Jehová naneconitsia-exana David penamataëjëtsia-exanaexae Israel-pijinë pemomoxi pebijiwi
(2Sa 24:1-17)
21
Itsamatacabi Satanás anaeya siwanajamatabëxaina Israel nacuapijiwijawabelia. Nexata, pepopeyanacua-ewetsinë David-jawabelia jitsipaeya-exanatsia penamataëjëtsia-exanaenexa pamonae pebijiwi, pejinawanapaewi bajarapanacuata. 2 David nexata itoroba Joab, itsamonae petuxanewijawabelia-ata, petonamata-ëjëtsinexatsi. Pitorobijawata jumaitsi:—¡Paponare daxita Israel nacuajawa, panenamata-ëjëtsinexa daxitajiwi pebijiwi, pamonae jinawanapa bajarapanacuanëjawa, Beersebajawaweliacujinae panepatsinexa Dan tomarajawabelia! Bajarapacuenia panewënëjucaecujinae, itsa paweretsianame, icatsia papatsiaremena pataneyapëtaeya-exanaenexamë ponëbeje panamata-ëjëtame —jai.
3 Itsiata, Joab jumecanawiata mapacueniaje:
—Tajatuxanenë, ¡xua panewajëtame pata-exanaenexa apoxanepanae cajena! Xanë picani bitso jitsipajë Jehová pejamatabëcueneta wajanaca-ayaibitsaëto-exanaejawa Israel-pijinë pemomoxitsi ajena pamatacabijawaberena pajiwibitsaëtowecua. Itsiata, daxita bajarapamonae aponamata-ëjëtsi-atamë, tsiteca nijajiwi tsawanapae. ¿Detsa xuajitsia nexata bajarapacuenia canaëjëtame nexanaenexa, Israel-pijinë pemomoxi bajarapaneconi petsijumajopaenexatsib Jehová pitabarata? —jai Joab.
4 Itsiata baitsi jane, Joab muxujiobi-ata picani David pibisiacuene pexanaeyaniwa, tsiteca David ajumesaë Joab petonamata-ëjëtsinexatsi Israel nacuapijiwi. Nexata, Joab wecuapitsapa pijatuxanenë, peponaenexa daxita Israel nacuajawa jiwi petonamata-ëjëtsinexa. Daxita penamata-ëjëtsiweretsicujinae, nawiarena icatsia Jerusalén-jawaberena. 5 Pepatsicujinae Joab Jerusalén-jawaberena, nexata David yapëtane jane baja papebibeje jinawanapa bajaraponë peyanacua-ewetsinacuajawata. Israel nacuata namata-ëjëta caemillón cien mil ponëbeje pebijiwi, pecuenecaëjëpaewitsi penawajabitsaëtsijawa, bajarapacuenia Judápijinë pemomoxi pejinawanapaenacuata jinawanapa cuatrocientos setenta mil ponëbeje. 6 Bajarapanamata-ëjëtsijawata, aponamata-ëjëtsi pamonae Levípijinë pemomoxi, bajarapacuenia Benjamín-pijinë pemomoxi-ata, tsipaji Joab apotsitaxanepanaetsi picani penamata-ëjëtsijawa pacuenia David itorobatsi pexanaenexa.
7 Joab-bana penamata-ëjëtsijawa Israel nacuapijiwi, Dioso bajaraxua tsita-abejetsi. Nexata xuata, bajaraPonë naneconitsiaya tocaëjëtatsi ayaibitsaëto Israel-pijinë pemomoxi petëpaejawanexa. 8 Nexata, David pijaneconi penawecuapaebijawata Diosojawabelia jumaitsi:
—Dioso, bajarapacuenia ta-exanaejawata, bitso cajena pibisiacuene exanajë nitabarata. Nexata, cawajëtatsi nijajiwitonënë tajaneconi tanesiwajamatabëcuenecaewinexamë, tsipaji pepacuene ajamatabëcuenecowëbiaya-exanajë xua nitawetame picani ta-exanaeyaniwa —jai penawecuapaebijawata.
