DANIEL 11

»Icatsia, bajarapanaitayotsi-ángelnë^a nejumaitsi: ‘Xanë abaxë bajayata copiaya Miguel jamatabëcuene-asaëya-exanajë, yawenonajënua bajaraponë pebarënawajabitsaëtsijawata bajarapa-ewetsidowathinëbeje pacujinae Darío copiayapijiwaita^b yanacua-ewetaponapona Media nacuata. 2 Nexata, ajenaconoxae cayapëtaeya-exanaenatsi papexaniajailiwaisianë rubena bajarapabaxutota,’ nejai.

Pacuenia penaitayotsi-ángelnë yapëtaeya-exana Daniel-jawabelia Egipto, Siria nacuabeje peyanacua-ewetsiwinexa, yabara peliwaisi

»Orijibia nejumaitsi: ‘Pepopeyanacua-ewetsinë Cirocujinae, abaxë itsamonae acueyabi ponëbeje yanacua-ewetawanapaena Persia nacuata. Bajarapa-acueyabi ponëbejecujinae itsanë cuatronë^c yanacua-ewetsiana bajarapanacuajawata. Bajarapacuatronë bitso pexainaenë tsane daxita matatoxenetsia copiaya pepopeyanacua-ewetsiwimiwecua Persia nacuata. Ayaijawa pexainaexae tsane, pinijicuenesaë xainaponaena. Nexata, bitso penamatacaitorobisaënua pexainaexae tsane, tsimaxëponaena Grecia nacua pepopeyanacua-ewetsinëjawabelia.^d 3 Bajarapacuatronë petsimaxëpatsicujinae Grecia nacua pepopeyanacua-ewetsinëjawabelia, bexëajawabelia itsanë naitajëtsiana Grecia nacuata. Pepopiacuenesaënë tsane penawajabitsaëtsinexa. Nexata, bajaraponë belia cuene-amoneyabaponaena ayaibitsaëto itsanacuanëpijiwi,^e bajarapacuenia peyanacua-ewetsinexa Grecia nacua pepopinijinacuaxanetocuenia. Bajaraponë daxita xua jamatabë-exana, pejitsipaecuenia exanaponaponaena. 4 Itsiata baitsi jane, bajaraponë pepuaxainae pinijipenamatacaitorobisaë daxitawecua, bajarajota pibisiacuene tocopiapatsianatsi. Nexata, papinijinacuaxaneto picani copiayanëmi yanacua-ewetaponapona, bajarapanacuami itsamonae canatsanaena, cuatro panacuabeje penacopatsinexa. Bajarapacuenia bajaraponë peyanacua-ewetsicuenemi towerewerecaenatsi. Nexata, pemomoxi-ata apocanacopatsi tsane bajarapayanacua-ewetsicuene. Biji rajane caranata, cuatro ponëbeje, itsamonae, cotocaewi naexanaena pepopeyanacua-ewetsiwinexa bajarapanacuami, pepuanatsicobetsanae tsane bajarapa-iranëmi. Itsiata, pitsicuenesaë xaina copiaya pepopeyanacua-ewetsinëmi, bajarapacuenia cotocaewi pamonae yanacua-eweta apocuenesaëjëpae tsane.

