SALMO 33
Wënëxaniatsianatsi Jehová ayaijamatabëcuenenë wajanacayawenonabiabinë daxitawecua
1 ¡Paxamë pexaniacuene pane-exanawanapaewi jamatabëcuenebarëyaya patonaxëanare Jehová! Pexaniacuene pexanaewi itsa wënëcanaxëana Jehová bitso pexaniacuene.
2 ¡Pawënëjoneya-exanare Jehová panetoracatsijawata panija-arpa, bajarapacuenia patocanaxëanaename Jehová lirawiria-arpayo!
3 ¡Jehová patocanaxëanare pejanawajianë!a Pexaniacuenia barëyaya patoracatsianame panecanaxëanaejawanëta. 4 Bajarapacuenia patonaxëanaename tsipaji Jehová pijumeliwaisi pexaniajailiwaisi. Daxitajawa Jehová pexanaejawanë pexaniacuenia topitsapabiabatsi. Epatua itsajamatabëcuene apopexainaenë pexaniacuene pexanaejawawecua. 5 Jehová asiwaya tane daxita pamonae pexaniacuene pexanaewi, pamonae-ata pexaniajamatabëcuenewi. Jehová wajanaca-asiwajawa yacaëjëpa daxitanacuajawa.
6 Jehováb pejumeta exana itaboxo, daxita pitayotsitulupujawanë yajawa.
7 BajaraPonë mene caetuata caecowëta, manuamene pexanetsinexa. Pecaetuatetsicujinae awajubua tsecae.
8 Bajaraxuata, daxita nacuapijiwi beyaiyatane Jehová. Cujunawiaya-ata bejinawanapa bajaraPonë pitabarata, 9 tsipaji raja pejumaitsijawata naexanaxuaba daxitacuene. Pitorobixae daxitacuene pejumaitsicowëya naexana. Tsitecaeyanua nacopata.
10 Mapanacuataje penamatacaitorobiwi siwanajamatabëcueneweretabiaba xua exanaejitsia picani, itsiata Jehová to-itothianabiaba pesiwanajamatabëcueneweretsijawami. Bajarapacuenianua tobijianabiaba daxitaxua jiwi najamatabëcuenewereta pexanaenexa Jehovánejewa.
11 Itsiata baitsi jane, xua Jehová najamatabëcuenewereta pexanaenexa, bajaraxua tsitecaena daxitamatacabijawabelianexa. Daxitacuene Jehová penajamatabëxainaecuene pexanaenexa tsitecaena. Apotocopiarucaetsinua tsane.
12 Bitso jamatabëcuenebarëya tsane panacuapijiwi xaina Jehová pijaDiosocuenia peyawenonaenënexatsi. Bajarapacuenia bitso jamatabëcuenebarëya tsane pamonae natoyapëtane Jehová pitapetsijawatsi pijajiwicuenia.
13 Jehová athëbëwetsica naëcotabiabica mapanacuajawabetsica, nexata taeyabiaba daxita mapanacuata pejinawanapaewije. 14 Pe-ecaetronojawawetsica nacanaitaxutuaca-eweta daxitatsi mapanacuata wajajinawanapaewije. 15 Jehová daxitajiwi pejamatabëcuene-exanaenë, bajaraxuata xua najamatabëxaina jamatabëcueneyapëtaeyabiaba. Cueneyapëtanenua daxitajiwi pexanaejawanë.
16 Mapanacuataje itsa pepopeyanacua-ewetsinë barënawajabitsaëta petsimaxëpatsiwijawabelia, itsamonae pewetsiwi najamatabëxainabiaba pewecuapanepaenexa pijawajabitsaëwiwecua pinijibitsaëto penatoxainaexae pijajiwi peyacaranatsiwitsi. Itsiata baitsi jane, bajaraponë apocuenecaëjëpaetsi penacapanepaenexa bajarapapinijibitsaëto natoxainae-ata pijajiwi. Bajarapacuenia pecuene-aitatsacanë apocuenecaëjëpaetsi penacapanepaenexa pijacuata piasaënëxae. 17 Bajarapacuenia caballojumata ponaeta jiwitonë, apocuenecaëjëpaetsi caballo pecapanepaenexatsi pijawajabitsaëwecua. Caballo bitso asaë-ata tsipae, apocuenecaëjëpaetsi pecapanepaenexa jiwitonë.
18 Bajarapacuenia apocuenecaëjëpaetsi-ata bajarapamonae penacapanepaenexa, itsiata baitsi jane, Jehová naitaxutoca-eweta pewetsinexa pajiwi ponapona cujunawiaya peyaiyataexae, pamonaenua siwanajamatabëcuenecopata bajaraponëjawabelia piasiwaxaetsi pitaxutotsoniataenexatsi. 19 Bajarapajiwi Jehová ewetabiaba pecapanepaenexa petëpaejawawecua, janibomatacabita-ata peyatëpaeyaniwa piajanijawa.
20 Jehová bajarapitsipewetsinëxae, waxaitsi nexata jamatabëcuene-ewetawanapatsi bajaraPonë wajanacayawenonaejawanexa, tsipaji baja Jehová wajanacayawenonaenë tsaponaponae, wajanacayacaranatsinënexanua xua nacatsi-ayaijitsia. 21 Jehová bitso siwajamatabëcuenebarëya tsanetsi wajajamatabë-ëthëtojawawetsina, tsipaji itaxutuajamatejemaya siwanajamatabëcuenecopatatsi wajanacayawenonaenexa bajaraPonëjawabelia.
22 —Itaxutuajamatejemaya patacasiwanajamatabëcopatsixae xamë Jehovámëjawabelia, pacawajëtatsi asiwaya pataneyajawaponaponaenexamë pataca-itaxutuajamatejemajamatabëcuenecowëya —jaitsi wajasiwanajamatabëcuenecopabiwi Jehovájawabelia.