Jehová yapëtaeya-exanatsi Isaías pacuenia wënërubijitsia pexënato
8
Isaías jumaitsi Israel-pijinë pemomoxi, Judá nacuata pejinawanapaewijawabelia:—Jehová nejumaitsi mapacueniaje: «¡Pire pinijitablapaxaneto bajarapajumata neyaquinaenexa piniji-itanetota mapawënëje; Maher-salal-hasbaza pejaiwënë!», nejai Jehová.
2 »Nexata, xanë jejanë baja. Bajarapacuenia yaquinarutajë bajarapawënë taxënato pewënënexa. Nexata, natsicueyajunatajë sacerdotenëbeje, Urías, Zacarías-ata, Jeberequías pexënato, bajaraponëbeje tanetaenëbejenexa pexaniajaicuene tayaquinarutsijawa taxënato penaexanaewajënaeya. Bajaraponëbeje pexaniajainëbeje tsabiabi, pacuenia pawënëtaneme baja bajaraponëbeje yabara. 3 Itsamatacabijawa tajawa Diosojumepaebiwa imoxoyobajë. Nexata, bajarapowa nacoxita pebinëyo. Penaexanaematacabi bajarapapejewaxinëyo Jehová nejumaitsi: «¡Bajaraponëyo wënërubare Maher-salal-hasbaz! 4 Bajarapacuenia wënërubianame nexënato tsipaji bajaraponëyo peyapëtaewajënaeya pejumaitsijawa: ‘apa, ena,’ pejaijawa, bajarapamatacabijawa Asiria nacua pewetsinë tsimaxëpatsiana Israel-pijinë pemomoxijawabelia, Damasco tomarapijiwi, Samaria tomarapijiwibeje, pebarënawajabitsaëtsinexatsi. Nexata, bajaraponë cuene-amoneyabiana bajarapanacuapijiwimi. Yacajërëtsiananua bajarapatomarapijiwimibeje pecobecowëmi», nejai —jai Isaías Israel-pijinë pemomoxijawabelia.
5 Isaías jumaitsi Israel-pijinë pemomoxijawabelia, Judá nacuata pejinawanapaewi:
—Icatsia, Jehová tanebarëcuaicuaijaijawata nejumaitsi: 6 «Xanë Jehovánë picani bajarapamonae asiwaya ewetsijitsianë jamatejema pejinawanapaenexa pijawajabitsaëwiwecua, itsiata baitsi jane, nenaitaxutuajemata. Caranata, pecujunawixae pijawajabitsaëwi, natsata xanëwecua pejunatsinexa Rezín, Siria nacua pewetsinë, bajarapacuenia Peka, Samaria tomara pewetsinë, Remalías pexënato, bajaraponëbeje peyawenonaenexatsi pebarënawajabitsaëtsijawata», nejai Jehová. Baitsi, pacuenia Siloé matathaibëpijimera wainae-ecabiaba, bajarapacuenia Jehová pacatocaëjëta picani jamatejema panejinawanapaenexa. Itsiata, aeconoxaeta itsacuenia pacatocopatsiana.
7 »Panewecuanatsatsixae Jehová pacatocopatsiana papecatsimaxëpatsinexa Éufrates menejawawerena peponaewi, baitsi Asiria nacuapijiwi. Nexata, pacuenia menianë piawajubuamatacabi cawota daxitacuene pecaponaenexa piajibijawabelia, bajarapacuenia Asiria nacuapijiwajabitsaë paca-exanaena pecuenesaëta papecawerebiabaponaenexa, xanëwecua panejunatsixae jiwitonëbeje papecayawenonaenënexabeje. 8 Pacuenia mene piawajubuajawata belia matapëcaewa daxita-iranë, bajarapacuenia Asiria nacuapijiwajabitsaë yacaëjëpaena daxita nacuanëjawa bajarapacuenia pepatsinexa Jerusalén tomarajawabelia, itsanacuanë pecuene-amoneyabicujinae. Pacuenia jiwitonë ba-apobubunae itsa piawajubuamera pata saya pecuaibositojawa matapëcaewinejewa, bajarapacuenia pijawajabitsaëwi matatoyorotsia jinawanapae-atatsi tsane, itsiata Jerusalén tomarata pejinawanapaewi apocuene-amoneyabitsi tsane. Xamë Emanuel, daxita nijanacuajawab yacaëjëpaena Asiria nacuapijiwajabitsaë. Pacuenia pinijipepunaenë cotsala bepijiayo patabiaba itsajawabelia, bajarapacuenia bepijiayo yacaëjëpaena nijanacuajawa Asiria nacuapijiwajabitsaë —jai Isaías Judá nacuapijiwijawabelia Asiria nacuapijiwi yabara.
