SALMO 34
Dioso wajanaca-ewetsijawa peliwaisi
Israel nacua peyanacua-ewetsinë, David-pijinë, peyaquinaesalmoyo.
1 Caematacabi canacujitsia pexaniajamatabëcuene rajutabiabianajë Jehovájawabelia. Tawajënaeyabelia pexaniacuenia wënëxaniatabiabiana bajaraPonë. 2 Jiwijawabelia barëyaya nawajunupaebabiabianajë Jehová taneyawenonabiabijawa yabara. Beweliajamatabëcuenewi penataewi, nejumetaena. Bajarapamonae-ata barëya tsane.
3 ¡Naxatsia! Wënëxaniatsianatsi Jehová bitso ayaijamatabëcuenenë yabara. Pecuenecaëjëpaenëtsi-ata pinijicuene pexanaenexa yabara.
4 Tajunawijawata, wajëtajë Jehovájawabelia, taneyawenonaenexa. BajaraPonë nejumecowënëta tawajëtsijawa. Nexata, newecua-ajibia-exana daxita tajunawijawami. 5 Pamonae Jehovájawabelia siwanajamatabëcuenecopata peyawenonaenexatsi, nexata itsa yawenonatsi, jamatabëcuenebarëya tsabiabi, tsipaji bajarapamonae aponajamatabëcuenecueratsi bajaraPonëjawabelia.
6 Xanë, betajiobinë, wajëtajë Jehovájawabelia. BajaraPonë nejumecowënëta tawajëtsijawa. Nexata, daxita papibisiacuene netocopiapata, tayajamatabëcuenebëjaijawami, newecua-ajibia-exana. 7 Pamonae Jehová yaiyatane, bajarapamonae bajaraPonë pija-ángelnë matatoyorotsia ewetatsi itsacueneyaniwa.
8 Jehová pajamatabëcuene-ëjëtsianame. Nexata, payapëtaename pexaniajamatabëcuene pexainaejawa bajaraPonë. Pajiwi siwanajamatabëcuenecopata bajaraPonëjawabelia, bitso barëya tsaponaponae. 9 ¡Paxamë Jehová papijajiwimë, payaiyataema, tsipaji pamonae yaiyatane bajaraPonë, pexaniacuene to-exanabiaba bajarapamonaejawabelia! Nexata, bajarapamonae aponamatawenonabiabi itsacuenejawa-ata. 10 Newëthë piaitatsacanë-ata, itsajawata piajani tsabiabi. Jiwi apo-aitatsaca-ata, pamonae siwanajamatabëcuenecopata Jehovájawabelia, bajarapamonae apoto-ajibitsi tsane penamatawenonaecuene, tsipaji bajaraPonë rajutabiabatsi.
11 Paxamë papewëjëawimë, paxamë-ata papejanawimë, naxatsia. ¡Panejumetaema! Pacamuxujiobianatsi Jehová paneyaiyataenexa. 12 ¿Detsa pajiwi jitsipa jamatabëcuenebarëyaya xaniawaetsia peponaponaenexa? ¿Detsa pajiwi jitsipa bajayajebi piasaëtsaponaponaenexa?
13 Paxamë bajaraxua itsa pajitsipame, panajamatabëcuenecataitsianame pibisialiwaisi panecuaicuaijaiyaniwa. Panajamatabëcuenecataitsianamenua penajumetsënëtsiliwaisi panepaebiyaniwa. 14 Pibisiacuene pane-exanabiabijawa, pacopabianame. Pexaniacuene pa-exanabiabianame. Daxitajiwijawabelia pabarajamatabëcuenexanepanabiabianame. ¡Pëtsa pacopatame daxitajiwijawabelia panebarajamatabëcuenexanepanaejawa!
15 Jehová naitaxutoca-eweta pexaniacuene pexanaewi. Namuxuna-ewetanua pewajëtsijawatsi. 16 Pibisiacuene pexanaewi, Jehová anaeya naëcota. Pibisiacuene pexanaewi, bajaraPonë ajibia-exanaena mapanacuawecuaje. Nexata, bajarapamonae matawëjëa itsajiwi-ata aponajamatabënapitsitsi tsane.
17 Pexaniacuene pexanaewi, wajëta Jehovájawabelia. Nexata, bajaraPonë jumecowënëtatsi pewajëtsijawa. Nexata, daxita papibisiacuene tocopiapatatsi, bajarapapibisiacuenewecua Jehová capanepatsi. 18 Pamonae bitso najamatabëxaina itsacuene itsa tocopiapatatsi, bajarapamonae Jehová yajawaponapona. Pamonae yajamatabëcuenebëjai pibisiacuene pexanaeneconi, bajarapamonae Jehová wecua-ajibia-exana pejamatabëcuenebëjaijawa.
19 Pexaniacuene pexanaejiwi-ata, pibisiacuene tocopiapatsianatsi. Itsiata, daxita bajarapapibisiacuenewecua Jehová capanepaenatsi.
20 Tsitecaena daxita pesi. Jehová apocopatsi tsane caesito-ata pesi-epatsicababiabinexatsi. 21 Pamonae bitso pibisiacuene exana, bajarapamonae pibisiacuene tocopiapatsianatsi pibisiacuene pexanaejawa pejamatabëcuene. Pamonae itoya pexaniacuene pexanaewi, bajarapamonae Dioso naneconitsia-exanaenatsi. 22 Pamonae xaniawaetsia Jehová tojinawanapa, bajarapamonae bajaraPonë capanepaenatsi pijawajabitsaëwecua. Pamonae siwanajamatabëcuenecopaba Jehovájawabelia, bajaraPonë aponaneconitsia-exanaetsi tsane.
C35—C36 […]