5 »’Bajaraxuacujinae, Grecia nacuaxaneto pepuapenatsicobetsanaecujinae cuatro pa-iratupabejecuenia, saicaya penayanacua-ewetsinexa cae-iratupa canacujitsia. Bajarapa-iratupaxiyajuwënëjawa cae-iratupayo boca sur-nenia^f Israel nacuawecua, pewënë Egipto nacua.^g Bëxëajawabelia Egipto nacua pepopeyanacua-ewetsinë, ayaicuenesaë xainaena. Itsiata belia, itsanë, bajaraponë pijajiwi wajabitsaëtuatuajëta pepopenamatacaitorobiwiyajuwënënë,^h caenë bitso piacuenesaënë tsane pepopeyanacua-ewetsinëwecua. Nexata, bajarapapenamatacaitorobinë wecuanatsatsiana pepopeyanacua-ewetsinëwecua, juya peyanacua-ewetsinexa itsa-iratupayo Egipto nacuapiji-irayajuwënëjawami. Bajarapayacajërëtsi-irami boca nortenenia Israel nacuawecua, pewënë Siria nacua. Orijibia, pijajiwi wajabitsaë cuene-amoneyabaponaena ayainacuanëpijiwijawabelia, ayainacuaxaneto pecanacopataponaenexa. Bajarapacuenia nexata saicaya yanacua-ewetsiana itsanacua pinijinacuaxaneto Egipto nacua peyanacua-ewetsinëwecua. 6 Ayaicuenia wainë pepuapanepae tsane, nexata Egipto nacuaⁱ pepopeyanacua-ewetsinë, bajarapijinia pacuenia Siria nacua pepopeyanacua-ewetsinëbeje naliwaisicajonenabeje penatsimaxëpatsiyaniwabeje, caeliwaisi penajuaxainaenexabeje picani. Bajaraxuata, Egipto nacua pepopeyanacua-ewetsinë nacoxirajutsiana^j Siria pepopeyanacua-ewetsinëjawabelia. Bajarapacuenia exanaenabeje pexaniajainexabeje penaliwaisicajonejawabeje picani. Itsiata, bajarapanaliwaisicajonecuenemi pexaniacuenia apotopitsapaetsibeje tsane, tsipaji itsamonae beyaxuabianatsi bajarapowami, pamonami, pexënatomi, bajarapacuenia-ata pamonaemi yajawapata amoneya petonacuenebawanapaewimitsi. 7 Nexata, bajarapowami pijamonaeyajuwënënë naexanaena pepopeyanacua-ewetsinë Egipto nacuata. Bajaraponë tsimaxëpatsiana Siria nacua pepopeyanacua-ewetsinëjawabelia pebarënawajabitsaëtsinexa. Bajaraponë cuene-amoneyabiana bajarapamonaemi, yacajërëtsiananua paboxanetota Siria nacua pewetsinë natonacuenebanuta penayajiwitaenexa pijawajabitsaëwecua. Nexata, juya ponaponaena bajarapaboxanetota. 8 Bajarapacuenia bajaraponë yacajërëtsiana jumapecataeya pexanaenëanë, Siria nacuapijiwi pijadiosowi, pecaponaenexa Egipto nacuajawabelia. Nexata, capona padiosonëanë exana pe-epanaxuabicuenia pesetsinanijawanë petsiwajënae-exanaeferajawabelia, itsajawanënua bitso penamatamotsijawanë, oronanitota, palatananitota-ata pexanaejawanë. Bajaraxuacujinae, apojamatabë-itonotsi tsane, wainë panepae-ata, Siria nacua pepopeyanacua-ewetsinëjawabelia. 9 Ayaibexëacujinae itsiata, Siria nacua pepopeyanacua-ewetsinë icatsia cuene-ëjëbiaya tsimaxëpatsiana Egipto nacua pepopeyanacua-ewetsinëjawabelia pebarënabenexa. Itsiata, apopecuenecaëjëpaexaetsi tsane pecuene-amoneyabijawa, nexata caewëarena nawiatsiana jamatabëcuenenacueratsiaya pija-irajawaberena.

