22
Bajaraxuata David jumaitsi:—Matsaena jotaje xanepanaena pijataxunaenexa Jehová Dioso pijatemplobonexa, Dioso pija-altar-nexa-ata, itsajota tajuitabiabijitsia dajubi Israel-pijinë pemomoxi Diosojawabelia pijaneconijamatabëcuene —jai
David tsiwajënaexaniawaeta Dioso pijatemplobonexa
2 Bajaraxuacujinae, David itoroba petocaetuatsinexatsi petsiyapëtaewi ibo pecanacuenebijawa, pamonae itsanacuawerena peponaewi, apo-israelitawiyajuwënëwi, pejinawanapaewi itsiata Israel nacuata. Nexata, itapeta pamonae ibojawanë penamatajëpaeya-exanaewinexa, pa-ibojawanëta canacuenebijitsia Dioso pijatemplobonexa. 3 Bajarapacuenia David tsiwajënaexaniawaeta hierronani, bitso ayaijawa clavomonae pexanaenexa, bajarapacuenia grapajawanë-ata baupanënexa. Bajarapacuenia bitso ayaijawa tsiwajënaexaniawaeta broncenanijawanë. 4 Cedronaejawanë-ata caetuata ayaijawa, Sidón tomarabeje, Tiro tomarapijiwibeje pecapatsijawanë David-jawaberena bajarapatemplobonexa.
5 Bajarapacujinaeta, David jamatabë-itsi pexënato yabara mapacueniaje: «Taxënato Salomón abaxë bitso pewëjëato, nexata coxanatsi abaxë bajarapitsicuene pexanaenexa. Bajaraponë apocuenecaëjëpaetsi xaniawaetsia penacuenebijawa. Pabo tonacuenebijitsia Dioso pijatemplobonexa, bitso pepo-ayaiboxaneto tsane itsawiriatemplobonëwecua. Bitso pewënëjonebo tsane pexaniabo yabara. Bajaraxuata nexata, xanë tajëwelia totsiwajënaexaniawaetsianajë daxitaxua namatawenonaejitsia bajaraponë penacuenebimatacabi», jamatabëjai.
Bajaraxuata, David bitso ayaicuenia bajaraxuanë tajëwelia tsiwajënaexaniawaeta petëpaewajënaeya. 6 Bajaraxuacujinae, junata pexënato Salomón pecanacopatsia-exanaenexa, itsamatacabi penacuenebinexa Jehová pijatemplobo, Ponë Israel-pijinë pemomoxi pijaDioso. 7 David jumaitsi pexënato Salomón-jawabelia:
—Taxënato, xanë raja picani najamatabëxainajë tatonacuenebijawa Jehová Dioso pewënëta pijatemplobonexa. 8 Itsiata baitsi jane, Jehová nejumaitsi: «Xanë cacuenetanetsi. Xamë peponebarënawajabitsaëtsinë, nexata bitso jiwi ayaijawa nejanacayajatsinëcuene. Bajaraxuata, xanë apocatocopatsitsi tsane xamë tanetonacuenebinexamë bajarapatemplobo, jiwi nebenëxae. 9 Itsiata baitsi jane, xamë xainaename nexënato itsamatacabijawabelia, bajaraponë pejamatabëcueneliwaisicainaenënexa. Nexata, xanënua tocopatsianajë pamonae pijawajabitsaëwi, matatoyorotsia pejinawanapaewitsi, bajarapamonae barënawajabitsaëtsinejewa pebarëponaponaenexa. Bajaraxuata, wënërubianame bajaraponë Salomón.a Bajaraponë peponaponaematacabita, jinawanapaena jiwi jamatejemaya itsacuene taenejewa Israel nacuata. 10 Nexata bajaraponë netonacuenebiana tawënëta bajarapatemplobo. Bajaraponë pijinia xanë taenajë betaxënatocuenia. Bajaraponë pijinia netaena bepaxanëcuenia. Nexata, xanë tocopatsianajë Salomón pijamonaeyajuwënënë peyanacua-ewetsinexa Israel nacuapijiwi daxitamatacabijawabelia», nejai raja Dioso —jai David.