9 Bajarapamatacabi petsiwajënaeyapëtaenë Gad-wënënë tonacuenebaponapona David.
Nexata Jehová jumaitsi Diosojumepaebinë Gad-jawabelia:c
10 —Ponaename David-jawabelia tanetotsipaebinexamë, pacuenia xanë Jehovánë tocaëjëtajë bajaraponë acueyabi xuabejejawata tananeconitsia-exanaenexa. Bajaraponë juya nato-itapetsiana pitsineconita naneconitsia-exanaejitsianë bajaraponëjawabelia —jai Jehová. 11 Gad jejai. Nexata, pona petsipaebinexa David-jawabelia. Jumaitsi:
—Marapacuenia cajumaitsije Jehová: 12 «¡Nato-itapere caejawa pitsineconita jitsipame pecananeconitsia-exanaenexa nijaneconijamatabëcuene! ¡Nato-itapere itsa jitsipame pecatsi-itorobijawa acueyabi pawaibeje janibocuene Israel nacuata! ¡Itsa jume, nato-itapere acueyabi pajuametobejecuenia panijawajabitsaë papecacuene-amoneyabinexa, panewecuarëcëpaecuenia panejinawanapaenexa! ¡Itsa jume, nato-itapere acueyabi pamatacabibejecuenia Jehová papecabeyajebinexa pinijiwixaeta! Baitsi pacatsi-itorobiana Jehová pija-ángelnë papecabeyaxuabaponaenexa pinijiwixaeta daxita Israel nacuajawa, bepapecabeyajebijawa ángelnë pija-espadata», cajai Jehová. Nexata, juya netsipaebianame xua nato-itapetame Jehová pecananeconitsia-exanaejawanexa, juya tatsipaebinexa tane-itorobinë xamëjawaberena —jai Gad Jehová pitorobicueniatsi.
13 David nexata jumecanawiata:
—Bitso neto-ayapëbeje cajena tanato-itapetsijawa. Jehová itsiata jiwi bitso pitaxutotsoniataenë wajawënajiwitonëwecua. Nexata xanë nacaewetsianajë, bajaraPonë tanenaneconitsia-exanaenexa paneconita naneconitsia-exanaejitsia. Aponetsixanepanae wajawajabitsaë wajanacacuene-amoneyabicuenia wajanacabeyejebijawa —jai.
14 Nexata, Jehová tocopata Israel nacuapijiwi pewerebiabiwixaeta petëpaponaenexa. Nexata, bajarapamonae tëpa setenta mil ponëbeje. 15 Bajarapacujinaeta Jehová itoroba pija-ángelnë pewerebiabanajetarucaenexa Jerusalén tomarapijiwi. Itsa baja ángelnë bajarapatomarapijiwi werebiabanajetaruca, nexata Jehová itsa tane jiwi ayaibitsaëto petëpaejawa, icatsia bajaraPonë itaxutobejiobiatane bajarapamonae. Nexata itsajamatabëcuene xainajopa pewerebiabijamatabëcuenemiwecua. Nexata, bajaraPonë ángel-nëjawabelia pebeponaeyaniwa, cuene-itaweta baja. Jumaitsi:
—¡Xanepana rabaja! ¡Pëtsa baja pematatsënëa beponame! —jai Jehová. Nexata bajarapaepatota, ángelnë nucajopa itsajota Ornán, jebuseowirianë, trigo tanabataxuababiabaponapona. Bajarajota, bajaraponë pija-irayo trigobotonë petanabataxuababiabitaxunaenexa. 16 Nexata, David itsa athëbëyotsia naëcota, taenuta ángelnë penucaejawa athëbëyo iramatatsënëta, Ornán pijatrigo petanabataxuababiabitaxunae matatsënëta. Bajarapa-ángelnë cobenanuca espada pematasajawa ca-itaropitanucaeya Jerusalén-jawabelia. Nexata bajarapacuenia petaejawata, David, daxita pewetsiwi ancianomonae yajawa, pematabacabëta nubenajunua irataeya, yaiyataeya pewajëcaenexa Diosojawabelia. Bajarapamonae naxatabanua pecatsequecaepananëtsi, penajamatabëcuene-itajëtsinexa penasiwajamatabëcuenebëjaijawa pijaneconi yabara. 17 Bajarapaepatota, David jumaitsi Diosojawabelia:
—Bajarapamonae tayanacua-ewetsiwi aponaneconitsi penamata-ëjëtsijamatabëcuene yabara. Xanë raja itorobajë bajarapamonae tanetonamata-ëjëtsinexa. Nexata, bajarapamonae be-ovejaxi nepënapona tamatacaponaecuenia. Xanë raja bajarapapibisiacuene exanajë xamë nitabarata. ¿Denexata maxua pamonae xamë cato-exana pianeconijibiwi? Jehová Dioso, pexaniacuene cawajëtatsi, bajarapananeconitsijamatabëcuene xanë tanetsijumajopaenexa, bajarapacuenia tajamonaejawabelia-ata. ¡Itsiata baitsi jane, copare baja nebejawa netsicopatsiwixaeta, newerebiabiyaniwa bajarapamonae nijajiwi! —jai David pewajëtsijawata Diosojawabelia.