10 »’Itsiata baitsi jane, Siria nacua pepopeyanacua-ewetsinë pexi siwanajamatabëcueneweretsiana petsimaxëponaenexa Egipto nacuapijiwijawabelia, pebarënawajabitsaëtsinexa. Nexata, caetuatsiana wajabitsaëwi pinijibitsaëtoxaneto, pebarënacuenexaniawaetsinexa. Nexata, bajarapaepatota Siria nacua pepopeyanacua-ewetsinë pexiyajuwënënë,^k barëtsimaxëpatsiana pijajiwi wajabitsaëwi yajawa Egipto nacuapijiwijawabelia. Nexata, bajaraponë barëwerebiabanajetarucaena bepijiayocuenia. Pacuenia pepamene bepijiayo bijianapona daxita piawajubuatsanajetarucaejawata, bajarapacuenia werebiabanajetarucaena pepatsijawabelia Egipto nacuapijiwi penayajiwinacuenebanutsitomarajawabelia, bitso piacuenesaëtomara. Itsiata, apojonecapanepae tsane bajarapatomarajawabelia. 11 Bajarapacuenia petsimaxëpatsixaetsi, nexata Egipto nacua pepopeyanacua-ewetsinë^l bitso ayaicuenia anaepanaena. Nexata, bajaraponë ya-anaeya tsimaxëpitsapaena, pebarënawajabitsaëtsinexa Siria nacua pepopeyanacua-ewetsinë pijajiwi wajabitsaëjawabelia. Nexata, Siria nacuapijiwajabitsaë pinijibitsaëxanetomi-ata, daxitami cuene-amoneyabianatsi. 12 Nexata, Egipto nacua pepopeyanacua-ewetsinë pecuene-amoneyabixae tsane, pinijibitsaëtoxaneto pijawajabitsaëwimi pebeyejebixae-ata, be-ayaijamatabëcuenenë nataena. Itsiata baitsi jane, bajaraponë penamatacaitorobisaë bajayajebi apocanacopatsi tsane. 13 Itsamatacabi bexëajawabelia Siria pepopeyanacua-ewetsinë pijajiwi wajabitsaë icatsia caetuatsiana, pebarënacuenexaniawaetsinexa, copiayamibitsaëto matatoxenetsia. Nexata, pijajiwi wajabitsaë xainaeya-exanaena bitso pexaniawiria pecanawajabitsaëtsijawanë. Bajaraxuacujinae, wainë pepanepaecujinae tsane, icatsia bajaraponë barëtsimaxëpatsiana pijajiwi wajabitsaë yajawa, pebarënawajabitsaëtsinexa Egipto nacua pepopeyanacua-ewetsinëjawabelia.

14 »’Bajarapamatacabijawa bajarapacuenia itsa taeponaena, nexata itsanacuanëpijiwi ayaibitsaëto jamatabëcuene-anaepanaena Egipto nacua pepopeyanacua-ewetsinëjawabelia. Bajaraxuata, tsimaxëpatsiana bajaraponëjawabelia. Itsamonae israelitawiyajunëwi pijinia, pejitsipaewi pebarënawajabitsaëtsijawa, jamatabëcueneyanabiana bajarapamonae petsimaxëpatsijawata. Bajarapacuenia exanaena bajarapa-israelitawi, pijacuata jamatejema pecopiapatsia-exanaenexa bemajitsinaebocuenia petaejawa. Itsiata, bajarapamonae jamatabëcuenenaxuabiana, tsipaji penatocaëjëtsicuenia apotopitsapaetsi tsane. 15 Bajaraxuacujinae, Siria nacua pepopeyanacua-ewetsinë tsimaxëpatsiana pamonae jinawanapa Egipto nacuapijiwi penatonacuenebanutsitomara penayajiwitaenexa pijawajabitsaëwecua. Bajarapatomara peyacaranatsijawa matatoyorotsia yacapatsiaya jinawanapaena. Nexata, natonacuenebaponaena irajawanë najumajebaponaeya pexananutsinexa petsutocuenia, bajarawetsica petsimaxëjonenexa tomarajawabelia. Belia, cuene-amoneyabiana bajarapatomarapijiwimi, bajarapacuenia peyacajërëtsinexa pijatomarami. Nexata, Egipto nacuapijiwajabitsaë apocuenecaëjëpaetsi tsane pecuenecaranatsijawa bajaraponë. Bajarapacuenianua pamonae pexanianawajabitsaëtsiwi-ata, apocuenecaëjëpaetsi tsane pecuenecaranatsinexa, tsipaji acuenesaëjibi tsane. 