NÚMEROS 17

Aarón pijanaebo peliwaisi

Nexata, xuacujinae Jehová jumaitsi Moisés-jawabelia:

2 —Itorobare israelitawijawabelia, caenë, pemomoxibitsaëto canacujitsia penamatacaitorobinë pecapatsinexa pijanaebo, baitsi pecapatsinexa daxitata doce ponaebobeje. Nexata, xamë caepenamatacaitorobinë canacujitsia wënëyaquinaponaename pijanaebota. 3 Levípijinë pijinia pemomoxibitsaëto pijanaebota wënëyaquinaename Aarón. Bajarapacuenia caenë pemomoxibitsaëto canacujitsia xainaponaena pijanaebo, penamatacaitorobinë pewënëta. 4 Bajaraxuacujinae, bajarapadoce ponaebobeje jebianame tajacarpabo-ënëta, patacanajumeliwaisixaniawaetsibaula pewajënaeya, itsajota xanë pacacaxitajarababiabatsi. 5 Xanë raja peneta ponë ta-itapetsinë penamatacaitorobinënexa tajajiwi, pijanaebo tobaxujuwia-exanaenajë. Nexata, bajarapacuenia israelitawi copabia-exanaenajë pematatsënëa pibisiacuenia papecabaracuaicuaijaijawabeje xanë taitabarata —jai Jehová.

6 Moisés nexata tsipaeba bajarapaliwaisi daxita israelitawijawabelia. Nexata, caenë pemomoxibitsaëto canacujitsia penamatacaitorobinë, rajutapona pijanaebo Moisés-jawabelia. Bajarapacuenia caetuata daxitata doce ponaebobeje. Bajarapanaebonëtuatuajëta, Aarón pijanaebo naboca. 7 Bajaraxuacujinae jane baja, Moisés jeba bajarapanaebonë Dioso pijacarpabo-ënëta, Jehová penajumeliwaisixaniawaetsibaula pewajënaeya. 8 Itsamatacabi, bajayacunuajawabelia, Moisés icatsia pona carpabojawabelia. Itsa pata itsajota bajaraponaebonë bobena carpabo-ënëta, tane Aarón pijanaebo pebaxujuwanucaejawa, penamatonototanucaejawa, penaweretsi-almendranaecuaitonë perubenaejawa-ata. 9 Nexata, Moisés juta daxita bajarapanaebonë, Jehová pitabarata pejebijawanë, petsitajëtsinexa daxita israelitawijawabelia. Nexata, bajarapamonae petaecujinae, caenë canacujitsia penamatacaitorobinë pitapona pijanaebo.

10 Bajaraxuacujinae, Jehová jumaitsi Moisés-jawabelia:

—Icatsia buare Aarón pijanaebo patacanajumexaniawaetsibaula pewajënaeya. Bajarajota xaniawaere bajaraponaebo, pecuene-itajëtanucaenexa xanë taitapetsijawa bajaraponë, nexata bajarapamonae copabiana pebaracuaicuaijaijawa pibisiacuenia xanë taitabarata. Bajarapacuenia bajarapamonae apotëpae tsane —jai.

11 Moisés nexata exana daxita pacuenia Jehová itorobatsi. 12 Daxita bajaraxuanë petocopiapatsicujinaetsi, israelitawi jumaitsi Moisés-jawabelia:

—Paxanë saya padaxitanë patatëpaewinexa cajena. Ajibi patapanepaecuenenexa. 13 Daxita pamonae cujita Dioso pijacarpabojawabelia, bajarapamonae tëpabiaba. Bajaraxuata, paxanë padaxitanë patatëpaewinexa saya —jai bajarapamonae.