Saúl barënawajabitsaëta filisteomonaejawabelia
13
Pacujinaeta Saúl itapetatsi pepopeyanacua-ewetsinënexa Israel-pijinë pemomoxi pejinawanapaenacuata, bajaraponë baja penaweretsinë tsaponaponae. Bajaraponë baja itsa xaina wainë pewetsinë penaexanaecujinae, 2 nexata bajaraponë itapeta tres mil ponëbeje israelitawiyajuwënëwi pijajiwiwajabitsaënexa. Dos mil ponëbeje yajawaponapona bajaraponë Micmas-jawata, Betel tomara imoxoyojawata pe-enaetsutonë. Itsamil pijinia ponëbeje pexënato Jonatán yajawaponapona Gabaa tomarajawata, Benjamín-pijinë pemomoxibitsaëto pejinawanapaenacuajawata. Nexata itsamonae wajabitsaëwiyajuwënëwi Saúl itoroba penawiabinexa pijabonëjawabelia, pa-epatowajëto abaxë aponamatawenonaetsi. 3 Bajarapacujinaeta Jonatán tsimaxëpata filisteomonae, pebarënabenexa pijawajabitsaë pijataxunaejawabelia, Gabaatsutota pebarënawajabitsaëtsinexa. Bajaraponë nexata, werebiaba filisteowimi Gabaajawata. Nexata itsamonae filisteowi nawënëliwaisitane pijawiriawi pewerebiabijawatsi. Xuacujinae, Saúl itoroba piobinexa trompeta pijajiwiwajabitsaëwi junatsiaya daxita Israel-pijinë pemomoxi pejinawanapaenacuajawa. Piobijawata, yapëtaeya-exana hebreomonae penacaetuatsinexa filisteomonae pebarënawajabitsaëtsinexa.4 Nexata daxita israelitawi itsa nayajumetane pejumaitsijawa: «Saúl raja barëwerebiaba filisteomonae pijawajabitsaëtaxunaemi, bajaraxuata juya filisteomonae naca-itoyanaëcota waxaitsi israelitawitsi», pejaijawa itsa jumetaepona, nexata Saúl pijajiwi wajabitsaëwi tonacaetuatatsi Gilgal tomarajawata. 5 Bajarapijinia pacuenia, filisteomonae nacaetuata, pebarënawajabitsaëtsinexa israelitawijawabelia. Bajarapamonae xaina treinta mil pacarrozawënëmobeje pecanawajabitsaëtsimonë. Xaina seis mil ponëbeje pijajiwi wajabitsaëwi caballojumata peponaewinexa, itsamonae pijinia ayaibitsaëto petaxuta peponaewinexa. Pacuenia manuamene tajetabo atsapërë aponamata-ëjëtsicapanepaetsi, bajarapacuenia tsita-itsitsi ayaibitsaëtoxanetoxae. Penacaetuatsicujinae, bajarapamonae pona Micmas tomarajawabelia. Bajarajota, imoxoyojawata pijataxunaebo nacuenebanuba Bet-avén-jawawetsina.
6 Bajarapacuenia israelitawi itsa tane bitso pecuenematatoxenetsijawatsi bajarapafilisteomonae, nexata bajarapamonae pona penamatayabinexa. Itsamonae namatayaba petsutoyenepana ibowajuanëjawabelia, itsamonae pijinia momotonëjawabelia, bajarapacuenia pe-enaemëthëanëjawa ibotonëtuatuajëjawa. Itsamonae pijinia namatayaba mera penawotsifotonëjawa, bajarapacuenia meramëthëanëjawabelia-ata. 7 Itsamonae pijinia ayaibitsaëto nicaba Jordán-mene itsapanabelia penamatayabinexa Galaad nacuajawabelia, Gad nacuayojawa-ata. Ayaibitsaëto wecuanajetabijirawi-atatsi, itsamonae abaxë Saúl yajawanacopata Gilgal-jawata, junawi-ata. 8 Saúl wajënae-ewetaponapona siete pamatacabibeje Samuel pepatsijawanexa petocaëjëtsicueniatsi, penajuatajuitsinexa jane baja dajubi altar-jumata, pewajëtsinexa Diosojawabelia. Itsiata, Samuel apopatsi Gilgal-jawata. Nexata itsamonae, pijajiwi wajabitsaëwi baja, wecuanawiabaponatsi. 9 Nexata Saúl jumaitsi pijajiwijawabelia:
—Panetocapatsianame padajubi daxitanë tajuitsijitsianë Diosojawabelia wajaneconijamatabëcuene, bajarapacuenia itsadajubi wajanajamatabëcuene-itajëtsinexa caejamatabëcuene wajanajuaxainaejawa namata-enetsia bajaraPonëjawabelia, wajanacasiwajamatabëcuenecaewixae wajaneconimi. Xanë nexata tajuitsianajë dajubi altar-jumata Diosojawabelia —jai. Jejai bajarapamonae. Bajarapacuenia exana. Nexata, Saúl pijacuata natotajuita bajarapadajubi Diosojawabelia, Samuel pecuenenajematsixae, apotsicarucae-atatsi bajaraxua pexanaenexa.
10 Itsa baja Saúl weretanajetaruca dajubi daxitanë petajuitsijawa, nexata tane Samuel penajetarucaejawa. Nexata bajaraponë Saúl pitsapa pecopiapitsinexa, pebajacobinexa-ata. 11 Nexata Samuel jumaitsi Saúl-jawabelia:
—¿Detsa xuajitsia xamë bajarapacuenia exaname? —jai Samuel.
Saúl jumecanawiata Samuel-jawabelia:
—Xamë saya bitso baja najematame. Pitsimatacabiwajëto netocaëjëtame picani nepatsinexa, apopatsimë. Belia baja tajajiwi newecuanawiabapona. Icatsianua, jumetaniji filisteomonae penacaetuatawanapaejawa Micmas-jawata. 12 Nexata, xanë jamatabë-itsinë mapacueniaje: «Belia bajarapamonae panetsimaxëpatsipaica patanebarënawajabitsaëtsinexa Gilgal-jawabetsica wajëtsinejewanë abaxë Jehovájawabelia taneyawenonaenexa», jamatabëjanë. Nexata xamë nenajematsixae, filisteomonae tanetsimaxëpatsiwajënaeya wajëtsinejewanë Jehovájawabelia, bajaraxua exanajë —jai Saúl.
13 Samuel nexata jumecanawiata:
—¡Xamë xua exaname apoxanepanae cajena! Saya ajamatabëcowëbiaya exaname. Itsa xamë jumecowënëtsipame Jehová, pacuenia catonajumecopata, nexata bajaraPonë catocopatsipa nijamonaeyajuwënënë pecanacopatsinexa Israel-pijinë pemomoxi daxitamatacabijawabelianexa pepopeyanacua-ewetsinënexa. Nexata, aponejumecowënëtsixae, Jehová cawecuapitsiana neyanacua-ewetsicuenemi, perajutsinexa itsanëjawabelia. 14 Aponejumecowënëtsixae, nexata neyanacua-ewetsicuenemi catocopiarucaena itsamatacabijawabelia. Bajaraxuata, Jehová natojaitsiana itsanë, ponë pesiwajamatabëcuenebarëyanë, caejamatabëcuene pexainaenë Diosojawabelia, bajaraponë penutsinexa pepopeyanacua-ewetsinënexa Israel-pijinë pemomoxi necowëta. Bajarapacuenia cato-exanaena, Jehová aponejumecowënëtsixae pacuenia ca-itoroba nexanaenexa —jai Samuel Saúl-jawabelia. 15-23 […]
C14—C15 […]