11 Orijibia, David jumaitsi pexënatojawabelia:
—Xanë ajenaconoxae, taxënatomë, catojitsipatsi Jehová Dioso pecayajawajawa, pecayawenonaejawa-ata necaxitajarabinexa bajarapatemplobo nenacuenebijawa, pacuenia baja tajëwelia najumecapanepaeya jumaitsi ne-exanaenexa xamë yabara. 12 Jitsipajënua Jehová Dioso pecarajutsijawa neyapëtaejamatabëcuene, necanaëjëtsijamatabëcuenenexanua. Nexata, pamatacabi catocopatsiana neyanacua-ewetsijawa, nejumecowënëtsinexa Jehová nijaDioso peca-itawetsiliwaisianë. 13 Daxita nexanaejawanë catopitsabiabiana xaniawaetsia itsa xamë xaniawaetsia jumecowënëtabiabianame daxita paliwaisi Jehová tonajumecopatatsi Moisés-pijinëjawabelia israelitawi pexanabiabinexa. ¡Nexata, ajamatabëcuenesaëmëre ne-exanaenexa Dioso pijatemplobo pacuenia catocopata! ¡Pëtsa jamatabëcuenefaefaename! ¡Pëtsanua junawame bajarapabo nenacuenebinexa! 14 ¡Nenamuxuna-ewere xaniawaetsia! Xanë bitso ayaicuenia tayanacua-ewetsimatacabi tsiwajënaexaniawaetejebajë bajarapatemplobonexa xua canacuenebijitsiamë. Tsiwajënaecaetuatsia-exanajë tres mil trescientos patoneladabeje oronanijawanë, bajarapijinia pacuenia treinta y tres mil patoneladabeje palatananijawanë. Bajarapacuenia broncenanijawanë aponamata-ëjëtsicapanepaenë xuabeje caetuatsia-exanajë. Bajarapijinia pacuenia hierronani aponayapëtae xuawajëto tsiwajënaecaetuata. Bajarapacuenia tsiwajënaexaniawaetajë ibotonë, bajarapijinia pacuenia pawirianaejawanë canacuenebijitsiamë. Itsiata, itsa-ibojawanë, itsa naejawanë-ata, orijibia xamë namatawenonaename nijacujaya nenacaetuatsijawa. 15 Nexata, xamë bitso xainaename ayaibitsaëto pecatonacuenebiwi, itsamonae ibotonë pecanacuenebiwi, itsamonae templobo pecatsanaewi tsane bajarapa-ibojawanëta, itsamonae pijinia pecanacuenebiwinexa naejawanëta. Orijibia, xainaename ayaibitsaëto petsiyapëtaewi daxitawirianacuenebicuene. Nexata, itsamonae xainaename petsiyapëtaewi 16 penacuenebijawa oronanitonë, palatananitonë, broncenanitonë, hierronanitonë-ata. Nexata jane baja, nacuenebare. Daxitaxuanë nacuenebianame, Jehová cayawenonaena —jai David Salomón-jawabelia.
17 Bajaraxuacujinae, David itoroba daxita pamonae penamatacaitorobiwijawabelia Israel-pijinë pemomoxi peyawenonaenexa pexënato Salomón. Bajaraponë jumaitsi bajarapamonaejawabelia:
18 —Jehová Dioso raja pacayajawaponapona paxamë. Bajaraponë pacatocopatanua jamatabëcuenexanepanaeya najuapanejinawanapaenexa daxita panejinawanapaenacuajawa, tsipaji baja Jehová xanë netocopata daxitajiwi tajaliwaisijawalia pejinawanapaenexa mapanacuapijiwije. Bajaraxuata, tanamatacaitorobinë tsaponaponae bajarapamonae Jehová pewënëta. 19 ¡Bajaraxuata, ajenaconoxae mapamatacabijawaweliacujinaeje panajamatabëcuenewerere, xaniawaetsia panejumecowënëtawanapaenexa Jehová Dioso! ¡Pataxuxuabianame panetonacuenebijawa Jehová Dioso pijataxunae! Bajarapatemplobo paneweretsicujinae, bajarapabojawaberena patotixitsianame icatsia Jehová penajumeliwaisixaniawaetsibaula, bajarapacuenia daxita pecanacuenebijawanënexa-ata bajarapatemplobojawata —jai David penamatacaitorobiwijawabelia.
C23—C28 […]