Eliseo jamatabëcueneyawenona pamona petotëpaewatsi
4
Profetawiyajuwënënëmi pijawa, itsamatacabi pata Eliseojawabelia, peyanijobinexa peyawenonaejawanexatsi yabara. Jumaitsi:—Xamë baja yapëtaneme nijajiwitonëmi, tamona, tanewecuatëpaejawa. Bajaraponë cajena Jehová yaiyataecuenia petoponaponaenëmi. Piasaëtsaponaponaematacabi abaxë, bajaraponëmi amoneyaba palata itsanëjawabelia. Nexata, aeconoxae patajopa piamoneyabinë palata, taxënatobeje pecaponaenexatsi, penacuenebia-exanaenexatsibeje amoneyacuenia tamonapijinë piamoneyabijamatabëcuene —jai.
2 Eliseo nexata yanijobiaya jumaitsi bajarapowajawabelia:
—¿Detsa xua nexata xanë cato-exanaejitsipatsi xamëjawabelia? Nejumaitsimëre. ¿Detsa xua xainame nijabojawata necanajetsinexa? —jai.
Nexata, bajarapowa jumecanawiatatsi:
—Ajibi. Itsacuenejawa cajena apoxainaenë tajabota. Xainajë saya caebëyo, aceitera pexainaebëyo —jai.
3 Nexata Eliseo jumaitsi bajarapowajawabelia:
—Ponare nexata ajenaconoxae imoxoyo nijabowecua pejinawanapaewijawabelia, nenacowaebinexa ayaijawa pënësajinae canalitonë. 4 Bajaraxuacujinae, boyalia barëjonename nexënatobeje. Nexata, barënayabaupa xatatsianame. Caponaename nija-aceitebëyo. Bajarapacuenia daxita papënësajinaejawanë nacowaebame wënëbaponaename. Nexata, saicaya nubaponaename aceiteranë newënëbijawanë —jai Eliseo.
5 Bajaraxuacujinae, bajarapapetiriwa baja penapëjiobicujinaetsi Eliseo, pona pijabojawabelia. Itsa baja pata pijabota, nayabaupaxatata pexënatobeje yajawa. Nexata jane baja, taxuxuaba pewënëbijawa aceiteranë, pënësajinae canalitonëjawabelia pexënatobeje tocapatatsi, pecowaebijawanë. 6 Itsa baja wënëba daxita pënësajinae canalitonë pecowaebijawa, nexata bajarapowa icatsia jumaitsi itsanë pexënatojawabelia:
—Netocapare itsa pënësajinae canalitonë pematatsënëa —jai.
Nexata jumecanawiatatsi bajaraponë:
—Ajibi rabaja pematatsënëa —jaitsi. Nexata, bajarapaepatota baja ajibi tsajone aceitera penawotanajetarucaejawami. 7 Bajaraxuacujinae, pona bajarapowa petsipaebinexa profetanë Eliseojawabelia.
Nexata bajaraponë jumaitsi:
—Nexata aeconoxaeta, caponaename necanajetsinexa bajarapa-aceiterajawanë. Bajarapacuenia nacobecowëmatamotsianame niamoneyabinëjawabelia. Nexata xua nacopatsiana bajarapamatamoyajuwënëjawa, bajaraxua xamënexa catonacopatsiana, bajarapacuenia nexënatonexabeje-ata, panena-ewetsinexa bajarapamatamojamatabëcuene —jai Eliseo profetawiyajuwënënëmi pijawajawabelia.
