Daniel tane bemajitsinaebocuenia anijawiriapebitobeje, oveja, chivo-ata
8
Daniel icatsia jumaitsi peyaquinaejawata: «Itsamatacabijawabelia, Belsasar itsa baja xaina acueyabi pawaibeje peyanacua-ewetsijawa, xanë, Danielnë, icatsia taniji bemajitsinaebocuenia copiaya xuanë tataejawanëwecua. 2 Bemajitsinaebota xanë nataniji tanucaejawa Susa tomarata, penatonacuenebanutsitomara pijawajabitsaëwecua penayajiwitaenexa, Elam nacuata pe-ecaetomara Ulaimene-itapajawata. 3 Nexata, xanë tanaëcotsijawatalia, tajëwetsina taenutajë oveja pebito penucaejawa Ulaimene-itapajawata. Bajaraponë xaina anijamata-etobeje. Bajarapamata-etobeje piapiamata-etobeje, itsiata caemata-eto netsita amata-epia cotocaewimata-etowecua. 4 Taniji bajaraponë penamata-e-cawetsijawa petsimaxëponaejawanexa waëyabetsia, norteyenepanajawabelia,a bajarapacuenia sur-yenepanajawabelia-ata.b Bajaraponë itsadajubinë-ata apocuenecaëjëpaetsi pecueneyacaranatsinexatsi, pecuenesaë-ata pewecuapanepaenexa. Nexata, bajaraponë pejitsipaecuenia exanapona. Bitso piacuenesaënë naexanapona, pecuene-amoneyabaponaejawata.5 »Itsa abaxë xanë canaëjëtsiaya taenucajë bajaraponë yabara, bajarapaepatota taniji chivo pebito penaitajëtsijawa, penajetarucaejawa waëwetsica. Bajaraponë daxitajawa najetaruca pebitsojinaecuenia irajumawereca taxunanonotsinejewa. Bajaraponë saya xaina pitaxutobejetuatuajëta perucaejawa caemata-etoxaneto. 6 Bajarapachivonë pecowëwetsica daxitasaëta anaeya tsimaxëcujinaeponaica, pebarënabenexa anijamata-etobeje pexainae-oveja pebitojawabelia, mene-itapata penucaenë. Nexata, chivo pebarënabejawata daxitasaëta torotajarabaxuaba ovejami. 7 Petorotajarabaxuabijawata mata-etsicatajarabaxuaba anijamata-etomibeje. Bajarapa-oveja pebito apoxainae pesaë penayamatamotsinexa chivo pebarënabejawatatsi. Nexata, ovejami xuabatsi irabelia. Tsapabataxuabatsinua irata. Bajarapaepatota, ajibi itsajiwi-ata oveja pecapanepaenexatsi chivo pecuenesaëwecua.
8 »Nexata, chivo pebito pecuene-amoneyabi-oveja pebitojawabelia, caematacabi canacujitsia ayaicuenesaë xainapona. Itsiata, paepatota bajaraponë bitso pinijicuenesaë xaina, papinijimata-etomi xaina pitaxutobejetuatuajëta totanatanaëcatsi baja. Bajarapamata-etomi pecowëyarena, tojuwatsi itsacuatro pamata-etobeje, beweliajawanë. Bajarapacuatromata-etobeje, caemata-eto canacujitsia, saicaya nawecua-itaropitarubena nacuayenepananëjawabelia. 9 Bajarapacuatro pamata-etobejeyajuwënëjawata juwarena tsiquirimata-etoyo. Bajarapatsiquirimata-etoyo cuenewitsabanajetaruca pewajënaeyabelia. Nexata, cuenesaëyacaëjëpanajetaruca pemutuabereca payenepana pe-enaetomaranëjawabereca. Orijibia, peyacaëjëpaenexanua sur-yenepananenia pe-enaetomaranëjawabelia, bajarapacuenia pepatsinexa wajapexania-iranacuajawabelia, itsajota waxaitsi israelitawitsi jinawanapatsi. 10 Orijibia, cuenesaëwitsabanajetarucanua, petsimaxëpatsinexatsia Dioso pijajiwi wajabitsaëjawabetsia, tulupumonaejawabetsia.c Nexata, bajarapamonaeyajuwënëwi penetsica irabetsica. Bajaraxuacujinae, bajarapamonae itaxutotsoniataenejewatsi bejiobia-exanaponatsi, pacuenia jiwi taxunanonobapona ira itaxutotsoniataenejewa. 