16 Nexata, Siria nacuapijinë barëbenajetarucaena pijawajabitsaëwi pejitsipaecuenia, cuenecaranatsinejewatsi itsanacuanëpijiwijawa-ata. Belia, patajopaena bitso pexanianacua Israel nacuajawabelia, bajarapanacuata penacopatsinexa. Nexata, xuacujinae pecuene-amoneyabaponaejawata, werebiabanajetarucaena xua caxitajarabanajetaruca. 17 Bajaraxuacujinae, bajaraponë icatsia tsimaxënacuenexaniawaetaponaena, penaxainaeyabinexa daxita Egipto nacuapijiwi pejinawanapaenacuanëjawa. Nexata, petoyapëxanepanaenexatsi pecuene-amoneyabijawa Egipto nacuapijiwi, bajaraponë canaëjëtsiana yamaxë-itorobiaya penaliwaisicajonejawa Egipto nacua pepopeyanacua-ewetsinëjawabelia namata-enetsia penatsimaxëpatsiyaniwabeje. Nexata, rajutsiana pexënatoyo pijawanexa Egipto nacua pewetsinëjawabelia,^m bajarapacuenia picani pewerebiabiyaniwa bajarapanacuapijiwi. Itsiata baitsi jane, xaniawaetsia apotopitsapaetsi tsane pecaëjëtsicuenia. 18 Bajaraxuacujinae, tsimaxëpatsiana manuamene-itapaya pe-enaenacuanëpijiwi. Ayaibitsaëto bajarapanacuanëpijiwimi cuene-amoneyabiana, bajarapacuenia juya peyanacua-ewetsinexa. Itsiata baitsi jane, itsanë, apopijanacuapijinë, wajabitsaë pepopenamatacaitorobinë, cuenecanawiatsiaya urabiana Siria nacua pepopeyanacua-ewetsinëjawabelia,ⁿ be-ayaijamatabëcuenenë penataeyabiabinëmi, pecuene-amoneyabijawatatsi. 19 Nexata, bajaraponë nawiataponaerena pijanacuajawaberena, bajarajota peponaponaenexa picani pijanacuata penatonacuenebanutsitomaranëta itsajota naewetsijitsia pijawajabitsaëwecua. Itsiata, patsinejewa abaxë pijatomarajawabelia, bajaraponë cuene-amoneyabianatsi. Beyaxuabianatsinua. Nexata, bajaraxuacujinae caeto-ata pematatsënëa jiwi apoyapëtae tsane bajaraponë yabara.

20 »’Nexata, bajaraponë pecowëtami juya itsanë naitajëtsiana peyanacua-ewetsinexa Siria nacua. Bajaraponë itorobiana itsanë impuestomatamo peyanijobabiabinënexa, ayaijawa pecobecowëjawanë penotaponaenexa, bajarapacuenia bitso pexainaenë penaexanaenexa. Itsiata baitsi jane, caematacabibejecujinae, bajaraponë beyaxuabianatsi, apopenawajabitsaëtsimatacabi-ata.

21 »Orijibia ángelnë nejumaitsi tsaponae: ‘Bajaraponë pebeyaxuabicujinaetsi, icatsia itsanë yanacua-ewetsiana^o Siria nacua. Bajaraponë picani apopecuene-itajitsipaenëtsi tsane, apopetsicarucaenëtsinua picani pepopeyanacua-ewetsinë penaexanaenexa, tsipaji apopeyanacua-ewetsinë pijamonaeyajuwënënë tsane. Penacopatsinexa pepopeyanacua-ewetsinë bajarapanacuata, bajaraponë pibisiajamatabëcuenenë-ata najamatabëcuenematayatsiana, pepitsinexa bajarapataxunae peyamaxë-itojorobicuenia. 22 Nexata, bajaraponë werebiabanajetarucaena daxita pamonae picani pecueneyacaranatsiwitsi. Orijibia, beyaxuabiananua Israel nacuata sacerdotewi pepopenamatacaitorobinëmi,^p ponë penamatacaitorobinë Dioso penajumeliwaisicajonewijawata.