Daniel towajëca pijamonae israelitawi Diosojawabelia
9
Icatsia, Daniel yaquina peyaquinaebaxutota. Jumaitsi: «Darío, Media nacuapijinë, Asuero pexënato, pecuene-amoneyabicujinae Belsasar, Babilonia nacua peyanacua-ewetsinëmi, yanacua-ewetaponapona Babilonia nacuapijiwi.a Darío itsa baja xaina caewaicuenia peyanacua-ewetsijawa caldeowi, 2 copiaya waita, xanë, Danielnë,b bajarapamatacabi nacujarubaponaponajë profeta Jeremías-pijinë peyaquinaebaxutota,c paliwaisi Jehová tajëwelia yapëtaeya-exanatsi Jerusalén tomara yabara. Bajarajota, taniji pacuenia Jehová tocaëjëta setenta pawaibejecuenia Jerusalén tomara piabejetsecaenexa pebijianetsicujinae. 3 Nexata, xaniawaetsia tayapëtaenexa Jeremías-pijinë peyaquinaejawa yabara, wajëcajë Diosojawabelia taneyapëtaeya-exanaenexa. Orijibia, wajunupaebajënua waxaitsi israelitawitsi pibisiacuene waja-exanaeneconimi. Tanajamatabëcuene-itajëtsinexa ayaicuenia tasiwajamatabëbëjaijawa waxaitsi israelitawitsi wajaneconijamatabëcuene yabara, najuma-acatajë pecatsequecaepanata, tawajëtsijawata. Orijibia, ecajënua ipumanajumata. Apoxaenënua taxaejawa, jamatejema Tajatuxanenë Dioso taneyawenonaenexa tawajëtsicowëya. 4 Tanawajunupaebijawata Jehová tajaDiosojawabelia israelitawitsi wajaneconi yabara, jumaitsinë mapacueniaje: ‘Tajatuxanenëmë, Diosomë, bitso ayaijamatabëcuenenëmë, ayaisaënua nexainaenë. Xua tajëwelia jumaitsimë najumecapanepaeya nenajumeliwaisicajonejawa nijajiwijawabelia, bajarapacuenia exanabiabame. Pamonae peca-asiwajamatabëcuene cajumecowënëtawanapa nenajumecopatsiliwaisi, bajarapamonaejawabelia najamatabëcuene-itajëtame nitaxutotsoniataejawa. 5 Paxanë baja cajena nitabarata pibisiacuene bitso pata-exanawanapaewi. Nexata, pata-ajamatabëcuenebejewicuenia pa-exanawanapajë bitso piabejecuenejawanë, pepo-aponejitsipaecuenejawanë-ata. Apopacajumecowënëtabiabitsinua. Pacopabawanapajënua patanetonajumecopatsiliwaisianëmi, patane-itorobiliwaisianëmi-ata, ëpatajitsipaecuenia pata-exanawanapaenexa. 6 Orijibia, apopanamuxuna-ewetabiabinënua nijajiwi profetawi patanetsipaebiliwaisianë. Bajarapamonae picani newënëta paebabiaba pepopataneyanacua-ewetsiwimijawabelia, itsamonae-ata patanenamatacaitorobiwimijawabelia, patajasalinaiwimijawabelia-ata, daxita pamonae pejinawanapaewimi Israel nacuajawata. Itsiata, bajarapamonae petsipaebiliwaisianëtsi apojumecowënëtabiabi. Tsiteca bajarapacuenia paxanë-ata pa-itsinë tsawanapae. 7 Xamë baja cajena Tajatuxanenëmë, pexaniacuene nexanaponaponaenë. Itsiata, paxanë pa-israelitawinë apobajarapata-itsiwi. Nexata, padaxitanë bitso pa-auranë Xamë nitabarata, pamonae israelitawi pejinawanapaewi Judá nacuata, Jerusalén tomarata, Judá nacuawecua imoxoyojawa pejinawanapaewi, tajënacuanëjawa-ata patajinawanapaewi Judá nacuawecua, panacuanëjawa panecayajatame patajinawanapaenexa. Bajarapacuenia panecayajatame apopatacajumecowënëtabiabijamatabëcuene pata-ajamatabëcuenetajaxae. 