peyapëtaewi penajorobijawata. Daxita bajarapamonae pepatsicujinae, Babilonia nacua pepopeyanacua-ewetsinë jumaitsi bajarapamonaejawabelia:
—Ponë cuenecaëjëpatsi peyorobinexa mapa-itanejawanë rubena boyenepanata, ponë-ata netsipaebiana pajamatabëcuene yabarajumaitsi, nexata bajaraponë xanë xatatsia-exanaenajë pesãëjainawa. Wësixatatsia-exanaenajënua oronanijawata pexanaepanajawa, bajaraxuajawatabeje daxitajiwi peyapëtaenexa bitso peyaiyataenënexatsi. Orijibia, tocopatsianajë yawenonaeya acueyabinëcuenia tanecobena-ewetsinënexa —jai pepopeyanacua-ewetsinë.
8 Nexata bajarapaepatota, daxitawiriawi pijacujirucuenia peyapëtaewi pe-ëjëbijawata cujibarena pepopeyanacua-ewetsinëjawaberena, peyapëtaeya-exanaenexa picani. Itsiata baitsi jane, bajarapamonae caejiwi-ata apocuenecaëjëpaetsi peyorobijawa bajarapayaquinarutsijawa, peyapëtaeya-exanaenexa pepopeyanacua-ewetsinë pajamatabëcuene xaina bajarapa-itanejawanë. 9 Bajaraxua petaejawata, nexata bajaraponë bitso najunawiaca. Orijibia, ayaicuenia pecajunawi ya-itabarawayana. Daxita pamonae peyajawanacuenebiwi apoyapëtae xua exanaejitsia. Bitso jamatabëcuenebëjai bajarapayaquinarutsijawa yabara. 10 Itsiata baitsi jane, Belsasar pena itsa jumetanetsi pewawajaijawa peyajawanacuenebiwi-ata, nexata muxunapata pabo-ënëjawata pexënato barëxane pijajiwi. Jumaitsi:
—Catojitsipatsi, tajatuxanenëmë, neyanacua-ewetaponaponaejawa daxitamatacabijawabelianexa. ¡Pëtsa jamatabëcuenebëjamë! ¡Pëtsa nenabenajacaexae itabaranajeronamenua! 11 Neyanacua-ewetsinacuata raja caenë ponapona, ponë bitso peyapëtaenëxae, nacatsita pejamatabëcuenecaëjëpaeya-exanaenëtsi wajanacuapijidiosowi. Bajarapadiosowi peyawenonabiabixaetsi, bajaraponë naexana bitso peyapëtaenë daxita jiwiwecua. Axapijinë pamatacabijawa yanacua-ewetsiaponapona, itsa tocapatatsi bajaraponë petocanaëjëtsinexa piayapëbejeliwaisianë, xaniawaetsia yapëtaeya-exanabiaba juya pacuenia exanaejitsia itsamonae pecanaëjëbiwiwecua. Peyapëtaenë bitso anijajamatabëcueneliwaisibeje pexainaejawata-ata, bajarapacuenia-ata pecanaëjëtsinë. Bajaraponë bitso cajena peyapëtaenë pecanaëjëtsicuene, pacuenia itsi diosowi. Bajaraxuata tajatuxanenë, axapijinë pepopeyanacua-ewetsinëmi Nabucodonosor, bajaraponë tocopata pepopenamatacaitorobaponaenënexa daxita pamonae peyapëtaewi mapanacuapijicuenetuatuajëta, pamonae peyapëtaewi pe-ëjëbijawata, pamonae peyapëtaewi tulupu pecanaëjëbijawata, pamonae-ata peyapëtaewi penajorobicuenia. 12 Bajaraponë raja pewënë Daniel, ponë pepopeyanacua-ewetsinëmi wënëruba Beltsasar. Bajaraponë rajane xainaponapona ayaicuenia daxitajiwiwecua peyapëtaejamatabëcuene, pecanaëjëtsijamatabëcuene-ata. Nexata, xaniawaetsia yapëtaeya-exanabiaba pajamatabëcuene xaina xua jiwi amajitsinae, apowajayapëtaejamatabëcuenemi-ata. Bajarapacuenia bitso piayapëbejeliwaisianë xaniawaetsia canaëjëtabiaba, peyapëtaeya-exanaenexa xua exanaejitsia. ¡Bajaraponë pajunare tajatuxanenë, pecayapëtaeya-exanaenexa pajamatabëcuene xaina jiwicobe xua yaquinaruta boyenepanajawata! —jai pepopeyanacua-ewetsinë pena. Jejai nexata Belsasar.
