ISAÍAS 7

Paliwaisi Dioso tonajumecopata Isaías petsipaebinexa Acaz-jawabelia

Pamatacabijawa Uzías pemomo, Jotam pexënato Acaz, Judá nacua pewetsinë tsaponaponae Jotam petëpaecujinae, bajarapamatacabijawa pijinia Rezín Siria nacua pewetsinë tsaponaponae. Bajarapamatacabijawa-ata pijinia Peka, pexënato Remalías, Israel nacua pewetsinë tsaponaponae. Rezín, Pekabeje pijajiwiwajabitsaëwibeje najuatsimaxëpatabiababeje pebarënawajabitsaëtsinexa caebitsaëtocuenia Jerusalén tomarapijiwijawabelia, Acaz peponaponaetomarata. Itsiata, bajaraponëbeje pijajiwibitsaëtobeje apocuenecaëjëpabiabitsi pecuene-amoneyabinexa bajarapatomarapijiwi peyacajërëtsinexa.

2 Bajaraponëbeje pijajiwiwajabitsaëwi pebarëpatsiwajënaeya Jerusalén tomarapijiwijawaberena pebarënawajabitsaëtsinexa, itsamonae wajunupaeba Judá nacua pepopeyanacua-ewetsinë Acaz-jawabelia pacuenia Siria nacuapijiwajabitsaëwi pata Israel nacuata. Bajarapamonae jamatabëcueneyanatsijitsia Efraín-pijinë pemomoxi pijajiwi wajabitsaëwijawabelia pebarënawajabitsaëtsinexa Jerusalén tomarapijiwajabitsaëjawaberena. Nexata, pejumetaejawata bajarapatomarapijiwi, bajarapacuenia pepopeyanacua-ewetsinë-ata, ayaicuenia pecajunawi bitso neconecojai. Baitsi, pacuenia naejawa banajëaba jowibota, bajarapacuenia bajarapamonae pecajunawicobexae neconecojai bajarapaliwaisi pejumetaejawata.

3 Bajarapamonae pejunawixae, Jehová jumaitsi profeta Isaías-jawabelia:

—Aeconoxae barëponaename nexënato Sear-jasub yajawa panemata-enenaenexabeje Acaz, Judá nacua pepopeyanacua-ewetsinë, panamuto ruca Ovejana̱pananë Pequiatsitaxunaejawabetsia. Baitsi, panamuto ruca tomarawecua waëyabetsia, itsajota copiaruca mera petsi-exanaefoto penawotabiabijawa petsicuemëthëpucajawabetsia. 4 Necaxitajarabijawata jumaitsimë tsane Acaz-jawabelia: «¡Xania baja tsane! ¡Na-ewere xaniawaetsia nijacuata necajunawi nexanaeyaniwa itsacuenejawa Jehováwecua! ¡Pëtsa junawame! ¡Pëtsa cujunawamenua bajaraponëbeje yabara! ¡Ajamatabësaëmëre, tsipaji bajaraponëbeje bitso cabara-anaepanaponaponabeje picani, itsiata imoxoyo pewajënae pecopiarucaejawanexabeje! Baitsi, pacuenia petajuenubenae-isotabuqueranë bepijiayo itaxupa pitatsajawicujinae, bajara-itsi tsane bajaraponëbeje.