8 Jehová, daxita pamonae pepopataneyanacua-ewetsiwimi, pamonae patanenamatacaitorobiwimi, patajasalinaiwimi-ata, daxita bajarapamonae pibisiacuene exanawanapa xamë nitabarata. Paxanë-ata bajarapacuene-itsinë tsawanapae. Bajaraxuata, paxanë panajuanatoyapëtaniji bitso pata-auracuene xamë nitabarata. 9 Xamë itsiata, patajaTuxanenë Diosomë, jiwi nitaxutobejiobiataenë, nexata jiwi pijaneconi siwajamatabëcuenecaewabiabame. Bajaraxuata raja, pane-itaxutobejiobiataeyabiabame patajaneconimi patanesiwajamatabëcuenecaewinexamë, paxanë pata-ajamatabëcuenetajawi-ata patacajumecowënëtabiabiyaniwa. 10 Jehová patajaDiosomë, picani apopatacanamuxuna-ewetabiabiwi, apopatajumecowënëtabiabiwi-ata paliwaisianë panetonajumecopatame nijajiwi profetawita. 11 Padaxitanë Israel nacuata patajinawanapaewimi apopajumecowënëtawanapaenë patanetonajumecopatsiliwaisimë. Pawecuanatsatabiabajë patane-itorobiliwaisianë patajumecowënëtabiabiyaniwa. Bajaraxuata, bajarapapibisiacuene panetsijumajopa paxanë, itsanacuanëjawa patanecayajatsinexamë patajinawanapaenacuamiwecua, pacuenia baja xamë jumaitsimë najumecapanepaeya patanetocopiapatabiabinexa patajaneconijamatabëcuene.d Bajarapaliwaisi baja najumecopatame nijajiwitonë Moisés-pijinëjawabelia. Bajarapaliwaisicowëya baja panetsijumajopa, pibisiacuene pata-exanawanapaexae xamë nitabarata. 12 Xamë, paneyapëtaeya-exaname picani paxanëjawaberena, pataneyanacua-ewetsiwijawabelia-ata, bajarapapibisiacuene patanetocopiapatsiyaniwa, patanenaneconitsia-exanaeyaniwamë patajaneconijamatabëcuene. Itsiata, apopacajumecowënëtsitsi. Nexata, xamë baja cajena najumecowë-exaname patanetsi-itorobijawatamë bajarapitsipinijipibisiacuenejawa. Itsiata, pacuenia xamë panenaneconitsia-exaname Jerusalén tomarata patajinawanapaewi ayaicuenia, caeto-ata abaxë apopataenë mapanacuata bajarapacuenia nenaneconitsia-exanaejawa itsanacuanëpijiwi. Baitsi, panacua rajutame picani patajasalinaiwimijawabelia pijanacuanexa, paxanë-ata papemomoxinë patawajënaeyabelia patajinawanapaenacuaminexa, bajarapanacuawecua panecapitsapame, pacuenianua cajayatsiaya panejinawanapaeya-exaname itsanacuanëjawa, bajarapitsinaneconitsia-exanaecuene apopataenë cajena caeto-ata. 13 Daxita baja pacuenia paneyapëtaeya-exaname Moisés-pijinëta netonajumecopatsiliwaisita, bajarapapiabejecuene panetocopiapata baja paxanëjawaberena. Itsiata, tsiteca abaxë paxanë apopacajaitabiabitsi Jehová patajaDiosomë. Orijibia, paxanë baja cajena apopawecuanajamatabëcuenepënëyorotsinë, patacopabinexa pibisiacuene pata-exanawanapaejawa. Bajarapacuenia nejumecowëya paneto-exanae-atamë, nejumeliwaisi pacatotanetsi benatsiquejemaliwaisi, asiwaya patacajumecowënëtsiyaniwa. 