13 Daniel nexata caparenatsi pepopeyanacua-ewetsinëjawaberena. Nexata, bajaraponë yanijobatsi:
—¿Xaniajai tsabaja Judá nacuajawawerena xamë Danielmë pecayajawacapatsinërena petaicaewitsituatuajëta taxapijinë, pepopeyanacua-ewetsinëmi Nabucodonosor? 14 Itsamonae raja nejumaitsi xamë yabara diosowi pejamatabëcuene nexainaejawa itsamonaewecua. Bajarapacuenia xamë cuenewënëjunuame bitso neyapëtaenëcuene, xaniawaetsia liwaisi necanaëjëtsinëcuene-ata yabara. 15 Picani raja mapanacuataje pejinawanapaewi xanë capatsia-exanajë daxita pamonae bitso peyapëtaewi mapanacuapijicuene daxitajiwiwecua, tanetoyorobinexa picani bajarapayaquinarubi-itanejumenë boyenepanajawata, taneyapëtaeya-exanaenexanua pajamatabëcuene xaina. Itsiata, bajarapamonae apocuenecaëjëpaetsi peyorobinexa, taneyapëtaeya-exanaenexanua pajamatabëcuene xaina. 16 Xanë itsiata, jumetaniji xamë yabara pecacuenecaëjëpaenëcuene neyapëtaeya-exanabiabijawa pajamatabëcuene xaina jiwi piamajitsinaejawanë. Bajarapacuenianua cawënëtanetsi pecacuenecaëjëpaenëcuene peto-ayapëbejeliwaisianëtsi neto-itajëtabiabijawa, netoxanebijawanua xaniawaetsia petopitsapaenexatsi jiwi penatsixainaeliwaisianëwecua. Nexata, itsa xamë aeconoxae yorobianame bajarapa-itane, tanetsipaebinexamë pajamatabëcuene xaina, nexata xanë itorobianajë tajajiwi pecaxatatsinexa pesãëjainawa, bajarapacuenia pecatsiwësirutsinexanua oronanijawata pexanaepanajawa. Bajarapacuenianua catocopatsianatsi yawenonaeya acueyabinëcuenia tanecobenayanacua-ewetsinënexamë —jai pepopeyanacua-ewetsinë.
17 Nexata, Daniel jumecanawiata:
—¡Bajaraxuanë natoxaniawaere saya, tajatuxanenë, xua picani jitsipame tanerajutsinexamë jiwi taneyaiyataenexa! Itsa jume, tocopatsianame itsanë nerajutsinexa, pecabarëyanexa. Bajaraxuanë xanë aponamatawenonaenë. Itsiata baitsi jane, tajatuxanenë, xanë yorobianajë pajumenë yaquinaruta boyenepanajawata. Xuacujinae, cayapëtaeya-exanaenatsi pajamatabëcuene xaina bajarapajumenë.