Eliseo patabiaba Sunem tomarapijiwibeje pijabojawata
8 Itsamatacabi Eliseo naropota Samaria tomarawecua, peponaenexa Sunem tomarajawabereca. Bajarapatomarata ponapona petiriwa ayaijamatabëcuenewa. Nexata bajaraponë pepatsicuijinae bajarapatomarata, bajarapapetiriwa junatatsi ajumesaëya peponaenexa pijaboyabelia penaxaenexa. Nexata bajarapamatacabijawaweliacujinae, Eliseo icatsia itsa najetarucabiaba bajaraxuayo, bajarajota bajaraponë patabiabajopa penaxaeyabiabinexa. 9 Nexata bajarapowa belia jumaitsi itsamatacabi pamonajawabelia:
—¡Nejumetaema! Xanë yapëtaniji papebi waxaitsibejejawata patabiaba wajanacasiwaxainabiabinexabeje, bajaraponë tsaena Jehová pitapetsinëtsi, pijacuene petonacuenebaponaponaenënexa. 10 Pexaniacuene cawajëtatsi. Xaniawaetsia wajacopiapitabiabinexabeje bajaraponë, nexata, nacuenebianatsibeje athëbëyo piji-irajawatatsia peyacaranatsibojawa, pepatabiabinexa. Nexata, bajarapabo-ënëta tobuatsianatsibeje cama. Tonutsianatsibejenua mesa, bajarapacuenia silla-ata yajawa. Bajarapacuenia lámpara tonutsianatsibeje pitayotabiabinexa. Nexata, pacujinae bajaraponë nacasiwaxainabiabianabeje, bajarajota nacopatabiabiana pemajitsinexa —jai bajarapowa pamonajawabelia. Pamona jejai bajarapacuenia pexanaenexabeje.
11 Bajaraponë itsamatacabi icatsia patajopa pesiwaxainaenë. Nexata, nacopatajopa bajarapaboyo peyacaranatsi-ënëjawa athëbëyo irajawatatsia. Bajarajotatsia nexata majitanuca. 12 Nexata itsamatacabijawabelia, bajayacunua, jumaitsi pijajiwitonë Giezijawabelia:
—Junare Sunem tomarapijiwa pepatsinexatsina, tabarëcuaicuaijainexa bajarapowa —jai.
Nexata, Eliseo pijajiwitonë tojunata. Bajarapowa itsa patajopaina, bajaraponëjawata tsitanaitajëta. 13 Nexata Eliseo pijajiwitonëjawabelia itoroba pejumaitsinexa:
—Jumaitsimëre bajarapapetiriwajawabelia: «Xamë cajena pexaniacuenia bitso pane-ewetabiabamebeje», jamë tsane—. Icatsia, yanijobianame: «¿Detsa xua jitsipame xamë yabara patacato-exanaenexabeje? ¿Apojitsipaemë meta patacatojumaitsinexa itsacuenejawa pepopeyanacua-ewetsinëjawabelia, itsa jume, wajabitsaëwi pepopenamatacaitorobinëjawabelia?», —jamë tsane jai Eliseo pijajiwitonëjawabelia, juya pejumaitsinexa bajarapowajawabelia.
Nexata bajarapacuenia peyanijobijawatatsi, bajarapowa jumaitsi:
—Ajibi. Xanë saya tajanacuata jamatabëcuenexanepanaeya ponaponajë tajamonaetuatuajëta aliwaisijibia —jai bajarapowa.
Bajaraxuacujinae, bajarapowa penawiatsicujinae, icatsia Eliseo yanijoba pijajiwitonëjawabelia:
14 —¿Detsa pitsicuene nexata to-exanaenatsibeje bajarapowajawabelia? —jai.
—Itsabo. Bajarapowa caejawa pexi apoxainaponaponae. Icatsia, pamona baja bitso perujunëyo —jai Giezi.
15 Eliseo nexata jumaitsi:
—Junare icatsia bajarapowa —jai.
Nexata, Eliseo pijajiwitonë runareca pejunatsinexa. Bajarapowa baja itsa junanucaponaina, nucajopa baupajawata. 16 Nexata Eliseo jumaitsi bajarapowajawabelia:
—Ajenaconoxae pawaijawawerena, mapitsimatacabianëjawataje xainaename baja nexënatonëyo, nisaponaponaenexa —jaitsi.
Nexata bajarapowa jumecanawiata:
—¡Jume raja, tajatuxanenë, Dioso pijajiwitonëmë! Nebaranajume-itacanitsiaya pëtsa nejumaitsimë nijajiwitowanë taxi taxainaejawanexa yabara —jai.
