Eliseo jamatejemaya-exana Naamán petsabanaeleprawitanewecua
5
Pamatacabijawa Naamán ponapona, bajaraponë pepopenamatacaitorobinë tsaponaponae Siria nacua pepopeyanacua-ewetsinë pijajiwi wajabitsaë. Siria nacua pepopeyanacua-ewetsinë bitso asiwayacuenia tanetsi bajaraponë. Bajaraponë ayaijamatabëcuenenëcuenia tanetsi, tsipaji Jehová yawenonabiaba pecuene-amoneyababiabinexa Siria nacuapijiwajabitsaë. Bajaraponë tae-atatsi ayaijamatabëcuenenë, awitane tsaponaponae petsabanaewitane leprawënëjawa.a2 Nexata pamatacabimijawa Siria nacuapijiwajabitsaëwi abaxë najetarubena israelitawi pejinawanapaenacuajawa, peyacajërëbaponaenexa pecobecowëjawanëmi, petaicaponaenexanua jiwixi, bajarapamatacabimijawa bajarapawajabitsaëwi pejanawa waetaba, apopenajapatsiwa abaxë. Bajarapowa pecapatsicujinaetsi Siria nacuajawabelia, nexata nacopata Naamán pijawa pijabota, petonacuenebaponaponaewacuenia. 3 Nexata itsamatacabijawabelia, bajarapapejanawa jumaitsi pijatuxanewajawabelia:
—Itsa tajatuxanenë ponaejitsipa profetanëjawabelia, Samaria tomarata peponaponaenë, itsa jumaitsi meta tsipae bajaraponëjawabelia, jamatejemaya-exanaejitsipatsi tajatuxanenë petsabanaejawamiwecua —jai bajarapapejanawa.
4 Nexata, bajarapacuenia Naamán itsa jumetane, bajaraponë pona pepopeyanacua-ewetsinëjawabelia, petsipaebinexa daxita bajarapapejanawa xua jumaitsi, Israel nacuapijiwa 5 Nexata, Siria nacua pepopeyanacua-ewetsinë jumaitsi:
—Xanepana. Nexata, ponaename bajarabelia. Xanë tatoyaquinaebaxuto caponaename Israel nacua pepopeyanacua-ewetsinëjawabelia nerajutsinexa, xaniawaetsia pecacopiapitsinexa —jai.
Nexata, bajarapacuenia Naamán pona baja. Capona treinta mil ponëbeje palatanëanë, seis mil ponëbeje oronëanë, diez panaxatatsijawabeje-ata. 6 Yajawacaponanua petoyaquinaecuyalatobaxuto Israel nacua pepopeyanacua-ewetsinëjawabelia. Bajarapabaxutota jumaitsi mapacueniaje: «Itsa pitsianame mapabaxuto tacatoyaquinaejawa, yapëtaename xanë ta-itorobijawa tajajiwitonë Naamán, ponë penamatacaitorobaponaponaenë tajajiwi wajabitsaëwi. Cato-itorobatsi xamë, bajaraponë nejamatejemaya-exanaenexa petsabanaejawamiwecua leprawënëwitane», pejaibaxuto.
7 Bajarapabaxuto pepitsicujinae, Israel nacua peyanacua-ewetsinë yoroba baja. Peyorobicujinae, bajaraponë penaxatatsijawa namipatitinaxuaba, penajamatabëcuene-itajëtsinexa ayaicuenia pejamatabëbëjaijawa. Jumaitsi pebarë-ewetsiwijawabelia:
—¿Xanë tsaja Diosonënë? Dioso raja perajutsinë jiwi piasaëjamatabëcuene, petëpaeya-exanaenënua. Bajarapitsinëcuenia meta netane, bajaraponë tanecato-itorobirena leprawixae petsabanaenë tajamatejemaya-exanaenexa —jai. ¡Pacuenecanaëjëre! Siria nacua peyanacua-ewetsinë liwaisi saya nacatsijaita waxaitsijawaberena, pacuenia wajanacabarënawajabitsaëtsinexa —jai Israel nacua peyanacua-ewetsinë.
8 Nexata Eliseo, Dioso pijajiwitonë, itsa jumetane Israel nacua peyanacua-ewetsinë penamipatitinaxuabijawa penaxatatsijawa pejamatabëbëjaijawa yabara, bajaraponë tonajume-itoroba pepopeyanacua-ewetsinëjawabelia mapacueniaje: «¿Detsa xuajitsia nexata xamë bajarapacuenia nenaxatatsijawa titinaxuabame? Neto-itorobare xanëjawaberena bajaraponë peponaenexa. Nexata, bajaraponë yapëtaena profetanë peponaponaecuene Israel nacuata», jai Eliseo.
