Daniel tsitajëta xuanë taeyabiaba bemajitsinaebocuenia Belsasar peponaponaematacabita
Daniel tane bemajitsinaebocuenia cuatro ponëbeje pitothianëanë
7
Itsa abaxë Belsasar-pijinë xaina caewai peyanacua-ewetsijawa Babilonia nacuata, bajarapawaijawalia itsamerawi xanë, Danielnë, amajitsinaenë. Bajarapacuenia taniji majitsinaebocuenia nawitsia itsacuenejawanë, tabocaejawata tajacamata. Xanë tanaëcotsijawata, yaquinajë daxita xuanë penamatamotsijawanë, tataejawanë bemajitsinaebocuenia. Taxuxuabajë tayaquinaejawa bajaraxuanë yabara mapacueniaje:2 «Bemajitsinaebocuenia xanë taniji merawi jowibo namata-enetsia pebubujaijawa cuatro payenepanabejejawawerena manuamenematatsënëwereca. Nexata, bajarapajowibonëta bitso exana ayaicuenia malataca namata-enetsia manuameneta. 3 Jemata bajarapaepatota pitsapaina bajarapamanuamenejawawetsina cuatro ponëbeje pitothianëanë,a piayainëxanetonë. Daxita bajaraponëanë nawecua-aitothia tsaponae saicayacuenia. 4 Copiaya ponë pitsapaina, bajaraponë jëpa newëthë petsobianëb pinijinë. Pexainaenë pejumata becotsalacorofetoxanetobeje. Xanë paepatota taenucajë, bajarapacorofetomibeje wejuma-ucutatsi. Xuacujinae, bajarapanewëthëxaneto petaxutabeje nucaeya-exanatsi jiwitonëcuenia. Bajaraponë tsijamatabërutatsi jiwijamatabëcuene pexainaenënexa, jiwicuenia penajamatabëxainaenënexa.
5 »Bajaraxuacujinae, icatsia taniji itsanë piayainë. Cotocaewi ponë pitsapaina, bajaraponë pejëpaenë be-unupijinë pianaepanaenë osowirianëcuenia.c Bajaraponë nayenepanayotsiaya nuca caenenia. Wonuanucapona acueyabi payenesitobeje. Nexata, bajaraponë pitorobijawatsi, jumetaniji mapacueniaje: ‘¡Ponare! ¡Xaema daxita pawi cacuenecaëjëpa nexaejawa!,’ pejaijawa.
6 »Bajaraxuacujinae, icatsia taniji acueyabinë pepitsapaejawa manuamenejawawetsina. Bajaraponë pejëpaenë leopardowirianewëthëd peyaquijainë, pebitsojinaenë. Bajaraponë pejumajawata xaina cuatro pacorofetobeje. Tanijinua bajaraponë pexainaejawa cuatro pamatabocotobeje. Nexata, bajaraponë rajutatsi pinijisaë, pejamatabëcuenecaëjëpaenexatsi daxita peyanacua-ewetsijawa.
7 »Bajaraxuacujinae, icatsia taniji bemajitsinaebocuenia cuatronë. Bajaraponë pepopiayainëe. Waja-itaxutuanabenajacaenë. Bitso pepopibisianë. Bitso ayaicuenia pepopiasaënënua. Bajaraponë xaina pinijihierrowonotonë. Nexata, bajaraponë daxita epa-ucubaxaenajetaruca pexaeponaejawata. Xuanë wecuaibo-othopatsi, bajaraxuanë cuetsabataxuabapona. Bajaraponë xaina diez pamata-etobeje pematabocotota. Bajaraponë bitso wecua-aitothia daxita pamonae copiaya taniji bemajitsinaebota, acueyabi ponëbeje pitothianëanë.
8 »Paepatota xanë taenucajë bajaraponë pemata-etonë, taniji pepitsapaejawa itsatsiquirimata-etoyo bajarapamata-etonëtuatuajëta. Pepitsapaejawata, wematabocojopaeya-exana acueyabi pamata-etomibeje, copiaya picani xuanë xaina. Bajarapamata-etoyo xaina bejiwitonë-itaxutobeje, pecuaibowojoto-ata. Nexata, cuaicuaijai tsabiabi, ayaijamatabëcuenenë nataeya.