^q 23 Bajaraponë picani itajara naliwaisicajonena itsanacuanëpijiwijawabelia, yaiyataeya penataenexa. Itsiata, belia tsimaxëpatsiana penaliwaisicajonewimijawabelia. Tsiquiribitsaëtoyo xainae-ata pijajiwi wajabitsaë, cuene-amoneyababiabiana pamonaejawabelia barënawajabitsaëtanajetarucaena. 24 Paepatota bajaratomaranëpijiwi jamatejema jinawanapaena aliwaisijibia, bitso pecobecowëjawanë pexainaewicuenia itsanacuanëpijiwiwecua, bajarapaepatota bajaraponë jemata tsimaxëpatsiana bajarapatomarapijiwijawabelia. Nexata, bajaraponë cuene-amoneyabanajetarucaena pacuenia pijamonaemi apocuenecaëjëpaetsi pecuene-amoneyabinexa. Nexata, bajaraponë pijajiwi wajabitsaë barënatsicobetsanabiabiana daxitaxuanë yacajërëbanajetarubena pebarënawajabitsaëtsimatacabianëjawa. Nexata, bajaraponë barënajumejaitabiabiana pacuenia icatsia barënawajabitsaëtsijitsia pamonaejawabelia jinawanapa penatonacuenebanutsitomaranëta penayajiwitaenexa pijawajabitsaëwecua. Bajarapacuenia pexaniacuenia topitsaponaenatsi xua exanaponaena ëcae-epatoyonexa.

25 »’Pexaniacuenia petopitsapaexaetsi picani pexanaecuenemi, nexata itsamatacabijawabelia bajaraponë pejamatabëcuenebarëyaxae, pecuenesaëjamatabëcuene, pitatsacajamatabëcuenenua, tsimaxëpatsiana Egipto nacua pepopeyanacua-ewetsinëjawabelia.^r Bajarapaepatota pijinia, Egipto nacua pepopeyanacua-ewetsinë caetuatsiana ayaibitsaëto pijajiwi wajabitsaë, bitso piacuenesaëwi, pecuenecaranatsinexa pijawajabitsaëwi pebarënawajabitsaëtsijawata. Itsiata baitsi jane, Egipto nacua pepopeyanacua-ewetsinë penajuanawajabitsaëtsiwi yamaxë-itojorobianatsi. Nexata, Siria nacua pepopeyanacua-ewetsinë cuene-amoneyabiana bajaraponëmi. Bajaraxuata, apocuenecaëjëpaetsi tsane pecuenecaranatsijawa petsimaxëpatsiwitsi. 26 Pamonae Egipto nacua pepopewetsinë itajara bepeyapëtaewitsi siwaxainabiabianatsi, bajarapamonae najumejaitsiana bajaraponë pepëya, pecuene-amoneyabinexatsi. Nexata, bajaraxuata, bajaraponë pijajiwi wajabitsaëmi tobeyejebianatsi ayaibitsaëto pewerebiabijawabeliatsi. 27 Nexata, Siria nacua, Egipto nacua pepopeyanacua-ewetsinëbeje, najua-ecaenabeje caemesajawata, penajumejaitsinexabeje picani pacuenia nabarajamatabëcuenexanepanaejitsiabeje icatsia. Najumejaitsi-atabeje tsane penasiwajamatabëcuenexanepanaenexabeje itajara, bëpënëa nasiwanajamatabëxainaenabeje, namata-enetsia ëpiabejecuene penato-exanaejawabeliabeje, penawerebiabinexabeje. Nexata, nasiwanajumetsënëtsianabeje xua najumaitsibeje namata-enetsia. Itsiata baitsi jane, apotopitsapaetsibeje tsane caenë canacujitsia penatocanaëjëtsicowëyabeje, tsipaji sajina abaxë Dioso petocaëjëtsimatacabitsibeje pecopiarucaejawanexabeje. 