17 Pacuenia jane baja itsiata Eliseo jumaitsi, bajarapawaita baja bajarapowa nacoxita. Nexata wecuanaitajëtatsi pebinëyo. 18 Nexata bajaraponëyo witsabanajetaruca pexaniacuenia. Itsiata baitsi jane, wainë pepanepaecujinae, itsamatacabijawabelia bajaraponëyo pona paxa petaenexa, itsajotalia bajaraponë pijajiwi barëcaetuataponapona penaweretsitrigoxu. 19 Nexata bajarajotalia peponaponaejawata, bajaraponëyo jemata ayaijumeta jumaitsi:
—¡Jaque, bitso amatatanenë! ¡Amatatanenë bitso! —jai bajaraponëyo peya-aëaëjaijawata.
Nexata, paxa jumaitsi pijajiwitonëjawabelia:
—Caponare baja penajawabelia —jai.
20 Nexata, paxa pijajiwitonë isapitatsi. Caponatsi baja penajawabelia. Pecapatsicujinae penajawata, bajarapowa isa-eca bajaraponëyo pethaëtota buatecaeya matonejejawabelia. Bajaraxuacujinae, bajaraponëyo baja tëpa. 21 Nexata, bajarapowa petëpaenëyo cajunaya athëbëyo, pacuartojawata profetanë toxaniawaetabiaba. Camajumata buata. Bajarapowa baja pitsaparena. Xuacujinae, yabaupaxatatabuata. 22 Bajaraxuacujinae, bajarapowa pona pabiabelia, pejunatsinexa pamona penacuenebaponaponaenë. Pepatsicujinae, jumaitsi bajaraponëjawabelia:
—Pexaniacuene netocopare nijajiwitonë, burro yajawa, taponaenexa bepijiayocuenia profetanëjawabelia. Bajarapacuenia tanawiatsinexa icatsia —jai pamonajawabelia.
23 Nexata pamona jumaitsi:
—¿Detsa xuajitsia bajaraponëjawabelia ajena ponaejitsiamë? Apopejanajuameto raja abaxë, bajarapacuenia apopenacuera-ewetsimatacabi-ata, Dioso pijacuene wajabarë-exanaenexabeje bajaraponë ¿Dexua yabara nexata poname? —jai bajaraponë.
Nexata bajarapowa jumaitsi:
—Ajibi. Nacopare saya jamatabëcuenebëjamënejewa —jai. Pamona nexata jejai.
24 Bajaraxuacujinae, bajarapowa jumaxaniawaetsia-exana pijaburro. Bajaraxuacujinae, bajarapowa jumaitsi pijajiwitonëjawabelia:
—Ponaenatsibeje baja. ¡Namataxainare bepijiayo xamë! ¡Pëtsa xamë abaxë nucajopame! Matapania xanë paepatota cajumaitsitsi tsane wajanucajopaenexabeje, nucajopaename —jai.
25 Nexata jane baja, pona bajarapowa. Bajaraxuacujinae, patajopabeje Carmelotsutojawabelia, itsajota profeta Eliseo ponapona. Itsa Eliseo copiatane tajëjawawerena abaxë penajetarucaejawa, nexata jumaitsi pijajiwitonë Giezijawabelia:
—Taema, marawerena najetarucaje Sunem tomarapijiwa. 26 Pexaniacuene ne-exanare. Cujinaeya liamëre bajarapowajawabelia necopiapitsinexa. Yanijobianame: «¿Detsa itsimë? ¿Jamatejemamë? ¿Depacuenia ponapona amona? ¿Depacuenia-ata ponapona nexënato-ata?», jamë tsane —jai Eliseo.