9 Naamán nexata pona bajarabelia. Yapatajopa pijacarrozamo, caballo peyarobobocaemotsi, Eliseo pijabobaupajawata. 10 Itsiata baitsi jane, bowecua pitsapaenejewalia Eliseo pecopiapitsinexa Naamán, Eliseo saya pijumewajunupaebinëtsi itoroba pejumaitsinexa: «Ponare Jordán menejawabelia! Bajarapameneta, siete xuabeje najabutsianame. Bajarapacuenia neperabëtsabanaejawa caewiana. Nexata, perabëxanepanaename baja», jai.
11 Naamán bajarapacuenia itsa tsipaebatsi, jamatabëcuene-anaepanaeya wecuapona. Nexata jumaitsi tsanajetarucae peyajawaponaewijawabelia:
—Xanë jamatabëcuene-itsinë picani: «Bajarapaprofetanë meta pitsapaena xaniawaetsia tanecopiapitsinexa. Nexata meta, taitabarata nucaena, Jehová pijaDiosojawabelia tanetowajëtsinexa taneperabëjayatsicuenia, taperabëtsabanaejawami tacaewinexa», jamatabëjanë picani —jai Naamán.
12 Icatsia, jumaitsi tsanajetarucae:
—Damasco nacuapijimenebeje, Abana mene, Farfar menebeje, ¿tsaeta apopexaniawiriamenebeje daxita Israel nacuapijimenianëwecua? ¿Aponetoxanepanae tsaeta tanajabutsinexa bajarapamenebejejawata, taperabëxanepanaenexa icatsia? —jai bajaraponë.
Nexata, bajaraponë bitso anaeya pona bajarajotawecua. 13 Itsiata baitsi jane, bajaraponë pijajiwi, peyajawaponaewi, bajarapaepatota cujibarenatsi. Jumaitsi bajaraponëjawabelia:
—Tajatuxanenë, itsa profetanë ca-itorobijitsipa ne-exanaenexa bitso pecatsi-ayapëbejecuenejawa, ¿nexata xamë apo-exanaemë tsipae? Matatoxenetsia nexata catoxanepana nexanaenexa pacuenia ca-itoroba pecatoyapëxanepanaecuenia. Saya bajaraponë cajumaitsi neponaenexa nenajabutsinexa, bajarapacuenia neperabëtsabanaejawa pecaewinexa, neperabëxanepanaenexa icatsia —jaitsi.
14 Naamán nexata pona Jordán mene-itapayabereca. Bajarajotareca siete xuabeje najabuta meneta, pacuenia baja Diosojumepaebinë, profeta Eliseo, tonajumecopatatsi pexanaenexa. Nexata bajaraponë peperabëtsabanaejawami baja ajibi. Perabënacopata pacuenia pejewaxinëyo baperabë-itsi. 15 Bajaraxuacujinae, daxita peyajawaponaponaewi yajawanawiata icatsia Eliseo pijaboyaberena. Nexata, tsitanaitajëtajopa Eliseojawata. Jumaitsi Eliseojawabelia:
—Ajenaconoxaeta baja, yapëtaniji pacuenia apoxainae itsanacuanëjawa pepoDioso. Caenacua saya, Israel nacua, xaina pijaDioso, pepoDioso. Bajaraxuata, ajenaconoxae pexaniacuene cawajëtatsi, tanewecuapitsinexamë amoneyacuenia tacarajutsijawanexa xua catocaponatsi —jai.
16 Itsiata baitsi jane, Eliseo jumecanawiata:
—Jehová pitabarata cajumaitsitsi, Ponë nacataeponapona pitabarata, apocawecuapitsitsi tsane —jai.
Picani Naamán orijibia ajumesaë pewecuapitsinexatsi. Itsiata, Eliseo apojejai pewecuapitsinexa.
17 Nexata Naamán jumaitsi:
—Pexaniacuene cawajëtatsi. Itsa aponewecuapitsimë tsane xua catocaponatsi, ¿nexata tsaja apopanetocopatsimë tsipae anijanëbeje tajamulabeje mapa-irayajuwënëjawaje tacaponaenexa patajanacuayabelia? Bajarapacuenia jitsipajë, tsipaji ajenaconoxaecujinae nijajiwitonë pematatsënëa baja dajubi apototajuitsinë tsane jumapecataenëjawabelia. Saya caenë Jehovájawabelia tajuitsianajë, —nayabarajai Namaán. 18 Caejawa saya jitsipajë Jehová tanesiwajamatabëcuenecaewabiabinexa ta-exanaeneconi, paepatota pataneyanacua-ewetsinë barëjoneyabiabianajë Rimón jumapecataenë pijatemplobojawabelia, asiwaya penawajëcabiabinexa. Pewajëcaejawata, bajaraponë nayaëtanuca xanëjawaberena nabëxëtsiaya patanucaejawatabeje bajarapajumapecataenë pitabarata. Bajaraxua yabara tanetaeyaniwa tananeconitsinëcuenia, tsipaji pepacuene siwanajamatabëcuenecopatajë ëJehovájawabelia —jai.