9 Icatsia, Isaías jumaitsi Judá nacuapijijiwi pijawajabitsaëwijawabelia Asiria nacuapijiwijawabelia-ata:
—¡Nexata, panejumetaema padaxitanacuapijiwimë, tajë paxanëwecua panejinawanapaewi, panejamatabëcueneyanatsiwi Asiria nacua pewetsinë panebarënawajabitsaëtsinexa mapanacuayaberenaje! Panacaetuatsi-atamë tsane patanebarënawajabitsaëtsinexamë, apopanecuene-amoneyabimë tsane, tsipaji Dioso pacawerebiabiana. Xaniawaetsia pasiwanacuenexaniawaetsi-atamë tsane, bajaraPonë pacawerebiabiana. 10 Xaniawaetsia patsiwajënaenajamatabëcueneweretsi-atamë tsane pacuenia panecuene-amoneyabijitsiamë, pacuene-amatononobimë tsaothopae tsane. Daxitaxua panajamatabëxainaename pane-exanaenexa patanebarënawajabitsaëtsijawatamë, panenajamatabëxainaecuenia apopacatopitsapae tsane, tsipaji Dioso baja paneyajawa —Isaías yapijiwijai Judá nacua pijawajabitsaëwijawabelia.
Jehová muxujioba Isaías pesiwanajamatabëcuenecopatsiyaniwa pewënajiwitonëjawabelia
11 Icatsia, Isaías jumaitsi Judá nacuapijiwijawabelia:
—Jehová ajumesaëya nemuxujioba tanajamatabëcueneliwaisijëpaeyaniwa mapanacuapijiwije, tasiwanajamatabëcopatsiyaniwa tawënajiwitonëjawabelia bajaraponëwecua. Nexata nejumaitsi: 12 «Mapanacuapijiwi jumaitsi tsabiabije: ‘Itsamonae pibisiacuenia nacasiwanajamatabëxainabiaba wajapëya,’ jai tsabiabi. ¡Xamë pëtsa itsiata liwaisijëpame! ¡Pëtsa cujunawame! ¡Xua bajarapamonae yabaracujunawabiaba, pëtsa xamë bajaraxua cujunawame! 13 Daxita bajaraxuanëwecua ëxanë Jehovánë necujunawiaya yaiyataeya-ata ponaponaename, tsipaji ta-acuenesaënë daxitawecua. Nexata, xanë benecujunawame taneyaiyataeyabiabinexamë, tsipaji xanë tananeconitsia-exanaenë pajiwi naneconita xanëjawaberena. Nexata, apobecujunawimë xanëwecua itsacuenejawa-ata», nejai Jehová. 14 BajaraPonë xaniawaetsia ewetsiana piayaicuenewecua daxitajiwi pesiwanajamatabëcuenecopatsiwitsi. Aponacueratsi tsane. Itsiata baitsi jane, paxamë Israel papemomoximë, anijanacuatabeje panejinawanapaewi, Diosojawabelia apopanesiwanajamatabëcopabixae, bajaraPonë pacatonaexanaena be-ibotoc panefirapecaenexa. Bajarapijinia pacuenia Jerusalén tomarapijiwinexa tonaexanaenatsi bepecataicaebud baratsui, bajarapacuenia yacaranatsijitsia bajarapamonae pewecuapanepaeyaniwa pijawajabitsaëwiwecua, apopeyaiyataexae pijaDioso. 15 Nexata, be-iboto pijaDioso petonaexanaexaetsi, ayaibitsaëto firapajonejonena bajaraPonë pejamatabëcueneta petëpaenexa. Bajarapijinia pacuenia itsamonae bepetaicaebaratsuitsi tsane pecuemayajawata, bepe-arëbanubenaewitsi tsane petaicaenexatsi pijawajabitsaë, pecaponaenexatsi itsanacuajawabelia —jai Isaías Jehová pitorobicueniatsi. 16-22 […]