DANIEL 10

Xua Daniel tane bemajitsinaebocuenia Tigris menemuxuneneta

Ciro baja itsa xaina acueyabi pawaibeje peyanacua-ewetsijawa Persia nacuajawata, bajarapamatacabijawa Daniel, ponë wënërubatsi Beltsasar, Dioso yapëtaeya-exanatsi bemajitsinaebocuenia papexaniajailiwaisi itsamatacabijawabelia tocopiapatsijitsiatsi Israel-pijinë pemomoxijawabelia. Itsiata baitsi jane, bajarapajamatabëcuene bitso to-ayapëbejetsi pejumeyapëtaenexa. Nexata, Daniel bajaraxua pejamatabëcueneyapëtaenexa, bitso canaëjëbiaya ponapona. Belia, nexata yapëtaejopa pajamatabëcuene xaina, peyapëtaeya-exanaejawatatsi icatsia bemajitsinaebocuenia.

2 Nexata, peyaquinaejawata Daniel yapëtaeya-exana daxita bajarapamajitsinaejawa yabara. Jumaitsi: «Bajarapamatacabianëjawa xanë, Danielnë, bitso najamatabëxainaeya ponaponajë acueyabi pasemanabejecuenia xua yabara taniji bemajitsinaebocuenia. 3 Apoxaenë pexaniapexaejawanë; saya xaniji piaxaebijawanë. Apoxaenë-ata pewi. Vinora-ata apo-apaenë. Aponatuxuwiatsinënua petuxujuwijawanëta. Ëbajarapacuenia ponaponajë bajarapa-acueyabi pasemanabeje pewerewerecaejawabelia. 4 Nexata bajarapacujinae, veinticuatro matacabita, copiayapijijuametojawata, xanë nucajë pinijimene Tigris-itapajawata. 5 Nexata, xaniawaetsia tanaëcotsijawata, jemata taenutajë itsanë bejiwitonë. Bajaraponë naxatatanuca bitso pexanianaxatatsijawa, linowiriapanata pexanaejawa. Na-epacëtanucanua pepopexania-oronanijawanëta pexanaepanajawa. 6 Bajaraponë perabënaitayota pacuenia topaciowiria-iboto. Pitabarata pijinia itabaranaitayota pacuenia yamaxëcotia. Pitaxutobeje pijinia itaxuto-itatsajawa benaecunuyo petajuitsicotia. Pemaxëbeje, petaxubeje pijinia butujai pacuenia pe-ojobibroncenanijawanë. Bajaraponë pecuaicuaijaijawata, jumejëpa be-ayaibitsaëtoxaneto pecuaicuaijaijumenë.

7 »Xanë picani bajarapaepatota itsamonae yajawanucajë. Itsiata, xanë caenënë taniji bajaraponë bemajitsinaebocuenia. Caejiwi-ata, tayajawanucaewi, apotae itsacuenejawa-ata. Itsiata, taenejewa bitso pejunawijawa jamatabëcuene-amoneyabatsi. Nexata, rëcëpeca penamatayabinexa. 8 Nexata, xanë caenënë bajarajota nacopatanucajë, paepatota xanë taniji bemajitsinaebocuenia. Bajarapitsicuene tataejawata, bitso xanë daxitanënë najeronayajë, asaëjibinënua tsanajetsireca. 9 Paepatota jumetaniji bajarapanaitayotsinë pecuaicuaijaijawa, nexata xanë jopajë irataeya tatëpajonecuenia. Bajarajota, xanë irata nacopatanucajë irataeya tabocaejawata, bitso betamajitsinëcuenia. 10 Bajarapaepatota, nayapëtaniji pecobeta tanejayatsijawa. Nexata, nematacota, tanucaenexa tamatabacabëta irawaetabanucaeya tacobeta. 11 Bajarapanaitayotsinë nejumaitsi: ‘Daniel, xamë bitso Dioso peca-asiwanë. ¡Namatacore, netaxuta nenucaenexa, wajacuaicuaijainexabeje! Xanë raja nitoroba xamëjawaberena, tacatsipaebinexa xua canaëjëtsiaya ponaponame. ¡Nexata, nenamuxuna-ewere xaniawaetsia xuanë cajumaitsijitsiatsi!,’ nejai.

