Moisés itapeta Josué pecanacopatsinexa Israel-pijinë pemomoxi penamatacaitorobinënexa
—Junaimina Abarim-tsutojumabetsina. Bajarapatsutojumawetsica taename pa-ira rajutajë Israel-pijinë pemomoxijawabelia. 13 Bajarapa-ira netaecujinae, xamë-ata tëpaename jonenejewamë bajarapanacuajawabelia, pacuenia Aarón nematapijinëmi tëpa, 14 tsipaji baja paxamëbeje apopanejumecowënëtsimëbeje, pacuenia paca-itorobatsibeje Zin nacuatusatojawatalia. Paepatota Israel-pijinë pemomoxi nesiwajamatabëcuene-anaepanaeya newajëcapona mera, bajarajotalia paxamë-atabeje apopa-exanaemëbeje pataneyaiyataecueniamëbeje bajarapamonae pitabarata pane-exanaejawatabeje apopataca-itorobicueniabeje. Bajaraxuata, pacatonajumecopatatsibeje panetëpaenexabeje petusatonacuata, Canaán nacuajawabelia pajonenejewamëbeje —jai Jehová Moisés-jawabelia. (Bajaraxua yabarajumaitsi Dioso pecapitsapaejawarena mera ibotoxanetojawawerena Meribataxunaejawatalia, Cades-tsutojawatalia, Zin nacuajawata.)
15 Nexata, Moisés jumecanawiata Jehovájawabelia:
16-17 —Jehová tajaDiosomë, xamë raja nenajumalirajutsinë daxitajiwijawabelia piasaëtsawanapaenexa. Cawajëtatsi nitapetsinexa itsanë tacowëta penamatacaitorobaponaenënexa mapamonae nijajiwi. Nexata, bajaraponë pematacaponaenënexa nijajiwi israelitawi penawajabitsaëtsimatacabi pijawajabitsaëwijawabelia, bajarapacuenia pebarënawiatsinënexa pijabonëjawaberena pecuene-amoneyabicujinae pijawajabitsaëwi. Itsa apo-itapetsimë tsipae itsanë, nexata pacuenia ovejamonae naxuabiaya bajinawanapa pewetsinëtsinejewa, bajarapacuenia nijajiwi bajara-itsi tsipae —jai Moisés.
18 Nexata, Jehová jumecanawiata Moisés-jawabelia:
—Je, xanepana. Josué, pexënato Nun, bajaraponë cajena taja-Espíritu Santo jamatabëcuenecaëjëpaeya-exanatsi pejamatabëcueneyawenonaenexa. Nexata, junatsianame bajaraponë netsimatanacobebuatsinexa. 19 Bajaraxuacujinae, itajëtsianame sacerdotenë Eleazar-jawabelia, daxitajiwi pitabarata-ata. Nexata, daxita bajarapamonae pitabarata tsicopatsianame Josuéjawabelia penamatacaitorobinënexa Israel-pijinë pemomoxi. 20 Nexata, netsimatanacobebuatsijawata tsiwajënaecuenewajunupaebianame bajaraponë pecanacopatsinexa nenamatacaitorobijamatabëcuenemi, jamatejema daxita israelitamonae bajaraponë jumecowënëtsiaya pejinawanapaenexa. 21 Bajaraxuacujinae, Josué penamatacaitorobinë penaexanaecujinae, itsa itsacuene pexanaewajënaeya, nexata bajaraponë ponabiabiana sacerdotenë Eleazar-jawabelia, peyanijobinexa pacuenia barë-exanaejitsia israelitawi. Nexata, Eleazar, tajacarpabota penucaenë, bajaraponë juya neyanijobiana Jehovánëjawaberena. Nexata, xanë yapëtaeya-exanaenajë Eleazar-jawabelia xua barë-exanaejitsia Josué Urim pejamatabëcuene.a Bajaraxuacujinae juya, Eleazar yapëtaeya-exanaena Josuéjawabelia xua xanë tojitsipajë pexanaejawanexa. Bajarapacuenia tsane Josué juya petsipaebinexa Israel-pijinë pemomoxi xua exanaejitsia. Nexata, Josué pitorobixae, bajarapamonae pitsapaena penawajabitsaëtsinexa, bajarapijinia pacuenia penawiabinexa pijabonëjawaberena-ata penawajabitsaëtsicujinae, daxitacuene pejumecowënëtsinexatsi —jai Jehová.
22 Daxita pacuenia Jehová tonajumecopatatsi pexanaenexa Josuéjawabelia, Moisés baja exana. Junata Josué petsitajëtsinexa sacerdotenë Eleazar-jawabelia, bajarapacuenia daxitajiwi pitabarata. 23 Nexata, bajarapamonae pitabarata bajaraponë tsimatanacobebuata, petsicopatsinexa Josué penamatacaitorobaponaponaenëcuene Israel-pijinë pemomoxi, Jehová pitorobicueniatsi.
C28-C30 […]