Dioso jiwi penaneconitsia-exanaematacabinexa
9 »Bajarapamata-etoyo itsa abaxë cuaicuaijai tsarucae, bajarapaepatota icatsia taeponajë bemajitsinaebota penubaponaejawa athëbëtatsia tronojawanë, itsaxuanëta enaejitsia pamonae jiwi pijaneconi petocanaëjëbiwinexa. Bajaraxuanë penubicujinae, caetronojawata eca ponë Pepoperujunë, daxitacuene pewajënaeya peponaponaenë. Bajaraponë penaxatatsijawa bitso pepopeniojaijawa, pacuenia pebinejainioponaejawa. Bitso pematabocoto matana̱niojai, pacuenia papaëputo baniojai.f Bajaraponë pe-ecaetronojawa xaina petaxutoyorotojawanë. Bajaraxuanë xaina be-isotocotia bitso pitatsajawijawanë. 10 Bajaraponë pe-ecaetronojawawelia pitsapa nawotsiaya pitatsajawicotiaxaneto pacuenia pepamene. Bajaraponë xaina bitso ayaicuenia pepo-ayaibitsaëtoxaneto ángelewi petonacuenebiwitsi, jiwi apopenamata-ëjëtsicapanepaecuenia. Orijibia, jiwi ayaibitsaëtoxaneto nubena bajaraponë pitabarata, ángelewi matatoxenetsia. Bajaraxua tataejawata, netsita jiwi pijaneconi pexainaewi petocanaëjëbitaxunaenexa. Nexata jane baja, tronota pe-ecaenë, jiwi pijaneconi petocanaëjëbinë, taxuxuaba mapanacuapijiwije pijaneconi pexainaewi petocaëjëtsinexatsi, caejiwiyo canacujitsia, penaneconitsia-exanaenexa. Nexata, payaquinaebaxutonëta rubena jiwi pexanaecuenemi peyaquinarubijawa, pa̱teca jane baja, paneconiwajëto xaina baparapaneconicowëya penaneconitsia-exanaenexatsi.
11 »Bajarapaepatota pijinia, jumetaeponajë tsitecaeya tsiquirimata-etoyo nawënëxaniatsiaya penayabaracuaicuaijaitsaponaejawa be-ayaijamatabëcuenenë nataeya. Xua jumaitsi tsaponae nejamatabëcuenebenajaca tajumetaenucaejawata. Bajarapaepatota pijinia, taniji pebeyaxuabijawatsi cuatronë, ponë pepopitothianë daxitawecua, bajarapamata-etoyo yajawa. Bajaraponëmi tupatiticatsi, pepotsiquirijawaxi pexanaenexa. Bajarapatsiquirijawaxi pexanaejawa jane baja, penelia isotojawalia, pa-isotocotia pitsapa nawotsiaya Pepoperujunë pe-ecaetaxunaejawawerena bepepamenecuenia. 12 Bajarapijinia pacuenia, acueyabi ponëbeje pitothiawi, copiaya pepitsapaewi, wecua-ajibia-exanatsi pecuenesaëjawami. Itsiata jane abaxë, tocopatatsi saya cae-epatoyo piasaëtsawanapaenexa, petocopiapatsijawabeliatsi pewecua-ajibia-exanaematacabinexatsi.
13 »Orijibia, bajarapamerawi taeponajë bemajitsinaebocuenia maxuanëje. Xanë taniji jemata penaitajëtsijawa penajetarucaenë itarërëbotuatuajëta, jiwitonë pejëpaenë.g Bajaraponë najetaruca, pepatsinexa itsajota eca Pepoperujunë. Nexata, tocopatatsi pimoxoyotsinexa bajaraponë Pepoperujunë pe-ecaejawabelia. 14 Nexata, bajaraponë tocopatatsi piacuenesaëjawa pexainaenexa, ayaijamatabëcuenenëcuenia petaenexatsi, peyanacua-ewetsinexanua daxitanacuanëpijiwi. Nexata, bajaraponë pitorobicuenia daxitanacuanëpijiwi, daxitawiriajumewi-ata tonacuenebawanapaenatsi, penajamatabëcuene-itajëtsinexatsi asiwaya peyaiyataejawa. Papiacuenesaë xaina bajaraponë peyanacua-ewetsinexa, apotowerewerecae tsanetsi. Bajarapijinia pacuenia, peyanacua-ewetsicuene itsajiwi-ata apocuene-amoneyabi tsanetsi pewecuapitsinexatsi.
