Israelitawi jitsipa Samuel peto-itapetsinexatsi pepopeyanacua-ewetsinënexa
8
Samuel baja itsa perujunë tsanajetarucae, nexata bajaraponë itapeta pexënatobeje, juez-nëbejecuenia israelitawi pewetsiwinexa. 2 Copiayapijinë pexënato pewënë Joel. Cotocaewinë pijinia pewënë Abías. Bajaraponëbeje ewetaponaponabeje israelitawi Beerseba tomarata. 3 Itsiata baitsi jane, bajaraponëbeje paxa Samuel pacuenia xaniawaetsia liwaisi-ewetaponapona, apocuenejëpaebeje. Saya bajaraponëbeje bitso palatacuene pejitsipaenëbeje. Bajarapapalata pejamatabëcuene jiwi pewetsiliwaisi bijianabeje. Nexata, pexaniajaicuenia apoliwaisicanacuenebibeje. Caranata, ponë pecunuajawa matamotatsi, bajaraponë taeyabiababeje pianeconijibinëcuenia. Nexata, tocaëjëtabiababeje penaneconitsia-exanaenexa apopenatomatamotsinë. Bajarapacuenia bajaraponëbeje jiwi tobijiana peliwaisicanaëjëtsicuene Dioso pitabarata. Bajaraxuata, bajaraponëbeje pexaniacuenia aponacuenebibeje paxa pecuenecowëya. 4 Nexata, belia bajarapamatacabi daxita ancianowi, israelitawi pewetsiwi, nacaetuata peponaenexa Ramá tomarajawabelia, itsajota Samuel ponapona, pebarëcuaicuaijainexa. 5 Nexata, bajarapamonae pepatsicujinae, jumaitsitsi:—Xamë rabaja bitso nenaweretsinë tsaponae. Orijibia, nexënatobeje, ponëbeje paneto-itapetame patane-ewetsinënexabeje, bajaraponëbeje apocacuenejëpaeya pexaniacuenia liwaisianë apocanaëjëtsibeje. Bajarapacuenia-ata apopanetonacuenebaponaponaebeje pexaniacuenia. Bajaraxuata, ajenaconoxae paxanë pajitsipajë patanetowënërubijawamë pepopataneyanacua-ewetsinënexa. Pacuenia daxita nacuanëpijiwi nacatsuxaina pijapepopeyanacua-ewetsinëtsi, bajarapacuenia paxanë maparucaeje pajitsipajë pataneto-itapetsinexamë —jai israelitawi pija-ancianowi Samuel-jawabelia.
6 Samuel bajarapacuenia itsa jumetane, bajarapamonae pewajëtsijawatsi petowënërubinexa pepopeyanacua-ewetsinënexatsi, bajaraponë apotsitaxanepanaetsi. Jamatabëcuene-anaepana. Nexata, wajëta Jehovájawabelia bajaraxua yabara. 7 Itsiata baitsi jane, Jehová jumecanawiatatsi mapacueniaje:
—Itsiata, xamë benamuxuna-ewetame daxita bajarapamonae xua cajumaitsi neto-exanaenexa. Bajarapamonae itsa bajarapacuenia cato-exana, pecacuene-itoyaxae apocato-exanae. Xanë raja tanecuene-itoyaxae, bajaraxua neto-exana. Apotsitaxanepanaetsi pepotayanacua-ewetsinëcuene bajarapamonae. 8 Pamatacabi Egipto nacuajawawerena jutajë pijasalinaiwimi, ajena mapamatacabijawaberenaje, bajarapamonae necuene-atsobiaya netaeyabiaba. Baitsi, bajarapamonae newecuaponabiaba pejaitsinexa itsadiosowi xanëwecua, pesiwanajamatabëcuenecopatabiabinexa bajarapajumapecataenëanëjawabelia, juya asiwaya penawajëcabiabinexa bajaraponëanëjawabelia peyawenonaenexatsi. Bajarapacuenia pecato-exanaejawata, xamë natae-atamë pecacuene-atsobijawa picani, pepacuene itsiata xanë necuene-itoya bajarapamonae cajena. 9 ¡Aeconoxae xua cajumaitsi bajarapamonae, jumejejamëre neto-exanaenexa! ¡Itsiata baitsi jane, neto-exanaewajënaeya, bajarapamonae xaniawaetsia tsipaebare pacuenia pepopeyanacua-ewetsinë cuene-itsijitsia bajarapamonae pijanacuata! —jai Jehová Samuel-jawabelia. 10 Nexata, Samuel tsipaeba daxita pacuenia Jehová jumaitsi Israel-pijinë pemomoxijawabelia, pamonae wajëcatsi pepopeyanacua-ewetsinë peto-itapetsinexatsi. 11 Muxujiobanua pitsicuene taejitsia pepopeyanacua-ewetsinë pejamatabëcuene. Nexata pemuxujiobijawata jumaitsi:
—Marapacueniaje pepopapecayanacua-ewetsinë exanaena paxamëjawabeliaje: Bajaraponë pacacoxinotsiana panexënatonëxi pijajiwi wajabitsaëwinexa. Nexata itsamonae panexënatonëxi itorobianatsi wajabitsaëwi pijacarrozawënëmonë pecajinawanapaenexa penawajabitsaëtsimatacabi, itsamonae pijinia caballojumanëta pejinawanapaewi tsane penawajabitsaëtsimatacabi, itsamonae pijinia peya-ewetsiwinexa pepopeyanacua-ewetsinë, peponaewinexa pewajënaeya pepopeyanacua-ewetsinë pepopijacarrozamota, pejumewajunupaebanajetarubenaewinexa, panenatixibinexa namutowecua papecayanacua-ewetsinë paneyaiyataexae. 12 Itsamonae pijinia tocopatsianatsi penamatacaitorobiwinexa wajabitsaëwi mil ponëbeje. Itsamonae pijinia namatacaitorobiana cincuenta ponëbeje. Itsamonae pijinia nacuenebia-exanaenatsi pija-irata, pijapabianë peto-ewetsinexa, bajarapacuenia petocaetuatabiabinexa pe-ubijawanë. Bajarapacuenia pijinia itsamonae tonacuenebiana daxitaxua wajabitsaëwi pecanawajabitsaëtsijawanënexa, bajarapacuenia pecanawajabitsaëtsicarrozamonënexa-ata. 13 Bajarapacuenia-ata pacacoxinotsiana panexënatowaxi, amoneyacuenia petonacuenebawanapaewaxinexa, itsawaxi petuxujuwijawanë petonacuenebiwinexa, itsawaxi pemitsasetsiwinexa, bajarapacuenia pan pemitsa-exanaewinexa-ata. 14 Nexata bajaraponë panija-irayajuwënëjawanëmi pecawecuanotsiana, penaxainaeyabinexa daxita matatoxenetsia pexania-iranë itsa-iranëwecua, bajarapacuenia panija-uva pabianë, bitso pexaniajawanë, panija-olivobacabo pabiyajuwënëjawanë-ata. Nexata bajaraponë rajutsiana bajaraxuanë peyajawayanacua-ewetsiwi. 15 Daxita panenotsiyajuwënëjawanë, pacuenia panenotsixu, panenotsi-uvacuai, panenotsi-olivocuai-ata pacawajëcaena, daxita pane-ubijawanëmi nexata diez xuayomibejeyajuwënëjawa panerajutaponaenexa caejawa canacujitsia. Daxita bajaraxua papecawecuanotsicujinae, rajutaponaena pecobena-ewetsiwitsijawabelia, pamonae ayaijamatabëcuenewi pewetsijawata, bajarapacuenia beweliajamatabëcuenewinua. 16 Bajarapacuenianua pacawecuanotabiabiana pebijiwi, petiriawi-ata amoneya papecatonacuenebawanapaewimi. Bajarapacuenia panexainaewi pacawecuanotsiana panijabueyu, panijaburromonae-ata. Daxita bajarapamonae pacawecuapitsiana pecanacuenebia-exanaenexa bajaraponë pijajawanëjawata. 17 Bajaraponë-ata pacawajëcaena panerajutsinexa panija-ovejabitsaëtoyajuwënëwi, chivomonae-ata, diez ponëmibejeyajuwënëwi panerajutaponaenexa caenëyo canacujitsia. Bajarapacuenia paxamë-ata bajaraponë patonacuenebawanapaename. 18 Belia, itsamatacabijawabelia paxamë pacobexaebëjamë tsane, ponë ajena panewajëcame papecayanacua-ewetsinënexa. Bajarapacuenia pacuene-ataejitsibi-atamë tsane bajarapacuene yabara, pawajëcae-atamë tsane Jehovájawabelia papecawecua-ajibia-exanaenexa papecayanacua-ewetsicuene, itsiata bajaraxua Jehová apopacajumecowënëtsi tsane bajarapamatacabijawa —jai Samuel bajarapamonaejawabelia.
19 Itsiata baitsi jane, israelitawi apojumecowënëtsi pacuenia Samuel muxujiobatsi. Caranata, pejumecanawiatsijawata jumaitsi:
—Apo-itsacuene. Tsitecaeya pajitsipajë pataxainaejawa pepopataneyanacua-ewetsinë. 20 Pajitsipajë patanacuenejëpaejawa itsanacuanëpijiwi pepopataneyanacua-ewetsinë pataxainaejawa pataneyanacua-ewetsinexa. Bajaraponë pane-ewetsiana. Panematacaponaenanua patabarënawajabitsaëtsimatacabi patajawajabitsaëjawabelia —jai israelitawi pejumecanawiatsijawata.
21 Samuel bajarapacuenia penamuxuna-ewetsicujinae daxita pacuenia bajarapamonae jumaitsitsi, juya tsipaeba bajarapaliwaisi Jehovájawabelia.
22 Nexata, Jehová jumecanawiatatsi mapacueniaje:
—¡Bajarapamonae pacuenia cajumaitsi, to-exanare! Nexata, to-itapetsianame pepopeyanacua-ewetsinënexatsi —jai Jehová.
Bajaraxuacujinae, Samuel itoroba baja bajarapamonae penawiabinexa pijanacuayabelia, itsawerena pata bajarapamonae.
C9 […]