14 Bajaraxuata Jehovámë, panetoxaniawaetame bajarapitsipibisiacuene patanetocopiapatsia-exanaenexamë, patajinawanapaenexa nacajayatsiaya itsanacuanëjawa Judá nacuawecua, panacuami picani xamë rajutame patajasalinaiwimijawabelia. Xamë Jehová patajaDiosomë, pexaniacuene nexanaponaponaenë daxita xua exaname. Bajarapacuenia necuene-itsinë tsabiabi-ata, paxanë itsiata apopajitsipaenë patacanamuxuna-ewetsijawa, patacajumecowënëtsinexa.15 ’Bajaraxuata ajenaconoxae, pexaniacuene cawajëtatsi xamë Tajatuxanenë patajaDiosomë, tsipaji xamë baja cajena itajëtame pinijisaë nexainaenëcuene, pacujinae jutame nijajiwi patajasalinaiwimi Egipto nacuawerena.e Bajarapacuenia nexanaejawata xamë nawënëcapitsapame pecacuenecaëjëpaenëcuene bajarapamatacabijawawerenacujinae ajena pamatacabijawaberena-ata. Itsiata baitsi jane, paxanë pibisiacuene pa-exanawanapajë, daxita piabejecuenejawanë-ata xamë nitabarata. 16 Tajatuxanenëmë, pacacueneyapëtanetsi xamë bitso pexaniacuene nenajamatabëxainabiabinë. Bajaraxuata, ajena pexaniacuene cawajëtatsi necopatsinexa bitso nebara-anaepanaejamatabëcuenemi patajinawanapaewimi Jerusalén tomarata, icatsia nexanebia-exanaenexa bajarapatomara. Bajarapacuenia cawajëtatsi, tsipaji raja bajarapatomara xamë nijatomaracuenia nexainaetomara, patomarata eca picani nijatemplobo nijatsutojumata. Daxita panijajiwinë, patajasalinaiwimi-ata pibisiacuene pata-exanawanapaejamatabëcuene, daxita pamonae pejinawanapaewi patapënëya capo̱capo̱naeya panebaracuaicuaijai tsabiabi Jerusalén tomarata patajinawanapaewimi yabara. 17 ¡PatajaDiosomë, nenamuxuna-ewere nijajiwitonënë xua cawajëcaponatsi newënëta, asiwayacuenia netaenexa nijatemplobomi nexanebia-exanaenexa, jiwi pecawënëyaiyataenexa! ¡Tajatuxanenëmë, xaniawaetsia taema pacuenia nijatemplobomi nacopata piabejetsecaejawa! 18 ¡Nejumetaema tajaDiosomë xua cawajëtatsi! ¡Taema xaniawaetsia pacuenia paxanë pajinawanapajë nabejiobitsiaya! ¡Taemanua pacuenia nijatomarami nacopateca pepopebijianetsicueniatsi, patomarata jiwi nacaetuatabiaba picani, newënëta pecawajëcabiabinexa! Bajarapacuenia apocawajëcaetsi pataneto-exanaenexamë aneconijibia patajinawanapaexae nitabarata. Biji rajane, cawajëcatsi pataca-itaxutuajamatejemaxae jiwi nitaxutobejiobiataeyabiabinëxae. 19 ¡Tajatuxanenëmë, nejumetaema! ¡Tajatuxanenëmë, panesiwajamatabëcuenecaeware patajaneconi! ¡Tajatuxanenëmë, nejume-itaxutotsoniataema, pataneto-exanaenexamë tacawajëtsicuenia! ¡Xamë panijajiwinë pexaniacuenia patacawënëcacuaicuaijainexa, pëtsa cuenenajematame pataneyawenonaenexamë! ¡Nijatomara xanebia-exanarenua, patomarata pacawajëcabiabatsi! ¡Pëtsa cuenenajematame bajaraxua nexanaenexa!,’ janë tawajëtsijawata.
