Jehová tonajumecopata Isaías xua yabara naneconitsia-exanaejitsia Israel nacuapijiwi pewetsiwi
10
1-2 Paliwaisi Jehová tonajumecopatatsi, Isaías tsipaeba Efraín Pemomoxijawabelia. Jumaitsi mapacueniaje:—Piayaicuenejawanë Jehová pacatsi-itorobiana papecatocopiapatsinexa paxamë jiwi pijaliwaisianë panetocanaëjëtsiwi, tsipaji paxamë panejamatabëcueneliwaisita pa-itorobabiabame itsamonae beweliajamatabëcuenewi pecobecowëjawaxi yamaxë-itojorobiaya panewecuanotabiabinexa. Nexata, pawecuanotabiabame pecobecowëjawanëmi bepejiobiwi, pamonajiwi pewecuatëpaewaxitsi-ata, tsonijiwixi-ata. Dioso pejumeliwaisi apopajumecowënëtsimë. 3 Nexata, pacayanijobatsi panecanaëjëtsinexa. ¿Detsa nexata xua pa-exanaename patacayanijobimatacabita pane-exanaecuenemi yabara, patacananeconitsia-exanaenexa? ¿Jipatsa nexata pacayawenonaejitsipa bajaraxuawecua? ¿Detsa jota papuenetsianame daxita panecobecowëjawanë juya papecayacajërëtsiyaniwa? 4 Ajibi panewecuapanepaenexa tsane Jehová papecatsi-itorobimatacabi Asiria nacua pewetsinë papecabarënawajabitsaëtsimatacabinexa paxamëjawaberena. Pacatsicopatsiana saya papecataicaejawa bajaraponë papecacuene-amoneyabixae, itsa jume, bajaraponë pacabeyejebaponaena. Bajarapacuenia Jehová pacato-exanae-ata tsane, apopacasiwajamatabëcuenecaewi tsane papecabara-anaepanaejawa panijaneconi yabara. Orijibia, pacatocaëjëtsiana papecananeconitsia-exanaejawanexa —jai Isaías Efraín pemomoxijawabelia, Jehová pejumaitsicueniatsi.
Dioso xaina itsaliwaisi Asiria nacua pewetsinënexa
5 Isaías mapaliwaisije wajunupaeba Asiria nacua pepopeyanacua-ewetsinë yabara, Jehová pejamatabëcueneta penaneconitsia-exanaejawanexa. Nexata, pecopiapatsiwajënaeya jumaitsi Efraín pemomoxijawabelia:
—Jehová jumaitsi: «Asiria nacua pepopeyanacua-ewetsinë piayaicuene penatotaenë tsane. Pacuenia pijajiwitonë pexainaenë naneconitsiaya jumaconitabiaba apopejitsipaecuene pexanaexae, bajarapacuenia Xanë picani Asiria nacua pepopeyanacua-ewetsinë xainajë betajanaebocuenia tananeconitsia-exanaenexa tajajiwi pijaneconi pejamatabëcuene. 6 Bajaraxuata, bajaraponë picani itorobijitsianë pebarënawajabitsaëtsinexa tajajiwijawabelia, tsipaji nenacofënëtsiaya jinawanapa, apotanejumecowënëtsicuenia, tajajiwicuenia natae-ata picani. Xanë tocopatsianajë tabara-anaepanaexae, pecuene-amoneyabinexatsi bajarapamonae pecobecowëjawanëmi, pebejiobiwicuenia penacopabinexa, bajarapacuenia benatsiquejemawicuenia petaenexatsi pecuene-amoneyabixaetsi. Pacuenia namuto peponaejawata natsiquejemacuenia ira taxunanonobabiaba bejiobiataenejewa, bajarapacuenia tocaëjëtsianajë natsiquejemacuenia petaenexatsi Israel-pijinë pemomoxi Asiria nacuapijiwi pebeponaejawatatsi.
7 »Bajarapacuenia tocaëjëtsi-atanë tsane Asiria nacua pepopeyanacua-ewetsinë bajarapacuenia tananeconitsia-exanaenexa picani tajajiwi, itsiata bajaraponë apocanaëjëtsi-ata bajarapacuenia pexanabiabinexa. Saya jitsipaena pewerebiabinexa ayaibitsaëto nacuanëpijiwi pebeponaejawata, ayainacua pepopeyanacua-ewetsinë penaexanaenexa. 8 Nasiwajamatabëcuene-itsi tsabiabi tsane saya mapacueniaje: ‘Yeee ra jane daxita tajajiwi wajabitsaëwi penamatacaitorobiwi pepopeyanacua-ewetsijamatabëcuene pexainaewi jiwi peyaiyataenexatsi. 9 Xanënexa daxita tomaranë acuenesaëjibi tanecuenecaranatsijawa. Yeee ra jane cuene-amoneyabajë Carquemis tomarapijiwi necuenecaranatsinejewa, Calno tomarapijiwi-ata, Arfad tomarapijiwi-ata, Hamat tomarapijiwi-ata, Damasco tomarapijiwi-ata, bajarapacuenia Samaria tomarapijiwi-ata. 10-11 Daxita najëpaeya jamatejema cuene-amoneyabajë ayaibitsaëto, jumapecataeya pexanaenëanë xainae-ata pijadiosowicuenia pewetsinexatsi, apopejitsipaecuene petocopiapatsiyaniwatsi. Pacuenia cuene-amoneyabajë baja Samaria tomarapijiwi, bajarapacuenia-ata cuene-amoneyabianajë Jerusalén tomarapijiwi, tsipaji padiosowi jumapecataeya pexanaenëanë natoxaina pewetsinexatsi picani, bajarapadiosowi beweliasaë pexainaewi, Samaria tomarapijiwi pijadiosowiwecua,’» jamatabëcuenejai tsane Asiria nacua pepopeyanacua-ewetsinë xanë Jehovánë tatocaëjëtsicuenewecua.