28 Nexata, Siria nacua pepopeyanacua-ewetsinë naropotsiana penawiatsinexa pijanacuayabelia. Ayaijawa pecobecowëjawanë canajetarucaena, peyacajërëbijawanëmi penawajabitsaëtsimatacabi Egipto nacua pepopeyanacua-ewetsinëjawabelia. Nexata, penawiatanajetarucaenë, bajaraponë siwanajamatabëxainaena pibisiacuene pexanaenexa Israel nacuata pejinawanapaewijawabelia, pamonae jumecowënëtawanapa Dioso penajumeliwaisicajonejawami Moisés-pijinëta. Bajaraxuata pesiwanajamatabëcueneweretsicowëya, pibisiacuene exanaena pejitsipaecuenia bajarapamonaejawabelia. Bajaraxua pexanaecujinae, nawiatsiana pijanacuayabelia. 29 Pamatacabijawa tocaëjëtatsi Dioso, bajaraponë icatsia tsimaxëpatsiana Egipto nacua pepopeyanacua-ewetsinëjawabelia. Itsiata baitsi jane, cotocaewi patsimaxëpatsicuene apotopitsapaetsi tsane pacuenia copiayami. 30 Bajarapacuenia apotopitsapaetsi tsane, tsipaji pamonae waëyabetsia^s manuamene-itapajawa pejinawanapaewi, pijajiwi wajabitsaë najetarubenaenica manuamenejawa barcomonëta. Nexata, bajarapamonae cueneyacaranatsiaya tsimaxëpatsianica pebarënawajabitsaëtsinexatsi. Nexata, Siria nacua pewetsinë bajarapacuenia petaejawata, aitajepaebiaya caewërena nawiatsiana pijanacuajawaberena. Itsiata, pejamatabëcuenenaxuabixae pesiwanajamatabëcueneweretsijawami, ya-anaeya penawiatanajetarucaexae, bejiobia-exanaena pamonae Diosojawabelia penawajëcabiabiwi Israel nacuata. Itsiata, pamonae copabiana Diosojawabelia penawajëcabiabijawami, juya penawajëcabiabinexa bajaraponë pijadiosowijawabelia, bajara-ëpamonae pexaniacuenia taeyabiabiana.

31 »’Bajaraponë pijajiwi wajabitsaë tocopatsiana pibisiacuenejawanë pexanaenexa Dioso pijatemplobo-ënëta, itsajota jiwi nayajiwijinawanapaena^t pijawajabitsaëwecua. Papibisiacuene exanaena bajarajota, Dioso taena petobijianaejawatsi pijataxunaemi, bepenaxuirabibocuenia penacopatsinexa bajaraPonë pitabarata. Orijibia, cuene-itawetsiana bajarapatemplobojawata jiwi dajubi petajuitabiabiyaniwa caematacabi canacujitsia altar-jumata Diosojawabelia. Xuacujinae, pecowëta copatsia-exanaena jiwi pexanabiabinexa bajarapataxunaeta xuanë Dioso tane pepopitoyajawanë. 32 Nexata, bajaraponë najumetsënëtsiaya wënëxaniatabiabiana, peyamaxë-itojorobinexa pamonae pecopabiwi Diosojawabelia penawajëcabiabijawami, caejamatabëcuene pexainaenexa bajaraponëjawabelia, apopejumecowënëtsinexa Dioso penajumeliwaisicajonejawami. Belia, bajarapamonae xainaena caejamatabëcuene bajaraponëjawabelia, pibisiacuene pexanabiabinexa. Itsiata baitsi jane, pamonae pepacuene piasiwawi Dioso, bajarapamonae ajamatabësaë tsane Dioso pejitsipaecuenia pexanaenexa. Nexata, cuenecaranatsiaya nawajabitsaëtsiana Siria nacua pewetsinëjawabelia. 33 Pamonae Dioso piasiwawiyajuwënëwi, pewetsiwi pijamonaetuatuajëta, cujarubabiabiana jiwi ayaibitsaëto Dioso pijacuene beweliacuenia peyapëtaewijawabelia. Itsamatacabijawabelia, bajarapacujarubiwiyajuwënëwi^u itsamonae beyejebianatsi espadata, itsamonae tajuitsianatsi. Wecuanacobetoxotsianatsi daxitaxua-ata xaina. Itsamonae pijinia caponaenatsi petaicaewitsicuenia tajë nacuanëjawabelia, bajarapanacuanëpijiwi amoneyacuenia petonacuenebiwinexa. Bajarapitsipibisiacuenejawanë Dioso pijajiwi taeyabiabiana caejuametobejecuenia. 