11 Belia, bajarapatsiquirimata-etoyo pejamatabëcuene-itajëtsinë, ayaijamatabëcuenenë nataeya tsimaxëpata jamatabë-itonotsiaya Diosojawabelia, Ponë pepopenamatacaitorobinëd Dioso pijajiwi wajabitsaë. Nexata, cuene-itaweta jiwi dajubi petotajuitsiyaniwa altar-jumata caematacabi canacujitsia Diosojawabelia. Tobijiananua Dioso pijataxunaemi, pabojawata pijajiwi nawajëcabiaba, bepenaxuirabitaxunaecuenia penacopatsinexa bajaraPonë pitabarata. 12 Bajarapacuenia bajarapatsiquirimata-etoyo bejiobia-exanapona Dioso pijajiwi, Dioso petocopatsixae bajaraponë pecobejawabelia. Orijibia, bajaraponë pibisiajamatabëcuenenëcuenia cuene-itawetapona petajuitabiabiyaniwa dajubi caematacabi canacujitsia Diosojawabelia, pejumecowënëtabiabiyaniwanua Dioso Moisés-pijinëta petonajumecopatsiliwaisitsi, juya benatsiquejemaliwaisicuenia petaenexa. Orijibia, pataxunaeta picani jiwi dajubi totajuitabiaba Diosojawabelia, bajarapataxunaeta tocopata pijajiwi wajabitsaë pecuene-itorobinexa Dioso pijajiwijawabelia, pexanaenexa Dioso apopejitsipaecuenia. Bajarapataxunaeta, Dioso apopejitsipaecuenejawanë pexanabiabixae, tobijiana Dioso pijajiwi penawajëcabiabitaxunaemi. Bajaraxuata, nacopata bepenaxuirabitaxunaee Dioso pitabarata. Pacuenia bajarapabijianaponaenë jitsipa exanabiaba. Xua exanapona, pexaniacuenia topitsapaponatsi.
13 »Bajarapacuene tataenucaejawata, ángel-nëbeje jumetaniji penabarëcuaicuaijaijawabeje. Cae-ángelnë yanijoba itsa-ángel-nëjawabelia. Jumaitsi: ‘¿Detsa pamatacabijawabelia meta werewerecaena bajaraxuanë; pecueneyacaranatsijawa dajubi petajuitsijawami caematacabi canacujitsia, pebijianaponaejawa Dioso pijajiwi penawajëcabiabitaxunae, bajarapijinia pacuenia, Dioso pijajiwi pebejiobia-exanaponaejawatsi?’ jai bajarapa-ángelnë. 14 Nexata, itsanë jumecanawiata mapacueniaje: ‘Bajaraxua najematsiana dos mil trescientos pacaniwiyobeje, pabajayacunuabeje yajawa.f Bajaraxuacujinae, Dioso wecua-ajibia-exanaena pijataxunaewecua bajarapanaxuirabicuenemi, icatsia Dioso pijajiwi penawajëcabiabibo aneconijibia pe-ecaenexa,’ jai.
15 »Paepatota, abaxë xanë, Danielnë, bemajitsinaebocuenia tataejawa canaëjëtanucajë, bajarapajamatabëcuene tayapëtaenexa, bajarapaepatota icatsia jemata netsitanaitajëta ángelnë, jiwi pecuenejëpaenë. 16 Nexata, xanë jumetaniji pejumaitsijume jiwijumecuenia Ulaimenejawata. Asaëyata pejumaitsijawa: ‘¡Gabriel, tsipaebare maponëjawabeliaje pajamatabëcuene xaina, xua bajaraponë tane bemajitsinaebocuenia!,’ pejaijawa.
Gabriel yapëtaeya-exana Daniel-jawabelia pajamatabëcuene xaina piamajitsinaejawa
17 »Nexata, ángel Gabriel, itsa nimoxoyorena tanucaejawaberena, xanë bitso najunawiacajë. Nexata, xanë tamatabacabëta nucajunuajë itapapatsiaya irabereca. Itsiata baitsi jane, bajaraponë nejumaitsi: ‘Xamë, jiwitonëmë, xua taneme bemajitsinaebocuenia, bajaraxua raja catsitajëta pecopiapatsijawanënexa pamatacabijawabelia mapanacuapijiwi penayanacua-ewetsicuenejeg copiarucaejitsia,’ nejai.
18 »Paepatota, bajaraponë nebarëcuaicuaijai tsanucae, xanë tëpajunuajë. Nexata, xanë irataeya bocajunuajë irabelia. Tanejayatsijawata bajaraponë nematacota. Nexata, bajaraponë icatsia nenucaeya-exana. 19 Bajaraponë nejumaitsi: ‘Nacua pecopiarucaematacabianëjawabelia Dioso bara-anaepanaeya naneconitsia-exanaena mapanacuapijiwije pibisiacuene pexanawanapaejamatabëcuene. Nexata, xanë catsipaebianatsi xua copiapatsijitsia mapanacuapijiwijawabeliaje, pamatacabi copiarucaejitsia bajarapananeconitsia-exanaecuene mapanacuapijiwi.
