Daniel xuarecatsi newëthëmonae penubenaemëthëjawareca
6
Darío penaexanaecujinae pepopeyanacua-ewetsinë Babilonia nacuata, najamatabëcuenewereta pitapetsinexa ciento veinte ponëbeje peyawenonaeya-ewetsiwinexatsi. Nexata, bajaraponë tocopata bajarapamonae, caenë canacujitsia, pewetsinacuanë pecobena-ewetawanapaenexatsi gobernador-wicuenia. 2 Itapetanua itsa-acueyabi ponëbeje penamatacaitorobiwinexa bajarapagobernadorwi. Bajarapa-acueyabi ponëbejeyajuwënënë Daniel. Darío tocopata bajarapapenamatacaitorobiwi pecuenetaeyabiabinexa gobernadorwi, petsipaebinexa pepopeyanacua-ewetsinëjawabelia pacuenia yanacua-ewetawanapa bajarapaciento veinte ponëbeje, bajarapacuenia peyajiwitaewanapaenexa pepopeyanacua-ewetsinë pewënëliwaisibijianaeyaniwatsi, itsa bijiaya tonacuenebawanapa. 3 Itsiata baitsi jane, bajarapapenamatacaitorobiwituatuajëta nacuene-itajëta Daniel pecuenecaëjëpaenëtsicuene daxita pewetsiwiwecua, penamatacaitorobiwiwecua-ata. Bajaraponë pexainaexae itsamonaewecua xaniawaetsia pewetsijamatabëcuene, nexata pepopeyanacua-ewetsinë siwanajamatabëxainaponaponatsi Daniel petocopatsinexatsi daxita peyajawanacuenebiwi pepopenamatacaitorobinënexa peyanacua-ewetsinacuata. 4 Itsiata baitsi jane, paciento veinte ponëbeje Darío itapeta yawenonaeya nacua pewetsiwinexa, ponëbeje-ata Daniel najuanamatacaitorobaponapona bajarapaciento veinte ponëbeje, itsa jumetane pacuenia siwanajamatabëxainapona pepopeyanacua-ewetsinë petocopatsinexatsi Daniel pinijitaxunae, bajarapamonae bitso cueneca-ëbatsi. Nexata, tojaitabiabatsi pacuenia bajaraponë cuenewajunupaebijitsiatsi bijiaya penacuenebaponaejawa penamatacaitorobicuenejawata. Itsiata baitsi jane, Daniel apocuenecaxitajarabitsi caejawayo-ata xua yabara naneconitsia-exanaejitsiatsi, tsipaji bajaraponë pexaniajaicuenia tonacuenebaponapona daxitacuenejawalia. Bajaraxuata, ayaicuenia jaitabiabi-ata peneconitsinexatsi, bajarapamonae itsiata apocuenecaëjëpaetsi pewajunupaebijawatsi bijiata petonacuenebaponaponaejawa. 5 Nexata, bajarapamonae bajaraxua yabara najumaitsi: «Pepacuene baja apotocaxitajarabitsi tsane bijiaya penacuenebijawa, caejawa-ata xua yabara neconitsijitsiatsi Daniel pepopeyanacua-ewetsinë pitabarata. Juya saya, betojaitatsi pacuenia bajaraponë apocuenecaëjëpaetsi tsane pejumecowënëtsijawanexa pepopeyanacua-ewetsinë. Betojaitatsi xua pijaDioso itawetatsi pexanaeyaniwa. Nexata, pijaDioso pejumecowënëtabiabinëxae, apojumecowënëtsi tsane pacuenia itorobatsi pepopeyanacua-ewetsinë. Matapania meta, bajarapacuenia jopaeya-exanaejitsipatsi», najai bajarapamonae pecueneca-ëbixae Daniel-jawabelia.6 Nexata, bajarapamonae, ciento veinte ponëbeje yawenonaeya pewetsiwi, penamatacaitorobinëbeje yajawa, najumejaita pitapetsinexa bajarapamonaetuatuajëta pamatabëxëyo ponaejitsia Daríojawabelia, pebarëcuaicuaijainexa. Nexata, itsa baja bajarapamatabëxëyo pata Daríojawata, bajarapamonae jumaitsi:
—Patajatuxanenëmë, Darío, bitso pacatojitsipatsi xamë daxitamatacabijawabelia neyanacua-ewetaponaponaejawanexa. 7 Daxita paxanë patacacobena-ewetsiwi mapanacuataje, pa-ayaijamatabëcuenewinë, pabeweliajamatabëcuenewinë-ata, patanacaetuatsicujinae caejamatabëcuene paxainajë mapacueneyabaraje. Bediosonëcuenia ayaijamatabëcuene nexainaenëxae, pacasiwacanaëjëtatsi daxitajiwi penajamatabëcuene-itajëtsinexa pecayaiyataejawa pexanaejawata mapacueniaje: Treinta pamatacabibejecuenia cuene-itawetsianame daxitajiwi penawajëcaeyaniwa itsadiosowijawabelia, jiwitonëjawabelia-ata. Ëxamëjawabelia jamatejema penawajëcabiabinexa. Nexata, pajiwi aponawajëcae tsane xamëjawabelia, bajarapajiwi naxuabiareca newëthëmonae penubenaemëthëjawareca. 8 ¡Nexata, ajenaconoxae pepacuene xaniajaiya bajarapaliwaisi najumecopare! Yaquinarutsia-exanaename peyaquinaebaxutojawabelia. Xuacujinae, yajawanawënëyaquinarutsianame bajarapabaxutota itsajiwi-ata pexanetsiyaniwa, tsipaji acuenebi pexanetsijawa caejiwiyo-ata, pe-iquinaejawanua nenawënëyaquinarutsicujinae. Waxaitsi daxita Media nacuapijiwitsi, Persia nacuapijiwi-ata xainatsi caeliwaisi wajajumecowënëtabiabinexa wajanacatonajumecopatsiliwaisianë wajanacayanacua-ewetsinëbeje penawënëyaquinarutsicujinae —jai bajarapamonae.
9 Nexata, pepopeyanacua-ewetsinë Darío jejai, petsitaxanepanaexaetsi bajarapa-itorobiliwaisi. Nexata, Darío yaquinaeya-exana peyaquinaebaxutota bajarapaliwaisi. Xuacujinae, pexaniajainexa nawënëyaquinaruta peyaquinaepanatabujawata. 10 Nexata, paepatota Daniel yapëtane bajarapaliwaisi pepopeyanacua-ewetsinë penajumecopatsijawa, bajarapaepatota pona pijaboyabelia, penawajëcaenexa Diosojawabelia. Pepatsicujinae, bajaraponë baupata pijaventanawojoto, pabo-ënëjawata majitabiaba, athëbëyo irajawatatsia. Bajarapaventanawojoto ruca payenepananenia Jerusalén tomara eca.a Nexata, pacuenia pematabacabëta wajëcabiaba, acueyabi xuabeje caematacabi canacujitsia ventawojoto canacujitsialia, bajarapacuenia nuca pewajëtsinexa Diosojawabelia pexaniacuenia wënëxaniatanucaeya. 11 Pecueneyapëtaexae Daniel bajarapacuenia pexanabiabinëcuene, nexata bajarapamonae junua peya-enebinexa Daniel peponaponaebojawabelia. Bajarajota, caxitajarabatsi penawajëcanucaejawata, pewënëxaniatanucaejawatanua pijaDioso. 12 Bajarapaepatota, nexata bajarapamonae bepijiayo nawiabeca pepopeyanacua-ewetsinëjawabelia, petsipaebinexa apopejumecowënëtsijawa penajumecopatsiliwaisi yabara. Nexata, bajarapamonae jumaitsi bajaraponëjawabelia:
—Xamë, patajatuxanenëmë, ¿aponajumecopatsimë tsaja jiwi penawajëcaeyaniwa treinta pamatacabibejecuenia itsadiosojawabelia, jiwitonëjawabelia-ata, ëxamëjawabelia penawajëcabiabinexa? ¿Apotocaëjëtsimë tsaja nexuabia-exanaenexareca newëthëmonae penubenaemëthëxanetojawareca daxita pamonae apopecajumecowënëtsiwi nenajumecopatsiliwaisi? ¿Bajarapacuenia tsaja aponaliwaisicaëjëtsimë? —jai bajarapamonae.
Nexata, pepopeyanacua-ewetsinë jumaitsi:
—Jãjã, bajarapacuenia rabaja najumecopatajë —jai. —Nexata, pacuenia itsi tsabiabi Media nacua, Persia nacuabeje pitorobiliwaisianë pepopeyanacua-ewetsinëbeje peyaquinarutsicujinae, acuenebi jiwi pexanetsijawa, pe-iquinaejawanua —jai.