»Bajarapacuenia tanejumaitsitsanucaejawata, xanë namatacotajë tanucaenexa. Nucaeya neconecojanë tsanucae. 12 Nexata, bajaraponë nejumaitsi: ‘¡Daniel, pëtsa junawame, tsipaji raja Dioso cajumetane pamatacabi taxuxuabame newajëcaponaejawa, nenajamatabëcueneweretsixae neyapëtaenexa pajamatabëcuene xaina papiayapëbejejawanë taneme bemajitsinaebocuenia! Catotanenua beweliajamatabëcuene nenajamatabëcuene-itajëtsijawa bajaraPonë pitabarata, pacujinae apoxaemë nexaejawa, aponaitabëtsimënua. Nexata, xanë Dioso nitoroba xamëjawaberena, tacayapëtaya-exanaenexa bajaraxua yabara. 13 Pamatacabita taxuxuabame newajëcaejawa Diosojawabelia, bajarapamatacabita nitorobi-ata picani tapatsinexa xamëjawaberena. Itsiata, Persia nacua pewetsidowathinëtsi, necueneyacaranataponapona veintiun pamatacabibejecuenia, tapatsiyaniwa xamëjawaberena. Itsiata baitsi jane, Dioso neto-itoroba itsa-ángelnë taneyawenonaenexa. Bajaraponë, Miguel, pepopenamatacaitorobiwiyajuwënënë Dioso pija-ángelewituatuajëta. Miguel patsinejewa abaxë, xanë caenënë taja-epato nacopatanucajë tabarënawajabitsaëtsinexa bajarapadowathinëjawabelia, Persia nacua pewetsinëjawabelia. 14 Xanë raja matapania patajopajë tacayapëtaeya-exanaenexa xua tocopiapatsijitsiatsi nijawiriawijawabelia, Israel-pijinë pemomoxi, mapanacua pecopiarucaematacabijawabelia, tsipaji xua xamë taneme bemajitsinaebocuenia, bajaraxua catsitajëta bajarapamatacabijawatalianexa,’ nejai bajarapanaitayotsi-ángelnë. 15 Paepatota bajarapanaitayotsinë nejumaitsi tsanucae bajaraxua, xanë moya nucajë irataeya itsajume-ata jumaitsinënejewa. 16 Nexata, bajarapaepatota icatsia itsa-ángelnë naitajëta, jiwitonë pejëpaenë. Bajaraponë necuaibojayata. Nexata, matapania necuenecaëjëpa tacuaicuaijainexa penaitayotsi-ángel-nëjawabelia, ponë taitabarata pecuaicuaijaitsanucaenë. Jumaitsinë mapacueniaje: ‘Tajatuxanenë, majotaje daxitaxua taniji bemajitsinaebocuenia bitso xanë siwajamatabëcuenebëjanë tsabiabi. Nexata, xanë nacopatajë ta-asaëjibinëcuenia tasiwajamatabëcuenebëjaijawa yabara. 17 ¿Detsa pacuenia meta xanë nijajiwitonënë necuenecaëjëpaejitsipa tacabarëcuaicuaijainexa xamëjawabelia, itsa bitso xanë pepo-asaëjibinë, nejumecuenobanua nitabarata?’ janë.

18 »Bajarapacuenia tajumaitsicujinae, nexata cotocaewi penaitajëtsi-ángelnë necujirena icatsia tanejayatsinexa. Bajarapacuenia nerajuta pesaë taxainaenexa. 19 Xuacujinae, bajaraponë tane-ajamatabëcuenesaëya-exanaenexa nejumaitsi: ‘¡Xamë raja Dioso peca-asiwanë, nexata pëtsa junawame! ¡Pëtsa jamatabëcuenebëjamënua! ¡Ayaicuenia ajamatabëcuenesaëmëre!,’ nejai. Paepatota nebarëcuaicuaijai tsanucae, xanë nayapëtaniji orijibia tajamatabëcuenesaëtsaponaejawa. Nexata, jumaitsinë penaitayotsi-ángel-nëjawabelia: ‘¡Tajatuxanenë, nejumaitsimëre, tsipaji rabaja icatsia tasaë xainajë!,’ janë tanebarëcuaicuaijainëjawabelia. 20-21 Nexata bajaraponë nejumaitsi: ‘¿Xamë tsaja yapëtaneme xua yabara xanë patajë xamëjawaberena tacataenexa? Patajë picani tacayapëtaeya-exanaenexa paliwaisianë rubena pepopexaniajailiwaisibaxutota. Orijibia, xanë xainajë itsajawanë ta-exanaenexa, itsiata taponaewajënaeya cayapëtaeya-exanaenatsi bajarapaliwaisianë. Bajaraxuacujinae, bepijiayo caewëalia ponaenajë tabarënawajabitsaëtsinexa Persia nacua pewetsidowathinëtsijawabelia. Itsa baja, xanë cuene-amoneyabianajë bajaraponë tabarënawajabitsaëtsijawata, nexata bajarapaepatota, itsanë netsimaxëpatsiana Grecia nacua pewetsidowathinëtsi tanebarënawajabitsaëtsinexa. Xanë apoxainaenë itsanë taneyawenonaenexa tabarënawajabitsaëtsijawata bajarapa-ewetsidowathinëbeje; caenë saya Miguel, pa-ángelnë ewetaponapona Dioso pewënëta Israel nacua,’ nejai ángelnë.