19 Eliseo nexata jumecanawiata:
—Ponare baja jamatabëcuenebëjamënejewa —jai.
Nexata, Naamán baja pona bajarajotawecua. Itsa abaxë aponajetarucae tajë peponaecujinae bowecua, Eliseo pijajiwitonë Giezi najamatabëxaina: 20 «Tajatuxanenë baja copata Naamán, Siria nacuapijinë, penawiatsinexa wecuapitsinejewa xua tocaponatsi picani perajutsijawanexatsi. Nexata, xanë pepacuene ajenaconoxae baraponaenajë bepijiayocuenia, juya xanë tanerajutsinexa xua picani tocaponatsi perajutsijawanexatsi, xanë juya taxainaenexa», jamatabëjai. 21 Nexata, Giezi pona Naamán pecowëwelia. Itsa Naamán napijinaëcota, tane Giezi pecujinaejinaenajetarucaejawa. Nexata bajaraponë runaica pijacarrozamojawawetsica, pecopiapitsinexatsi. Itsa baja imoxoyotanajetaruca, yanijobatsi:
—¿Itsacuenejawa pacatocopiapata? —jai.
22 Nexata Giezi yamaxë-itojorobiaya jumecanawiata:
—¡Jume! Ajibi picani. Xanepana saya —jai. Tajatuxanenë raja nitoroba xamëjawaberena tacajumaitsinexa: «Patabeje raja anijanëbeje, pewëjëatobeje, profetacuene penacujarubiwi, penajetarucaenëbeje Efraín nacuatsutonëjawawerena», tacajainexa. Nexata catonajumeruta tanerajutsinexamë tres mil ponëbeje palatanëanë, anijanaxatatsijawabeje yajawa, perajutsinexa bajaraponëbejejawabelia —jai bajaraponë yamaxë-itojorobiaya.
23 Naamán nexata jumecanawiata:
—Pexaniacuene ne-exanare. Caponare seis mil ponëbeje palatanëanë —jai.
Giezi picani apojejai. Itsiata, Naamán jumaitsi tsaponae pewecuapitsinexatsi. Belia Giezi jejai. Nexata bajarapacuenia, anijadorobejeta jia bajarapaseis mil ponëbeje palatanëanë, anijajawabeje pijinia pejanapenaxatatsijawabeje yajawa. Orijibia, Naamán rajuta bajarapadorobeje itsanëbeje pijajiwitonëbejejawabelia, pewajënaeya canamataxainaeya petocaponaenexatsi. 24 Bajarapamonae itsa pata-othopa muetsiacuenia imoxoyojawata patsutojumata Eliseo pijabo eca, Giezi nexata ponëbeje tocaponatsibeje wecuapita bajarapadorobeje. Itorobabeje napëjiobiaya, penawiatsinexabeje pijatuxanenëjawabelia. Xuacujinae, muetsiacuenia matayata bajarapadorobeje bo-ënëta. 25 Bajaraxuacujinae, Giezi pona pabo-ënëjawata Eliseo eca, petsitanaitajëtajopaenexa. Nexata Eliseo yanijobatsi:
—¿Detsa werena patanajetarucame, Giezi? —jai.
—Nijajiwitonënë cajena itsajawabelia apoponaponaenë —jai Giezi pejumecanawiatsijawata.
26 Itsiata baitsi jane, Eliseo orijibia jumaitsi tsaponae:
—Xua jumaitsimë, najumetsënëtame. Paepatota Naamán runaica pijacarrozamojawawetsica pecacopiapitsinexa, xanë bajarapaepatota tajamatabëcuene betacayajawa. Itsiata baitsi jane, xua Jehová to-exana jiwi, aponacatoxanepanae wajamatamopitsinexa palatanëanë, wajanaxatabijawanënexa, olivonaebacabo, uvamacanaebacabonë, ovejamonae, bueyumonae, pebijiwi, petiriawi-ata amoneyacuenia wajanacatonacuenebabiabiwinexa. 27 Bajarapacuenia nexanaexae, Naamán pijawitanemi peperabëtsabanaejawami leprawënëjawa, nexata xamë juya catsijopaena, bajarapacuenia nemomoxi-ata petsinacopatsinexatsi daxitamatacabijawabelia —jai Eliseo.
Paepatota Giezi a̱jena̱ wecuanatsata Eliseo, bajarapaepatota jane baja, bajaraponë tsipitsapatsi bajarapawixaejawa. Naperabëyapëtane peperabëtsabanaejawa leprajawa, bitso peperabëniojaicuenia.