13 Orijibia, bajarapamonae icatsia jumaitsi:
—Daniel, ponë Judá nacuapijiwi petaicaewitsiyajuwënënë, apopecayaiyataenëcuenia apojumecowënëtsi nenajumecopatsiliwaisi, penawajëcaejawata itsadiosonëjawabelia xamëwecua. Paxanë pacaxitajarabajë bajaraponë tsiteca penawajëcabiabijawa acueyabi xuabeje pijaDiosojawabelia, pacuenia exanabiaba caematacabi canacujitsia —jai bajarapamonae.
14 Nexata, pepopeyanacua-ewetsinë itsa jumetane bajarapacuenia pejumaitsijawatsi, bitso bejamatabëjiobireca. Caecuenia siwanajamatabëcuenewereta picani pacuenia capanepaejitsia Daniel bajarapaliwaisiwecua. Nexata, daxitamatacabijebi caniwiyojawabelia jaitaponapona pacuenia capanepaejitsia. 15 Itsa abaxë jaitaponapona, cuenenajemata penajumecowënëtsinexa. Icatsia, belia bajarapamonae pata pepopeyanacua-ewetsinëjawabelia, orijibia penajamatabënapitsia-exanaenexatsi pacuenia tsicarucatsi penajumecopatsiliwaisi penajumecowë-exanaenexa. Nexata, asaëyata jumaitsi:
—Patajatuxanenëmë, xaniawaetsia xamë yapëtaneme pacuenia to-acuenebitsi jiwi peliwaisixanetsinexa, pe-iquinaejawa-ata penajumecopatsiliwaisi Media nacua, Persia nacuabeje peyanacua-ewetsinëbeje penawënëyaquinarutsicujinae bajarapabaxutota. Catsicaruca nexata nenajumecowënëtsijawa —jai bajarapamonae.
16 Nexata, pepopeyanacua-ewetsinë Darío matapania itoroba pijajiwi wajabitsaë Daniel pecapatsinexatsirena, pexuabinexatsireca newëthëmonae penubenaemëthëjawareca. Itsiata baitsi jane, penaneconitsia-exanaewajënae pacuenia bajarapaliwaisi tocaëjëtatsi pexanaenexa, nexata Darío ajamatabëcuenesaëya-exanaeya jumaitsi Daniel-jawabelia:
—Daniel, nijaDioso, Ponë to-exanaponaponame pejitsipaecuenia, bajaraponë baja cacapanepae —jaitsi.
17 Nexata, Daniel pexuabicujinaetsireca bajarapamëthëxanetojawareca, bajarapamonae capata piniji-ibotoxaneto, bajarapamëthëcuaibo peyabaupaxatatsinexa. Xuacujinae, peyabaupaxatatsi-ibotoxaneto pemuxubërëjawata catsana atsananijawanëta. Bajarapa-atsananitota pepopeyanacua-ewetsinë, peyajawanacuenebiwinua pija-anillojawanëta cacuetsanapona pecowërucaenexa, Daniel petocopiapatsinexatsi xaniajaiya pacuenia baja tocaëjëtatsi penaneconitsia-exanaenexatsi, apopejumecowënëtsixae panajumecopatsiliwaisi Darío juta pejanaliwaisicuenia. Bajarapacuenia cacuetsanaponanua itsamonae muetsiacuenia pecapanepaeyaniwatsi. 18 Bajaraxuacujinae baja, Darío nawiata peponaponaeboxanetojawabelia. Nexata, bajaraponë pijacamata boca pexaejawa xaenejewa. Pitsicuenejawanë bato-exanabiabatsi picani pebarëyaya-exanaenexa, bajaraxuanë-ata apotocopatsi, tsipaji bitso bajaraponë najamatabëxaina bajaraxua yabara. Orijibia jamatabëcuenebëjai. Daxita merawijebi apojamatabëcuenemajitsi. 19 Nexata, a̱jena̱ matacabitsina, pepobajayacunua, bajaraponë naëcota, peponaenexa bepijia newëthëmonae penubenaemëthëjawabelia, jamatejema peyapëtaenexa xua tocopiapatatsi Daniel. 20 Nexata, Darío itsa patanajetaruca bajarapamëthëxanetojawabelia, nexata najamatabëxainaeya junata. Jumaitsi:
—Daniel, Dioso piasaëtsaponaponaenë pijajiwitonëmë, ¿nijaDioso tsaja cacapanepa bajarapanewëthëmonaenë pecaxaeyaniwa, paDioso xamë toponaponabiabame xaniawaetsia? —jai.