Pacuenia Dioso pijajiwi, pitapetsiwi, pitsicuene taejitsia itsamatacabijawabelia, yabara peliwaisi
20 »Orijibia, wajëcaponajë Jehová tajaDiosojawabelia. Nexata, paepatota xanë wajëcanucajë, nawajunupaebajë tajaneconi, tajamonae israelitawi pijaneconi-ata yabara. Bajarapacuenia wajunupaebajë Diosojawabelia, bajaraPonë pitaxutotsoniataenexa pijatemplobomi, pabomi picani eca penato-itapetsitsutota. 21 Xanë abaxë itsa wajëcanucajë, bajarapaepatota, ángelnë, Gabriel, punanajetaruca bepijiayo xanëjawaberena, copiayami ponë netsitanaitajëta bemajitsinaebota. Bajaraponë najetaruca caniwiyo-epatota,f paepatota dajubi totajuitabiaba Diosojawabelia. 22 Bajaraponë nejumaitsi: ‘Daniel, xanë matapania najetarucajë ajenaconoxae xamëjawaberena, xaniawaetsia tacayapëtaeya-exanaenexa pajamatabëcuene xaina xua taneme bemajitsinaebocuenia. 23 Xamë picani a̱jena̱ taxuxuabame newajëtaponaejawa Diosojawabelia, bajarapaepatota Dioso cajumecanawiata. Nexata, Dioso bitso peca-asiwaxae ayaicuenia, xanë najetarucajë tane-itorobicuenia, xua wajëtame Diosojawabelia tacayapëtaeya-exanaenexa. ¡Xaniawaetsia nenamuxuna-ewere xua catsipaebijitsiatsi, jamatejema nejumeyapëtaenexa xua xamë taneme bemajitsinaebocuenia! Cajumaitsitsije:
24 »’Setenta pasemanabejecuenia (490 pawaibeje)g Dioso tocaëjëta petaenexa nabejiobitsicueneta pejinawanapaejawa xamë nijawiriawijawabelia, Jerusalén tomara yajawa, bitso niasiwatomara, pewecua-ajibia-exanaejawabeliatsi nijawiriawi pijaneconimi, bitso pibisiacuene pexanawanapaejamatabëcuene. Bajarapasetenta pasemanabeje pepanepaecujinae, matapania Dioso nutsiana ponë yanacua-ewetsijitsia pexaniacuenia daxitanacuanëpijiwi daxitamatacabijawabelianexa. Bajarapacuenia jane baja, matapania copiapatsiana pexaniajaicuenia xua taneme bemajitsinaebota. 25 ¡Daniel, jumeyapëtaema xaniawaetsia xua catsipaebijitsiatsi mapajamatabëcueneje! Pamatacabijawa Babilonia nacua pepopeyanacua-ewetsinë itorobiana icatsia israelitawi penawiabinexa Jerusalén tomarajawabelia, peyaxanebinexa, bajarapa-itorobimatacabijawaweliacujinae panepaena siete pasemanabejeh peyaxanebiweretsijawabelia Jerusalén tomara pijacallejawanë, bajarapacuenia-ata tomara matatoyorotsia peyacaranatanutsipanajawa. Bajaraxua peyaxanebiweretsicujinae, panepaena itsasesenta y dos pasemanabeje, pepatsimatacabijawabelia ponë petsimata-epanaenëtsii Dioso pitapetsinëxaetsi. Itsiata, bajarapasesenta y dos pasemanabejejawalia Dioso pijajiwi bitso jinawanapaena jamatabëcuenebëjaiya, nabejiobitsiaya pejinawanapaexae. 26 Bajarapasesenta y dos pasemanabeje (434 pawaibeje) pepanepaecujinae, ponë aceiterata tsimata-epanatsi Dioso pitapetsinëxaetsi, abaxë pitsinejewa xua yabara pata, bajarajane baja beyaxuabianatsi.j Orijibia, pebeyaxuabicujinaetsi, itsanacuapijiwajabitsaëk tobijianaenatsi pijatemplobomi, bajarapacuenia-ata pijatomarami, Jerusalén tomara. Bepijiacuenia bijianaena, pacuenia ayaicuenia penawotsimene babijiana daxita pebubutsijawata. Dioso tajëwelia pecaëjëtsicuenia, jiwi barënabenajetarubenaena daxita bajarapasesenta y dos pasemanabeje peweretsijawabelia. 27 Bajaraxuacujinae, bajarapanacua peyanacua-ewetsinë naliwaisicajonena caesemanacuenial ayaibitsaëto Dioso pijajiwijawabelia, pejamatabëcueneyawenonaenexa picani. Itsiata, bajarapasemanamaxëto epatuajawata, bajaraponë itawetsiana Dioso pijajiwi petajuitabiabiyaniwa dajubi altar-jumata Diosojawabelia, bajarapacuenia itawetsiananua itsa-ofrendajawanë perajutabiabiyaniwa. Belia, bajaraponë bitso pibisiacuene exanaena dajubi petajuitsi-altar-muxuneneta, bajarajota pecopatanutsinexa pitsicuenejawa Dioso tane pepopitoyajawa. Nexata, bajarapa-itoyajawa nacopatanucaena bajarajota, Dioso penaneconitsia-exanaejawabelia bajaraponë bajarapapibisiacuene pexanaexae, pamatacabijawabelia Dioso tajëwelia tocaëjëta penaneconitsia-exanaenexatsi,’ nejai Gabriel taneyapëtaeya-exanaejawata xua yabara amajitsinaenë», jai Daniel peyaquinaebaxutota.