18 »Tajatuxanenë, Dioso, ponë pepo-ayaijamatabëcuenenë, bajayata axapijinë, Nabucodonosor, tocopatatsi peyanacua-ewetsinënexa pinijinacuaxaneto. Bajarapacuenia tocopatatsinua ayaijamatabëcuenenënexa, jiwi pewënëxaniatabiabinexatsinua pexanaecuenejawanë yabara. 19 Nexata, bajaraponë ayaijamatabëcuenesaë xaina, Dioso perajutsixaetsi. Nexata, tomaranëpijiwi, daxitanacuanëpijiwi, daxitawiriajumewi-ata, yaiyataeyabiabatsi. Cujunawiaya taeyabiabatsi. Ayaijamatabëcuenesaë pexainaexae, exanabiaba pejitsipaecuenia jiwijawabelia. Bajarapacuenia pexanaejawata, itsamonae pijajiwi wajabitsaë itorobabiaba pebeya-exanaenexa, itsamonae pijinia tocopatabiaba abaxë pejinawanapaenexa. Itsamonae pijinia tocopatabiaba peyaiyataenexatsi, bitso ayaijamatabëcuenewicuenia, bajarapacuenia itsamonae petaeyabiabinexa beweliajamatabëcuenewicuenia. Daxita bajaraxua pejitsipaecuenecowëya exana, cueneyacaranatsinejewatsi. 20 Itsiata baitsi jane, itsamatacabi bajaraponë ayaijamatabëcuenenëcuenia natane Diosowecua. Bajarapacuenianua ajamatabëcuenetaja tsajopae ëpenatojitsipaecuenia pexanaponaponaenexa. Ayaijamatabëcuenenë nataeya jiwi bejiobiataenejewa exanaponaponanua daxitacuene. Nexata, Dioso bajarapaepatota wecua-ajibia-exanatsi peyanacua-ewetsijamatabëcuenesaëmi, jiwi pewënëxaniatsicuenemitsi-ata ayaijamatabëcuenenë yabara. 21 Juya tocopatatsi pewecuanatsatsinexa jiwiwecua pejinawanapaejawa. Jiwicuenia penajamatabëxainaejawami to-ajibitsi. Naexana juya bedajubinëcuenia. Nexata, bajaraponë wayafuabelia bowecua ponapona bepejunawiwi burromonaecuenia. Naxaeponapona po̱na, pacuenia vacamonae. Bajarapacuenia athëbëwetsica dono tsijuma-othopabiabatsi. Bajarapacuenia ponapona axapijinë, penatoyapëtaejawabelia pacuenia caenë Dioso pepo-ayaijamatabëcuenenë daxitawecua, pesaë pexainaenëcuenenua daxita jiwi peyanacua-ewetsiwiwecua. Penatoyapëtaejawabelianua pacuenia bajaraPonë to-itapetabiaba caenacua canacujitsia daxitanacuanëpijiwi pajiwi yanacua-ewetsia-exanaejitsia.
22 »Ajenaconoxae, tajatuxanenëmë Belsasar, bajaraponë pexënatomë, xamë jamatabëcuenejëpame bajaraponëmi, axapijinëmi. Nexata, ayaijamatabëcuenenëmë nataneme Diosowecua. Picani yapëtae-atamë xua tocopiapatatsi axapijinëmi, xamë itsiata ajenaconoxae beweliajamatabëcuenenëcuenia apoponaponaemë Dioso pitabarata. 23 Caranata saya juya, itsacuenia exaname. Xamë, tajatuxanenëmë, be-ayaijamatabëcuenenë nataneme Dioso athëbëtatsia pe-ecaenëwecua. Dioso apoyaiyataemë. Caranata, cuenecapo̱capo̱name. Nexata, itorobame pecapatsinexa nijamesajawaberena pacopajawanë pecanacuenebijawanëmi Dioso pijatemplobota, bajarapacuenia necuenecapo̱capo̱naenexa Dioso. Nexata, bajaraxuanëta xamë, neyajawanacaetuatsiwi, ayaijamatabëcuenewi, nijawaxi, cotocaewi