34 Pacujinae Dioso piasiwawi tocopiapatsianatsi pebejiobia-exanaejawatsi, pebeyejebijawatsinua, bajarapamatacabita jiwi bewelia yawenonaenatsi. Itsamonae-ata nacajonena Dioso piasiwawijawabelia bepejumecowënëtsiwi itajara, itsiata apoyawenonae tsane bajarapamonae pewecuapanepaenexa bajarapabejiobia-exanaecuenetsi. Nacajonena saya pijacuata penasiwanajamatabëxainaexae pexaniacuene penatotaenexa. 35 Nexata, Siria nacua pewetsinë itsa beyejebia-exanaena Dioso piasiwawi, bajarapabejiobia-exanaecuenejawata Dioso capitsapaeya-exanaena pamonae saya ëpenacajonewi, pijacuata penasiwanajamatabëxainaecuene yabara, jamatejema penacopabinexa ëpamonae pepacuene Dioso piasiwawi. Bajarapacuenia Dioso tocopatsiana bajarapanacua pewetsinë pebejiobia-exanaenexa pijajiwi nacua pecopiarucaematacabijawabelia. Bajarapamatacabi abaxë sajina pecopiapatsinexa, Dioso penatocaëjëtsimatacabi.

36 »’Bajarapamatacabianëjawa Siria nacua pepopeyanacua-ewetsinë^v exanabiabiana penatojitsipaecuenecowëya. Belia, nexata bajaraponë ayaijamatabëcuenenë nataena daxitawiriadiosowiwecua. Nexata, bitso pibisiacuenia baracuaicuaijai tsane pepoDioso yabara, jiwi caeto-ata apopejumaitsijumenë. Daxita bajaraponë pexanaecuenejawanë, xaniawaetsia topitsapabiabianatsi picani, Dioso bara-anaepanaeya penaneconitsia-exanaematacabi pecopiarucaejawabelia, daxita pibisiacuene pexanawanapaewi mapanacuataje. Bajarapaepatota nexata, Dioso tsitorobianatsi paneconita tocaëjëta penaneconitsia-exanaenexa, tsipaji xua Dioso jamatabë-exana, bajaraxua exanabiaba. 37 Bajarapayanacua-ewetsinë apotoyaiyatae tsane pijasalinaiwimi pijadiosowi,^w bajarapacuenia petiriawi-ata padiosowijawabelia^x jumecowënëtsiaya nawajëcabiaba, itsawiriadiosowijawabelia-ata, tsipaji bajaraponë bitso ayaijamatabëcuenenëcuenia nataeponaponaena daxita diosowiwecua. 38 Bajarapacuenia be-ayaijamatabëcuenenë nataeponaponae-ata tsane daxita pijanacuapijiwi pijadiosowiwecua, bajaraponë itsiata siwanajamatabëcuenecopatabiabiana itsatomaranëpijiwi jumapecataeya pexanaenëjawabelia,^y pijasalinaiwimi apopeyapëtaediosonëjawabelia. Nexata, siwanajamatabëcuenecopatabiabiana pajumapecataenë natoxainabiaba bediosonëcuenia pamonae piacuenesaëtomaranëta pejinawanapaewi, pewetsinexatsi pijawajabitsaëwecua. Bajarapajumapecataenë bepijadiosonëcuenia petaexae tsane, asiwaya yaiyataeya rajutabiabiananua oronanijawanë, palatananijawanë, pexanianaitabëtsiwiria-ibojawanë-ata, bajarapacuenia itsawiriapenamatamotsijawanë-ata. 39 BajarapaSiria nacua pepopeyanacua-ewetsinë bajarapapitothiadiosonëjawabelia siwanajamatabëcuenecopatsiaya tsimaxëpatsiana piacuenesaëtomaranëta pejinawanapaewijawabelia. Nexata, pecuene-amoneyabicujinae, pamonae yaiyataeya taeyabiabiana bajaraponë,^z bajarapamonae juya tocopatsianatsi pataxunaeta ayaijamatabëcuenewi ewetabiaba. Bajarapacuenia iranë tsicobetsanaenatsi pijamatamocuenia.