Nexata, pijajiwitonë cujinaeponalia. Itsa namata-enena, yanijoba pacuenia jumaitsitsi. Bajarapowa nexata pejumecanawiatsijawata jumaitsi:
—Xaniawaetsia pajinawanapajë —jai bajarapowa. 27 Bajarapowa baja itsa patajopaeya petsutojumabetsia, itsajotatsia Eliseo ponapona, nexata bajarapaepatota, bajarapowa pematabacabëta nucajunua Eliseo pitabarata. Taxuwaetabanucanua, pexaniacuene pewajëtsinexa. Nexata bajarapacuene itsa tane, Giezi imoxoyolia pewecuatsatsinexa. Itsiata baitsi jane, Eliseo jumaitsi:
—Copare abaxë, tsipaji raja bajarapowa najamatabëxainaeya patajopa. Itsiata, xanë Jehová aponeyapëtaeya-exanae xua tocopiapatatsi bajarapowa —jai.
28 Nexata, bajarapaepatota bajarapowa jumaitsi:
—Tajatuxanenë, ¿xanë tsaja nexata cawajëtatsi xamëjawabelia taxijiwiyo taxainaenexa? ¿Xanë tsaja apocajumaitsitsi tanejumaitsimëyaniwa nebaranajume-itacanitsiaya taxi taxainaejawanexa yabara? —jai bajarapowa Eliseojawabelia.
29 Nexata Eliseo jumaitsi pijajiwitonë Giezijawabelia:
—¡Naxaniawaere baja! ¡Tajanaebo pire, necaponaenexa bajarabelia! Itsa namuto-epatua cacaxitajarabiana itsajiwi, pëtsa bajacobame. Namuto-epatua itsajiwi itsa cabajacobiana, pëtsa jumecanawiatame. Bajaraxuacujinae, itsa patsianame itsajota boca pejewaxinë, nexata tajanaebo tsitabarabuatsianame bajaraponëyo —jai.
30 Itsiata baitsi jane, bajarapapejewaxinë petëpaenë pena jumaitsi Eliseojawabelia:
—Xanë najumecapanepaeya cajumaitsitsi, Jehová piasaënë tsaponaponae pitabarata. Bajarapacuenia xamëjawabelia-ata cajumaitsitsi. Nexata, xanë majotawecuaje apopitsapaenë tsane xamënejewa. Jitsipajë tacayajawaponaejawa —jai.
Nexata, Eliseo bajaraxuacujinae yajawaponatsi bajarapowa. 31 Itsiata baitsi jane, Giezi pewajënaeya wecuanamataxaina bajarapajiwibeje. Nexata bajaraponë baja itsa pata bajarapaboyabelia, picani Eliseo pijanaebo tsitabarabuata, pejewaxinë piasaëya-exanaenexa. Itsiata baitsi jane, apo-itajëtsi itsacuenejawa-ata piasaëjumali pexainaenexa. Bajaraxuacujinae, icatsia Giezi pona pemata-enenaenexa Eliseojawabelia. Nexata, jumaitsi:
—Pejewaxinë baja aponamatacotsi, icatsia caewëarena piasaënexa —jai.
32 Eliseo baja itsa pata, nexata junua bajarapaboyabetsia, itsajotatsia pejewaxinë buatatsi petëpaenë camajumata. 33 Nexata, bajaraponë pejonecujinaelia, bajarapabo baupaxatata. Eliseo, pejewaxinë petëpaenëbeje, bajara-ëpajiwibeje bajaraxuayolia nuca. Nexata bajarapaepatota, bajaraponë wajëta Jehovájawabelia. 34 Pewajëtsicujinae, cujilia camajawabelia itsajota petëpaenëyo buatatsi. Nexata, bajarapatëpaenëyo tsimipabëboca. Nacuaiborutanuca pecuaibojawalia. Naitaxutorutanuca pitaxutojawalia. Pecobebeje-ata cobewaetabanuca petëpaenë. Nexata bajarapacuenia, tsiquirinëyo petëpaenë taxuxuaba piaperabëtajujawa peperabëcainejebijawami. 35 Bajaraxuacujinae, Eliseo icatsia wecuanonotapuna. Bo-ënëta matatoyorotsia nucaponapona. Bajaraxuacujinae, icatsia bajarapatëpaenëyo tsimipabëboca. Nexata, jemata petëpaenëyomi siete xuabeje athibatsi. Naëcota baja. 36 Eliseo nexata junata pijajiwitonë Giezijawabelia. Jumaitsi:
—Junare Sunem tomarapijiwa —jai.
