Itsamatacabijawabelia naexanaejitsia pexaniacuenia pepopeyanacua-ewetsinënexa
9
Orijibia Isaías jumaitsi:—Dioso picani bejiobia-exana Galilea nacuapijiwi, Zabulón-pijinë pemomoxi, Neftalípijinë pemomoxi-ata, bajarapacuenia itsamonae apojudíowi-ata Jordán-menemuxubërëa pejinawanapaewi. Nexata, ayaicuenia pebejiobia-exanaexaetsi, bajarapanacuapijiwi aponatotae penacapanepaecuenenexa. Pacuenia jiwi bitso pitaquirijawataa itsa jinawanapa apotae pepitsapaejawanexa pecotianejewa, bajarato-itsitsi. Itsiata, bajarapacuenia jinawanapae-ata apotsitecae tsane daxitamatacabijawabelianexa pebejiobia-exanaejawatsi. Itsamatacabijawabelia Dioso wecua-iquinaena bajarapamonae itsamonae beweliajamatabëcuenewi petaejawamitsi. Belia, itsamonae topexaniacuenetsi tsane, bajarapacuenia-ata wënëxaniatsianatsi Galilea nacuajawata pejinawanapaewi, bajarapacuenia Jordán menepanawerena, Galilea pucapanawerena pejinawanapaewi-ata.
2 »Pamonae jinawanapa bepitaquirinacuanëjawa,b xuacujinae belia jemata bajarapamonae taena bepinijicotiajawa. Pamonae jinawanapa bepinijipitaquirijawabëxëpana, bajarapitsiwijawata tonapebetsijitsiatsi pitayotsicotia. 3 Bajarapamatacabi icatsia Israel nacuapijiwi be-ayaijamatabëcuenewi nataejitsia. Nexata, bajarapamonae bitso siwajamatabëcuenebarëyajitsia, pacuenia jiwi babarëya pe-ubijawanë penotsicujinae pexaejawa petonawitsixaetsi. Bajarapacuenianua barëyajitsia pacuenia wajabitsaëwi babarëya pijawajabitsaëwi pecobecowëmi penatsicobetsanaejawata pecuene-amoneyabicujinae. 4 Bajarapacuenia barëya tsane, tsipaji bajarapamatacabita Dioso capanepaena pijajiwi, pacuenia exana bajayatami pecapanepaejawata Gedeón-pijinë pejamatabëcueneta Madián nacuapijiwimi pewerebiabimatacabita. Nexata, pebejiobia-exanaecuenemitsi Israel-pijinë pemomoxi wecuapitsapaena, jamatejema icatsia pejinawanapaenexa. 5 Bajarapamatacabi Dioso piajibia-exanaexae penayabara-itoyacuenemi, nexata penataxuxatabijawanëmi, penaxatabijawanëmi-ata penawajabitsaëtsijawata, pejana penacajapibijawanëmi, tajuitsijitsia isotota pebijianaenexa.
6 »Bajarapitsicuene taenatsi, tsipaji waxaitsi penacuetonëyo nacarajutsijitsia pebinëyo.c Bajaraponëyo tocopatsijitsiatsi pewetsinënexa daxitajiwi.d Bajaraponëyo wënërubianatsi pecuene yabara mapawënëanëje: ‘Bitso pexanialiwaisicuenia pemuxujiobinë,’ ‘Diosonë bitso piacuenesaënë, apopejamatabëcuene-amoneyabinëtsi,’ ‘peyamatacabiatsitecaenë jiwi pewetsinexa paxacuenia,’ ‘pewecua-ajibia-exanaenëe jiwi penayabara-itoyacuenemi, jamatejemaya penajuajinawanapaenexa,’ pejaiwënëanë xainaena.
7 »Bajaraponë xaniawaetsia yanacua-ewetsiana daxitanacuanë,f jamatejema penajuajinawanapaenexa. Peyanacua-ewetsicuene apotocopiarucaetsi tsane. Bajarapacuenia jamatejema jiwi penajuajinawanapaecuene apowerewerecae tsane. Bajaraponë, David-pijinë pemomoxiyajuwënënëxae, canacopatsiana daxitamatacabijawabelianexa peyanacua-ewetsitaxunaemitag pe-ecaenexa. Bajaraponë yanacua-ewetsiana daxitajiwi xaniajaiya perowialiwaisi pecanaëjëtsicuenia. Ëpexaniacuenia exanaena. Bajarapacuenianua najëpaeya taena daxitajiwi. Bajaraxuata, jiwi jamatejemaya najuajinawanapaena daxitamatacabijawabelianexa, nacua-ewetsinë penaexanaejawawerenacujinae. Daxita maxua nacato-exanaena Jehová, Ponë daxitawecua bitso piacuenesaënë tsaponaponae. Bitso wajanaca-asiwajamatabëcuene pexainaenë —jai Isaías Judá nacuapijiwijawabelia. 8-21 […]