David nacuenebanuta altar-jawa Jehová pewënëta
(2Sa 24:18-25)
18 Nexata Jehová pija-ángelnë itoroba Diosojumepaebinë Gad, pejumaitsinexa David-jawabelia, pejunaenexatsina, pexananutsinexa altar-jawa Jehová pewënëta, itsajota Ornán, jebuseowirianë, tanabataxuabaponapona pijatrigo petsutojumata. 19 Nexata, David pona jane baja bajarapatsutojumabetsia, pexanaenexa altar-jawa Jehová pewënëta, pacuenia profeta Gad jumaitsitsi. 20 Ornán petanabataxuabaponaponaejawata trigo, itsa napijiwinaëcolia, bajaraponë taenuta ángelnë. Itsiata, peyajawatanabataxuabiwi, cuatro ponëbeje pexi, bajarapaepatota bajarapamonae petaejawata, rëcëpeca pewecuanamatayabinexa bajarapa-ángelnë. 21 Nexata itsa David imoxoyotanajetaruca itsajota nuca Ornán, bajaraponë itsa tane pecujitsijawatsi, bajaraponë pitsapalia pecopiapitsinexa. Nexata, bajaraponë irataeya bocajunua yaiyataeya David pitabarata.
22 Nexata, David jumaitsi Ornán-jawabelia:
—¡Nerajure pataxunaeta tanabataxuabaponaponame trigo, bajarajota ta-exananutsinexa altar-jawa Jehová pewënëta! Camatamotsianatsi bajarapataxunaeyo pacuenia namatamota, jamatejema mapawerebiabiwixae Jehová petsicopatsijawa pijajiwijawabelia bajaraxua pewecua-ajibia-exanaenexa, bajaraponë penajamatabëcuenecataitsinexa 4 dajubi tatajuitsijawata tajaneconijamatabëcuene —jai.
23 Ornán nexata jumecanawiata:
—¡Tajatuxanenë, jamatejema saya pire, nexanaenexa pacuenia jitsipame! Xanë bajarapacuenia carajutsianatsinua mapabueyubeje netajuitsinexa altar-jumata. Bajarapacuenia-ata catsirajutsianatsi isonexa tacatanabataxuabimoyomi trigo. Orijibia, trigoxu-ata yajawacarajutsianatsi, jamatejema netajuitsinexa altar-jumata ofrendacuenia Diosojawabelia. Tajatuxanenë, bajaraxua daxita xanë catsirajutsianatsi amoneya —jai Ornán.
24 Itsiata, pepopeyanacua-ewetsinë David jumaitsi:
—Bitso casiwajamatabëcuenebarëyatsi pacuenia picani nejumaitsimë. Itsiata baitsi jane, xanë netoxanepana tacacomuatsinexa pacuenia netocopatame. Acuenebi xanë nijajawa tacawecuapitsijawa amoneya, tajaneconijamatabëcuene tarajutsinexa Jehovájawabelia, bajarapacuenia tatajuitsinexa nijadajubinë xanë camatamotsinejewatsi —jai.
25 Nexata, David matamota Ornán-jawabelia bajarapataxunaeyojamatabëcuene seiscientos ponëbeje oronanitota pexanaepalatanëanë. 26 Nexata, bajarajota jane baja, exananuta altar-jawa Jehová pewënëta. Bajarajota, tajuita Jehovájawabelia itsabueyu daxitanë pijaneconijamatabëcuene, bajarapacuenia itsabueyu penajamatabëcuene-itajëtsinexa caejamatabëcuene penajuaxainaejawa namata-enetsia Jehová pesiwajamatabëcuenecaewixaetsi pijaneconimi. Nexata altar-jumata pejebicujinae petajuitsidajubinexa, xuacujinae wajëta Jehovájawabelia. Nexata, Jehová tocopatsica isoto athëbëwetsica bajarapa-altar-jumabetsica itsajota dajubi jebanubena petajuitanubenaenexa. 27 Nexata, Jehová bajarapaepatota pija-ángelnë itoroba baja pija-espada pejenexa pewënojojawareca. Bajarajota nexata, jiwi copata petëpaejawa. 28-30 […]