20 »’Itsiata, bajarapacopiarucaematacabiwajënaeya, copiapatsinejewa copiaya cayapëtaeya-exanaenatsi. Xua taneme oveja pebito, pexainaenë anijamata-etobeje, bajaraxua raja itajëta anijanacuapijiwibeje peyanacua-ewetsicuene yabara, Media nacua, Persia nacuabeje. 21 Xuacujinae, pachivo pebito taneme, bajaraxua raja pijinia itajëta Grecia nacuapijiwi peyanacua-ewetsijawanexa daxitanacuanëpijiwi. Papinijimata-eto pijinia xua taneme pitaxutobejetuatuajëta, bajaraxua raja cuene-itajëta copiaya pepopeyanacua-ewetsinënexah bajarapanacuata. 22 Xua pijinia taneme petanatanaëcaejawa pemata-etotabuyalia, pepitsapaejawa itsacuatro pamata-etobeje bajarapacowëyarena, bajaraxua cuene-itajëta caenacuaxanetomi-ata, natsanaena cuatro panacuabejecuenia. Nexata, bajarapanacuanëpijiwi yanacua-ewetsianatsi itsamonae. Bajarapanacuanëpijiwi pewetsiwi apocuenesaëjëpae tsane pitsicuenesaë xaina copiayapijinacua peyanacua-ewetsinë.
23 »’Bajarajane baja, paepatota bajarapanacuanëpijiwi pepo-ayaineconi natsixainaena, imoxoyo pewajënae peyanacua-ewetsicuenemi petocopiarucaenexatsi bajarapacuatro panacuanëbeje peyanacua-ewetsiwi, nexata bajarapaepatota naitajëtsiana itsanë pepopeyanacua-ewetsinënexa. Bitso ayaijamatabëcuene penataenë tsane, petsiyapëtaenënua peyamaxë-itojorobicuenia peyanacua-ewetsijawa. 24 Nexata, bajarapayanacua-ewetsinë pewajënaeyabelia pinijicuenesaë xainaponaena. Itsiata, papinijicuenesaëta bajaraponë canacuenebiana, pijacuata apopenatoxainaesaëta. Bajarapayanacua-ewetsinë pijajiwi wajabitsaë ayaicuenia bijiananajetarubenaena patomaranë tsimaxëpata pebarënawajabitsaëtsimatacabianëjawa. Daxita xua exanaena, pexaniacuenia topitsapabiabianatsi. Nexata, bajaraponë werebiabiana itsanacuanëjawa peyanacua-ewetsiwimi, pamonae piacuenesaëwimi-ata. Bajarapacuenia werebiabiananua ayaibitsaëto Dioso pijajiwi pitapetsiwiyajuwënëwi. 25 Bajaraponë bitso petsiyapëtaenë tsane peyamaxë-itojorobinexa, nexata yanacua-ewetsiana jiwi peyamaxë-itorobiliwaisita. Bajaraxua yabara be-ayaijamatabëcuenenë nataeyabiabiana. Itsamatacabijawabelia pacujinae jiwi natocanaëjëta aliwaisijibia pejinawanapaejawa, bajarapamatacabita bajarapamonae yapëtaeya-exanaenejewatsi bajaraponë jemata werebiabiana ayaibitsaëto bajarapamonaeyajuwënëwi. Belia, bajaraponë tsimaxëpatsiana ponë daxita pepoPeyanacua-ewetsinë Diosojawabelia picani pebeyaxuabinexa. Itsiata baitsi jane, bajaraponë saya cuene-amoneyabianatsi pesaëta, jiwi yawenonaenejewatsi.
26 »’Daxita pacuene taneme bemajitsinaebocuenia caniwiyopijicuenejawanë, bajayacunuapijicuenejawanë yabara-ata, xua catsitajëta bajaraxua pexaniajaijawa. ¡Itsiata baitsi jane, xamë nejamatabëcueneta natoxainare muetsiacuenia, tsipaji abaxë sajina pecopiapatsinexa! Bajaraxuanë raja copiapatsiana itsamatacabi ayaibexëajawabelia,’ nejai ángel Gabriel.
27 »Bajarapacuenia tataecujinae bemajitsinaebocuenia, xanë, Danielnë, natotaniji ta-asaëjibijawa. Nejamatabëcueneromaebaponapona itsamatacabianë. Bajaraxuacujinae, namatacotajë baja. Icatsia nexata, nacuenebaponaponajë xuanë netsicaruca tanacuenebaponaponaenexa, pepopeyanacua-ewetsinë pijacuenejawanë. Itsiata baitsi jane, xanë bitso jamatabëcuenebëjaiya ponaponabiabajë xua yabara taniji bemajitsinaebocuenia, tsipaji apoyapëtaenë pajamatabëcuene xaina», jai Daniel peyaquinaejawata.