nenotsiwaxinua, bajarapacopajawanë paca-apaewanapame piatanevinoranë. Nexata, paneyayotaponaejawata pane-apaeranë, pawënëxaniataponame panijadiosowi, pepoDiosowecua. Pawënëxaniataponame jumapecataeya pexanaenëanë oronanijawanëta, palatananijawanëta, broncenanijawanëta, hierronanijawanëta, naejawanëta, bajarapacuenia ibotonëta-ata. Bajarapadiosowi apopetaewi, nexata apopacatae paneyayotaponaejawa panewënëxaniatsicuenia pane-apaejawata. Bajarapadiosowi apopejumetaewinua, nexata apopacajumetae panewënëxaniatsijumenë. Apopeyapëtaewi-ata itsacuenejawa, nexata apoyapëtaenua papecayawenonaenexa. Itsiata, pepoDioso cuenecaëjëpatsi daxita bajaraxua pexanaenexa. Nexata, cuenecaëjëpatsi pecatocaëjëtsinexa netëpaejawanexa, itsa jume, niasaëtsaponaponaejawanexa, tsipaji xaina pecobeta daxita ne-exanaecuenejawanënexa. BajaraPonë itsiata caeto-ata apopawënëxaniatsimë, ayaijamatabëcuenenë-ata. 24 Bajaraxuata ne-ecaejawata, bajaraPonëwecua ayaijamatabëcuenenëmë nenataexae, imoxoyojawata catsi-itoroba bajarapajiwicobe pecatoyaquinarubinexa mapajumenëje: 25 «MENE, MENE, TEKEL, UPARSINc», pejaijumenë. 26 Bajarapajumenë mapajamatabëcuene xainaje: MENE pejaijamatabëcuene xaina: «Catocaëjëta», pejaijume. Bajarapajumeta cayapëtaeya-exana, tajatuxanenëmë, Dioso catocaëjëta neyanacua-ewetsicuene pecatocopiarucaematacabinexa. 27 TEKEL pejaijamatabëcuene xaina: «Cajamatabëcuenecanaëjëta», pejaijume. Bajarapajumeta cayapëtaeya-exana, tajatuxanenëmë, Dioso raja cajamatabëcuenecanaëjëta, peyapëtaenexa nejamatabëcuenenamatamotsijawa. Caranata, catocaxitajaraba nejamatabëcuenefafanaejawa, bijiaya neyanacua-ewetsinëxae. 28 UPARSIN pejaijamatabëcuene xaina: «Cawecuatsata», pejaijume. Bajarapajumeta cayapëtaeya-exana, tajatuxanenëmë, Dioso rabaja cawecuatsata neyanacua-ewetsinacuanëmi, anijanacuabeje penacopatsinexa. Bajarapacuenia pecawecuatsatsixae, tocopata juya Media nacuapijiwi pewetsinë, Persia nacuapijiwi pewetsinëbeje, neyanacua-ewetsinacuanëmi pewetsinexabeje anijanacuabejecuenia necowëta —jai Daniel.
29 Bajarapaepatota nexata, Belsasar caecuenia itoroba pijajiwi Daniel pejumaxatatsinexatsi pesãëjainawa. Bajarapacuenia petsiwësirutsinexatsinua oronanitojawata pexanaepanajawa. Nexata jane baja, Daniel wënëpaebanajetarubenatsi pecanacopatsijawa yawenonaeya acueyabinëcuenia pecobenayanacua-ewetsinënexa bajarapanacuata.
30 Itsiata baitsi jane, bajarapamerawi Belsasar baja beyaxuabatsi pijawajabitsaë, Babilonia nacua pepopeyanacua-ewetsinëmi. 31 Xuacujinae, Darío jane baja, Media nacua pepopeyanacua-ewetsinë, yajawacanacopata pepopeyanacua-ewetsinënexa Babilonia nacuata Belsasar pecowëta. Bajarapacujinaeta Darío xaina sesenta y dos pawaibeje.