40 »’Paepatota jane baja, Dioso tocaëjëtatsi petocopiarucaenexatsibeje bajaraponëbeje peyanacua-ewetsijawamibeje, bajarapaepatota copiaya Egipto nacua pepopeyanacua-ewetsinë tsimaxëpatsiana, pebarënawajabitsaëtsinexa Siria nacua pepopeyanacua-ewetsinëjawabelia. Itsiata baitsi jane, Siria nacua pepopeyanacua-ewetsinë cuenecanawiatsiaya barëtsimaxëpatsiana ayaibitsaëto pijajiwi wajabitsaëwi yajawa; itsamonae petaxuta peponaewi, itsamonae pecanawajabitsaëtabiabicarrozamonëta peponaewi. Itsamonae pijinia ponaena pecanawajabitsaëtabiabibarcomonëta. Nexata, barënawajabitsaëtsiana Egipto nacua pepopeyanacua-ewetsinëjawabelia. Nexata, pebarënawajabitsaëtanajetarucaejawata, cuene-amoneyabaponaena itsanacuanëpijiwi, panacuanë ena bajaraponëbeje peyanacua-ewetsinacuabejetuatuajëta. Pacuenia bitso mene piawajubuamatacabita iranë bepijiayo pëcaewa, bajarapacuenia cuene-itsi tsane Siria nacua pewetsinë pijajiwi wajabitsaë pecuene-amoneyabaponaejawata. 41 Bajarapijinia pacuenia, barëjonenajetarucaena Israel nacuajawa. Nexata, bajarapanacuajawa beponaena bitso jiwi ayaibitsaëtonë. Itsiata baitsi jane, wecuapanepaenatsi Edóm nacuapijiwi, bajarapacuenia Moab nacuapijiwi, ayaibitsaëtonë Amón nacuapijiwi-ata. 42 Nexata, bajarapacuenia bajaraponë yanacua-ewetsiana itsanacuanë nawitsia. Belia, yanacua-ewetsiananua Egipto nacua, tsipaji bajarapanacuapijiwimi apocuenecaëjëpaetsi tsane pewecuapanepaejawa. 43 Bajarapacuenia wecuacaponaena daxitaxua penamatamotsijawanë, oronanijawanë, palatananijawanë, daxitaxuanë-ata bitso penamatamotsijawanë Egipto nacuapijiwi pijajawanëmi. Bajaraxuacujinae, icatsia cuene-amoneyabiana Libia nacuapijiwi, Etiopía nacuapijiwi-ata. 44 Bajarapamatacabijawalia tojumepatsianatsi ayailiwaisi, pemutuabereca pejinawanapaewi peliwaisi, nortenenia pejinawanapaewi peliwaisi-ata. Bajarapaliwaisianë anaeya-exanaenatsi, jamatabëcuenebëjaiya-exanaenatsinua. Bajaraxuata, anaeya caewëarena barëpitsapaena bajarapanacuabejejawabelia, pebarënawajabitsaëtsinexa. Picani bitso jamatabëwerebiabiana, jamatabëbeyejebaponaenanua jiwi ayaibitsaëto. 45 Nexata, exananubiana pexaniawiriacarpabonë pijataxunaeboxanetonexa pa-ira boca manuamenebeje, petsutobejetuatuajëta; patsuto baitsi Dioso itapeta pijatemplobomi pijataxunaenexa, Jerusalén tomarata. Itsiata baitsi jane, Dioso petocaëjëtsicueniatsi bajaraponë tocopiapatsianatsi petëpaejawanexa. Nexata, beyaxuabianatsi xainaenejewa itsajiwi-ata peyawenonaejiwinexatsi,’ nejai ángelnë taneyapëtaeya-exanaejawata xua copiapatsijitsia itsamatacabijawabelia», jai Daniel.