5 »¡Xaniajai picani, pacuenia nayajumetaneme! Siria nacua pewetsinë, Remalías pexënato-ata, Israel nacuata pepopeyanacua-ewetsinë, najamatabëxainabeje papecatsimaxëpatsinexa. Bajarapamonae najumaitsi penajumejaitsijawata: 6 ‘Tsimaxëponaenatsi Judá nacuapijiwi wajajunawia-exanaenexa bajarapamonae. Nexata, barënawajabitsaëtsianatsi bajarapanacuapijiwijawabelia, wajapatsinexa Jerusalén tomarajawabelia. Bajarapatomarapijiwi itsa cuene-amoneyabianatsi, nexata nutsianatsi Tabeel pexënato, Judá nacua pepopeyanacua-ewetsinënexa Acaz pecowëta,’ najai picani bajarapamonae. 7 Itsiata, marapacuenia pepoPetuxanenë Jehová jumaitsi pajudánacuapijiwimëjawabelia: ‘Xua bajarapamonae najamatabëxaina apotocopiapatsitsi tsane, pexanaenexa paxamëjawabelia. Pepacuene pejitsipaecuenia apotopitsapaetsi tsane. 8-9 Baitsi, bajarapamonae bitso apopiacuenesaëwi pacuenia nataeyabiaba. Damasco tomarapijiwi, Siria nacuata pe-ecaetomara, bajarapacuenia Samaria tomarapijiwi Israel nacuata pe-ecaetomara, natae-ata ayaijamatabëcuenewicuenia pepopenamatacaitorobitomaraxaebeje, itsiata aposaëmatatoxenetsi itsatomaraxipijiwiwecua, pijanacuabejeyajuwënëtomaranë. Daxita saya najëpaeya beweliasaë pexainaewi taitabarata. Bajarapacuenia Damasco tomarata pepopeyanacua-ewetsinë Rezín, bajarapacuenia Samaria tomarata Peka, Remalías pexënato, pepopeyanacua-ewetsinë, bajaraponëbeje pepopeyanacua-ewetsinë-atabeje, itsiata bajaraponëbeje jiwitonëbeje saya Jehová pitabarata. Nexata, aposaëmatatoxenetsi pijanacuapijiwi. Daxita saya beweliasaë pexainaewi. Pepacuene pacatsipaebatsi Efraín-pijinë pemomoxi yabara. Bajarapamonae Israel nacuapijiwi pijanacuacuenemi tocopiarucaenatsi sesenta y cinco pawaibejecujinae.’ Itsiata, paxamë pajudánacuapijiwimë yabara pacajumaitsitsi mapacueniaje: ‘Bajarapijinia pacuenia paxamë-ata bajayajebi apopajinawanapaemë tsane panijaJudánacuata, itsa paxamë tsitecaeya panewajënaeyabelia apopanesiwanajamatabëcuenecopabimë tsane ëxanëjawaberena pataca-ewetsinexa,’ jai raja Jehová», jamë tsane Acaz-jawabelia —jai Jehová Isaías-jawabelia.

10 Nexata, Jehová itsaliwaisi itoroba Isaías petsipaebinexa Acaz-jawabelia. Nexata, Isaías jumaitsi bajaraponëjawabelia:

11 —Neyapëtaenexa pexaniajaicuene xua Jehová pecatsipaebijawa bajarapanacua-ewetsinëbeje yabara, bajaraPonë ca-itoroba newajëtsinexa bajaraponëjawabelia pecatsita-exanaenexa pinijicuenejawa, bitso pecatsita-ayapëbejecuene-ata. Bajarapapinijicuenejawa catsi-exanaena bajarapacuenia athëbëyo itaboxojawatatsia, itsa jume, mapanacuataje irajawatatsica. Nejitsipaecuenia wajëtsianame, bajarapacuenia bajarapapinijicuene pecatsitajëtsijawata yapëtaejitsiamë pepacuene necuene-amoneyabijawanexa bajarapanacua-ewetsinëbeje —jai Isaías abaxë Rezín, Pekabeje petsimaxëpatsiwajënaeya Judá nacuapijiwijawaberena.

12 Acaz nexata jumecanawiata:

—¡Jume! Jehovájawabelia acuenebi xanë tawajëcaejawa jamatabëcuene-ëjëbiaya tanetsita-exanaenexa tayapëtaenexa pexaniajaicuene —jai Acaz.

13 Nexata Isaías jumaitsi:

—¡Panejumetaema paxamë David-pijinë papemomoxiyajuwënëwimë, nacua pane-ewetsiwi tsaponaerena! Paxamë tsaena pacatsita jemacuene panejamatabë-itonotabiabijawa jiwijawabelia pane-exanaejawata apopejitsipaecuene. Nexata, xamë Acaz, orijibia ¿bajarapacuenia tsaja icatsia jamatabë-exaname tajaDiosojawabelia nejamatabë-itonotsinexa, apone-exanaejamatabëcuene xua cawajëta? 14 Nexata, bajaraxuata Jehová pijacuata cayapëtaeya-exanaena pexaniajainexa, pecatsita-exanaejawata mapapinijicuene. Pejanawa raja, imisia peponaponaewa, yacotaponaponaena pejewaxinacueto. Bajarapowa raja itajëtsiana pejewaxinëyo. Bajaraponëyo wënërubiana Emanuel —jai Isaías Acaz-jawabelia. 15-25 […]