SALMO 32
Jiwi pibisiacuene pexanaeneconimi Dioso itsa wecua-ajibia-exana, jiwi pebarëyajawa peliwaisi
Israel nacua peyanacua-ewetsinë, David-pijinë, peyaquinaesalmoyo.
1 Jamatabëcuenebarëya tsane pajiwi Dioso siwajamatabëcuenecaewatsi pijaneconimi, altar-jumata petajuitsixae dajubi pijaneconijamatabëcuene. 2 Jamatabëcuenebarëya tsane pajiwi Jehová aneconijibia tanetsi, penawajunupaebixae matayatsinejewa daxita pibisiacuene pexanaejawa.
3 Pa-epatowajëto aponawecuapaebinë tajaneconi Diosojawabelia, aperabësaëjibinë tsaponaponae. Najamatabënaxainabiabajë bitso. Nawixaetaeya aëaëjanë tsabiabi daxitamatacabi. 4 Merawijebi, matacabijebi-ata, aponecopatsimë nenaneconitsia-exanaenejewamë tajaneconi yabara. Nexata, jamatejema apoponaponabiabinë.
5 Belia jamatabë-itsinë: «Diosojawabelia tsipaebianajë pibisiacuene ta-exanaejawa», jamatabëjanë. Nexata, Jehová catsipaebatsi daxita pibisiacuene ta-exanaejawa, cawecuamatayatsinejewatsi itsaneconi-ata. Nexata baja, xamë newecua-ajibia-exaname daxita pibisiacuene ta-exanaeneconimi.
6 Bajaraxuata, nijajiwi itsa nacueneyapëtaena, penaneconitsijawa xamëjawabelia, caecuenia benawecuapaeba xamëjawabelia, paepatota abaxë aponaneconitsia-exanaemë. Nexata, wecuapanepaena nenaneconitsia-exanaejawanexa.
7 «Xamë raja caxainatsi tanecapanepaenënexamë. Xamë ne-ewetabiabame tajawajabitsaë tane-itsacueniabiyaniwa. Nexata, daxita necapanepaewi yajawa, barëya ayaijumeta pacawënëxaniatatsi patanecapanepaejawamë yabara», janë Diosojawabelia.
8 Dioso nejumaitsi:
«Canaitaxutoca-ewetabiabianatsi. Camuxujiobabiabianatsi pexaniacuenia. Cayapëtaeya-exanabiabianatsi xua xanepana nexanabiabinexa. 9 ¡Pacuenia jamatabëcuene-itsi caballo, mula-ata, pëtsa xamë bajarajamatabëcuene-itsimë, tsipaji bajarapamonae apocajumecowënëtsi saya nijumeta nitorobijawa! Matapania itsa tsicuaiboxatatame pijafreno, cajumecowënëta. ¡Xamë pëtsa bajara-itsimë xanëjawaberena! Caecuenia nejumecowënëre», jai Dioso.
10 Piajamatabëcuenebejewi tonawitsianatsi pejamatabëcuenebëjaiya-exanabiabijawanexatsi. Pajiwi siwanajamatabëcuenecopata Jehovájawabelia, bajarapajiwi bitso asiwaya ewetsianatsi.
11 ¡Paxamë papexaniajamatabëcuenewimë Jehová pitabarata, pasiwajamatabëcuenebarëyamëre papecayawenonabiabijawa yabara! ¡BajaraPonëjawabelia jamatabëxanepanaeya ayaijumeta patonaxëanare!