Pajamatabëcueneliwaisi xaina xuanë Daniel tane bemajitsinaebocuenia
15 »Daxita xuanë xanë Danielnë taniji bemajitsinaebocuenia, bajaraxuanë yabara natsijunawajë, tanejamatabëcuenematatoxenetsixae. Nexata, jamatabëcuenebëjanë daxita bajaraxuanë tataejawanë yabara. 16 Nexata, xanë imoxoyotajë itsanë bajarapa-ángelewiyajuwënënëjawabelia, pamonae tonacuenebawanapa Pepoperujunë, tronojawata pe-ecaenë. Wajëtajë xanë pexaniajailiwaisi tanetsipaebinexa pitsicuene yabara amajitsinaenë, pajamatabëcuene-ata xaina taneto-itajëtsinexa. Nexata, bajaraponë nejumejejai tanetsipaebinexa. Nejumaitsi: 17 ‘Xua taneme cuatro ponëbeje pitothiawi, bajaraxua raja jamatabëcuene-itajëta cuatro panacuaxanetobeje, jiwi peyanacua-ewetsijawanexa mapanacuataje. 18 Itsiata, bajarapacuatro panacuaxanetobeje pewetsiwi petocopiarubenaecujinaetsi tsane daxita nacuanëpijiwi peyanacua-ewetsijawa, bajarajane Dioso ayaijamatabëcuenenë tocopatsiana pijajiwi pitapetsiwih peyanacua-ewetsinexa daxita nacuanëpijiwi. Nexata, bajarapamonae daxita nacuanëpijiwi yanacua-ewetsiana daxitamatacabijawabelianexa. Apotocopiarucaetsi tsane bajarapayanacua-ewetsicuene,’ nejai bajaraponë.
19 »Nexata, xanë jumaitsinë bajaraponëjawabelia: ‘Xanë bitso jitsipajë picani pexaniajaicuenia tayapëtaejawa cuatronë yabara; ponë ayaicuenia pitothianë, bitso pepopiayainë daxitawecua, ponë xaina hierrowonotonë, broncecopibocotonë-ata. Ponënua jiwi pebeyaxuabaponaejawata epa-ucubaxaepona, cuetsabataxuabaponanua xuanë penacopabijawanëmi. 20 Bajarapacuenia-ata jamatabëyapëtaniji xua yabara diez pamata-etobeje xaina pematabocotota. Xua yabara-ata naitajëta tsiquirimata-etoyo, cotocaewi pepitsapaejawa. Xua yabara tsiquirimata-etoyo jopaeya-exana itsa-acueyabi pamata-etomibeje, copiaya penubenaejawanëmi. Xua yabara bajarapatsiquirimata-etoyo xaina pitaxutobeje, pecuaibowojoto-ata penayabaracuaicuaijainexa bitso ayaijamatabëcuenenëcuenia nataeya. Bajarapitsicuene pexainaexae tsiquirimata-etoyo, xanë netsita bitso bepenamatamotsimata-eto itsamata-etonëwecua. 21 Bajarapacuenia canaëjëtajë, tsipaji itsa abaxë taeponajë tamajitsinaejawata bajarapacotocaewi penaitajëtsimata-etoyo pejamatabëcuene-itajëtsinë taxuxuaba pebarënawajabitsaëtaponaejawa Dioso pijajiwi pitapetsiwijawabelia, pecuene-amonaeyabaponaejawanua bajarapamonaemi, pepatsijawabelia Pepoperujunë daxitawecua. 22 BajarapaPerujunë, ponë Dioso pepo-ayaijamatabëcuenenë, pexaniacuenia yawenonaena pijajiwi pitapetsiwi, pecapanepaenexa tsiquirimata-etoyo pecuene-itajëtsinë pebejiobia-exanaponaejawamitsiwecua. Bajaraxuawecua pecapanepaecujinae, Dioso tocopatsiana pijajiwi peyanacua-ewetsinexa daxita nacuanëpijiwi,’ janë ángel-nëjawabelia, taneyapëtaeya-exanaenexa pajamatabëcuene xaina xua yabara yanijobajë.