12 »Pamatacabijawa Jehová weretsiana pecuenexanetsijawa pijajiwi Jerusalén tomarapijiwi, bajarapacuenia Sión-tsutota pewetsiwi, Asiria nacua pepopeyanacua-ewetsinë pejamatabëcueneta, bajarapamatacabijawa matapania jane baja Asiria nacua pepopeyanacua-ewetsinë juya Jehová naneconitsia-exanaena, tsipaji bitso be-ayaijamatabëcuenenëcuenia nataeyabiaba Jehováwecua. 13 Asiria nacua pepopeyanacua-ewetsinë jamatabëcuene-itsi tsane: ‘Xanë daxita bajaraxua exanajë tajacuata, tsipaji ayaibitsaëtoxaneto xainajë tajajiwi wajabitsaëwi. Bitso tayapëtaenënua tanawajabitsaëtsinexa, nexata xaniawaetsia siwanajamatabëxainajë pacuenia cuene-amoneyabijitsianë daxitanacuanëpijiwi. Bajaraxuata, tajajiwi wajabitsaëwi cuenecaëjëpatsi pewerebiabaponaenexa bajarapanacuanëpijiwi tanaxainaeyabinexa pijanacuanëmi. Bajarapacuenia to-ajibia-exanajë pitsinacuamiwajëto itsaxuayo tocopianajetarucatsi pija-iranëmi, bajarapacuenia bajarapanacuanëmi penaexanaenexa caenacuaxaneto tayanacua-ewetsinacuanexa. Yacajërëtajënua pecobecowëjawanëmi tajajawanexa. Cuene-amoneyabajë daxita itsamonae pepopeyanacua-ewetsijiwi pecuene-aitatsacapepopeyanacua-ewetsinëcuenia. Daxita bajaraxua tajacuata exanajë bajarata-itsinëxae. 14 Jamatejema notaponajë bajarapatomarapijiwi pecobecowëjawanëmi, bajarapacuenia pija-iranëmi itsajiwiyo neyacaranatsinejewa, bajarapacuenia itsajiwiyo-ata yapijiwicuaicuaijainejewa bajarapamonae. Baitsi, pacuenia peyacabocaenë pecowëta pematapenajawata, jiwitonë notabiaba petobëtoxi, bajaraponëyo yacaranatsiaya anaeya nacorafefaubabenejewa, napumuxowësatsiaya aëjainejewa-ata, bajara-itsinë xanë bajarapamonae pija-iranë tayacajërëtaponaejawata,’ jamatabëjai tsane Asiria nacua pepopeyanacua-ewetsinë.
15 Itsiata, Jehová jumaitsi yanijobiaya pecanaëjëtsinexa pexanaecuene yabara bajaraponë: «¡Canaëjëre! ¿Sipali meta be-ayaijamatabëcuenenë nataejitsipa pecanacuenebinëtsiwecua? ¿Bajarapacuenia serrucho be-ayaijamatabëcuenejawa nataejitsipa meta pecaucubinëtsiwecua? ¿Detsa xuajitsia nexata xamë, betajanaebocuenia tacacanacuenebaponaponaenë, be-ayaijamatabëcuenenëmë nataneme xanë Jehovánëwecua? ¡Icatsia canaëjëre! Ponaebo jiwitonë cobenanucaponaejitsipa, ¿bajaraponaebo tsaja cobepitsiaya cobecaponaejitsipatsi? Jume cajena, tsipaji saya naebo. Baitsi, jiwitonë xuanë pecanacuenebijawanë daxita bajaraxuanë. Apojiwitonë. Bajarapacuenia xanë Jehovánë cacanacuenebaponaponatsi tajitsipaecuenia. Nexata, xamë nexanaecuenemi aponijacuata nexanaejawanë. Xanë saya ta-exanaejawanë xamëta.
16 »Ayaijamatabëcuenenë nenataexae xanëwecua, xanë Jehovánë, daxitawecua bitso ta-acuenesaënë tsaponaponae, cananeconitsia-exanaenatsi. Nexata, catsi-itorobianatsi pinijidomaecuene nijajiwi wajabitsaëwi pecuenobiwitsicuenia penacopabinexa. Daxita ayaicuenia bajarapamonae domae pejamatabëcuene amatataju tsane. Nexata, bajarapadomaeta cato-ajibia-exanaenatsi daxitaxua yabara be-ayaijamatabëcuenenëmë picani nataeyabiabame. Pacuenia pitatsajawi-isoto baweriajawa isonaexi, bajarapacuenia cato-ajibia-exanaenatsi ayaijamatabëcuenenëcuenia nenataeyabiabijawami», jai Jehová Asiria nacua pepopeyanacua-ewetsinë yabara, Isaías petsipaebinexa Israel nacuapijiwijawabelia. 17-34 […]