Giezi nexata tojunata bajarapowa. Bajarapowa pejonecujinae bajarapabojawaberena, Eliseo nexata jumaitsi bajarapowajawabelia:
—Mara baja nuca nexënatoje. Barëponare baja —jai.
37 Bajarapowa paepatota jonenajetaruca. Nexata, pexaniajamatabëcuene perajutsijawa, penajamatabëcuene-itajëtsinexa yaiyataeya nucajunua Eliseo pitabarata itapapatsiaya irabereca. Bajaraxuacujinae baja, bajarapowa pexënato barëpitsapalia.
Eliseo xanepanaeya-exana penayarajutsipexaejawami
38 Bajaraxuacujinae baja, Eliseo icatsia pona, Gilgal tomarajawabelia pepatsinexa. Bajarapamatacabijawa, bitso Gilgal tomarapijiwi janibo tsawanapae. Nexata itsamatacabi profetawinexa penacujarubiwi Eliseo yajawa-eca. Nexata Eliseo jumaitsi pijajiwitonëjawabelia:
—Eremelia ayainë waxi isotualia. Nacuenebare pexaejawa, wajarajutsinexabeje penacujarubiwi profetawinexa —jai.
39 Nexata bajarapamonaeyajuwënënë pitsapa wayafojawabelia, pebaxucuene pejaitsinexa. Bajaraponë caxitajaraba betsucutobëjawanë. Ucuta bajarapabëanë. Nexata, bajarapabëanë pijanawata tabuta canucapona pecaëjëpaecuenia. Bojawata pepatsicujinae, bajaraponë epacaucuba bajarapabëanë. Nexata pesetsiwaxijawalia matajia, yapëtaenejewa pitsiwiriacuenejawa. 40 Bajaraxuacujinae baja, tocajuca pexaenexa profetawinexa penacujarubiwi. Nexata, bajarapamonae a̱jena̱ taxuxuaba pexaejawa, wawajaiya jumaitsi:
—¡Eliseo, marapapexaejawata nayarajutatsije! —jai bajarapamonae. Nexata, copaba baja pexaejawa.
41 Nexata bajarapaepatota, Eliseo icatsia jumaitsi:
—Panetocarenamëre trigobenojawa —jai. Nexata bajarapawaxijawalia tsimata-othonalia bajarapatrigobeno. Bajaraxuacujinae, jumaitsi:
—Patocajucare baja icatsia bajarapamonae pexaenexa —jai.
Nexata, bajarapamonae icatsia baja xane. Ajibi baja bajarapaepatota, bajarapawaxijawalia piabejejawami.
42 Bajarapamatacabijawa, itsanë patajopa Baal-salisa tomarawerena, petocaponaenëtsi veinte papan-bëbeje, copiaya penotsicebadaxuta pexanaepan-jawanë, bajarapacuenia-ata pejanatrigoruanë Eliseo pexaejawanexa.
Nexata, Eliseo jumaitsi pijajiwitonëjawabelia:
—Narajure jiwi penaxaenexa —jai.
43 Nexata, pijajiwitonë jumecanawiatatsi:
—¿Detsa pacuenia xanë abatsipajë cien ponëbejejawabelia mapitsitsiquiripexaejawayojawataje? Aponetoyacaëjëpae raja —jai.
Eliseo orijibia jumaitsi:
—Narajure saya jiwi pexaenexa, tsipaji raja Jehová neyapëtaeya-exana bajarapamonae penaxaecujinae itsiata peyajununacopatsijawanexa —jai.
44 Nexata, bajarapacuenia Eliseo pijajiwitonë narajuta, bajarapamonae pexaenexa. Bajarapamonae nexata naxane. Itsiata, toyajununacopatatsi, pacuenia baja Jehová jumaitsi xua peyajununacopatsijawanexa.