23 »Bajarapa-ángelnë tanejumecanawiatsijawata nejumaitsi: ‘Ponë taneme piayainë, cuatronë pepitsapaenë, bajaraponë cuene-itajëta mapanacuapijiwije cuatronacuaxanetocuenia peyanacua-ewetsijawanexa. Bajarapacuatronacuaxaneto peyanacua-ewetsiwi wecua-acuene-itothia tsane peyanacua-ewetsijawata, copiaya pamonaemi yanacua-ewetawanapa acueyabi panacuamibeje. Nexata, bajarapacuatronacuaxaneto pewetsiwi exanaena mapacueniaje: Pijajiwi wajabitsaë anaeya werebiabaponaena itsanacuanëpijiwi pecuene-amoneyabaponaejawata, pacuenia pianaepanae-unupijinë werenepona pexaeponaejawata pebeyaxuabinë. Nexata, pexaeweretsicujinae penacopabiwijawanë, cuetsabataxuabapona bëjainejewa penucaponaejawata, bajarapacuenia pijajiwi wajabitsaë pecuene-amoneyabiwimi itsaxutotsoniataenejewa bejiobia-exanaponaena. Pacuenianua bajarapa-unupijinë pexaenënexa tupatiticabiaba, bajarapacuenia bajarapawajabitsaë peyacajërëbi-iranëmi natsicobetsanaena penajua-ewetsinexa. 24 Padiez pamata-etobeje pijinia taneme, bajaraxua cuene-itajëta diez ponëbeje penajuanacobena-ewetsiwinexa bajarapacuatronacuaxanetojawata, caenë canacujitsia pewetsiwinexa saicaya pija-iratupayo. Bajarapadiez ponëbeje penajuanacobena-ewetaponaejawata, itsamatacabijawabelia itsanë icatsia naitajëtsiana bajarapamonaetuatuajëta. Bajaraponë, cotocaewi panaitajëtsinë, ponë cuene-itajëta tsiquirimata-etoyo, bajaraponë wecua-acuene-itothia tsane copiayapijiwi peyanacua-ewetsijawawecua bajarapanacuaxanetojawata. Nexata, bajaraponë tsimaxëpatsiana acueyabi ponëbeje penajua-ewetsiwimijawabelia pecuene-amoneyabijawabelia. Bajaraponë pecuene-amoneyabicujinae bajarapamonaemi, nexata yanacua-ewetsiana peyanacua-ewetsi-iratupanëmi. 25 Nexata, bajaraponë bitso pibisiacuenia baracuaicuaijai tsane Dioso pepo-ayaijamatabëcuenenë. Orijibia, ayaicuenia jamatabë-itonotsiana Dioso pijajiwi pitapetsiwi, pecopabia-exanaenexa pejumecowënëtsijawami Dioso petonajumecopatsiliwaisitsi. Nexata, bajaraponë jaitsiana pacuenia xanetsijitsia Dioso Moisés-pijinëta petonajumecopatsiliwaisitsi, pemuxufetsinexa pexaniajailiwaisiwecua. Bajarapacuenia jaitsiananua petixitsinexa penacaetuatsimatacabianëmiwecua Dioso pexanaecuenemi penajamatabënapitabiabinexa, itsamatacabijawabelia najamatabënapitsiaya penacaetuatsinexa Dioso petonajumecopatsimatacabianëmiwecua. Nexata, bajarapacuatro peyanacua-ewetsinacuaxaneto pewetsinë peliwaisisaëbëxëpanayo Dioso pijajiwi jinawanapaena bejamatabëcuene acueyabi pawaibeje epatuajawa.i
26 »Itsiata baitsi jane, belia Pepoperujunë daxitawecua, athëbëtatsia pe-ecaenë tronojawata, jiwi pijaneconi yabara petocanaëjëtsinë, bajaraponë petoyapëtaexaetsi penaneconitsinëcuene, nexata wecua-ajibia-exanaenatsi piacuenesaëjawa bajarapayanacua-ewetsicuenewecua, ayaijamatabëcuenenë penataenëmi. Peyanacua-ewetsicueneminua tobijianaenatsi. Nexata, tocopiarucaenatsi baja. 27 Bajarapacuenia petocopiarucaecujinaetsi, Dioso pepo-ayaijamatabëcuenenë tocopatsiana pijajiwi pitapetsiwi peyanacua-ewetsinexa daxitanacuanë mapanacuajawataje, bajarapacuenia pejamatabëcuenematatoxenetsinexa daxita pamonae yanacua-ewetawanapa. Bajaraxuata, daxitanacuanëpijiwi jumecowënëtabiabiana Dioso pijajiwi, pitorobicuenia pexanawanapaenexa. Dioso pijajiwi peyanacua-ewetsicuene apotowerewerecae tsanetsi. Canacopatsiana daxitamatacabijawabelia,» nejai bajaraponë, tataejawata bemajitsinaebota.
28 »Bajarajota, werewereca baja tataejawa bemajitsinaebocuenia. Itsiata, xanë, Danielnë, bajaraxua yabara jamatabëcuenebëjanë tsabiabi. Tacanaëjëbaponaejawata xua taniji bemajitsinaebota, bitso xanë nejamatabëcuenebëjaiya-exana. Belia, itabaranajeronajë tacajunawi. Itsiata baitsi jane, moyanë. Apotsipaebinë itsamonaejawabelia. Tajamatabëcueneta saya natoxainajë», jai Daniel peyaquinaejawata piamajitsinaejawa yabara.