21 Nexata, Daniel jumecanawiata:
—Tajatuxanenë, catojitsipatsi niasaëtsaponaponaejawa daxitamatacabijawabelianexa. 22 TajaDioso raja neto-itoroba pija-ángelnë, bajarapanewëthëmonae taneyajiwicuaibocataitsinexa, tane-itsacueniabiyaniwa, tsipaji Dioso yapëtane xanë apotaxainaejawa itsacujiruneconi bajaraPonëjawabelia, xamëjawabelia-ata. Itsapibisiacuene-ata apocato-exanaetsi, tajatuxanenëmë —jai Daniel.
23 Nexata, pepopeyanacua-ewetsinë Darío jamatabëcuenebarëya bitso. Nexata, itoroba pijajiwi pewecuajutsinexatsi Daniel pamëthëjawata nubena newëthëmonae. Nexata, itsa jutatsi baja bajarapamëthëwecua, apocaxitajarabitsi peperabëtojawata itsacuenewajënë-ata, tsipaji bajaraponë itaxutuajamatejema pijaDiosojawabelia peyawenonaenexatsi. 24 Bajaraxuacujinae, pepopeyanacua-ewetsinë juya itoroba pecapatsinexatsi pamonae Daniel cuenewajunupaebatsi penaneconitsinëcuene yabara, bajarapacuenia pijawajiwi yajawa, pexijiwixiyajawa-ata. Nexata, daxita bajarapamonae enerecatsi bajarapamëthëxanetojawareca, itsajota nubena newëthëmonaenë. Bajarapamonaemi pepenetsijawatatsireca, patsinejewa irabereca bajarapanewëthëmonae siwajirewecatsi pexaenexatsi. Pexaejawatatsi yasitsicabaxanetsi.
25 Bajaraxuacujinae, Darío tonajumecopata pejanaliwaisi daxita peyanacua-ewetsinacuata pejinawanapaewi pejumecowënëtsinexa. Bajarapaliwaisi daxita jiwi peyapëtaenexa, toyaquinarutsia-exana peyaquinaebaxutota, pitorobinexa daxita tomaranëjawabelia, daxita nacuanëjawabelia, daxitawiriajumenë pecuaicuaijaiwijawabelianua. Mapejumaitsicuenia toyaquinaeya-exanaje: «Pacatojitsipatsi jamatejema pexaniacuenia panejinawanapaejawa, panecobecowëjawanë-ata papecatonawitsinexa.
26 »Orijibia xanë paca-itorobatsi, pacatonajumecopatatsinua daxita panejinawanapaewi tayanacua-ewetsinacuajawa paneyaiyataeyabiabinexa, panewënëxaniatabiabinexanua Daniel pijaDiosojawabelia, tsipaji raja, bajarapaDioso piasaëtsaponaponaenë. Apopewerewerecaenë daxitamatacabijawabelianexa. Peyanacua-ewetsicuene epatua apotowerewerecaetsi tsane. Penamatacaitorobisaë-ata epatua apotowerewerecaetsi tsane. 27 Jiwi petsi-ayaicuenetsiwecua pecapanepaenë. Pijawajabitsaë pecobewecua pewecuajutsinënua. Petsita-exanaponaponaenë bitso pinijicuenejawanë athëbëtatsia, irajawatatsica-ata. Bajarapecuene-itsinëxae, Daniel capanepatsi baja, xaenejewatsi newëthëmonae», jai Darío peyaquinaeya-exanaebaxutota.
28 Bajaraxuacujinae, Daniel tsitecaeya nacuenebaponapona peyanacua-ewetsiwituatuajëta, petonacuenebinë tsaponaponae Darío peyanacua-ewetsimatacabianë Babilonia nacuata. Bajarapacuenia orijibia tonacuenebaponapona Ciro, Persia nacuapijinë peyanacua-ewetsimatacabianë Babilonia nacuata, Darío pecowëta.